بسـم آللهہ)"
#نقطة_ضعف الحلقة 10
خشت فادية وهي تشبحلهم الزوز نظرات غريبة ، سلمت ع نور ونادت ع خوها
فادية : حسام نبيك في كلمتين
عرفت نور فادية شن تبي من الديـب ، وطلع الديـب مع اخته وخشت بيه للمطبخ
الديـب جبد الكرسي وقعمز : انشالله خير ؟
فادية بعتاب : عيب يلي ادير فيه
الديـب قال بهدوء وبعكس ما توقعت فادية اعترف بكل سلاسة : أنحبـها !
فادية انصدمت وقعدت تشبحله بإستغراب : تتسهوك ؟
الديـب : والي خالقك مانبصر ولا متعود نبصر في هالمواضيع ، ماتبوهاش كنتكم ؟
فادية ابتسمت : بالعكس نبوها
الديـب : خلاص اهم شي الموضوع مانبيش حتى الجن الازرق يسمع بيه !
فادية : حاضر
ناض الديـب ووطلع من المطبخ واتجه للباب وطلع ومـر اليوم عادي جداً ،ومرو الايام ، وفي واحد من الأيام روحت نور للحوش واتكت وهي تراجي في مكالمه الديـب ، تشبح لهاتفها الي ما عمره بادرت بيه هي واتصلت من لما عرفاته الديب! اتصل بيها ،
ردت بسعـادة نور : الو
الديـب بنبرة صوت جدية : الو نور
نور : اهلين شجو
الديـب : تمام وانتِ
نور :الحمدالله، خيرك ؟
الديـب وهو يسكر في الشنطة الصغيرة : خيرني ؟
نور : نحس فيك مش ع بعضك
الديـب وقف : ماشـي لـ سرت غدوا!
نور عقدت حواجبها بآستغراب : علاش ؟
الديـب : الدواعش هلكوهم ! ومعاش فيه مقاومة نهائي نص الجيش مات
نور تغيرت بدورها نبرة صوتها : قصدك بتمشي ؟
الديـب : ايه
نور : بروحك ؟
الديـب : لالا اني والاولاد
نـور : ضروري تمشي ؟
الديـب : ضروري هلبا ، لو ممشيناش هما حـ يجو !
نور بترجي : حسام !
الديـب شد شنطته وطلع من الدار واتجه لباب الحوش : ادعيلي بس !
نور خنقتها العبرة : هذا الي حكيت عليه يومها
الديـب : الي كاتبه ربي ح يصير
نور : ولا تأدو بإنفسكم للتهلكة !
الديـب : لـو كل واحد قال هالكلام وشد حوشه مكناش قاعدين عايشين لتوا
نـور سكتت لثواني قبل ما تقول : ما تمشيش
الديـب ركب سيارته المصفحة : ماتعرضيليش !
نور : لا بنعرضلك ، مش تحبني وتبيني ؟
الديـب ولـع سيارته : ايه ! نحبك ونبيك وميت فيك
نور : خلاص اماله اقعد ، قـاعدة نبيك اني
الديـب : ما تنسـينيش بالدعاء
نـور : علاش مُصر تعيش نفسك دور المسؤول !؟
ع فكرة انت مش مجبور تحارب ولا مجبور تتحمل مسؤولية اي حد غير نفسك
الديـب : الي تقولي فيه كله عارفه ومش حاجـة جديدة
نـور : خيرك هكي انت ؟
الديـب : خيرني ؟
نور : ماعرفتش كيف نتفاهم معاك !
الديـب سكت لثواني وهو يراجي فيه توضحله ، اما نور تفكرت كلام امه عليه وقالت : لو حاسب نفسك مافيش من يبيك انت غالط
الديـب : منسحابش ، اني متأكد ! اخطى امي مافيش من يبيني
نـور بهدوء : وأنـي ؟
الديـب : مش متأكد
نـور : لازم تتأكد
الديـب : ماعمرك قلتي
نـور : تراجـي فيا نقولها ؟
الديـب سكت ثواني قبل مايقول : نبي نسمعها منك قبل مانموت
نور بإندفاع : بعيد الشر عليك انشالله بعد عمر طويـل
الديـب : واحد ما يدريش ع روحه ، يروح وهو قاتل او مقتول !
نور : ربـي ينصركم عليهم يارب
الديـب : امين
نور : وتروحلي سالم غانـم ♥️
الديـب ابتسم : يارب
نور : كلمني لما توصل
الديـب : انشالله
________💕
اما عند أميرة ورجب يلي كانو يهدرزو بدورهم
اميرة : مستخسر فيا ؟
رجب : ياحبيبتي والله ماعندي حقه مش مستخسر
اميرة : رررجب من اولها هكي ! هذا الفيلو وقتلي ماعنديش حقه اماله عندك حق شنو
رجب : هلبا يا اميرة 3 الاف بنحطهم في فيلو بس
اميرة سكرت ع وجه رجب الخط بعصبية ، ولوحت الهاتف وقالت بغضب : قفاص ، غبي ! وفات اليوم ..
