مشاعر خارج دائره الصمت
البارت الثالث
ايسر:😔😔خطية الله يشافيهة ولادي هالشي لو بسبب
ابو رغد:لاسيدي جانت بلبل وبالمدرسة نار بس دكتور مايخاف الله سوالهة عملية لبلاعيمهة ودمر حبالهة الصوتية تالي حرمنة من صوتهة واتعقدت من معاير البنات الهة وبطلت حتى من المدرسة ورة ما عبرت الخامس اتوسلت بيهة عاد بس تاخذ سادس ماقبلت ماردت اضوجهة واجبرهة عفتهة براحتهة
ايسر:يبووو طلعت تتحسس شتكول علية هسة،احم عمي مايسولهة عملية ويرجع صوتهة
ابو رغد:والله ياسيدي سالت وتكلف هواي هاي صارلي ٣ سنين الم بالكت ادبرهن بس هالتشوف الحال مااكدر للمصاريف بس هي مو ماتحجي فدنوب هي صوتهة ناصي صار كلش بالاول وانوب كامت تتأذة كلش من تحجي وتتخربط فعافت الحجي
ايسر:ان شاء الله يشافيهة وتردلك صوتهة يملة البيت
ابو رغد:امين يارب
ايسر:ضلينة نسولف واخذني الوكت ماحسيت السوالف حلوة وياه انسان بسيط مار على كوووم ضيم وشايف وصابر وحامد الله وما مستسلم لهدنيا نسيت ضوجتي يم الضيم المار بيه وشوية واذن كمت صليت وكتلة سويلي طريق عمي اترخص
ابو رغد:لا والله ماتطلع لو هسة تضرب مدافع تريد تهين شيباتي تالي عمري اطلع ضيف وكت عشا ومامتعشي
ايسر:والله ياعمي نسيت وكتي وياك والحجية مريضة وماتتعشة الا اني وياهة وضليت احاول اطلع وهو وكفلي اخر شي اندكت باب الاستقبال راح ورجع جايب صينية العشا
ابو رغد:هاي كامل العشا حتى لا تكول يأخروني دظل يمي والله سيدي نسيت حتى مرضي وياك انتة بلسم الله شاهد
ايسر:هاي هي عمي لخاطرك بس اذا تعزني صدك بطل كلمة سيدي كولي ايسر ابو ورد بكيفك بعد
ابو رغد:متزوج ماشاء الله الله يهنيك ابني لان انتة تكولي اعتبرني ابنك احب اصيحك بي
ايسر:هاي هية حلوة منك واعتز اكون ابنك وظل يسالني عن بناتي ويكلي هسة تشوف شلون حياتك تصير جنة لان الله رزقك ببنات وبداخلي اكول مع الاسف ضجنة ومنغصتهة سهى تعشيت جان العشا بسيط بس شكد استلذيت بي طعمة طيب وبي نكهة من طبخ امي حسيتة مال ناس نيتهم صافية وكلوبهم بيض مو يكولن الطبخ نفس والظاهر بنتة نفسهة طيبة كملنة وشربنة الجاي واترخصت وطلعت حسيت براحة نفسية ما جنت حاسهة من قبل رغم شكد اطلع وية اصدقاء ومطاعم ومقاهي بس يمكن بساطة هالعالم جذبتني اكثر
رغد:اجة بابا ودخل هذا الضابط الشايف روحة وكلي سوي عشا عيب يطلع وجان جايب وياه فواكه دخلهن بابا حسيتة مرتب ويعرف بالاصول بس اسلوبة مزعج ويخوف سويت كباب طاوة وشوربة لبابا وكليت بتيتة وطماطة وطرشي وزلاطة وخضرة وخبز حار دزتة النة ام احمد المغرب خطية متخبز اذا متذكرني احسهة امي الثانية اذن الاذان وصبيت العشا واسمع بابا يكلة متطلع وازعل عاد بقة اووف ماحابة وجودة صليت ورجع بابا الجاي جان ماكل مبين عجبة طبخي😏😌وصبيتلهم جاي وديتة وشوية وطلع ردت اكول لبابا على اسلوبة وعيطتة بية بس كلت متسوة وعيب وبابا مبين مرتاحلة وهو وكف وياه وساعدة فبلعتهة وسكتت
