ضاد و عين

٣٨

ضاد و عين
Adzzon

خبر عقد المحكمه صار مفاجئ للكل ..
لان كلنا نعرف عمر بعد يحتاج وكت يكون نفسه , وموضوع العرس والعقد نهائيا مفاتحينه ..
عمر فاجئنا بي و السبب
( مزعوج من تصرفات جلال وميتحمل بعد حجايه منه )
حاولت اقنعه نصبر شويه بين مايدبر بيت حتى يصير العقد قريب للعرس .. وهو كالي
..
- هو حتى العرس ماصبرله بعد .. اني جنت ادور على بيت ايجاره زين ومالكى .. هنا البيوت كلها كبار من 300 متر وفوك وايجارتها حيل غاليه .. هسه اكو بيت قسمو مشتملات واني حجزت واحد منهن راح يكملوه للشهر الجاي و اخذه .. بعد ماعدنا شي

ماخربت واهسه بعد ومشيت على كلمته ..
رحنا حللنا اني وياه وسرى و حميد سوه بنفس اليوم ..
بقينا ننتظر النتيجه وموعد المحكمه ..

بهاي الفتره طلعت كم مره ويه امي للسوك ..
اشتريت ملابس الي و لعمر حتى نلبسهن بيوم العقد ..
و عمر كالي ' طلعت نتائج التحليل مطابق '
وهو حيل فرحان بيومها ..
مصطفى و رعد كالو ' احنه عازميكم على غده بيوم العقد بس تطلعون من المحكمه نروح مكان مرتب على الشط نتغده '

ومشى كل شي بهدوء وترتيب لحد قبل يوم موعد المحكمه ..
العصر عمر اجانه ..
متوتر ..
بس سلم كالي ..
' لبنى هويتي عندج ؟ '

ضليت أتذكر شويه بعدين كلتله ..
- لا مو عندي

ضل يلح عليه حتى أتذكر واني متاكده مماخذتهه ..
هو عصبي ويكولي ..
- امشي دوريها .. تذكري خاف غاسله الملابس ومفرغه الجيوب بالحمام باقيه   .. شوفيلياهه ويين

ضلينا اني وياه و امي ندور بالبيت .. نبشناه نبش ..
ومالكيناهه ..

عمر كعد محتار .. ويكول ..
- اخر مره رحت للصناعيه تسوكت غراض و هويتي بجيبي .. بالسيطرات طلعتها .. رجعت للمحل وهي موجوده بمحفظتي شفتها .. صار من البارحه ادور عليها ماكو .. لا بيت مصطفى و لا بيتنا و لا بالمحل .. حتى الجماعه السملتهم سيارتهم هم سالتهم عليها خاف واكعه بالسياره ومادري بيها .. وكالو ماكوو
وييين مادورها ماااكو
طارت الهويه طااارت

على كعدتنا .. دخل مصطفى ..
كبل كال ..
- هاا لكيتوها ؟

كلنه ضلينه ساكتين وملامحنا محتاره ..
مصطفى هم ضل ساكت وامي كالت
..
- سترك ياربي بس لاتوكع بيد واحد ابن حراام و يستغلها .. الوكت يخوف هسه .. كلشي ولا الهويه تضيع

مصطفى كللهه ..
- لاا لاا متروح بعيد .. هي هناا نلكاهه نلكاهه

امي سألت عمر ..
- اخذ شهادة الجنسيه  وحاجيهم شوف بلكت يسهلون امر