ضاد و عين

٤٠

ضاد و عين
Adzzon

برمشة عين صارت المشكله .. وصارت هوسه العشاير .. وتدخلات العمام .. هوسه الولد بالمنطقه كل يوميه والصياح ..

مصطفى وعمر .. عدهم محل انشائيه ..
زبون مشتري منهم اكثر من وجبه ومتفق وياهم الفلوس من يسلمه أبو البيت أجرته ينطيهم ..
لان شغل مقاولين كل فلوسهم وتعاملهم نص بنص .. انطيني واسلمك بفلان يوم ..

هذا الزبون تأخر اكثر من أسبوعين على موعد الدفع .. مخابري مره مرتين يلا جايهم ..
جايين يتحاسبون والزبون اختلف عليهم ..
يكوللهم  ' فلان وجبه اني دافعها نقد بساعتها بس الظاهر انتو حاسبيها تسديد دين وممسجليها  '
وكاعدين يحسبوها وياه قطعه قطعه .. كل وحده وفلوسها وتاريخ دفعها ..
ومطولين ٣  ساعاات همه بس فاتحين الدفتر ويرجعون يحسبون .. والزبون عاند وياهم وقفل ' مليونين ونص ' ميقبل يعترف هنه من ضمن الحساب ويكوللهم
' انتو قفاصه وتريدون تطلعون خسايركم  براسي ' 
و الفلوس الباقيه عليه ميقبل يسلمهن كلهن .. هنه باقيات عليه دين '  ١٣ مليون '
يريد ينطي منهن بس ' مليون ونص ' هسه والاسبوع الجاي يلا يدفعلهم الباقي .. ولو ينطيهن كلهن لو لا ..

عمر ملاغي بالحجي وهذاك صار يتمسكن كدام اهل المحلات من التمو على هوستهم ..
  واحد من الملتمين طلع ' أبو سكله ' 
وهم جان يطلب هذا المقاول ..
اجاهم وضل يحجي عليه .. فشله كدام الناس ..
يكوله ' هاي انته وين متروح تشلع الكلب يلا تدفع الفلس .. مثلي اني على طابوكات علعلتني سنه  وطيرت رزقي من المشاكل '

مصطفى سامع هيج .. كبل لازمه ضاربه ..
يكول
' اني عرفته قفاص وأبو فليس .. وردته بس يزلك بحجايه داكسر ضلوعه .. من سمعته هيج ثبتت بعد عليه تهمته وطلعت نار كلبي بي '
..
مصطفى يكول
' احنه تعبانين بشغلنا وفلوسنا لميناهن بكسرة ظهر يلا فتحنا المحل .. غير نسترزق منه لو نكضيهه ديون والفلوس تتقسط بعد شستفاد منها !
اني اريد ربحي كل راس شهر بايدي .. غير هيج مايشتغل عندي '

مصطفى و عمر وجماعه من الزلم هناك .. مطردي للزبون من المنطقه ..
وبنفس الليله مصطفى دز لبيت الزبون جماعه ينطوه خبر ..
' عندك مهله ٣ أيام ترجع الفلوس كامله .. اذا مرجعتهن بايدك ناخذهن عشاير وقانون '

هو ثاني يوم دزلهم بيد جماعته ' اربع ملايين ' ويريد يصبروله بس يستلم من أبو البيت وينطيهم  ..
الولد مقبلو ياخذوهن .. ورجعوهن بيد جماعته ..
كلولهم ' بقن يومين خلي يدبر نفسه ويرجعهن كلهن منريد شلاع كلب '

وخلصن اليومين وهو ماكو ..
راحو عليه للبيت وأهله كايلين ' طالع مو هنا '
وضلو أسبوع يرحون عليه ويكلولهم '  طالع بشغله محافظات '
..
الولد حصلو عنوان بيت عمه .. راحو عليه وحجوله السالفه ..
كلوله
' بعد احنه جلبنه بيك . . تريد نهدك دز عليه خلي يرجع ونتحاسب .. ميرجع هنا تلكانه بابك كل يوم مجودرين '
اخذولهم يومين ورجعو لبيت عمه .. هذاك متعارك وياهم ويكوللهم 
' اني متبري منه ومكاطعهم  , بزعان  من مصايبه  '
يريد يفلت منهم وهمه جلبو بي .
دزو على ولد عم عمر وكم واحد من اهل مصطفى  وراحو عليه للبيت .. وره العشى .. هناك كلبوهه هوسه بيتهم ..
وضلو لنص الليل يلا رجعو ..
..
اتفقو عكب باجر يسوون كعده عشاير وانطوهم المكان يلتمون بي ..