ضاد و عين

١٠

ضـاد و عــيـن
💯
•••• ••••

هذا الليل هنالك من يسير متهادىء الخطوات على ارضيه بيت بارده .. يتفقد اركانه .. يلملم بعض الحاجيات .. يطفىء ما يقابله من  الإناره ..

يستوقفه صوت المناجاة الفيروزيه  في تلك العليه .. فينصت لكلمات يترآى له ما فيها من صور  ..
" كنا نتلاقى من عشيه ..
نئعد على الجسر العتيئ ..
وتنزل على السهل الضبابه ..
تمحي الندى وتمحي الطريئ ..
ماحدا بيعرف بمطرحنا ..
غير الندى .. ورق تشرين ..
و يئلي بحبك انا بحبك
ويهرب فينا الغيم الحزين "

وعندما يتصاعد اللحن بنحيب الحنين المتراكم ..
" يا سنيني الي رحتي ارجعيلي ..
ارجعيلي شي مره ارجعيلي ..
وانسيني ع باب الطفوله .. تا اركض بشمس الطرقات 
ورديلي ضحكاتي الي راحو .. الي بعدا بزوايا الساحات     " 

تتسارع خطواته على الدرجات البارده  .. ليقف في تلك العليه محاطاً بفيروز .. شكلاً وصوتاً و روحاً متهاويه  بحراره الالحان  ..

تلتمس يده البارده هذا الكتف المثقل بالحرمان .. ليكن الكلام هنا بمواساة مدرك انها لاتنفع  ...
- الله يهونها ويتغير الحال .. تعال  نام ارتاح كافي تهلك روحك 

فيأتي  الرد صامتاً ..
هنا يجلس شخص فقد لذه الكلمات .. يحتضنه شخص يسعى دوماً  لبث الاطمئنان في روحه ..

من هذه العليه ستفتح نافذه ( الاخويه ) لتتالى الاحداث من منظور أوضح ..

تودعنا هنا فيروز بانخفاض صوتها الملائكي في تلك الالحان ..
ليرافقنا بعد الان  صوت .. ( رسلان ) ..


- عمر الدنيا نصيب ياعيني .. مو كلشي تكدر تخلي نصيبك .. هي ارزاق ويقسمها ربك .. حرام الي تسوي بنفسك وبينا ارضى بقسمه الله .. ربك مايظلم بشر ارضى بقسمته


نفس السكوت ..يطول والعيون جافه من السهر بنفس ذبولها ..

وخرت منه وهو كال بنبره حازمه  ..

- رسلان .. لا تعاديني

- يا عداوه عيني ياعدااوه !

رفع ايده يأشرلي اسكت وكال ..
- لا تعاديني بيها .. هي نصيبي وقسمتي .. اوزني كلامج من تحاجيني عليها لو لتحجين بعد  احسن

سكتت وبقيت متندمه , حجايتي اعرفها غلط وتحز بخاطره بس اريدله الراحه وادري من عدها ماكو بس التعب ..

ردت انزل وكلبي مانطاني اعوفه .. رجعتله دنكت بوست راسه وكلتله ..

- تجي افركلك ركبتك وراسك بزيت زيتون ؟

اني حاطه وجهي يم اذانه وهو ميل وجهه عليه وصار خده على خدي .. كال ..
- مابيه انزل جيبي هنا

بوسته بشعره ونزلت اخذت شويه زيت زيتون وصعدتله .. لزمت ايده وكومته .. راح تمدد بفراشه الصاير يم الحايط الي معلك عليه لوحه فيروز ..
صرت على كعدته افركله ركبته وفروه راسه ادلكها وجوانب كصته ..

خليته ينام وبقيت متمدده بصفه وافركله كصته من بين عيونه وفوك ..
كلتله ..

- مصطفى ما وصل لحد هسه ؟ شو تلفونه طافي بعده

- لا وصل بس خطه ميشتغل بسوريا , راسلني ع النت كال وصلت من المغرب

- أي الحمدلله , ان شاء الله يرجعون بالسلامه

فتح عيونه وشاورني ..
- قنعي سعده تروح لاهلها .. هاي متتحملهم هنا وامج متكعد راحه تخليني ابتلي بيها
- لا عفيه انته حاجيها , أني الكلمه مني تسويها سالفه شكبرها  انته رجلها حاجيها وتفاهمو



جر نفس قوي وغطى عيونه .. نزلت وعفته ينام ..

بقى بالي يم مصطفى مارتاح اذا ماحاجيه بنفسي .. 

اخذت فراشي مديته  يم ميز المرايه ونمت بالكاع .. مكاني وفراشي الدافي وافكاري همه كلشي املكه بهذا عمري ..

ماكدرت انام واني افكر بحجي مصطفى .. الي كاله قبل ميودعني ويروح ..

" وكع عمود خيمتنا دندن .. حبيبتنا زعلت ما ضل بينا وتد يفيد .. املي بجلال .. اني انكسرت بعتابها نمردت روحي "


دمعت عيني حسره على عمرهم المحروك ..
اخوتي ضالين  جمره بنص صدري .. مايطفيها بس هذيج ضحكتهم  ..

كضيت الليل اتكلب بفراشي لحد ما غفيت .. كعدني صوت المنبه .. الصبح ساعه سبعه الا ربع ..

اغسل والبس بجامه خفيفه وادخل المطبخ ..
احضر ريوك ابويه ... ياكل ويطلع .. ابقى انظف واحضر ريوك للبقيه .. وافكر للغدا ..

هذا المطبخ ونستي هنا .. بيتي هو هذني المطبخين , مجمدتي احب كل نهايه يوم ارتبها واشوف شبقى عندي وشنو احتاج ..
المخزن .. احب كل صبحيه امر عليه امسحه وكل سطل بي انظفه من التراب وارتب كل شي من الأكثر استخدام للاقل .. اخليهن جوه ايدي ..

