[Book-1]novelထဲဝင်သွားပြီးနောက် အသဲခွဲသမားဖြစ်လာခဲ့သောသူမ

26[U&Z]

"မင်း အဲ့တာတွေကို စားချင်လား" အရသာရှိနိုင်သည့် ဟင်းပွဲတွေကို ညွှန်ပြရင်း ဟော်ပေ့ချန် မေးလိုက်သည်။

နင်မုန့် ခေါင်းငြိမ့်ပြလိုက်လေ၏။

"အဲ့တာတွေကို မင်းစားလို့ရတယ်။ ငါဒီဟာကို လိုချင်တယ် လဲစားမယ်"

နင်မုန့် မျက်လုံးသည် အံ့ဩမှုကြောင့် ပြူးကျယ်သွားသည်။ အရသာရှိလှတဲ့ ဟင်းပွဲတွေနဲ့ သူမရဲ့ ရိုးရှင်းလှတဲ့ ဟင်းပွဲကို လဲစားချင်နေတဲ့ ဒီလူတော့ တခုခုမှားနေတာ ဖြစ်ရမည်။ နင်မုန့် လက်ခံဖို့ ပြောလိုက်ချင်ပေမယ့် သူမကို ကူညီဖို့ ငြင်းလိုက်သည့် ဟော်ပေ့ချန်အပြုအမူကို ပြန်တွေးမိသွားသည်။

"အမ်း....ရုတ်တရက်ကြီး ကျွန်မ ဒီဟာတွေအကုန် မစားချင်တော့ဘူး" အတုအယောင် ချောင်းဆိုပြလိုက်ပြီး နင်မုန့်ပြောလိုက်သည်။

"..."

ဟော်ပေ့ချန်ကတော့ စကားတစ်ခွန်းတောင် မဆိုဘဲ သူမကိုသာ စိုက်ကြည့်နေလေ၏။ သူ့ပုံစံက အတွေးနက်နေပုံပင်။ ခေါက်ဆွဲအားလုံးကို သူမ ပါးစပ်ထဲ ထည့်ရန် ဟန်ဆောင်လိုက်စဉ်မှာပဲ သူ့ဆီက စကားသံကို ကြားလိုက်ရ၏။

"အသံသွင်းစတူဒီယိုကို မနက်ဖြန် မင်းသုံးဖို့အတွက် စီစဉ်ပေးထားမယ်"

သူ့စကားဆုံးသည်နှင့် တပြိင်နက် နင်မုန့်က သူမလက်ထဲမှ ခေါက်ဆွဲပန်းကန်လုံးကို သူ့ဆီသို့ လွှဲပေးလိုက်ပြီး ဘဲသားစွပ်ပြုပ်ကို စသောက်လေတော့၏။ လျှာဖျားပေါ် ရောက်လာသောအရသာက သန့်ရှင်းပြီး လန်းဆန်းသော ခံစားချက်ကို ကျန်နေစေ၏။

စွပ်ပြုပ်က ကောင်းလွန်းတာမို့ နိုင်ငံတကာအဆင့်တန်း၀င် စားဖိုမှုးတစ်ယောက် ချက်သည်ဆိုတာ နင်မုန့် ထင်လိုက်သည်။

"ယောက်ျား ခေါက်ဆွဲထပ်လိုသေးလား။ ရှင်တကယ်လို့ ထပ်စားချင်ရင် ထပ်ချက်ပေးလို့ရတယ်နော်"

"..."

နင်မုန့် စားနေချိန်တွင် ဟော်ပေ့ချန်ကတော့ သူမနှင့်အဝေးဆုံးနေရာတွင် ထိုင်ပြီး ခေါက်ဆွဲပန်းကန်လုံးကို ကိုင်ထားလေသည်။ ထိုပုံစံက ခေါက်ဆွဲကို အမှန်တကယ်ကြိုက်နှစ်သက်သည့်ပုံ ပေါ်နေစေလေ၏။