السودان 01:00 AM
المستشفى التعاوني/ قسم التوليد
فتحت عيوني براحة لقيت معاي سراج وعشوش ف الغرفة قلت ليهم ب صوت مرتجف وولدي، قبل اكمل كلامي سراج مسك يدي وقال لي كويس م تشيلي هم انتي كيف؟
سكت ويداب بديت استوعب..
سراج واضح الإرهاق ف عيونو، ناس بيتهم ماف ولا واحد معاهو،، دقيقة!!
قلت ليهو زينب!!!
غمض عيونو مسافة قلت ليهو زينب ماتت كيف يعني !؟
مؤيد !!
مؤيد وين يا سراج وحالتو كيف ،، زينب مش كانت كويسة؟
رد علي انا بتكلم معاك م تسكت تخليني..
فك يدي وطلع من الغرفة عشوش جات مسكتني وقالت لي قضاء وقدر هي في مكان احسن من هنا ومحظوظة ماتت ف الحرم بعد عمرت طوالي ماتت ،، م قدرت انطق ولا حرف دموعي خذلتني وم وقفت بكاء..
جات داخلة د.إيمان قالت لي سمررر بتبالغي لكن الدموع والتوتر م بنفعوك انتي حالتك الصحية ف خطر عارفة!!
جاك نزيف والحمد لله م عمل مضاعفات قدرنا نوقفو بس وضع الجنين غلط ف ح نقيصرك بعد تلاتة أربعة يوم ومضطرين نخليك معانا لحدي يوم العملية بس ابعدي لي عن التووتر قدر الإمكان وف مفاجأة طبعا م ح اقولها ليك الا بعد الولادة شوفيها براك انتي وسراج..
م كنت قادرة استوعب وفاة زينب ،، صدمة كبيرة وهمي كلو ف مؤيد كل م اسأل منو م بجاوبوني وم شفت زول من اهل سراج غير منى جاتني مرتين ف التلاتة يوم القضيتهم ف المستشفى، ماف زول كلمني بالحاصل وبتهربوا مني حتى سراج بجيني صباح ومسا باقي اليوم مشكاة وريل وغصون بكونوا معاي صباحات وكل واحدة بتمشي دوامها، اما عشوش واسينات ببيتو معاي بالتناوب لحدي م اليوم الرابع ودا يوم العملية حتى ظهروا خالتو منال ومها سألت عنهم مؤيد بس م كان ف رد مقنع حتى زينة جاتني بس حالتها كعبة شديد هي وزرابي عزيتهم قعدوا معاي شويتين د.إيمان جات قالت ليهم يخوانا جهزوها للعملية..
كلهم طلعوا وهنا يداب قلبي بقى بضرب شديييد كنت بفتش على سراج بعيوني بس م جا،، سلوان جاتني ساعدت الممرضة جهزتني قاعدة ف الكرسي المتحرك على غرفة العمليات ف الممر بقيت ببكي كلهم قاعدين مي وخالتو زينب،، عشوش وخالتو منال جو مسكو ايدي قالوا لي م تخافي تطلعي بالسلامة ان شاء الله، زينة جات قعدت على رجولها قالت لي اطلعي لينا بالسلامة قلت ليها زينة لو حصلت لي حاجة قاطعتني وقالت لي م بحصل يلا نتلاقى بعد تبقي ماما..
دخلت غرفة العملية زي الداخلة ف النار جهزوني وكنت ح آخد المخدر ولسة بفتش سراج بعيوني فجأة جا داخل شايل ورود لابس للعملية إيمان قالت ليهو ورود هنا؟؟
قال ليها معقمة م تخافي قالت ليهو عطلتنا يا استاذ قال ليها دقيقة خت الورود على جنب جا جمب راسي مسك ايدي وقال ليها ممكن تبدي..
كنت مبسوطة شديد لأن سراج معاي قلت ليهو اتأخرت مالك قال لي الورد اخرني قلت ليهو انا خايفة قال لي انا معاك شد على ايدي قووي وتاني م حسيت ب حاجة..
