ضاد و عين

٣٩

ضاد و عين
Adzzon

عمر كولش يعتز بسرى ويحترمها
وجان دائمآ خايف عليها لا تتاذى من اهله

من سمع طارديهه ما سكت .. راحلهم و تعارك ويه الكل
ومصطفى طابك وياه ..
مأذيهم حيل بالمشاكل يلا عافوهم ورجعو ..

بقت سرى يمنا هذا لليوم ..
وصلو خبر لحميد وهو ثاني يوم نزل من دوامه بوجهه علينه ...

كعد يتفاهم وياهه ورجعها للبيت ..
وهم متعارك وياهم .. هجمه للبيت على راسهم
ومعوض سرى
ماخذها سفره لسليمانيه على طول فتره نزوله
ومن رجع وداها لاهلها
وضل بعد كل ماينزل من الدوام ياخذهه للبيت
من يلتحق يوديها لاهلها ..

مشت الايام .. احنه كل مانريد نرتب لزواجنا
تطلعلنه سالفه ..
مره عم عمر توفى
مره امتحاناتي اخير سنه
مره فلوس ماكو
مره مشاكل من امه ويه امي
مره مصطفى يتمرض
و مره جلال تعارك ويه ابو عمر
وخبصو المنطقه ومشاكلهم شهر مافضت

وعمر متخبل .. ديدفع ايجار البيت كل شهر
وهو ميكعد بي غير بس بليل .. ينام ويطلع من
الصبح لشغله

لحد ما دخلنا ٢٠٠٦ ..
يوم السبت بالليل ..
طافيه الكهرباء .. جلال صعد نام بالسطح و امي بقت نايمه بالغرفه ..
عمر بقى كاعد يمي بالطرمه ..
دنسولف وماخذين راحتنا بالكعده ..
جان تندك الباب قوي .. جفلنا ..
و عمر وكف يريد يروح يفتحها واني ماخلي خفت منو جاينا بالليل هيج كسر الباب بالدك ..

جان يطفرلنا من الباب مصطفى ..
عمر تلكاه يريد يفهم منه شبي ..
وهو يريد يحجي ما بي ..

انطيته مي شرب يلا كال ...
- اطلعو من المنطقه بالعجل .. اخذ جلال وامشو
بالمنطقه مداهمات أمريكان جفتو على البيوت زلم كبار وشباب
الحكو اطلعو بالعججججل

عمر لزم مصطفى ويكوله ..
- نشرد ونعوف بيوتنا والنسوان صدك تحجي !

مصطفى صيح عليه ..
- يول امشي .. صبح بالشارع و لا تصبح بوكا .. امششي راح يصلونا يوول امشي

ضل يصيح لجلال .
وعمر حضن راسي ويكولي ' لا تخافين لا تخافين '

نزل جلال وعرف الصار ومصطفى استعجلهم وطلعهم من البيت ..
رحت كعدت امي وضلينه مقفلين البوب وكاعدين بالظلمه ندعي الله يبعد شرهم عنا ..

تقريبا نص ساعه وسمعنا صوت الهمرات بشارعنا وضوا الليزر الأحمر ياشر على بيتنا ..
صارو يدكون الباب واني مجلبه بامي ..
هي كلتلي ..
' اركضي لمي ذهبج '