ايسر: رجعت للبيت اعصابي هادئة حتى سهى مستغربة هدوئي وقبولي اعتذارهة بهالاسلوب وحاجيتة بكل هدوء انه تداري امي والهة اجر وشما تصبر تكبر بعيني اكثروهي مثل امهة ولازم تعتني بيهة لخاطري وهي انطلقت واجتي تبوس بية وتتعذر وماصديتهة وعشنا ليلة رومانسية هادئة
سهى:حبيبي اليوم انتة كلش مرتاح ومسترخي ما جنت هيج من طلعت ابد شصار كون يومية هالحب والدلع والدلال مزاجك يخبل
ايسر:ماكو شي تغير بية بس كعدت وية ناس عشرتهم وكعدتهم حلوة وارتاحت اعصابي
سهى:منو هالناس
ايسر:متعرفيهم
سهى:عرفني عليهم عادي
ايسر:مو ضروري تعرفيهم بس يكفي تعرفين هو رجال جبير بالعمر وميتة مرتة حتى تهدء نار غيرتج
سهى:شسوي غير احبك واغار عليك بس طمنتني هسة..........دقايق صمت.......زين ما عندة بنات
ايسر:وحدة بس على مااعتقد
سهى:متزوجة
ايسر:اووف يا اسئلتج التافهة شمدريني
سهى:اي اكيد مامتزوجة مو تكول الام ميتة
ايسر:ويجوز متزوجة وعايشة يم ابوهة او تزورة
سهى:ليش شفتهة انتة
ايسر:فتحت الباب بس ماطلعت من ورة الباب لان جان ابوهة مو هنا
سهى:هلاو هلاو لعد شوداك يمة وهو طالع و عندة بنية مو عيب ماتستحون
ايسر:شبيج انتي ماتعقلين وشعلي بالبنية كاعد يمهة كاعدة يمي وشنو العيب ابوهة ودخلني بيتة كدام العالم قابل داخل وحدي
سهى:هلا هلا انوب دخلت بيتهم وكعدت يمهم واكيد هي الطايحة الحظ كعدت تجيب وتودي كدامك اكيد درت بيك ضابط وخططت هي وابوهة يوكعوك ويذبون براسك هالساقطة بواكين الزلم
ايسر: مااتحملت طولة لسانهة وتجاوزهة شنو قابل اني هيج زوج واتقشمر بعدين البنية مؤدبة والرجال اخلاق شلون تفشر عليهم وتتلفظ هالالفاظ كدامي جريتهة من شعرهة وفريتهة علية وكتلهة السانج اكصة اذا اتجاوزتي ونطقت هالالفاظ انتي الظاهر ابد مو مال احترام ودفعتهة واخذت ملابسي ورحت نمت يم امي شكد مااحاول اسايرهة واصبر تطلعهة من ماعونهة اكثر واكثر تعبت ومحد واكف بعيني غير بناتي لان حتى مدارتهة لامي طلع مصلحة وبس طاحت اتبرت منهة نمت واني مفور الله يلعنهة شلون جنت مرتاح
رغد:عدت ٣ايام وجانت صحة بابا تتعب اكثر واكثر واني مابيدي شي غير دموعي واتوسل يروح للطبيب وميقبل اخر شي كلا لام احمد وزوجهة بلكو يقنعوه وصدك اجوي كمت اسويلهم جاي ورجعت وصلت للباب وسمعت كلام خلاني اجمد بمكاني +
ابو احمد:ياابو رغد ليش تعاندني دكوم ياخوية للدكتور يعني كعدة البيت تطيبك
ام احمد:اي يا ابو رغد مو حتى بنيتك كضت من البجي وعيونهة ورمت عاجبك تشلع كلبهة
ابورغد:ياجماعة جيتكم على راسي بس اني رحت للدكتور واعرف صحتي تعبت
ابو احمد:اي شكلك الطبيب
ابو رغد:كالي كلبي تعبان وصايرة عندي جلطة خفيفة وصمام بالقلب ينرادلة تبديل وعميلتة تكلف
ام احمد:يمة اسم الله ورغد تدري