الكاونتر وره العشى اعزله حتى كل ماعون يرجع ويه مجموعته ..
كلشي انشفه بخاولي ناعم يلا اخلي بالكاونتر ..
اضوج اشوف اثر قطره المي طابع على الكلاص او الخاشوكه .. انتظرهن ينشفن يلا اعزلهن ..

ثلاجتي هاي مداريتها .. تنظيف واني امشي امسح يدتها وجوانبها .. ومااخلي بيها اكل مكشف ويسوي ريحه كلشي بحافظته
وارتبهن بالسره ..

عندي دفتر صغير معلكته بجانب الثلاجه .. أوراقه تصير من فوك مشكله بسيم .. اكتب بي كل شي خلصناه وشنو نحتاج اذا عدنا خطار او شي جديد بالاكل .. انطي الورقه لابويه الصبح كل يوم من يخلص ريوك وهو يدزهن الظهر ويه العامل ..


اعتني بكل تفصيل بالمطبخ .. ابالغ بتنظيفه والطبخ والترتيب .. بس لاني هنا احس نفسي داعيش يوم جديد .. عندي شي اسويه .. فد شغله تطلب مني احرك نفسي علمودها .. حتى ماحس الأيام دتمشي واني مادري اليوم هذا من راح شنو مر عليه بي .. إحساس الفراغ اكرهه .. يخليني ممرتاحه واتكاب .. بمثل هذا عمري .. ادنى التفاصيل ممكن تفيد وتصير سبب واحد يعيش بي ..

اني خلصت الدراسه .. اخذت شهاده التمريض .. اشتغلت ممرضه لفتره طويله .. جربت الدراسه والوظيفه خلص بعد ماكو شي اسوي بس اهتمامات البيت والاهل ..

عالمي صغير ..محدود على اخوتي واهلي والمطبخ .. ماعندي اختلاط بالناس ولا بالبنات سواء من أقارب او منطقه .. نهائيا ماعندي صديقه الا الي عرفتهن بدراستي وراحن ..
ايامي تدور بنفس الدائره .. واحمد الله عليها لانها صارت هادئه ..


يوم ثاني مر عليه وماسمعت بي صوت مصطفى .. يلزمني الخوف من مااحاجيه .. يذكرني غيابه هذا بايام السجن ومرارها .. جرعت الف مر يلا رجعت سمعت صوتهم .. هسه لو يغيبون ساعات أخاف عليهم وتضل الدمعه بعيني  يحاجوني واطمئن بخير ماعليهم مصيبه يلا ارتاح ..

بهذني اليومين رعد يمنا مقيم ... هو وعمر يحسبون الساعات لرجعتهم .. عايفين الشغل والعشاير وكلشي موكفيه لحد ما يرجعون مصطفى وجلال..
شور جلال وتصرفه هو الي راح يمشون بي ..

خبر رجعة جلال .. سوى لامي انهيار أعصاب .. هي تكره جلال ضعفين من كرهها لمصطفى .. من سمعت بي راح يرجع صيحت وعيطت لماا ملت .. خلت ابويه يحاجي الولد ويهدد بس .. قرارهم انتهى أي نقاش بعد ماكو ..
امي هسه كاعده بغرفتها وتون من راسها وتشتم على الولد بعلو صوتها ..
همه يسمعون ويغلسون ..
كله لان راح يرجع ... جلال .


صبحنا يوم الثالث .. عمر لكيته كاعد بالمطبخ يشرب جاي ..
ردت اسويله ريوك ماقبل .. شفت حاله مو زين ويهز رجله هواي .. يشرب بالكلاص وميدري بي هو مخلص ..ممركز بشي .. كلتله ..

- وضعك مو طبيعي شبيك يروحي ؟

اشر باصبعه على كلبه وكال ..
- اكو شي صاير بواحد منهم .. احس وجعهم هنا

يخوفني إحساس عمر الي ماخاب بيوم .. كبل كلتله ..
- مصطفى وينه ماحجى وياك !

فرك وجهه وكال ..
- ماعنده نت

كعدت بعد مابيه اوكف الخوف على مصطفى يهد حيلي ..

عمر ضل متوتر ويفتر بالطرمه واني اجر بروحي كوه حتى اسوي ريوك لابويه ديطلع لشغله .. بس عيوني تكت دموع .. أخاف عليه ماتحمل غيابه ..

انهار بس يفاركوني بعد ماكدر اكوم من فراشي .. عمر ومصطفى عندي  يصعدون وينزلون ويه النفس ..

يمشي الوكت وماكو خبر عنهم .. صار الظهر .. خليتلهم الغدا رعد كبل كالي ..
- مشكوره بس لو مخليته فد كم ساعه بعد هسه منشتهي

باوعت لعمر وهو بعده القلق على وجهه حتى ماحاجاني بس اشرلي بايده يعني اروح ..
فاخذت الاكل ورجعته ..

صار العصر و أني واكفه اغسل ملابس الجهال على المغسله جان اسمع صوت باب الشارع نركعت ..
كبل سديت البوري ونزلت ردان دشداشتي ورحت للهول

جان يصير بوجهي ... جلال ..
دخل هداد علينه .. وكف يم الدرج وصاح بعلو صوته ...

" عممممر "

نزلو يركضون وهو اول ما حطو رجلهم بالكاع .. لزم عمر من بلعومه جره وركعه على ظهره بالمحجر .. صار يضرب بي بوكسيات واني رحت عليه اصيح اريد يعوفه دمى وجهه وعمر ساااكت مارفع عليه اصبع ..

