ضاد و عين

٢٣

ضاد و عين
💯
•••• ••••

Adzzon

اربعتهم ملتمين وجلال صار يفتح العلاكه ويطلع ' سجاجين لونها اسود ' و ' زنجيل حديد '
صحت عليه بعصبيه من فوك ...
- جلااال

همه كلهم باوعولي وهو صار يلفهن بالعلاكه بسرعه .. عمر ياشرلي انزل من السطح .. واني ركض نزلت وطلعت عليهم
لكيتهم مموجودين .. بس عمر هنا ..

جرني من ايدي ودخلني للبيت بعصبيه ويكولي' شطلعج !!! '

دفعت ايده وكلتله ' عوف كلشي .. فهمني هذا الشفته شنووو و ليش ؟ '
هو سد حلكي بايده ويكولي ' صووتج صووتج '
دفعني جوه للمطبخ و راح ..
بقيت الوب اريد اعرف شعدهم ؟!

للمغرب رحت على بيت رعد .. جان هستوه يريد يتعشى ما خليته ..
ضلينه واكفين بطرمتهم وجبرته الا يحجيلي شضامين عليه ..

كالي
- جلال يريد يأخذ ثار اخو وثاره من هذاك الي عذبه بالسجن .. وعمامه ميقبلون يسووهه دم ويه هذولاك لان فضوها بفصل و ابنهم الي كتل اخو جلال حكمو عليه خمس سنين سجن .. عمامه يكولون بعد ما عدنا شي يمهم .. بس هو يكول اني بالي غير تفكير
- و انتو شدخلكم بالسالفه !
- هو حجى ويانه ورادنا نوكف وياه نساعده .. كال حطو ايدكم بايدي ومعليكم
- عفييييه وانتو ركضتو وياه على الغلط !
- لعد نعوفه !

لزمت ايده بعصبيه ..
- رعد متروح وياهم انته مو مثلهم همه متعودين على المشاكل والعركات انته لاتورط نفسك
حتى لو يزعل منك جلال .. ممنوووع ترووح

هو نكلب وجهه ومقبل على كلامي وضليت شكد مااحجي وياه يكولي ' مو صاحبي هو ليش اعوفه ,تريدين اختل واعوفهم يتعاركون مو عيب '
شكد حاولت افهمه و اقنعه وهو عاند .. هددته احجي لابوه وابد ما خاف .. طلعت زعلانه عليه ..
وبقيت لثاني يوم اني روحي مخنوكه وايدي على كلبي مادرري بيهم شراح يسوون ..

كلبي ماينطيني اعوفهم يورطون نفسهم بمشاكل .. خليت امي تطلع لشغلهه واني رحت لبيت ام مصطفى ..
بعدني احجي وياهه بس سلمت وداسالهه وين الولد .. ونزل عمر ..
كبل جرني من ايدي وكال ' من رخصتج يمه '

اخذني للهول وسد الباب .. ضل متجتف ويكولي ' سولفي شعندج ؟ '
صرت احجيله ..
- ليش ضامين عليه سالفتكم ويه جلال ؟ يعني فوك ما حسبتوني غريبه وصرتو بس انتو صحبه وتتشاورون وحدكم هم تديرون وجهكم وتمشون من اشوفكم ؟
وتعرفوني اريد احاااجيكم لييش متجوون ليششش

- يعني شتريدين نحجيلج .. سوالف ولد متخصج
- ماااكو متخصني .. عمر هذااا شي يخصنا كلنا .. جلال مو اخويه شترييد كلبي مايحترك عليه واهتم لمشاكله ! تريدني مادخل وادري انتو رايحين تورطون نفسكم بمشاكل ماتخلص بعد

هو اخذ مناظري واني تنرفزت .. بقيت مخليه ايدي على عيوني واتافف وهو يكولي ..
- احنه لان نخاف عليج ونعرفج راح تاكلين كلوبنا بالحجي ماردناج تدخلين بالسالفه

- عممر والله دتغلطون والله هاي أفكار جلال مو صح .. تجيب المشاكل .. هي لو بيهه خير اله جان عمامه وكفو وياه

- أي نعرف بيها مشاكل ونعرف لا اهله يقبلون ولا اهلنه ولا كل العشيره

- ايييي لعععد شبيييكم

هو لزم اصابعي عصرهن وكالي ' لترجفين اهدي اهدي '
لزمت راسي وصرت احجيله بتوسل ..
- عمر ارجووك لا تشجعه على الغلط

كال ' اكعدي ' ومن كعدنا كلتله ' انطيني نظارتي ' ما قبل ..
صار يحجيلي ..

