ضاد و عين

٣٤

ضاد و عين

•••• ••••
Adzzon

💯💯

تلمست وجهه وكلتله ..
- هاي ضليت بره وجهك مثلج
وهم لا اكل ولا دوا

بقيت افرك عيوني وأريد اكوم اسويله اكل وهو كالي ..
' ليش رجعتيلي ؟ '

بقيت ساكته وهو رفع حرك راسه يم وجهي .. كال ..
' همه جبروج و دزوج عليه ؟ '

خليت ايدي على شعره ورفعت خصلاته ..
- لا اني اجيت اشوفك , سمعت بيك تعبان

عمر وخر راسه مني .. بس اني ماعفت شعره ..
ودرت وجهه عليه .. كلتله ..
- اعرف شكد يتعب شعور محد يفهمك ويوكف وياك , ماحبيت تعيش نفس مااني عشت , ماردتك تبقى وحدك ,
اريد اضل وياك مثل ماتمنيت لو واحد وياي يصبر عليه ويفهمني

هو وخر ايدي منه وكالي..
- جنتي تعبانه مني

- جنت وحدي .. ماتعبت منك بس جنت وحدي

كمت بسرعه حتى اقطع هذا الكلام .. ماريد اجاوبه على شي بعد ..

رحت للمطبخ و صحتله ..
' عمر شتريد عشى '
ما رد عليه ..
ضليت اصيحله لحد مااجه ..
كالي
' ماشتهي '

عفته يكعد بره واني سويت ' بيتنجان و طماطه '
اخذت الصينيه وخليتها بصفه ..
رحت جبت المي والخبز وكعدت ..
سويت لفه اكلتها اني وكلتله ..
- عيني اليوم العشى بالهوا الطيب , يلا راح ادللك اليوم اني اوكلك بيدي

هو يباوعلي ضايج واني اجيت اوكله دار وجهه .. ضليت الح عليه وهو معاند ميقبل ياكل ..
جان الزم وجهه قوي وحطيت اللفه كلهه بحلكه ..
وهو صيح
- شبييييج
- انته شبييك !! متاكل لعد اني المن سويت والله يالله

ضل يباوعلي وعافس الوجهه بس دياكل الي بحلكه . واني سويتله لفه ثانيه وهم خليته بحلكه غصبا عليه واكوله ..
- مو حرام لعد صينيه مصبوبه وانته متاكل .. اكو غيرك يتمنى كسرة خبز ياكلها وانته اوكلك بيدي وتتبطر

هو اخذ الخبزه وكال بضوجه ..
- يلا فهمنا عاد فهمناا

ابتسمت وهو صار ياكل وحده .. اني اللفه بيدي اضل اكل بيها شويه شويه حتى هو ياكل براحته ويشبع ..
جبتله الجاي وكلتله ..

- عمر هواي كعدنا بره كافي ثلجت انييي يلا تعال جوه يلاا

ماقبل يدخل ... بقيت واكفه يمه وهو يشرب الجاي ويباوع للجو ..
من خلص الجاي كالي ..
- حضري غراضج و باجر رجعي لبيتج