اني واكفه يمهم وحسيت على مصطفى حضني من وره .. باوعت لوجهه هم مورم ومزورك .. متلزك بشفته وعيونه ..
اريد احجي مابيه .. وهو سحبني بنفس الحضنه وارتاج على حايط المغسله .. ويكولي ..

- عوفيهم يتفاهمون

رجعت اباوع لعمر تعب خطيه من الضرب بعد مابي يوكف .. ضل مدنك ومجلب بالدرج .. جلال لازم راسه وبركبه رجله يدفره بنص بطنه ..

ماتحملت اباوعله هيج ينكتل كدامي .. سديت عيني وخليت راسي على ايد مصطفى وهو صار يصيح ..

- جلاااال .. طولتها خي طولتها كافي

فتحت عيني وباوعتله .. عاف عمر متمدد بالكاع وراح هجم على رعد .. وهذاك يصيحله ...

" لا على الوجه اخيك محشي سني البارحه "

بس جلال ماعنده تفاهم كبل يجر ويضرب ضرب مال تفليش .. عبالك الوجه عنده خشبه ويجيب بي البوكس من كل كلبه .. بحيث رعد بأول ضربتين طفر الدم من حلكه على الكاع ..

اني ومصطفى كومنا عمر .. سوده عليه عينه نفخت وحلكه متروس دم .. ضال بس مدنك ويتفل دم بالكاع ..
وهذاك بعده شابع ضرب ..

شكد انضربو بس ولا واحد مهم رفع ايده وحامى نفسه .. ولا حجو كلمه عليه لان ضربهم .. رغم همه مو اقل منه قوه بالضرب .. هذا رعد جثيث من يلزم الواحد يكطعه النفس .. وعمر اني اذا افركله أخاف من جسمه..  من يصير عصبي ينكلب وحش والله محد فلت منهم سالم .. بس هنا يم جلال خانسين .. لان يحترموه بشكل ماصاير ..


جلال كعد على صدر رعد ويجر باذانه اثنينهن لواهن ويصيح .. 

- شسوي بيك لك رعد شسوووي بيييك

رعد يأشر بايده ومصطفى راحله جره من جوه جلال وصار منزل راس رعد ويدك على صدره .. وهذاك تقيء بس دم وضل يكح ..

ركضت جبتله مي .. اخذه مصطفى يشربه شويه وهو بدل مايبلعه يتغرغر بي ويذب بالكاع .. بعدين يلا شرب ..

اني اعاون عمر حتى يوكف واباوع لسعده شلون فاتحه باب الغرفه شويه ومطلعه نص وجهه تباوعلهم ..

جلال يفتر كدامهم ويمسح بخشمه بطارف اصبعه ..

عمر راح عليه ولازم خاصرته .. يريد يحضنه وهذاك خنكه بركبته ويصيح ....

- مااحضن كواويد .. هناااا هناا ادوسهم بالقنادر 

دفعه وعمر ضل مجلب بايد جلال .. وهو رجع ضربه على راسه ويصيح ...

- من نعلى على ساسك ومرضعك 

جره من راسه واخذه على رعد لزكهم راس براس ويصيح ..
- شكااااايلين احنه شكايلين ... الي يخون وين مكانه !

دفر رعد وصاح ..
- ويييييييين

رعد ساكت و عمر يكوله ..
- وصلناه يابه وصلناه ضل بس لف الجفن


جلال حط راسه على راس عمر ويصيح بوجهه ..
- اجفنك بدمك

وبايده الثانيه جر رعد من اذانه ويكوله ..

- وحك ربك اصلبك وادكهن بسمار بسمار براسك اذا ماتنعدل

مصطفى دنك عليه حضنه من بطنه وجره وهو يصيح ...
- نوااااقيص .. اجفنك بدممممك عمممر واالله بدمك ادفنك مو بتراب.. ولكم طلعتو كواويد ..  كواااااد ولك تزوج تزووووج

ضل يضرب بمصطفى ويصيح ..
- لك هدني عليه ازوعه روحه هدددنييي

عمر هو راحله وحضنه وهذاك يدفر بي وصار يسب باهلهم .. و رعد هم راح حضنه .. صارو حاصريه بالنص بحضنهم ..
وهو يشتم مااخلى عليهم حجايه .. مصطفى كل شويه وسد حلكه لان حيل جفص .. صار مصطفى يبوس براس جلال ويسكت بي
وهو مايسكت .. اذا يبوسه هذاك يركعه براسه .. وبهذوله يشتم ...

عمر وخر منه وكعد بالكاع .. لازم خاصرتهه ويباوعلهم ..
رعد ضل يدغدغ بجلال ويبوس بي وهذاك بدا شويه يلين .. مصطفى بعده حاضنه من بطنه .. ويضحك عليه لان هو أطول من جلال مسيطر عليه  ..

بس عمر يباوعلهم بخوف ووجع .. صاحلهم ..
- يولد

همه صارت عينهم عليه .. كللهم ..
- للاي  .. بيها شي 


مصطفى كبل عاف جلال وكابل عمر ويسأله ..
- شبيها ! منو كالك ! خابرتك !

عمر بس اشرله على كلبه .. ومصطفى لزم راسه وكعد .. صاح ..

- جلال دخيل الله ..  حلهاااا


جلال باوعلي وهو يطك ركبته .. كالي ...

- دنادن شعندج غدا

كلتله ..
- خير من الله

راح لزم وجه  رعد وصار يفره هيج وهيج .. وهذاك فاتحله حلكه وياشرله على سنونه .. جان يكولي..

- يلا جيبيلنه غدا لين هذا حلكه صاير طحين .. الاغم

ضربه على ركبته ويكوله ..
- مطيييي

ورعد يضحك ويتلمس بوجهه ..

