* سمح يا خالتي بنزل واي شي ولو دايرة من بكرة بوعدك بس دايرة اعرف حاجة
- حاجة شنو حابة تعرفي؟!
* قصة امي وابوي ولي امي كانت طالبة الطلاق؟!
- ي بتي دا م وقتو الكلام دا
* لا وقتو لازم اعرف كل حاجة عشان اقدر اتكلم مع الإنسان البقول انو هو ابوي
- لانو هو فعلا ابوك ي سمر وانتي لازم تتكلمي معاهو م ملاحظة انو ليهو اسبوع قاعد وانتي م بتعايني لي ف وشو ساي؟!
* اتكلم اقول ليهو شنو؟ م هاقدر اتكلم الا اعرف الموضوع ،، قاطعني صوتو وهو بقول طيب ح تعرفي كل شي بس بتمنى انك تسامحيني ،،عاينت باتجاهو كان واقف وبعاين لي بي حنية بس سبحان الله ولا شعرة من جسمي م اتهزت لاني خلاص وصلت الحد واكتر حاجة بحبها خسرتها تاني م خايفة اخسر ولا شي ،، قرب وقعد جمبي خالتي قالت ليو بسسس ... قاطعها قال ليها بعدا خليها تعرف ،، بعاين ليهو بنظرات احكي سامعاك بدا يحكي لي من وقت لاقى امي اللهي بت عمتو يعني هو طلع ود خال امي وحيد امو وابوهو اتوفى وهو صغير كان بحب امي شديد بس امو ما كانت بتحبها عشان ما ولدت في الاول ...
( القصة سبق وحكيتها )
- بس يا بتي صدقيني كنت مجبور اعمل كدا امي قالت لي لو م عرست ما عافية ليك قررت ارضي امي علي وفي نفس الوقت علاقتنا م تكون معروفة بس دا كل الحاصل بتمنى تسامحيني 😔
* يعني غشيت امي وخنتها في نفس الوقت؟! انت ما انسان صدقني لانو ماف انسان بعمل الشي العملتو انت ،، عارف انك كسرتنا جدعتنا بالسنين؟ طيب عارف امي عانت كيف؟ يوم بالغلط ساي اتصلت وقلت ليها انتي كيف؟ عارفها مرضت كيف؟ ودايرني اسامحك هه عارف ح اسامحك متين؟! لمن تعتذر من امي وهي تسامحك بعديها انا هسامحك💔
قمت منهم وكنت مكسورة شديد شلت توب امي حضنتو وبقيت ببكي ،، بكيت لاني م قدرت اواسي امي في مصيبتها ،، بكيت لانها كانت بتعاني براها طول المدة دي ،، بكيت للخذلان الاتعرضنا ليهو ،، بكيت وانكسرت بس بعدين قمت وقررت ابقى اقوى قررت اقوم واواصل حلم امي الكان نفسها فيو قررت م انكسر لأي كان قررت م أتخلى عن حلمي قررت حجات كتيرة واولها اني ح اسامح ابوي بس علشان خاطر امي لانها وصتني قبل تموت وانا لازم اعمل بوصيتها ،، عارفة انو جوابي ليهو كان معناهو اني مستحيل اسامحك بس ح اتراجع علشان خاطر امي لكن من جواي م قادرة اتجاوز ...
عدت الايام وهو رجع لي اسرتو وانا خلصت امتحانات وبديت في تجهيزات تامن وكدا وحياتنا بدت ترجع زي اول انتو عارفين اني اتعلمت انو كل حاجة بتتولد صغيرة وبتكبر الا الحزن بيتولد كبير وبيصغر مع مرور الزمن صاح انو الحزن بقى صغير ويمكن اتلاشى بس امي ما اتلاشت من جواي هي لسة عايشة جواي وفي كل خطوة بتزكرها🖤.
_____
مطار الدوحة ،، صالة المغادرة ،، كانت الأيادي تلوح قاصدة الوداع تم تبادل القبل عبر الهواء كانت اعين الام تدمع وتقول في قلبها "ربنا يغطيكم ويوفقكم يا اولادي" تلاشا الولدان عن الأنظار احتضن الأب ابنتاه وزوجته وعاد بهن إلى المنزل .
في الطائرة كانا يجلسا على المقاعد التي تطل عبر النافذة يرتديا نفس الزي بنطال جينز وقميص باللون الاسود يتشابها تماما الا ان احدهما يرتدي نظارة هاري بوتر ويمسك بكتاب "قوة التحكم في الذات"