- اني مو اشجعه على الغلط .. جلال هو أصلا غلطان ورايح و مورط نفسه بس محد يدري بي

خليت ايدي على كلبي وهو كالي ..
- لبنى حجايه هاي اذا طلعت منا ثقي بالله بعد عمرج ما تشوفين واحدنا ولاتسمعين خبره

- والله وغلاتكم ماحجي سركم

هو لزم ايدي وكالي صوت ناصي ..
- جلال خاطف ولد صغير يصير ابن الرجال العذبه بالحبس

شهكت وهو سد حلكي بايده واني الرجفه صارت بصدري ..
قرب راسه يم وجهي وصار يكولي ..
- جلال مصاحبله جماعه مسلبجيه ودافعلهم فلوس وجايب الولد .. اهله و عمامه ميعرفون بي .. اذا عرفو بي يأذوه .. وهو يريد واحد يوكف وياه هذولاك بدو يستغلوه .. شافوه عنده فلوس وأهله زناكيل وهو صغير .. لعبو بحاله ..

اجاني كالي ' عمر الحكلي هاي سالفتي وهسه هذوله راح يبيعوني الفوكي والجواي ومايشبعون '

اخذ نفس يريد يحجي بس سكت .. و اني سألته ..
- تورطت وياه ؟

حرك راسه ' أي ' يم ركبتي واني خليت ايدي على حلكي كتمت صوت بجيتي ..
هو جر نفس قوي و وخر بعيد عني ..
كال ..

- اخذنا الولد منهم هسه هو بيد مصطفى .. خلاه بمكان بس الله يشوفه بي

- شلون اخذتوه !

- تفاهمنا وياهم .. مااخذناه بالعرك .. مفاوضات سويناهه وبقو يطلبون جلال فلوس كاللهم عشره أيام واجيبهن وسدينا سالفتهم

مسحت وجهي ورفعت شعري وره اذني .. كلتله ..
- الولد لا تأذوه , كول لجلال .. شلون مانته تعذبت وضلت بكلبك هذا هم يتاذى ويضل بكلبه ويدمر مستقبله بالخوف

- لا زين مدارينه .. شبيج هو بعده جاهل كلشي ميدري

- و شوكت ترجعوه ؟ عمر والله السالفه تخوف عفيه فضوهه بسرعه لا تتورطون اكثر

- مادري خلي نشوف شلون تصفى


لبسني نظارتي وضل يباوع بعيوني .. كالي ..
- فرتج على البيوت بطليها لا فد يوم اكسر رجلج .. عبالج مادري بيج كم مره رحتي على بيت جلال و رعد ..

ابتسمت بفشله وهو خنزر ..
- كبرتي لبنى , عيب تدكين بابهم .. عندج حجي تنتظرينا نجي وتحجيلنا .. اذا محتاجه شي وشفتينا تاخرنا دزين امج علينا

حركت راسي ' أي ' وهو وكف .. اني هم وكفت ومشيت كدامه .. داطلع وام مصطفى صاحتني ..
كلتلي ' ابقي عندي فرشات اريد اغسلهن واريدج تعاونيني اني فلاونزا ومابيه حيل '

ابتسمت بوجهه وكلتلها ' تدللين خاله '

بقيت يمها وهي من شغل المطبخ للمسح لكنس الحديقه يلااا طلعت الفرشات وخلتهن بالطشت بره بالطرمه .. بس نكعتهن وراحت تكمل الغدا واني بقيت اغسل بالفرشات ..

كملتهن وهي كلتلي عوفيهن يذبن ميهن بين ميرجعون الولد ويشروهن ..

فصرت اعصر بثوبي من جوه وفتحت الباب داطلع جان يجيني عمر من باب بيتهم .. كبل صار بوجهي ودفعني جوه ..
صاح على ام مصطفى .. انطتني عبايتهه لبستها يلا خلاني اطلع ..
والطريق كله يرزل بيه ..
واني اغطي نص وجهي بالعبايه واضحك وارجع اوخرهه اباوعله وابتسم بخباثه وارمش بسرعه وارجع ادير وجهي واغطي بالعبايه .. وهو يشيط باعصابه ..

لحد ماوصلنه البيت هو بزعانه روحه .. واني ابد محجيت بس اتمضحك بوجهه ..
فتحت الباب وهو اندار ديروح .. صحتله بلواكه ..

- عممممر

هو باوعلي وعاقج وجهه .. هاي شفته الفوك مدري شلون رافعهه ويه خشمه ..

نزعت العبايه ومديتهه اله .. وهو لزمهه بقيت مجلبه بيهه كلتله ..
- مو بس انته تهدد وتتزعل عيووني تره اني هم اعرف ازعل , شويه خفف حجيك هذا وياي

- أي واذا زعلتي ؟

- ما احجي وياك بعد وكل الحق عندي متكدر تحجي

- لا تحجين بعد احسن

دفعت العبايه عليه وسديت الباب .. بقيت واكفه وشويه وصرت اباوع من حافه الباب .. شفته راح ..
رحت للمطبخ وشفت الساعه صارت 11 و شويه .. واني ممسويه الغدا ..
صرت اركض ركض بالمطبخ ..

من رجعت امي كلتلها . اني رحت لبيت ام مصطفى وساعدتها بشغل البيت لان مريضه .. بس ماحجيتلها سالفه جلال ..