رحت حميت الغدا و طلعت شوربه " كنور  البيضه " هي نكهه جاهزه بس اضيفها ويه باقي الطحين والزبد والحليب واسويها شوربه سريعه بالكريمه ونكهه الفطر ..

بين ماحضرت الزلاطه والمواعين وصبيت هي صارت ..

مصطفى اجاني دياخذ الصينيه وايده ترجف .. ماكدر يشيل .. جر كرسي وكعد ..
لزمت وجهه وهو مهضوم ويحجي ..

- كال عباله احنه صارلنه شي بالطريق ..  من شافني زين وشاف جلال مابقى بس هي

دنكت على راسه حضنته وهو يكولي ..

- مردت روووحي يوووولي اخذت حيلي

بوست راسه وكلتله ..
- اسم الله عليك ياعيني اسم الله

وخر مني ومسح وجهه وكال ...
- اخوج كارثه .. راح يخليني اوكع بايدهم بس حتى اعرف خبرها

بعصبيه كلتله ..
- لااا مصطفى متروح ولاتوصلهم ولا عمر يروح هناك لتبلونا

وكف وشال الصينيه كال ..
- اني أبو الغلط ولازم اطلع  بالوجه

راح واني ضليت بخوفي ... شلون بينا ياربي اخوتي وين تاليهم يوصلون بمرارهم ....

وكفت اغسل على السنك وانظفه .. اجتني سعده .. كلتلي ...

- بس كليلي هذوله من ياسجن مخرجيهم ؟!!!

- كلهن همه خلو قسم يعتب عليهم

- عزااا بعينهم .. لج هذا الجديد النوب شو جاي هايج عليهم  شبي هذا شمسويله !

- هذا هيج ضايج ومشتاقلهم وطلع حركه كلبه بيهم

- لا ايابه ! هاي مشتاقلهم هيج لعد لو يكرههم شيسوي

- يذبحهم


ضلت تباوعلي عبالهه استهزء لو اشاقه .. كلتلهه
- والله شبيج هذا سفاح .. ماسمعتي يصيح على عمر ادفنك بدم مو تراب

هم ضلت صافنه بوجهي .. وهالمره اني تعمدت احجيلهه شكولهم الحقيقيه لان قبل جنت اتأمل يضلون يحبوها بداخلهم بس يحترمون الحياه الجديده وكلت مااحجي شي خاف الكلمه تسوي مشاكل وتخربهم  بس هسه بعد هي خربت وماكو شي ينضم ..
كلتلها..

- صدكي هذا سفاح اكشر المنطقه صايحه الغوث منه .. ماكو منطقه حط رجله بيها وسلمت منه .. وين ميروح يتعارك يخلوه سجن بالزايد شهر ويطلع يخنسهم

هي سدت باب المطبخ وكلتلي ...
- هاي انتو ملفين بيتكم وين ماكو واحد زايعه السجن والدم تارس ايده !

- لاااا مو لهالدرجه بس همه أعصاب ماعدهم عقل من تهيج اعصابهم ويجفصون هواي

- بس فهميني شلووون يمشون بزودهم هيج ! ماكو شرطه ماكو قاضي يحكمهم ويربيهم !

- منو يكدرلهم ! يا اخو خيته اليصعدهم لقاضي !

- لاا والله ! هم يحطوه يكتلوه !

- همه يكعدون مستراحين وجماعتهم الشغل يمهم كلمن عشيرته تفزعله ويطلعون بزودهم

- خررب بعينهم حتى هنا حطت روحها العشاير

صرت احضر كلاصات الجاي وهي سالتني ..
- هذا السفاح منو عشيرته ؟

بنص ضوجتي ضحكت .. واني أتذكر جلال وسوالفه بالعشيره  ..  كلتلهه ..
- من عشيره ما تتوقعيها

- منين يعني هذا سني لو شيعي !


سكتت مارديتلها اكره هذا السؤال ..
وهي كالت ..
- دحجي منين اهله هالمصخم

وزعت الشكر بالكلاصات وعفت واحد فارغ لعمر ..
باوعلتهه وهي منتظره جواب ..

كلتلها ..

- جلال ابن بيت بُنيه

هي كبل شهكت وضربت صدرها .. كالت ..

- هذوله بيت بُنيه  النعرفهم هنا يمنه لو غيرهم !

- أي همه هذوله .. بيت بُنيه هذا جلال راسهم الحار

- عزاا ولج يمه هذوله ولدنا من يصيتون بشي يكلوله مثل بيت بنيه .. والله مره اذكرها ابن اخويه تعارك بالمدرسه ويريد أهلنا يرحون يسووها هجمه على اهل هذاك وابويه يصيحله .. قابل احنه بيت بنيه ونهد ومانهتم 

- اييي رحم الله امج وابووج . . همه هذوله اهل جلال
يهدووون وما يهتمون

بيت بُنيه بعد اسمهم شاره على علم
وجلال مصيتلهم بكل دربونه


اشرت باستهزاء على جهه الباب وكالت ..

• وهذا عود زنكيل مثلهم !

• زنكيل لعد شبي شناقصه ! لج هذا ابن بُنيه بعز الضيم والحصار جان هو ازكن ولد بالمنطقه.. موكل الناس بخيره وهو بعده ولد بالمدرسه .. اهله الله يزيدهم ناس اصحاب عقول تجاريه  وهو طالع اضرب منهم

عمامه مثل الريح ماتحسين الا رمشه عين تكومو فوك الروس كلمن شايل قامته هالكبرهه وماعدهم شي اسمه نقاش تفاهم
حجي بحجي .. ولعمك وخالك .. هاي كلها ميعرفوها اذا واحد اندك بولدهم
كبل فشخو راسه بالقامه  و يضلون جيب الفصل ودي الفصل


جلال بعد .. امي من ذكروه وكعت بفراشها
ولحد هسه ما طلعت باب غرفتها وانتي قيسي شكد هو  يرهبهم .. ومربيلهم گلب..


