قسوة ثم حنين 2 ( كاملة )

اقتباس 2 نوڤيلا الخاتمة (بدر باشا وعياله😎)

بحث عنه بالمنزل وهو ينادي باسمه تكراراً حتي وجده جالس علي الأريكة بشرود بغرفة أخيه الصغير ، تنهد بدر ثم أقترب منه يجلس علي يمينه ثم وضع يده علي كتفه متسائلاً باستغراب :_ مالك فيه ايه !؟
نظر إليه بشرودٍ ثم عاد لينظر بالفراغ بصمتٍ أطال حتي هتف أخيراً بخفوت :_ بدر..هو البشر قلوبهم قاسية كده ليه !.
رمقه بدر بعدم فهم ليتابع هو بعينين مهتزة دامعة ومندهشة لا يزال يتذكر ما حدث بين الطلاب صباحاً:_ ليه في منهم..مبيحسش بالتاني..مع إنه زيه ميختلفش عنه..من روح واحدة وطين واحدة...ربنا خلقه زي ما خلقه وميز كل واحد فيهم بشكله ولونه..ليه بيعايروا بعض بحاجة مش بإيديهم !؟..ليه بيذلوهم بشكلهم لمجرد إنه فيه اختلاف بينهم وبينه !..ليه يتريقوا علي لونه ، شعره ، جسمه ، حالته..والمصيبة انهم بيضحكوا !..فاكرينها خفة دم وهي جريمة قتل..بتقتل مشاعرهم وتدمر نفوسهم وتهدم ثقتهم في نفسهم ..ليه الواحد يبقي خايف يمشي وسط الناس عشان ميسمعش الكلام الجارح له ! ،او يشوف نظراتهم اللي بتحسسه انه مختلف عنهم مش انسان !!!
اختنق صوته بغصةَ مؤلمة لكنه تابع :_ ليه يتسببوا بوجعهم ومش بيحسوا بمشاعرهم او يراعوها ! ، ليه ميزودوش ثقتهم في نفسهم ويحكوا عن جمالهم؟!! ، ليه ميفكروش ان اللي قدر يخلقهم بعيب خلقي كده كان قادر إنه يخلقهم زيهم بس هو ميز كل واحد عن التاني..ليه قلوبهم قاسية كده !؟
نظر له بدر ببسمة حنونة متعجبة ..لم يكن متوقع أن ابنه يمتلك قلبٌ برئ نقي كهذا ! ، كم حمدَ ربه بهذه اللحظة إنه هكذا ذو قلبٍ رحيم يشعر بالغير ويتأثر لما يحدث معهم وليس كمثل من يحكي عنهم هؤلاء لا يبالوا لأي شئ او أحد سوا انفسهم..
اتكئ بمرفقيه علي ركبتيه مثله متنهداً ببسمة هادئة :_ بسم الله الرحمن الرحيم { يَا أَيُّهَا الَّذِينَ آمَنُوا لَا يَسْخَرْ قَوْمٌ مِّن قَوْمٍ عَسَىٰ أَن يَكُونُوا خَيْرًا مِّنْهُمْ وَلَا نِسَاءٌ مِّن نِّسَاءٍ عَسَىٰ أَن يَكُنَّ خَيْرًا مِّنْهُنَّ ۖ وَلَا تَلْمِزُوا أَنفُسَكُمْ وَلَا تَنَابَزُوا بِالْأَلْقَابِ ۖ بِئْسَ الِاسْمُ الْفُسُوقُ بَعْدَ الْإِيمَانِ ۚ وَمَن لَّمْ يَتُبْ فَأُولَٰئِكَ هُمُ الظَّالِمُونَ}
عارف لو فهموا معني الآية دي عُمرهم ما هيفكروا يتريقوا علي حد مهما كان ايه...هما فاكرين ان الهزار حلو وبيضحكوا مع بعض ووسط الكلام  بص دي عاملة ازاى...شوف دي شعرها ايه..ايه ده وشه عامل كده ليه وملخبط ماويروح يشوف نفسه في المراية بدل ما يخرج ويرعب الناس ده ، طب بص لبسه قديم ازاى ..اوف شوف دي لابسة واسع اوي ومغطيها ازاي..يالهوي دي مش حاطة ميكاب دي شكلها وحش اوي ، ودي بتضحك دايما ليه دي وبتظهر سنانها وده مش عارف اي ودي اي..
