ضاد و عين

٣٢

عين

هذا جلال يباوعلي وعيونه تدمع  .. ليش هسه يلا شفته !
و امي تتلمس شعري , صارلي هواي ماشفتها هيج قريبه مني .. ليش جانت عايفتني ! 
..
مصطفى شنو ديحجيلي ومبين عصبي , ليش ضايج هيج ؟

اباوعلهم ومافهم شي .. كأن بيني وبينهم حاجز جام .. اشوفهم بس ماكدر اوصلهم واندمج وياهم
وهمه احسهم نفسي
شنو الخلل الصار وباعدنا هيج !
هذا الشي جنت أحاول افهمه واني اباوعلهم ..
وصعب عليه تركيز وفهم شي ..

من ساعتها واني اتلفت بكل مكان  .. ادور على حياتي قبل .. او مكاني الهادىء , مكاني العشت بي فتره مرتاحه ..
بس ماكدرت ارجع لهذيج الراحه ولا كدرت اتأقلم هنا ..

احس عايشه  بضباب ..
محاوطني من كل جهاتي ..
مادري انتظره هو يزول ! او اني اطلع منا !
لشوكت يبقى ؟ شلون اذا اريد اطلع !
اسئله ماراحت من بالي على طول مااني كاعده بينهم
عيوني تباوع باستغراب لكل واحد يوكف كدامي , لكل تفصيل يمي .. الباب .. الحايط .. امي الي دتطبخ .. البنكه .. ايه الكرسي المعلكه بالحايط .. البرده وهي تتحرك من الهوا
كلهن عبالك اول مره اشوفهن ..

هذا مصطفى  اجه ديحاجي امي ..
امي طلعت للطرمه ..
يمكن دتتلكى خطار ..

رجعو وياهم ' حميد '
هو من باب المطبخ يباوعلي ويبتسم .. اني ابتسمتله وكمت اشرتله يتفضل ..
وهو وكف كدامي ومخلي ايديه وره ظهره ..
ديحجي واني بس صافنه بوجهه .. اركز على حركة حلكه وارجع اباوع لعيونه
هو باوع لمصطفى .. بعدين راح كعد بالهول ..

امي اخذتني حتى اكعد يمهم ..
واني بس بقيت كاعده بطرف القنفه واباوعلهم وافكر شنو كالو ؟
أحاول اجمع كلمات على حسب حركته من يحجي ..
وصحاني من صفنتي .. مصطفى ..
حط بايدي دفتر صغير وقلم ..
مكتوب بالورقه ' شلونج يابه '
باوعت لمصطفى وهو ياشرلي اكتب وارد على حميد ..
فكتبت..

- بصحه زينه الحمدلله

انطيت الدفتر لمصطفى وحميد من اخذه اجه كعد يمي ..
صار يكتبلي واني اردله بالكتابه ..

- لبنى يابه خايفين عليج ساعدينا واحجيلنا شصار وياج هاي الفتره كلها

- انتو ساعدوني اني ماعرف شي

بقى لازم الدفتر ويباوع لمصطفى .. مصطفى اخذ الدفتر وكتبلي ..
- تسمعين شي ؟

اشرتله ' لا '
كتبلي ..
- من شوكت ماسمعتينا

كتبتله ..
- من كم يوم

هو من قراهه كعد بالكاع واني على القنفه وصار يكتبلي ..
- يعني قبلها تسمعيني من احاجيج

كتبتله ..
- انتو ماتحجون وياي حتى اسمعكم
ماشفتكم تحاجوني ابد

حميد اخذ الدفتر مني وكتب ..
- اني من اول يوم بالمستشفى يمج ماشفتيني ؟

قبل ماجاوبه بقيت صافنه أتذكر منو شفت منو منووو ؟؟
بعدين كتبتله ..
- ماتذكر شفت احد

مصطفى اشرلي اهدأ وحميد كتبلي ..
- تتغدين ونطلع للدكتور وضلي لابسه نظارتج لاتنزعيها  الله يخليج وركزي ويانه