ابو رغد:لاشلون اكللهة مااكدر اشوفهة تنقهر
رغد:دخلت وايدي ترجف ودموعي تصب واباوع لبابا ذبيت الصينية وركضت لحضنة وصرت ابجي شلون اشوفة مريض ومااكدر اسوي شي وهو يمسح على راسي ويكلي مابية شي رفعت راسي واشرتلة انه اني سمعت كلشي
ابورغد:لاتخافين اني اكول لاستاذ مهاب يدايني للعملية ويكطع من راتبي لاتخافين علي(وبداخلي اقنع بيهة ادري ماراح يقبل ليش هو شباقيلي واطلع من الشركة لان كبرت ولو طلعت شلون اسدد الراتب يادوب مكفي ايجار ومصرف ششتغل ولو سويت العملية مايحتاجلي كعدة وراحة شناكل بهالفترة جنت خالهة على الله)
رغد:مرت ايام وبابا صحتة تتعب اكثر واكثر واني الوج عليه ومابيدي شي اخر شي قررت اروح لمدير شركتهم بلكت من يعرف حالتة يساعدة وهو كضة عمرة يخدمهم كعد الصبح وكوة ريكتة واشرتلة اروح لام احمد محتاجتني ورحت عليهة خطية اخذتهة وياية ورحنالة وكوة قنعتهم خالة ام احمد تدخل ودخلت بس اني ماخلوهة تدخل اندارلي وظل يباوعلي من فوك لجوة بنضرات مو مريحة
مهاب:انداريت ومامتوقع هيج شكل بنت الحارس جانت بنية تسوالهة عشر نسوان بياض وعيون ملونة وحلك عبالك مرسوم بقلم وخشم صغير وخدود حمر بدون قطرة مكياج وجانت محجبة بس مبين جسمهة مرتب وانوب قزومة اوويلي رأسا عدلت نبرة صوتي لان جنت ناوي ارزلهة واطردهة فوك ماابوهة صارلة بالشهر ميداوم بدون اي مبرر انوب جايتني بنتة وردت اكللهة بعد عينة بمكانة حارس ماالة عيشة عندي بس من شفتهة لاوالله متتفوت كتلهة اتفضلي شرايدةسحبت ورقة وقلم وكتبت واني مستغرب تصرفهة وانطتني الورقة قريتهة وانصدمت هي متحجي وشارحة حالة ابوهة وتريد مساعدة وفلوس معندهم للعملية اشرتلهة تسمعيني هزت راسهة كتلهة اتفضلي كعدي وكعدت احاجيهة بهدوء امهدلهة الطريق وكمت اتقربت منهة
رغد:ظل يحجي انه والدج عزيز ونعزة ونعزكم وعمليتة تكلف بس اذا تردين اساعدة وفاجئني لزم ايدي وكال تعالي وياي للبيت ليلة واغركم فلوس رأسا سحبت ايدي وكمت على حيلي وعيوني حمر اول مرة اتمنى اعيط حتى اكلة انجب واحترم نفسك بعدتة عني بقوة وطلعت كوة ارجف وخالة ام احمد بس شافتني هيج لحكتني تركض وراية وتكلي فهميني وشصار واني احس انعميت من الغضب حسيت روحي عبالك وحدة رخيصة ركبت تكسي وخالة ام احمد تحاول تهدئني واني ارجف ودموعي تصب وصلت للبيت بوجهي للغرفة بدلت واني ارجف واتذكر شلون استرخصني حقة بابا من مانزل روحة لهيج بشر ثاري وحوش مو بشر هيج الفقير سهلة عليه شرفة بنضرهم طلعت وغسلت وجهي كوة وسويت الغدا لبابا وكوة كعدت وياه حتى لايشك بس مالي نفس انقهرت صدك من الموقف الصرت بي وعلى بابا ووضعة للمغرب اندكت الباب وطلعت جان الضابط ايسر اشرتلة بمعنى تفضل ودخلت فتحت الاستقبال ودخلتة على بابا جانت نومتة بالاستقبال حتى لايكوم ويكعد هواي وقريب...
الكاتبة ايه.... يتبع