ضحك وسط دمعاته علي والده وهو يفعل تلك الحركات ويُقلد هؤلاء الناس واصواتهم ثم ابتسم بسخرية وتابع :_ ميسبوش حد في حاله ابداً..هزار جد جهر سر حتي لو نايم بيفكر ويتريق من جواه مع ان التريقة بتحصل عليهم اصلا كمان من ضهرهم..محدش فهمهم او وعاهن علي ان اللي بيعملوه ده جريمة وحساب التنمر ده بشع عند ربنا...ميعرفوش أن بسخريتهم علي حد دي هي في الحقيقة بيسخروا من ربنا سبحانه وتعالي اللي صنع وأبدع وخلق وصّور ، بس طبعا احنا مش هنتخانق معاهم ولا حتي ننصحهم لأنهم ممكن مياخدوش ان دي نصيحة اصلا وده عامل شيخ وبتاع وهيزيدوا في الموضوع...احنا ندعي بس إن ربنا يهديهم.
كاد أن يتحدث ويعترض لكن رفع بدر اصبعه بتحذير وأكمل :_ ندعي ليهم مش عليهم وندعي بقلب جامد كمان ، يبعت حد يفهمهم الغلط كده او يوريهم بشاعة كلامهم عشان يوقفهم المهم اننا ندعي إنه يهديهم وبس..
ثم ابتسم مجدداً مردفا :_ وبعدين ربنا ده رحيم اوي..مخلقش النفوس والتفكير زي بعض..وزي ما خلق اللي بيتنمر ويسخر ده..خلق زيك أنت وناس كتير قلوبهم رحيمة وبتحس بمشاعر غيرها حتي لو متعرفهاش..بيزعلوا لزعلهم ويتضايقوا كأنهم هما المهزوءين..قلوبهم جميلة كده تتحب وكلامهم للغير أجمل من الورد...الله شوف دي جميلة ازاى ..ما شاء الله ربنا يحفظك..ضحكتك حلوة ربنا يديمها...شوف كلام كده عسل رغم إنه صغير بس بيعمل فرق كبير في نفسية المستمع لما يفتكرها وينام فرحان بسببها..
ربت علي كتف ولده ببسمة ممازحاً بخفة  _ متزعلش نفسك وادعي للي اتنمر عليهم دول ربنا يجبر بخاطرهم وقلوبهم...اضحك بقا بدل التكشيرة اللي شبه عمك سليم وهو بيبتسم دي.
ضحك بشدة وهو يمسح دمعاته وشاركه بدرالضحك وهو يحيط عنقه بساعِده مقترباً منه :_ يخربيت رقة قلبك دي.عارف يالا ده أنا هخلي اللي هتتجوزك دي تدفع مهر عشرين مليون جنيه.
مازال يضحك وأشار علي نفسه :_ المفروض أنا اللي ادفع.
هزه بدر بساعِده بغيظٍ :_ ليه يعني انت تدفع وهي تاخد الوسامة دي ببلاش ! ، لا يا عم ده مش في قانوني ده انا تعبان فيك تسع شهور.
رفع حاجبه ليصحح بدر سريعا :_ أقصد يعني أمك تعبت فيك تسع شهور وانا تعبت عشرين سنة تربية..
خرجت ضحكاته مجدداً وهو يهتف:_ عارف يا بدر أحلي حاجة بحبها فيك ايه بعيدا عن عصبيتك المجنونة دي.
نفض بدر خصلاته بغرور :_ ايه ؟.
أجابه مبتسماً ببلاهة :_إنك قادر تخرجني من أسوأ حالة من الحزن ، بتفصلني ضحك بدرجة فظيعة ، ده ايه يا ربي الأب العسل ده ..أبويا عسل.
انهي كلماته وهو يلثم وجنته ليرفع بدر حاجبه بجمود :_ لا والله ؟ ، طب طالما أنا عسل يا سكر انت مسمعتنيش كلمة بابا ليه من لما اتولدت  !؟ ليييييه يا ظالم عايز اسمعها.
انتفض متراجعا للخلف اثر صرخته المغتاظة ليرمقه بسخرية متهكما :_ ده عند امك يا ادهم..
جذبه بدر بغتة من عنقه فهتف الأخر سريعاً :_ اهدي يا حاج ما انت عارف اني عندي حساسية منها ، طب استني استني هقولك حاجة..بحبك.
نظر له بدر مبتسما بإتساع ومشاكسة :_والله وأنا كمان.
ضحكا معاً ثم عانقه بقوة ليستمع بدر إليه وهو يهمس بامتنان :_ شكرا يا بدر.
ابتسم بدر وربت علي ظهره ثم ابتعد عنه غامزاً بعينيه حين التقطت أذنيه أصواتاً بالشرفة :_ اقوم اشوف أخوك اللي هيفضحنا في العمارة بمعاكساته دي.