__________💕
. *********************** أعلن رئيس القوات الأمنية عن وصول الرتل المسانـد الى اراضي سرت فجر اليوم ، كما اوضح في بيان له ان سيتم تحرير البلاد قريباً من ايادي الدواعش ، مزيد من التفاصيل في التقرير التالي .. فتحت نور عيونها ع هذه الكلمات ، مسحت بإيدها ع وجهها ومدت ايدها وخدت الهاتف ، شافت الساعه يلي كانت ع الـ 10:40 ومافيش ولا مكالمة من الديـب ! وقررت لـ أول مرة انها تتصل هي وتطمن عليه ، واتصلت لكن بدون رد ، زادت اتصلت للمرة الثانية وماردش ! حاولت تقنع نفسها انه يمكن الهاتف مش جنبه او
مايسمعش فيه وناضت
___________💕
اما عند الديـب الي كـان يتجوّل في شوارع سرت بالسيارة المتواضعه يلي استعارها من صديقه السرتاوي ، وهو يستكشف في الأماكن والمنازل السكنية باش تكون عنده فكرة قبل الانخراط في الحرب ، لفتله نظره الزحمة يلي كانت بجانب وحدة من المحلات درس السيارة ونزل ، اتجه للزحمة وهو يسمع صراخ بألم وصوت جلد ، وقف عليهم وشاف الرجالة الاثنين الملتحيين الي يجلدو في الشاب ومعاهم راجل كبير في العمر يعيط على الناس
ويقول : هذا عبره لـ اي منحل ساقط علماني !!
يسمع في الانغام والمعزوفات والموسيقى المحرمة !!
تلفت حسام للراجل يلي جنبه وقال : علاش يضربو فيه ؟
الراجل : شدوه مداير سماعات في وذنه نزلوه من السيارة وبدو يجلدو فيه
الديـب عقد حواجبه بإنزعاج : لا حول ولا قوة الا بالله
وخر الديـب خطوات وتلفت وهو يسمع في صوت
الجلد ، قرر يدير دوره ع رجليه ، طلع من الشارع
هذا وطلع لشارع تاني اكثر حيوية ، محلات تجارية ،
سيارات مزدحمة ، شم ريحة الخبز الزكية وقرر يتجه
لمصدر الريحة يلي كان في اخر الشارع اتجه حسام
للكوشة وهو يسمع في كلمات باللغة العربية
الفصحى ، نظرات الملتحين ليه ولي لبسه الغربي ،
خش للكوشة يلي كانت كلها رجالة بإيزارات ، اشري
خمسة فردات خبزة وطلع مشقف نص فردة وياكل
فيها خبطت فيه المنقبة يلي كانت تمشي بخطوات
مسرعة وكملت خطواتها المرتبكة بدون ما تتأسف ولا تكلمه
طبس الديـب خدي التزدان يلي طاح منها ،
ولحقها وهو يقول : يا أبلة لحظة بس كملت المنقبة خطواتها مستعجلة بدون ما تعبره ،
لن قال الديب : تزدانك طاح منك !
تلفتت المنقبة وشافتله بإرتباك وخوف وخدت التزدان
لكن الديـب مطلقش التزدان ، شافتله بإستغراب
وقاللها بجدية : خيرك ؟
المنقبة بصوت واطي : يجـري وراي !
الديـب : من هو ؟
المنقبة : صاحب الدكان ، يبي يزوجني نفسه !
الديـب مافهمش بس حاول يساعدها وقال : غيري كندرتك !
نزلت المنقبة راسها وشافت كندرتها ذات اللون
الملفت والمميز وهي واضحة من تحت عبايتها
القصيرة نوعاً ما تلفتت يمين ويسار وخشت لمحل
الأحذية مع الديـب تلفت الديـب لصاحب المحل يلي
كان شاب صغيـر واضح عليه من اهل المدينة نحت
المنقبة كندرتها ولبست كندرة سوداء سادة كان
واقف الديـب يخلص في حقها لما خش الملتحي الي
حكت عليه ، رجل اسمراني كبير في العمر بلحيته
الحمراء يتطاير من عيونه الشر حطت المنقبة كندرتها
القديمة في باكو الكندرة الجديدة ولبست الجديدة ،
قبل ما الملتحي يشوفلها ، ويتجهلها ونبضات قلبها
تزيد ، طبس جنبها وخدي الفيوكة البيج قامها وتلفت
لصاحب المحل وقال : خشتلك وحدة لابسة حذاء باللون هظا ؟!
صاحب المحل وهو يدير في روحه يحاول يذكر : امممم اي يمكن
الملتحي : امتى ؟!
صاحب المحل : توا توا قبل ما تخش انت بثواني !
الملتحي : شن شرت ؟
صاحب المحل : شرت كندرة
الملتحي : كيف شكلها ؟
اتجه صاحب المحل اموديل منقرض جداً وقديم وخدي منه فردة ومدها : زي هذه
خدي الملتحي الفردة وعطي لصاحب المحل فلوس وطلع من غير لا يعرف لا سعر الكندرة ولا ياخد الفردة التانية ومجرد ما طلع حطت المنقبة ايدها ع صدرها وغمضت عيونها وتنهدت بـ براحة
تلفتلها الديـب وقال بسخرية : الحمدالله ع السلامة سندريـلا !
ضحكت المنقبة ووقفت : بارك الله فيك
رجع شاف حسام لصاحب المحل وقال : الكندرة يلي عطيتهوله مرات وحدة لابسه زيها
ابتسم الشاب صاحب الدكان وقال : الموديل هذا لي
خمسة سنين في المخزن ، ومانباعش منه ولا قطعة
! وومافيش الا تلاته محلات احذية في المنطقة والمحلين مش جايبين نفس الموديل
الديـب : تمام وسكت لثواني قبل ما يتجه لباب المحل ويقول : هي السلام عليكم طلعت وراه المنقبة
وقالت : دقيقة استنى
يـتـبـعــ............💗
للگآتبهہ:MeMe Ali💗
قرآءه مـمـتعه🍃💕
تعليق+تصويت=حلقه جديده🙈