ضلت تتصفن وراحت منا ..
الولد بين مااكلو وشربو الجاي اني رحت
اداويهم ..

وجههم ورم ... رعد كل شويه وكال ..
" حشوتي ماتهنيت بيها رااحت وكعت راحت فلوسي والبنج كله رااح "

امسحله وجهه وهو يكولي ..
" خربت لو ينطلع بيه ! ؟ "

ضحكت وكلتله ..
" لا بيك شوفه زين "

رحت لعمر وهو مدلغم وجهه .. امسحله يم عينه و احطله دهن وهو على نفس وضعه ساكت ..
خلصتله وجهه وانطيته حبايه مال تشنجات لان ضال بطنه وخاصرته مأذيته ..
عفته وهو ساكت ومدنك ..

رحت لمصطفى داشوف وجهه شلت لزكات
وعقمتله .. وهو يباوع بعيوني ..
محتار والخوف بنظرته واضح ..

جلال كللهم ..

• شعدكم بعد ضاميه عليه سولفو هي كتلة الوحده

كلهم ساكتين عاد اني كلتله..

• الجهال ماشفتهم شلون حلوين مدبدبين

هو رفع شواربه منا ومنا .. كال ..

• ولد العار هذا .. ماريدهم
• ليش خطيه همه شذنبهم كلكم متريدوهم
• مو ولد الحنينه ما اشيلهم

سكتت  وضليت اباوع لمصطفى وهو يفرك بعيونه بتعب ..

جلال كال بصوت عالي..

• ايييي و امج وينها ماشفتها ؟ لو ماكو مصايب جان كلت ماتت بس عمر تفكه هي .. وينها ماتطلع تسسسلم ترحب ،.. عمي خاف كبرت مابيها تمشي اااااني اروحله ولااا تهتم اجيها برجلي وينها بس دليني بيها


يبتسم و يباوعلي... كلت بكلبي
'اويلي عليج يمه '

مصطفى حجى بعصبيه...

• لخاطر ربك كافي عوف كلشي حط بالك ويانه .. شوفلنه حل جلااال شبيك ماسمعت "للاي بيها شي " محتاجتنه .. شبيك يول راسك شغله هناا ويانه شغله
جلال باوع لعمر وطلع السجين الصغيره ام المنشار هاي متفارك جيبه .. فتحهه وكال لعمر  ..

- استفتحها  بيك .. ايدي تحكني عليها وانته تستاهلها .. باوعلهااا باوعلها زين

صار يفرهه بايده ويكول ..
- شفتها زين ؟ هاي ضامهه الك

طبكها وخلاهه بجيبه .. اشرلهم بتحذير ..

- مانساهه دكتكم هاي بعد حسابهه طويل  .. مارجعني عليكم تره لا العشاير ولا الخوه  بس جابتني شغلتين " حسابكم  و قهرها "

عمر ورعد ومصطفى دنكو راسهم .. وهو تربع بكعدته  وكال ..

- للاي  وينها ؟

مصطفى كال ..
- بالعماره

جلال فتح تلفونه وكال ..
- نطلعلها الفجر .. رعد وعمر يضلون هنا وانته توصلني وترجع

عمر كال ..
- اضل هنا شنو ! شبيييك

جلا ل صيح عليه ..
- لتدخل  الحجي مو يمك لتدخل 

مصطفى راح كعد يم جلال وكال بصوت عالي حتى يكطع حجيهم ..

- يااابه هناك منطقتهم كلها عمام وخوال مو فارغه وروحتنا صعبه هي مو بس حجي خلي نحسبها عدل

جلال كال ..
- انججججب أبو الحسبان شفتك شلون مشيتنا ميل بحسابك  ! اني حاااسبها قبلك وكلت توصلني وترجع .. نقاش خلص .. اريد انام يلا طكطكو منا 

باوعلي وكال ..
- سلميلي على امج وكليلها خطاار يمها خلي تطلعلي فراش جديد وتداريني كليلها جلاااال مشتاقلج مووووت


كمت ورحت للغرفه امي تباوعلي وسعده هم عاد اني جريت فراش وكلت لامي ..

- جلال يسلم عليج يمه يكول مشتاقلج
امي كبل طردتني منا وصارت تغلط عليهم ..

رحت اودي الفراش واكول " الله يستر من كعدته هنا شلون راح يعيشون جوه سكف واحد هو وامي !!"

الولد طلعو وعافوه ينام .. عمر صعد ورعد طلع .. بقى مصطفى يمي كعدنا بالهول .. وهو تمدد وحط راسه على رجلي ..

كلتله ..
- هاي شصاير بوجهك اوووف ياربي هو عايز شبيك ليش عفته يضربك

- هذني زين شوفي هنا شسوى


رفع فانيلته وشفت شلون جارحه بصدره بالسجين .. تلمسته بكل خوف هذا مخيطه وجرحه ناشف سوده عليه ...

كلتله ..
- يايمه هذا شمسوووي بيييك الله ستر ماحطها بكلبك

- هو راد يضربني بكلبي بس لاويته واجتي هنا .. بس خرا بيهه  منشار مو سجين

- سووده عليييه حبيبييي .. خلي اجيبلك دهن ميصير تضل هيج توجعك من تيبس

نزلت راسه من رجلي ورحت جبتله عصاره واجيت ادهنله وهو نزع فانيلته خلاهه على عيونه .. ادري بي تعبان وحيل متاذي من جرحه ..
رحت جبتله غطوه خفيفه وخليتهه على جسمه بقيت بس نص صدره مكشف .. ورجعت راسه على رجلي ..
ضل هو لازم ايدي واني افركله بركبته شويه ..


