ضاد و عين

٩

ضـاد و عــيـن
💯
•••• ••••

Adzzon

- اني اعلمج ىانتي خلصينا من شرهه

عيني بعينهه .. سدت الباب وكلتلي ..
- اكعدي افهمج

كعدت وكلتلهه ..
- شتعرفين وماسويتي لعد ! ليش تذبيهه براسي مدامج هيج كلشي تعرفين وتكدرين جان خلصتينا منها ليش الا اني يلا اخلصج من شرها !!

هي جرن نفس وصارت تحجي بصوت ناصي واني مقربه راسي منها ..

- اني كلشي سويت .. حطيت عون وفرعون حتى اخلص منها بس كل مادفعها واكول خلصت ترد ترجع مصيبتها فوك راسي

- أي وهسه شيتغير !

- هسه عمر وربعه يهوبدون بكيفهم ومأمنين مااااكو احد يعرف عمر تزوج .. لا هي تعرف بي متزوج وعنده جهال ولااا اهلهه .. هي حلهاا هنااا .. نكسرها بيهم ونكسرهم بيها .. اذا عرفت بي متزوج بعد هي الي تكوم تطرده وتسكت العشاير وكلشي يرجع لمكانه


صفنتلهه شويه بعدين كلتلهه ..
- ومنو كال هي بعد متريده ! شمدريج مايقنعهه ! شمدريج ماعنده تواصل وياهه وحاجيلهه كلشي ومخليهه كدامنه سكتاوي حتى ياخذهه !!

كبل كلتلي بكل ثقه ..
- لااا لاا .. لا محاجيهه ولا محاجيته .. اني اعرف كلش زين واحد ميدري بالثاني وين ما وين
- حتى لو يجوز بعدين يقنعها وترجعله من تشوفه هيج ذابح روحه عليهه وانتي كلتي تسحب منه فلوس بعد تكيف عليه وتجي تركض

- اكلهاا لا .. كلشي ميصير .. همه هسه نقطه ضعفهم .. هي متدري بزواجته .. بس تطلع السالفه بعد كلشي يخرب ويكعدون لا حول ولا قوه

- ايييي وشلون نخليهه تعرف ؟؟


عمتي حركت لسانهه على شفتهه وكالت ..
- دبري تلفون محد يعرف بي وانطيج رقم وحده خابريها واحجيلها

- عزاا يمه بلكي هاي راحت حجت لعمر ويجي يذبحني والله..  مشايفته متخبل خبال

- لااااا كلشي متحجي .. لتعانديني من اكلج سوي هيج سوي واسكتي اني اعرف ناسي واعرف الحجايه المن انطيها وبحلكمن اخليها

خفت من هاي السالفه واجلتها حتى افكر بيها زين .. بقيت اليوم كله افكر بيها ..
خوفي بس اذا عرف عمر اني الي وصلت الحجي .. لازم اطلع نفسي من السالفه واشوفلي حل ..


الجماعه رجعو عمر وهومتخربط فدنوب صاير ضغطه مرتفع وصاير جنازه ..
ضل نايم و رعد ومصطفى مكابلينه وقطره مي ماحطو بحلكهم  ...

رسلان ضلت يمهم واني رحت على عمي .. وضليت الح عليه ويه عمتي حتى يحجيلنه شصار وهيج تخبل عمر ..

عاد حجالنه ..
- المضيف متروس عكل بالشافعات لميناهم منين ما منين جبناهم وجماعتهم جايين هالمره يردون يفضوهه ويكسرون الشر والحجي كله باصول ومحد من الطرفين يتدخل ويحجي .. الحجي صار كله يم الشيوخ واحد يتفاهم ويه الثاني

عمر من البدايه منطي باص لجماعتنه (ماكو تفاهم وضلو ماطلو باالحجي )
فالسالفه طولت منين ما يجيبوهه يفروهه جماعتنه عليهم ويطلعون لغير سوالف بس يمشون وكت ..

ليش ما واحد من شيوخهم سأل ( انتو دوختونا نريد نفهم لبة مشاكلكم وين ؟ ) كال ( هاي الهوسه كلها اجتي بالتالي اريد اعرف الأصل ..  عيونكم تتجادح على شنو ؟! )

المغضوب هذاك بنص الزلم وكال ( شيخنا لا اكلك ولا تكلي .. هذا رايد بنتي وعينه عليهه وين متروح وتجي لا يفارك ولا يجفينا شره )

الرجال بعده يحجي وعمر مكعدينه باخر المضيف واجاه شايل نفاضه ومصطفى وراه مالحك عليه .. كوم يعمر وافشخ راس الرجال .. ركعه بيهه وهي كزاز هالثكلهه خلت الرجال سابح بدمه ...

ولا عينه تنكسر ولا يحترم جبير ولا شيخ .. ضل لازمه ونزل عليه مسبه وصياح علكهه علينه .. الزلم تجر بي وكلهه تتصايح وهو خانك الرجال من ركبته خله عيونه تكفع ..

ضربوه برجله يلا كدرو يجروه ورعد تلاحكه كبل ربط ايده واخذوه سحل بره .. طلعوه وهو هرج الدنيا بصوته مااااخلى حجايه تعتب عليه ماحجاهه ونزل روسنا  كدامهم ..

من تحاجيه تعاتبه يكلك .. شلون يجيب طاريهه كدامهم ليش اني معاركه على بنته لو على حك وثار !

