ضاد و عين

٤٤

ضـاد  و  عـيـن

Adzzon
💯💯

رسلان كالتلي..
- اجيت اريد اعترف بشي اريد اطلعه من كلبي
راح يموتني ضلته

كمت تأكدت ماكو احد قريب الباب ويسمعنا
رجعتلهه وانطيتها الامان تحجي ..
هي تحجي وتدمع عينها
..

- من جانت سرى عايشه
تعاركت ويه امي لخاطر عمر
هي مقهوره عليه و ماسكتت لان اكلو حقه وعثرو بحياته

ابويه تأثر بكلامهه وبضغط حميد عليه
اتفق ويه سرى يسجل حقوق عمر كلها اله بس
بدون ماحد يدري
حتى امي مارادهه تعرف

سرى لان حامل وتعبانه كلفت بنيه وياهه بالشغل هي تمشي بشغله عمر
ورتبوها كلها.. اخر شي البنيه اجتي لبيتنه دتسلم الاوراق لسرى وامي شافتهه
تعاركت ويه سرى بس هي ضلت ضامه عليهه
امي ماسكتت وكعدت
لا
ضلت تدور وراهم
وعرفت ابويه موقع بهاي الاوراق
تخبلت
سوتهه مشكله شكبرهه
وضلت لازمه السجين وتصيح
' اذبح روحي لو هسه تنطوني الاوراق '

رسلان شهكت بالبجي .. واني حضنتهه
وهونت عليها ..
كلتلهه..

- هي امج ليش شاده عداوه ويه عمر
شبيها متريد لابنها الخير
متريده يستقر ويعيش مرتاح

- تريده يعيش
بس يمها ..
امي تعرف عمر اذا لزم هاي الفلوس راح يتزوجج ويكعد بيت وحده
وهي لا تريد زواجكم ولا تريده يصير بيده فلوس ويعيش حاله حال الشباب
تريده يضل بمحكوميتهه

رسلان ضلت تباوعلي .. اني ابتسمتلهه
كلتلهه..
- عادي
تعودت عليها متريدني .. ماضوج اني من اسمعها
بس اضوج على عمر
كاسر كلبي وضعه والله انقهر عليه
ماتهنى بحياته

هي اخذت نفس ومسحت خشمها.. كالتلي..
- امي اخذتهن للاوراق وحركتهن كدام عين سرى
سرى عناد بيها كالتلها
( الا اسجل باسم عمر جنه تعاادل فلوسه الاكلتيهه
وماتوصليها لو تموتين )

امي عادتها لسرى بكل شي
وضلت تريد تعرف شراح تسجل سرى لعمر

حميد يروح لدوامه هي تلعب بيها لعب
حتى ابنها تضربه
لا تخلي يطلع لا يشتري .. لا يدخل حمام جوه
اذا يفتر بالمطبخ تكلب الدنيا علينه

ضلت سرى حابسته فوك وكاعده وياه
فأمي تحجي عليها لان بس فوك متنزل
وتروح تصعدلها تتعارك وياهه على شغل البيت
وتفتش بغرفتهه غصبا عليها
ومن يجي حميد تشكيله منها
وكدام ابويه تحجي عليها وتخلي يضل يصيحلها
حتى تنزل
ويضل يعاتبها..هي تستحي من ابويه فتسكت