كالي ..
- دندن شتكولين تسامحني ؟ لو خسرتها !

احتاريت شكول .. صعب الموقف كله صعب ..

كلتله ..
- مادري .. هي شكد قابليتها وياكم بعد مادري

وخر الفانيله من عيونه وكال ..

- انتي لو بدالهه تسامحين ؟

- صراحه .. لا .. واني من شوكت كلتلك تخسروها ما هتميت لكلامي

- يولي شسوي شسوووي انتي شفتي حالنه شلون جان ! لتضلون تلومون بيه والله اكلتو كلبي اني لو مامخاطر هيج جان خسرت حتى اخوج

- افتهمك بس هسه شلون تحلوهه ! انتو مافكرتو من تعرف شلون !

- كلت احاجيهه اشرحله الوضع كله

- أي لعد يلا احجي وقنعها ابقى هناك ويه جلال بس لتضل كدام العين


رجع غطى عيونه وكال ..
- كلت قبل قبل مو هسه .. هسه ماكدر مستحي منها والله اذا توكف كبالي هسه عيني ماحطها بعينها خجلااان حتى من نفسي والولد عيونهم كلها عتاب عليه .. دندن خجلان والله .. حرام اذا اعرف هسه احجيلي حرف وياهه


- لعد شلون ! عمر ميكدر وانته متكدر ورعد مبين عليه خايف يروحلهه .. هم الحجي تذبوه براس جلال !

- شنسوي ماعدنا بس هو يكدر يمشي بزوده

- الله يعديها على خير .. اذا كلش ماكدر يوصلها اني اروح احاجيهه

- خلي نشوف وين تصفى .. اصعدي شوفي عمر كليله خلي ينزل يمي مابيه اصعدله خلي ينزل اشوف شبي وجيبي فراش دينام يمي


رحت لعمر وشفته نايم على السجاده بغرفته .. نمرد كلبي عليه .. الله اكبر شلون الكلب يذل البشر ويخليه مسكين مهضوم  وهو أبو راس الكوي ..


دنكت وكعدته .. كومته ونزلنه .. هو مخلي ايده على جتفي وذاب ثكله عليه .. اخذته يم مصطفى هناك فرشتله وعفتهم ينامون ..

رحت احضر للعشه .. وشفت تلفوني بي مكالمه من رقم غريب .. قبل ساعه متصل ..
عفته وماهتميت ..

وره صلاه  المغرب هم رجع اتصل .. جاوبت اكول الو ومحد يحجي .. سديته ورحت اصب العشى لامي وسعده .. وبعدين صبيت للولد ..

وابويه هم رجع صبيتله .. وراح يم الولد ضل مكابلهم وسوالف هو وجلال ..

عمر سوده عليه لا قبل يتعشى ولا كام من فراشه .. بقى نفس نومته .. وماضغطنا عليه عفناه براحته هو حيله خلصان وهذا النوب زيدهه عليه بالضرب .. ضلت روحه تايخه ..
ثاني يوم .. من الفجر خابرني مصطفى .. هو نايم يمنا .. كمت من فراشي ورحتله بالمطبخ .. 
كالي ..

- دنون راح نطلع للعماره الولد بره بالسياره

قاطعت كلامه وكلتله ..
- عمر  يروح !

- ايي هو الكعدنا من ساعه 3 ودز رعد جاب سيارته وتحضرنا .. عاند وجلال كاله ترجع متضل وياي هناك هو قبل .. والله اليستر بعد شيصير هناك


ضليت مخليه ايدي على حلكي وخايفه عليهم .. عمر شلون بيك ياخويه ..

مصطفى اشر  بايده على صدره وايده ترجف ويحجي وهو يأخذ نفس قوي .. كالي ..

- مدري شبيه جسمي يرجف حتى ضلوعي احسها ترجف ردتج تهديني ماكدر اسوق هيج

خليت ايدي على وجهه وهو دنكلي بوست عيونه .. وحضنته .. ضل يتنفس بركبتي واني اكوله ..

- لا تبقى حبيبي ارجع ويه عمر عوفو جلال يتصرف انتو بعدكم مجاهزين تتواجهون

عدلت شعره وهو حط راسه على جتفي .. كلتله ..
- كلنه معتمدين عليك انته ابونا مو بس اخونا .. ونضل ممنونين الك للموت.. انته دائما تضحي وتشيل وجعهم بكل حيلك .. لا تلوم بنفسك ياعيني همه لان محتارين وخايفين اعصابهم تلفانه فمن حركه كلبهم يذبون الصوج بيك .. هسه ان شاء الله تفرج وتهتصافى الكلوب وترجعون مرتاحين سوه وكلشي يتغير ماكو شي يضل على حاله وانتو سباع ماتنغلبون هاي متجي كد شعره من العبرتوه

رفعت راسه وضحكت كرصتله خدوده وهو ابتسم وباسني براسي .. كال ..
- ادعيلنه

حضني شويه وطلع ..

اني رحت توضيت وصليت الفجر وبقيت كاعده ادعيلهم الله يسهل طريقهم ويبرد كلوبهم ..

امي اجتي عليه للهول وكالت ..

- هااا راحولهه يركضون .. وين الله ويلكطوهم بالمنطقه وينعنعون ضلوعهم .. يااواحد يا احد رد عليهم كيدهم وشرهم وخلصنا من الظلام هذول المايعرفون لا رب ولا اسلام


استغفرت ربي والله كلامها يحز بكلبي عليهم .. والحجي وياهه يطلعني بخساره .. اسكت واوكل الامر لله هو الي يعرف الظالم من المظلوم ..
مشى اليوم عادي .. اخابر مصطفى يكولي" بعد ماكو شي دنفتر بالمنطقه "
ولليل خابرني كال " راجعين " .. 