وقف يتجه إلي اليمين حيث شرفة الغرفة وقبل ان يدخل توقف بصدمةَ وأبطأ خطواته للداخل وهو يلوي فمه يميناًويساراً حتي وقف خلف هذا الصغير الذي يغمض عينيه بهيام ويمسك يدى فتاة بنفس عمره وحالتها لا تختلف عن حالته فكنا كعاشقان مُتيمان ليستمع بدر بدهشة تزداد إلي كلمات سوما العاشق هذا :_ يا قمر متدارى خلف البيبان..يا وردة مزروعة بين البنتجان...أُحُبكِ وسأظل أُحُبكِ حتي تُهدم البيوت والأركان...يا مليكتي السمراء يا أم العيون السود..أُحُبكِ للنهاية حتي إن كنت سأموت...يا شقراء..يا كحلاء..يا فيحاء.
يا جوز اللوز وال...
قطعه غزله صوت والده من خلفه مرددا بزهول :_ جوز اللوز !!.
فتح عينيه عاقداً جبينه بغيظٍ لمن قطع لحظته الرومانسية فالتفت إلي والده ساخراً بينما ركضت الفتاة للداخل بخجلٍ :_ يعني أنت عديت كل الشِعر ده ومسكت في جوز اللوز عادي !؟
ابتلع بدر لعابه ومازال في صدمته مردفا:_ معلش يا فندم أعذرني أنا أعرف جوز الهند بس لكن جوز اللوز ده مسمعتش عنه..
ضرب الأرض بقدمه متأفف بغيظٍ حين رحلت الفتاة التي عشقها منذ دقائق وعاش معها قصة حب فظيعةٌ لكنها تدمرت الآن بسبب والده:_ حرام عليك يا بدر دمرتلي اللحظة عاجبك كده اهي راحت..
رفع بدر حاجبه الأيسر متعجباً :_ معلش سؤال بس ، اللي كنت واقف معاها امبارح كانت بشرتها بيضة ودي بشرتها سوداء !! هو ايه كله تغيير مفيش ثبات !؟.
استند بظهره علي سور الشرفة رافعاً رأسه إلي والده زافرا بملل :_ امبارح كانت ملك ودي نقلت امبارح بالليل من العمارة وجه بدالها لوزة وعائلتها ، واللي عرفته من لوزة ان ليها بنات عمها وخالتها هيعيشوا معاهم هنا وهتعرفني عليهم.يعني الحقيقة لسه مش عارف هثبت علي مين وخصوصاً إني عرفت إن فيه جيران جديدة هتسكن في العمارة اللي قدامنا دي ومعاهم
بنت في نفس سني...ف للأسف الموضوع معقد شوية.
هز بدر رأسه متهكما :_ ربنا يفك عقدتك يابني..
ثم تحمحم وأثني ركبته يفك رباط حذاءه مردفا ببسمة جعلت الصغير يتراجع بحذر وخوفٍ وهو يراقب حركته :_ قولي ياحبيبي هو جواب استدعاء ولي الأمر اللي علي السفرة ده بتاعك!؟.
ابتلع الصغير ريقه بتوترٍ :_ اااههه اه طبعا بتاعي بيستدعوك عشان حفلة تكريم الأوائل وأنا في المقدمة طبعا يعني..
خلع بدر حذائه ببسمته المتوعدة ويتقدم نحوه ببطئ أرعبه :_ بقا بتعاكس بنت المدير يا حيوان وتضرب خمس ولاد عشان بس هما معاها في المسابقة وأنت لا..هاه؟
صرخ الصغير وقفز كالقرد إلي خارج الشرفة بينما التفت بدر بغضب ولحق به صارخاً :_ شوهت سمعتي يا حيوااان..خد يالاااااا..
....
لمحة صغيرة عن حياة البدر مع أشباله المجنون العاقل والصغير المنحرف😂😎👏
الاسماء لسه مش متفقة عليها الصراحة بس ان شاء الله اللي اختارتهم يعجبوكم ❤ ، حرفيا متحمسة اوي للنوڤيلا دي خاطفة قلبي من اول ما فكرت فيها اتمني انها تنال اعجابكم وتكون خفيفة علي قلوبكم💙💙💙
اما عن الرواية ف انا قررت ان بإذن الله بعد صلاة التراويح هينز بارت بس كل اسبوع ، يعني الاسبوع هينزل فيه بارتين او بالتالت صغير اللي ربنا يقدرني عليه ان شاء الله وشكرا اوى علي دعمكم وكلامكم الحلو ربنا يحفظكم جميعاً ويجمعنا كل سنة مع بعض يارب😍❤❤
والنوڤيلا دي هتنزل بعد ما قسوة تخلص نهائياً وهي هتبقي الخاتمة ليها فرفشة وخفيفة وضحك لا فيها نكد ولا حزن عشان الابطال تعبوا الصراحة😂😊 رأيكم في الاقتباس وياتري علاقة بدر مع أولاده هتبقي عاملة ازاي مع الكبير والصغي ؟😍😍😍 منتظرة رأيكم..
...
بفكر ان الكبير = يزن ، الصغير لسه مش عارفة اقترحولي اسماء😂😂