بعد تلاتة شهور ..
عدت تلاتة شهور من وفاة خالتو أمل وانا لسة م رجعت منهم البيت كان فاضي انا واخواني بس عدا ريلان اللي ح تطلع من المصح النفسي الليلة بعد اتجاوزت مرحلة الصدمة ،، عشوش كانت بتجينا من فترة للتانية وإياد رجع الإمارات بعد قعد معانا شهر وابوي سافر برضو بعد الأربعين طوالي ..
البيت كان كئيب شديد رئال ورئبال رجعوا دواماتهم ريل نزلت تالت هي ومشكاة وانا نزلت الجامعة لكن شايلة اربعة بدائل امتحنت تلاتة والليلة آخر واحد ..
الجبيرة طلعوها لي والكدمات اختفت بقيت كويسة شديد والليلة بعد طلعت من الامتحان مؤيد كان منتظرني مشيت ليهو قال لي اها امتحنتي كيف قلت ليهو ما عارفة يا مؤيد بس الحمد لله ربنا يعدي قال لي م مشكلة ح تهون م تشيلي هم يلا الليلة عازمك
- مؤيد والله م عندي نفس لي اي شي
* م عارف لي بقيتي كدا انا لي شهور بحاول اطلعك من الجو دا بس انتي م مدياني فرصة ف لو حابة اني اخليك عادي م بضايقك تاني
اتلفت مني وكان ح يمشي قلت ليهو والدموع في عيوني
- يعني انت كمان ح تخليني !؟
* مش انتي عايزة كدا !؟
بقيت ببكي عاين يمين وشمال قال لي يا هبلة بتبكي لي!؟
- انت ح تسيبني برضو وعارف م عندي غيرك 💔
* عويرة انتي ولا حاجة !؟
انا كنت بحاول اصحيك من الحالة المدخلة نفسك فيها بس م ح اسيبك انا لصقة بتعرفي اللصقة بس ح اكون لصقة ف حياتك حتى لو عرستي يلا قشقشي دموعك دي اصلك قاعدة على الهبشة وارح خلينا ننحشي جعاااااان
صراحة مؤيد خلاني أوعى على نفسي وأحاول اطلع من الجو دا خلاني أوعى على حجات كتيرة مشيت معاهو بعد فطرنا قلت ليهو ح أجاوبك على السؤال
- بس انتي م مجبورة يا سمر وانا اتفهمت حتة زي دي
* ابوي الضربني..💔
اتخيل ابوي ضربني لمن شافنا سوا يوم خالد اتوفى داك شكك فيني متخيل شعوري ح يكون كيف !؟
- طيب لي م حاولتي تكلميهو بالحقيقة
* مستحيل يا مؤيد ،، الحاجة الانت م عارفها اني م كنت بتو في يوم ولا امي كانت مرتو ،، ف نظروا نحن كنا ولا شي انا عمري كلو م شفتو ولا بعرفو ووقت جاني كان عمري ١٢ سنة بعد امي ماتت جاني وبكل بساطة قال لي أنا أبوك وسامحيني وكلام م كان عندو معنى بالنسبة لي ..
ما كان عندي كلام اقولو ليهو ف بتذكر اني قلت ليهو
" عارف ح اسامحك متين !؟ بعد امي ترجع وتسامحك ساعتها بس ح اسامحك "
بعد الجملة دي م قعد معانا كتير لملم باقي شتاتو ورجع ومن وقتها علاقتي معاهو كعبة شديد وانا للان م نسيت ولا ح أنسى العملو فينا وب عمليتو الأخيرة دي قفلها معاي مرة واحدة