تلكيتهم ساعه 11 بالليل .. عمر اول ما وكف غسل وجهه وكال لمصطفى ..

- نام انته هنا واني رايح لبيتك انام  هناك

اني لزمت عمر ماريده يروح اريده كدام عيني انقهر عليه يضل وحده .. بس مصطفى جرني وكال ..
" عوفي لتدخلين "

مصطفى طلع مفتاح غرفته وانطاه لعمر .. وعمر باسني براسي وراح ..

دخلنا اني ومصطفى وهو يكولي ..
" اريد اسبح سويلي الحمام بخار "

كلتله ..
- وجرحك شلون !

عصر جتفي وكال ..
- مايموتني .. روحي يلا نزليلي ملابس وياج


عفته بالمطبخ ورحت اخذتله ملابس من عمر ومنشفه جديده ونزلت فتحتله المي الحار لحد ماصار بخار يلا راح سبح ..
فرشتله بالاستقبال وحطيتله ماعون كيك وعصير زبيب وبقيت كاعده ع الدرج انتظره يطلع ..

هو طلع من الحمام واجاني كمت وهو حضني ومشينا للاستقبال ..
ضل كاعد ينشف شعره واني اوكله كيك واكل وياه ..
هو شرب شويه عصير وكال ..

- اني اشرب زبيب وحلكي محلى وعمر ريكه مر ! حرام والله

حط الكلاص بالصينيه وكال ..

- اني تعبان وبالي مو وياي انتي شبيج !

- والله مو قصدي شي بس كلت تاكل شويه تحلي حلكك

- اكلي انتي ماريد بعد .. جيبيلي مي


شلت الصينيه وكمت .. اني هم راح من بالي هو ينقهر على عمر لان ميكدر ياكل حلاه وعايفها علموده .. كل ماغسل كلاصات الجاي يجيني واحد ما مخيوط باقي الشكر بي .. واعرفه لمصطفى ..
هسه شنساني هيج !!

اخذتله بطل مي وكلاص وضليت كاعده يمه وهو شرب نص البطل .. وتمدد ..
كلتله اشوف جرحك ادهنلك وجهك ما قبل كال عوفي كلشي مابيه ..

صار يحجيلي ..
- جلال عفناه بالشارع .. مادري وين ينام شلون بي ماادري ميتفاهم ولا ينطي مجال واحد يحاجي .. أبو خابصهه

- ضال هو هو العمر مايكدر يغير جلال

- اييي بس والله بالي يمه .. وهو يكلي لحد يخابرني اريد ابقى مركز بشغلي

- أي احسن عوفوه هو ينخاف منه ماينخاف عليه

- الله كررريم .. خطيه رعد بالطريق وسنه هاج عليه كام عض جلال من جتفه .. بس هذاك فدنوب صاير كلبه مايحن عليهم .. يكله .. حيل بيك ضل نازع هنا لو تموت حبايه ماجيبلك

وعافه خطيه شكد تاذى من سنونه مكسوره بيهن الحشوه ولثته مورمه .. اني نزلت جلال وعمر واخذت رعد ادورله دكتور اسنان والمنطقه جول شكد افتريت يلا لكيت عياده اسنان

- خطيييه رعد ابد ماينصح كل يوم واكعله بمرض

- منفوس والله .. امي من تنشرله تكول مربط تربط بالنفس ..

- الله يحفظه

- خطيه والله هسه تذكرته شلون دكتور يريد يبنج حلكه وهو عاصر عيونه والله دمعت عينه من الوجع .. بنجه حتى بالكطن والبخاخ كم ابررره ضربه كل خمس دقايق يضربه ابره بنج وهو يكله بعده .. تعب وياه يلا خلصله الحشوه .. عاد اخذته للسياره عفته نايم ماكعدته لحد ماوصلنه المنطقه .

- الله يعينه تسكطت سنونه هو مو زين باقيله سن يتحشى وهذا تخبل عليه وفلشهن اووف ياربي ضيم انتوو ضيم كل واحد منكم ضيمه رادله كلب هالكبره


ابتسم وكال ..
- تنامين يمي ؟
- لااا غير امي هسه تكلبهه انذاار عليه
- والله تعبان مابيه حيلها .. روحي ماريد ابتلي بأحد خليني ارتاح

لفلف راسه واني كمت طفيت الضوا وطلعت ... 
قبل ماانام دزيت رساله لعمر

" ياروحي تعال الصبح تريك ويانه ماناكل ننتظرك "

نمت وصبحيه كعدت مصطفى وكلتله يروح يشوف عمر ..
ضليت انتظرهم لحد مااجوي يلا خليت الاكل .. عمر بس ساكت .. نحاجيه اني ومصطفى وهو بس يهز راسه كلشي ميحجي ..

هذا اليوم حسام مصخن ,ويتقيء وبس يبجي واحتارينه بي .. مصطفى كال ..
" اني اخذه للدكتور "

هو اكو دكتور أطفال يمنا قريب .. ردت اني اروح وياه بس عمر نزل على صوت البجي وكال اني اخذه ..
وراحو اخذوه وحدهم ..

من جابوه ضل مصطفى يحاجي سعده .. يعلمهه شلون تنطي دوا وجايبله حليب جديد .. هو يحجي بهدوء وهي كلتله ..

- يلا فهمت فهمت

هو كللهه ..
- زين استيعابج سريع ام وسام

عافهه وطلع .. هو بس اندار جان تغمه واني شفتهه .. هي باوعتلي وكالت ..
- هم طلعي لسانج هالطول عليه انتي الثانيه

ماحاجيتهه  .. عفتهه ورحت اشوف عمر ..

لكيته يعارك مصطفى يريد يروح على جلال ومصطفى ميخليه ..
ضلينه نحجي وياه  لحد ماقتنع وكعد ...

