ثم ماذا

40

الامارات6:00 AM

وصلنا الإمارات وانا كنت نعسانة ومرهقة شديد أول حاجة عملتها مما وصلنا الشقة رقدت ف أقرب غرفة لاقتني ونمت ،، صحيت على صوت غصون بتقول لي قالوا ليك قومي المغرب قرب وانتي نايمة للان وبعدين إياد مع صحبو برا قومي ساعدي ماما علشان كلنا جعانين ومنتظرين حضرتك تصحي😒

قمت اخدت دش سريع ولبست لي قميص طوييل زي نوع البجو بي طرحهم ديل وطلعت لقيت عشوش جهزت الأكل بترص فيهو رصيتو معاها وبعدها عشوش قالت لي غصون نادي إياد من الصالون مع صحبو مشيت المطبخ ختيت موية الشاي في النار وطلعت لقيتهم قاعدين وبدو ياكلو قلت السلام عليكم مروان قال لي عليكم السلام قلت ليهو كيفك ان شاء الله كويس قال لي الحمد لله ،، على كدا قعدت معاهم كنت جعانة شديد بس م قدرت آكل قدامو وهو مندمج مع عشوش وإياد ف الونسة بعديها قمت شربت موية وعايزة أدخل المطبخ عشوش قالت لي دا اكل شنو يا بت تعالي كملي أكلك قلت ليها شبعت الحمد لله دخلت المطبخ عملت سيرمس شاي وسيرمس قهوة فتحت التلاجة كان ف كيس فيهو كب كيك ختيتو ف صينية يداب انتبهت للشقة ما شاء الله رهييبة لمن بهناك ومفروشة جاهزة ،، كملو اكلهم شربنا الشاي والقهوة الموضوع جرا لحدي العشاء بعديها استأذن وطلع..

إياد جا راجع قال لي عاملة فيك بتخجلي يعني شوف البت كمان قلت ليهو انننن يا ثقيل😒 قال لي عارفك علشان كدا جبت ليك معاي شاورما قاعدة ف المايكرويف قلت ليهو م جادي واااي💃

جريت شلتها والثلاجة كان ف بيبسي شلتو دخلت الغرفة اكلت وشربت بعديها شلت تلفوني م فيهو اي موضوع طلعت الهول لقيتهم بحنسو ف إياد يفسحهم قال ليهم طيب ارح قلت ليهو وانا؟! قال لي ما شافعة زيهم ارح اطلعوا أما عشوش قالت نعسانة ح تنوم انا مشيت ب شكلي زاتو 😹

غصون ركبت قدام ورا ركبت معاي مشكاة الشوارع كانت فظيييعة وتقريبا عندهم يداب الناس بتطلع مشينا محل آيس كريم بس ابيت انزل من العربية لأني لابسة هدوم بيت والبنات فظييعات قاطعاااات كل واحدة احلى من التانية ولا العبايات يحردوها ليهم احييييي بس نزلوا هم وجابو لي معاهم بعديها لفينا مسافة ورجعنا قريب الساعة اتنين صباحا م كنت نعسانة ف قلت لي إياد عايزة تلفونو أدخل الفيس قال لي جيبي تلفونك يا غبية هنا في واي فاي فتح لي الباسورد واداني دخل غرفتو نام ..

يلا الشقة كالآتي فيها تلاتة غرف إياد ف واحدة على شكل صالون وأنا مع مشكاة ف غرفة وغصون مع عشوش فتحت الشبكة كمية رسايل من قروب الدفعة بطني طمت لمن شفت الجدول حق السنة الخامسة يعع وكمان فاتحين نفسهم فينا للآخر ..

رسلت ريكورد لي مؤيد كان اون لاين قلت ليهو شنوو يااا شايف الجدول عامل كيف السنة دي طبعا هنا فايتكك جوو عجييب وعايزاك تمشي تجيب لي معدلي نتايج البدائل شايفاها طلعت كلمني ضروري ياخ زهجج زهجج مبالغة
طوالي اتصل علي كان ف جوطة جمبو قلت ليهو ف شنو قال لي مجاهد جا امس عاملين كرامة وخطوبة أيمن من زينة برضو الليلة كلو مع بعض والبيت مليان وكدا قلت ليهو يااخي مبرووك ليهم وعقبالكم انت وزيينب قال لي آميين 🖤