- سمر أنا مخنوق ومتضايق ،، متضايق شديد حاسي قلبي ح يطلع من مكانو سابتني ومشت لي واحد تاني علشان القروش ،، سابتني وكسرت قلبي انا الحبيتها وكنت مستعد اعمل كل شي علشانها
* رئبال انت سكران ..!؟
من متين لو زعلان او متضايق بتسكر ..!؟
- سمر م تسيبيني زيها خليك معاي انا محتاج ليك..💔
حالتو كانت بتحنن الكافر دموعي نزلت على كل كلمة بقولها ما عرفت أقول ليهو شنو كل العملتو اني ضميتو علي شديد وقلت ليهو اطمن انا معاك ومستحيل اسيبك ..
حالتو كانت مزرية ومستحيل اقدر اوديهو البيت كدا م عارفة امشي وين في الليل دا ،، قطع تفكيري صوت احمد النسيت وجودو وهو بقول لي:
م ح يقدر يمشي البيت بالطريقة دي خليكم هنا فالمستشفى حجزت ليكم غرفة لازم يصحصح وياخد درب جلكوز علشان يقدر يتوازن اسي خليكم هنا والصباح ارجعو البيت
كأنو قرأ أفكاري م قدرت اناقشو كتير سندنا رئبال ودخلنا بيهو المستشفى قعد ف كرسي حاولت معاهو علشان يرقد فالسرير ابى نهائي قلت لي أحمد شكرا ليك خليهو انا بتصرف معاهو
- طيب انا ح امشي وصيت الممرضة ح تجيب ليكم الحجات الممكن تحتاجوها وان شاء الله ربنا يجبر بخاطرو وخاطرك
* تسلم يا احمد ما ح أنسى جميلك دا طول ما انا عايشة ،، نردها ليك في السمحة
- الواجب في النهاية انتي زي اختي والإنسانية قبل أي شي
بعد طلع قعدت على امشاطي ومسكت يديهو عاينت ف عيونو قلت ليهو رئبال انت كويس ..!؟
كان ببكي لسة قال لي ما كويس ابداً يا سمر أنا ما كويس ،، ضميتو علي شديد بكيت معاهو مسافة بعد هدأ شوية قلت ليهو قوم معاي دخلتو الحمام فتحت الموية في راسو خليتو تحتها ومشيت اشوف دولاب الغرفة فيهو شنو لقيت يونيفورم بيشن شلتو ووديتو ليهو بعد قفلت الموية قلت ليهو البس ديل واطلع منتظراك
طلعت قفلت الباب سمعت صوت باب الغرفة ،، الممرضة جابت لي درب الجلوكوز معاهو وجبة العشاء عبارة عن حليب وكيك اصلا المستشفى بتوزع فطور وغدا وعشاء للمرضى شكرتها وقلت ليها بركبو ليهو انا تسلمي بعد فاتت قفلت باب الغرفة لقيت رئبال راقد ف السرير وبعاين للسقف عرفتو بقى واعي حاولت اغير جو قلت ليهو :
أهو الاكل وصل لازم تاخد الدرب وتشرب الحليب اول شي حنى نتفاهم اوك !؟
ما رد علي قومتو ومديت ليهو الحليب عاين لي قلت ليهو عادي ممكن اشربك ليهو غصب ما بغلبني احسن تشيلو براك شالو مني وانا جهزت الدرب جيت اديهو ليهو لقيتو م شربو كلو بس احسن من لاشي شلت منو باقي الظرف ختيتو ف التلاجة الصغيرة ووصلت ليهو الدرب رجع رقد وانا قعدت جمب راسو قلت ليهو بصوت خافت رئبال..!؟
قال لي عرسوها يا سمر ،، فطومة عرست واحد تاني وكسرت لي قلبي ،، كنت راجع من رحلة دبي شفتها في المطار متحننة ومعاها راجلها ......