بهاي الليله نمنا من وكت .. اني شفت الولد ممحتاجين شي ومكضيهه صفنات بالسكف .. عفتهم ورحت لفراشي واخذتني النومه ..

حسيت على عمر يكعدني .. يهز بجتفي حيل .. كعدت على حيلي وهو شاورني ..

- كومي بساع البسي جبتج وشالج .. بسااع رسلان عشر دقايق بس الم الولد واشغل السياره الكاج بالباب

مالحكت اسال شكو .. هو طلع بسرعه واني كمت اباوع لامي وابويه نايمين .. شلون اطلع وماكوللهم يتخبلون غير ..

طلعت واخذت تلفوني خابرت مصطفى وهو بسرعه جاوبني ..كلتله

- وين رايحين فهمني شحجي لاهلي

- جلال خابر .. يريدنا بس يطلع الضوا احنه هناك ليش وشكو وشنسوي مادري .. تحضري بساع كال جيبوها وياكم بسااع دندن بساع البسي أي شي واطلعي


سد التلفون واني رحت للغرفه ضليت فاتحه الكنتور واباوع لاهلي .. شلون بيه شحجي امي تذبحني ومتخليني اطلع وياهم ..

عمر دك عليه وكبل سويته صامت .. وطلعت جاوبته كالي..

- كلشي لتحجين  لاهلج بس امشي هي تصفى بعدين
- عمر امي تموتني والله بس اطلع هيج طلعه
- خررراااابامج امششي رسلان فضيناااا بالباب واكفين
- ايي ايي

رحت جريت اول جبه كدامي والشال ولبستهن فوك بجامتي وهمزين الجزامه جوه الدرج كبل اخذت حذاء وطلعت اركض تلكاني عمر وصعدني بالسياره وكعد يمي .. لبست حذائي بالسياره وضليت اعدل بشالي ..

رعد كاعد بالصدر ومصطفى يسوق وعمر يمي ..
سالتهم " بيش ساعه هسه "

كلهم كالو " 3 وربع "

كلبي يدك سريع وبالي كله يم امي وابويه من يكعدون ميلكوني شلون بيه !!

كلت لعمر ..
- خابر ابويه احجيله عمر والله عيب هيج طلعتي

هو هم فتح تلفونه وكتب رساله لابويه ..
" رسلان وياي اخذتهه مستعجل افهمك بعدين "

ضليت متوتره كل الطريق ... وين راح يودوني بهذا شكلي .. وجهي حتى تغسيل ماغسلته ..
وهمه ميتحاجون .. مصطفى طاير بالسياره طير ..

دنيت راسي ليكدام وشاورت رعد كلتله " متشوفلي اكو هنا علج , بطل مي ؟ "

هو كبل طلع العلج من جيبه وانطاني .. وكال ..
" والله تعذريني ماكو مي هنا بس اشوف محل انزل اجيبلج "

تشكرته وضليت اعلج .. شويه عيب أخاف احجي وياها ويه أمها وحلكي بي ريحه . .

صدك والله وصلنه ويه طلعة الضوا بعدها الشمس مو كلش عاليه والسمه بعد بيها زراك ..

تلكانا جلال يم فلكه .. وصعدويانه .. مصطفى موكف السياره واندار يحاجيه ..
هو كال بصوت عالي ..

- هدوووء .. بالكم وياي

عمر لزم ايدي وضل يعصرها ويباوع لجلال .. جلال مسح وجهه وكال ..

- لبنى نايمه مستشفى محتاجه دم

عمر كبل عاف ايدي ورجع راسه .. ضليت افرك بجتفه واقوي وجلال كال ..

- مصطفى بساع مستشفى الصدر العام .. رعد ننزل وانته بوجهك تروح تنطي دم .. لتنخبصون ضلو مركزين وبالكم وياي مااريد احد ينثول .. نروحلهه بس ساعه بعدين تشوفولكم مكان وتكعدون بي متضلون كدام العين .. نشوف الوضع ,أهلها , المكان امان يلا ترجعون

هو يحجي ومصطفى مشى بينا للمستشفى ..
رعد وعمر ضلو ساكتين كلشي ماحجو ..

اني سالته ..
- شبيها شصايرلها ؟ حادث و تسمم شنو فهمنا !

- لا لا

أشرلي اسكت .. واني هنا لزمني الخوف وباوعت لعمر .. ياربي شلون بي اذا يشوفها بمرضها شيصير بي !!

ضليت ادعي الله يسهلها ويقوي كلوبهم ..

وصلنه المستشفى نزلنه ومصطفى راح يطبك السياره .. عمر لازم ايدي و جلال اخذنا لغرفتها ورعد من اول مادخلنا هور راح وحده .. حتى يتبرعلهه بالدم همه دمهم متطابق ..

عمر وكف جلال ماخلاه يدخل .. وكالي ..
- شوفيها اذا نايمه صيحيني واذا كاعده  ابقي حاجيهه منا لما يجي رعد

فتحت الباب بهدوء .. ودخلت .. ردهه نساء وأطفال هنا .. وكلهه نايمه ..
ضليت اباوع بالوجوه منل لحد ما شفتهه ..

نايمه على اخر سديه .. وكفت يمها وضليت اباوعلهه .. ضعفانه فدمره .. وجهها منتهي ..
معلكيلها المغذي .. وباوعت هنا للادويه بس شريط فيتامين وابر براسيتول ..

خليت ايدي على وجهها ماحست  .. كلت اروح اصيح عمر احسن ماكعدهه ..

طلعت وعمر اول ماشافني اجاني كال ..
- نايمه  نايمه ماحست عليج ابد
لزمت ايده وكلتله ..
- روحلهه  ياعيني روحلهه

..
يتبع