ضاد و عين

٢٠

ضاد و عين
💯
••••                                      ••••

Adzzon

أيام تمشي بين المدرسه وبين لمتنا ..
بيت مصطفى .. الكل هنا مداريني ,
ام مصطفى كُلش تخاف عليه وابد متعوفني وحدي .. هي تحضرلي ملابس حتى اسبح وتضل واكفتلي باب الحمام كل شويه تحاجيني محتاجه شي ؟  غسلت شعري زين لو تجي تغسلي ؟
واني ماقبل تدخل وياي .. من اطلع هي تلفني بالروب الجبير مالتهه وتكعدني بالهول يم الشباك تمشطلي شعري .. وبكل سوالفهه
لازم تضحك ..
وبالليل تفرشلي بغرفتهه واني استحي انام وعمو شامخ موجود .. صارت تفرشله بالسطح ويه الولد ونبقى اني وياهه نام بغرفتهه ..

رسلان تجيني العصر مرات تكعد شويه وتروح ..امهه متقبل تكعد يمنا هواي ..

جلال كل كم ساعه يجينا ويخبصنا بالسوالف والضحك ويروح ..

رعد اشوفه بس وكت الي نقرا ..ابوه ميقبل يطلع هواي بس على كد القرايه ويرجع لبيتهم ..

عمر ومصطفى ميفاركوني ..
واذا واحد يطلع الثاني يبقى .. حتى اخوان مصطفى (محمد واحمد) هم حبابين وياي كُلش بس رسول مااشوفه الا بالليل يرجع
يسلم ويصعد بغرفته ..

كلهم يمي ويعاملوني باحترام واهتمام بس الغربه واحساسها ابد ميفاركني .. وباقيه مستحيه بكعدتي وياهم

مااحجي الا ويه الي يحاجيني ولا اتحرك من مكاني اذا مو واحد منهم يكولي كومي نروح هناك .. ولا المس غرض حتى لو همه يخلون يمي دباديب او دفتر رسم واصباغ مالات مصطفى هم ماالمسهن ابد اذا مو هو يكعد يمي .. ولا اطلب منهم شي .. شينطوني اكل اكل واشكرهم .. ينامون انام .. يكعدون اكعد .. حتى الضحك والشقى الي متعوده
عليه وياهم بطلته وصرت احجي بحدود ويه الولد ..

بس عمر .. بدون مايضحك او يسولف او يتصرف بشي .. جان مخليني مطمئنه بمجرد مايكعد واباوعله ويبادلني بنظره يفهمني بيها ان  ' كلشي زين ' ..

ميحجي وياي هو بس بوكت مايطلعون الولد وتبقى بس ام مصطفى .. هو يكعد يمي يحاجيني بصوت ناااصي حتى شفته متتحرك .. يوصيني مره على دراستي ومره اذا محتاجه شي ومستحيه اكوللهم ومره اذا افكر بشي مخوفني وماكدر احجي ... 
واني بكل مره اجاوبه ' لا '

ام مصطفى هي تداوم بمدرسه اعداديه بنات .. فنكعد الصبح كلنا نتريك ومحمد يغسل المواعين ومصطفى يعزل وهي تمشط شعري وتخليلي الشرايط .. عمر يطلع قبلنا شايل جنطتي وينتظرنا بالباب .. من اطلع هو يلبسني الجنطه ونمشي كلنا سوه وبعدين نتفرق كلمن لمدرسته ..

عشره أيام بقيت بيتهم يلا رجعت ماما ميس واخذتني لبيتنا ...
هي حجت لام مصطفى تقريبا على كل شي .. وروحتهه هاي لان ابوهه جان مريض وداخل الإنعاش
اخذهه اخوهه اسعد حتى تشوفه قبل لايموت .. هو توفى ثاني يوم من روحتهه عليه وباقيه بالفاتحه ومخلصه السابع وراجعه ..