العصر عمر اجانه جايب ' دبة غاز ' بدل مال الطباخ بيها قليل ..
هو يباوعلي واني اباوعله شويه واندار ..

راح طلع وره شويه رجع .. كال لامي .. ' بنتج عدها درس هسه , اخذيها انتي '
اني بسرعه رحت على امي حضنتها وبعالي صوتي اضحك وكلتلها ..
' اييي ماااماا نروح سواا ونتمشى ,, ضاايجه والله ضايجه ضاايجه حباابه نفتر شويه ونرجع '

ماما ضحكت وكالتلي بدلي بسرعه .. واني رحت ولا انداريت عليه وباوعتله .. هو جان بس واكف ورايه وساكت ..
بدلت واجتي امي هم بدلت وطلعنا لكيناه واكف براس الفرع .. يدنك شويه ويباوعلنه ..

اخذت الدرس ومناك طلعنا تمشينا هوااي .. ماما اشترت ' لفتين حب ' ورحنا لمنتزه كعدنا اني وياها نسولف ونكرز ونضحك ..

اني وماما صديقات .. بينا احترام جبير بس علاقتنه قويه واحنه مرات حتى نتبادل بالقراصات والملابس .. لاني من كبرت صرت تقريبا نفس جسمها .. طويله ورشيقه ..
بس هي فرقها عني بشرتها بيضه اني بشرتي حنطيه ..

من ظلمت الدنيا وناس راحت هي كلتلي ' كومي اخذيلج فره بالمرجوحه طلعيها من نفسج '
واني ماصدكت سمحتلي .. رحت ركض كعدت على مرجوحه زنجيلها عالي ..
وهي اجتي رفعته الي .. بحيث صارت جليه ماطخ بالكاع ..

رادت تدفعني واني كلتلها ' لا عوفيني اتمرجح وحدددي '

صرت اتمرجح سريع .. والهوا بوجهي يخليني انتعش بعد مااريد انزل منها ..
وهي عافتني براحتي .. طولت يلا نزلت من تعبت ..

بقيت واكفه واخذ نفس ارتاح .. وجريتها الا تصعد بالمرجوحه .. وهي متقبل تكولي عيب ..
واني غصبا عليهه كعدتها وضليت افرها .. وهي تضحك ..
خليتها تنتعش بالهوا وتفرح يلا قبلت تنزل ..

رجعنا طول الطريق نضحك .. من وصلنا البيت لكينا ' جلال و عمر و رعد ' كاعدين ع الرصيف كدام بيتنا ..

دخلناهم البيت وهمه يحجون ويه ماما واني رحت غسلت و بدلت .. واجيتهم .. اول مانتبهت على جلال .. يباوعلي بنظره غريبه .. وكل شويه مدنك ويرجع يباوعلي يريد يحجي وعبالك مستحي ..

اني فهمته خجلان من هذاك موقفه وخايف لااني عرفت بموضوعه .. رحت جريته من شعره وكلتله ..
- ها جلاله وينك عايفني ما تسأل

هو ضحك وضل يبرر غيبته وصار يحجي بسوالف بيها طاري عمر واني مارديتله .
عمر وراهه كالي ' تعشيتن مبين طلعتجن طولت '
مارديت عليه ..
رجع جلال سألني ' شنو اكلتو بره ؟ ضربتونا بوري ؟ '
كلتله ..

- لا بس تونسنا ورجعنا

عمر كال' أي و متونسه متكومين تسويلنا اكل صار ساعه كاعدين '

درت وجهي ومارديتله ..
جلال ضربني على راسي وكالي ' هااا رافعه خشمج مبين زعلانه '

رعد راسا كالي ..
- اني هم زعلانه عليه ؟

ضحكت ومديت ايدي على خده كرصته وكلتله ..
- انته الروح والريه رعووودي

هو ضل يضحك ويهزهز بجتفه .. عمر عافنا و طلع ...

جلال ضل يعاتبني على عمر .. واني اكوله ' هو يريد منحجي اني شعليه '

ماما سوت كباب عروك وبيتنجان مشوي .. تعشو الولد واني شلت حصه لعمر .. هو كلش يحب هذا الاكل ..
من ديطلعون انطيت ماعونه لرعودي وخليت فوكاه كرصتين خبز .. وكلتله ..
' كول لعمر .. احنه نتزاعل بس منتكاطع '

راحو وبعد ماشفتهم أسبوع كامل ..
كل يوم انتظرهم .. و اصعد على السطح اباوع خاف بالشارع ومايجون عليه ..
وابد ماشفتهم ..

كلت خلي اروح على ام رعد هم اشوف الصغيرونه العب وياهه وهم اشوف بلكت رعد يحجيلي اخبارهم ..

اخذت امي العصريه و رحت .. سالنا على رعد .. امه كالت ' رايح ويه جلال لبيت جده على واهس الولد كم يوم ويرجعون '

اني من سمعت هيج رجف كلبي ... كلت هاي اكيد راحو على مصطفى وميحجون ..