وهسه تعال ارجع من جديد توسل بفلان وعلان حتى يكعد يتفاهم وياهم .. محد  يقبل يطب هيج طبه نوبه الثانيه .. يكلك ابنكم مايحترم والغلط راكبه من راسه لرجليه
جنا احنه اهل الراهي وجبناهم يتوسلون بصلح هسه نلافت وصار الدور علينه
وجيب الي يحلهه ..


من شفت السالفه هيج شابجه وحتوصل بينهم للدم لان واضح تاليهه يتذابحون
مبين عمر مايس منهم ينطوه بنتهم ويريد بس يسوي مشاكل ويضل متعبهم
وثاراتهم حتضل تجر كل يوم ثار جديد يطلعلنه ....

كلت احسن حل هو الكالته عمتي .... خلي هذيج الرعنه هي توكف ثاراتهم ..

ثاني يوم بعده البيت مشلوش بسالفه عمر .. وهو بعده مريض مشي مابيه حيل يمشي .. الولد يتكابل عليه وياخذوه للحمام ويرجعوه وحتى الاكل بيدهم يوكلوه ..

ثالث يوم انترس البيت بعمام عمر وولد عمه ورجعت الهوسه على نفس السالفه
وعمر كلامه واحد كل شويه يصيح بي  ..
( مغلطان ويستاهل..  لو عايفني قسم بالله اموته ..
هو ماعنده غيره شلون يجيب طاريها ..
اني حسابي وياه مو على نسوان ..
هو العال وكص لسانه بعد على ايدي )



مليت من حجيهم وهوستهم الماتخلص .. رحت للجهال وضليت مكابلتهم وافكر شوكت اخابر ؟؟
عاد اجتني عمتي وكلتلي ..

- ولج مذابحهم يصير ماله والي كومي فضيهه كومي خابري وخلصينا هلكت ارواحنا والله جرعتنا  السم هي وأهلها
كمت بزعانه روحي وكلتلهه ..
- جيبي الرقم جيبييي

انطتني تلفونهه ومطلعتلي الرقم كلت اصعد اخابر بغرفتي ..
ويه ما صعدت فكرت ..

كلت ليش اخابر من تلفوني وباجر عكبه صار ماصار كلها تنذب براسي .. خلي اخابر بتلفون رسلان حتى من يطلع الرقم يعرفه مال اخته واني اطلع منها ..


نزلت للمطبخ .. شفتهه مخليته عالشحن وهي دتغسل استكانات .. كلتلهه ..

- عادي اخذ تلفونج اخابر ضحى اختي جايه زعلانه بيت اهلي وأريد افهم شسالفتها ورصيدي ميكفي اني اسيا وهي اثير . انتي هم اثير اخليهه هي تخابرني عدهه خدمه بس اني خطي اسيا

كبل كلتلي ( عادي اخذي ) ..

اخذته وصعدت .. هي تلفونها من هذا النوكيا العادي يشبها مال عجايز .. هم عمتي تلفونها احدث منها .. أبو لمس بس هاي ضاله على زمن جدي ..

كعدت بغرفتي ونقلت الرقم وخابرت ...
يدك يدك محد يجاوب .. مرتين والثالثه جاوبو ..
طلعلي صوت ولد صغير  ..

يكلي ( منو منو ) .. زين اني نسيت اسال عمتي المره شسمها ام منو ؟ بل صعدت اركض شبيه !

عاد كلتله ..
- اريد امك وينها
بين ما صيح على امه وانطاهه تلفون اني فريت الغرفه فر ..

عاد حجت وياي المريه ...  هي سالتني منو ؟ واي كلتلهه ..

- عيني حبيبه جايتج بسالفه كون توصليها للمقصود .. وصليها لصاحبتها .. خلي تفكنا وتفك أهلها من العشاير والثارات

المريه كلتلي ..
- انتي من بيت أبو حميد !

- اييي عيني اني بنتهم .. وخايفه على اهلي الصار بيهم من ذاك اليوم لليوم كافي شبعنا ضيم ومرار  .. احنه ابنا تره تزوج وهسه عنده اثنين ولد توم ويصيحوله أبو وسام صارله تلث سنين متزوج .. بس همه ماحجوها كدام احد ولاا كدام مرته حجو على الطلايب والمشاكل وهسه مرته عرفت بي يريد وحده وتخبلت خبال .. راحت زعلانه لاهلها واخذت الجهال واخوتها صاحو وماكعدو .. احنه ماصدكنا عمر تزوج وصار عنده خلفه هسه كلشي راح ينهجم علينه وهذوله جهال مالهم ذنب .. ابوهم لو ذبحوه لو انشمر بالسجن مره الثانيه .. منو يفيدهم بعد ! تضل المره معلكه بركبتها اثنين ولد وحايره بزمانهه ! .. هم الله مايرضاهه .. عيني كولي للبنيه خلي تجوز من ابنا وتعوفه بحاله .. الرجال ازوج وهسه حاير بين مرته والجهال شلون يرجعهم وبين العشاير الماتخلص طلايبهم .. زين حبيبه امانه بركبتج هاي وصليها وخلي نحفظ اهلكم واهلنا .. تره اليوكع بيها بس هذوله الجهال وتضل خطيتهم بركبتها تااليهم لو يتيتمون لو يعيشون بدون ابوهم امهم حالفه ماترجعله وتشوفه الجهال الا يجوز من الي يريدها .. امااانه بركبتج توصليلها كل حجايه سمعتيها مني


هي ساكته اخر شي قبل ماتسد الخط كالت ..
- بالخير عليه أبو وسام والله كبر وبعده ماجاز من رعونيته ..يلا الله وياج عيني الله وياج