الرجل الاربعيني باللهجة الليبية

البارت الثامن والتلاثين

البارت38

#الرجل_الاربعيني_ج2

#جميله_جاسم

الايام ياصااحب علينا ضاعو💕

فسوق المشاعر بالرخيص انباعو

فسوق المشاعر ضعنا💥

مضي وقتنا عدى خلاص انبعنا💥

لقط جرح من بعد الطياب وجعنا

من أحباب شوره حبنا ماراعو ....

داليا... راقدة ونسمع في رعد يتكلم بصوت عالي ..مافهمتش من ايكلم ومع من يتعااارك... وامتي لحق اينوووض ...

انحس في روحي تعبانه شن بنوضني .. شفت الساعه لقيتها العشرة ونص ...

الي هالوقت راااقدة منوضني حد  ورعد متعود يفطر الساعه تمانيه الصبح ..

عدلت روحي ونضت من علي السرير ... نبي نعرف عركه اليوم وكارثه اليوم من وين بتجيينا ..

وقفت علي الدروج لقيت ..مودة الصووت الله ايبارك ..ورعد ..مش امقصر شوي ويضربها ... نزلت

مودة...  وشن قتلك اني الي اتعيط في وجهي نبييي شفرة تعرف اتجيبهااالي ولا ميصيرش خير ...

رعد.. وقت تعدلي منطقك وسلووبك وتصرفاااااتك يامدااام انجيبلك .....
غييرها متطمعيش ..لاعلي بالك فوتتلك مكالمه جواااد الكلللب  الي تهدرزي معاااه انسي  اصل الشفرة طلوع بري من الحوش ممنوع

مودة..نبي اعلاش كااارهني اه علااااش شن الي دايرتهولك مودة وهكي صاااير معاك ..

رعد... اني ماكاره حد اني كاره الوقت الي حطك قداامي عندك عاادي اتكلمي جواد راس حشييش خااانب كلللب لاعب ببناويت ليبيا لعب  وين قااعدة انتي في حوش رعد الي تخااف منه ليبيا كللها ...

وحشمتيني وقصرتي بوجهي شن تشبحي فيا مقووورن اني خروووف قداامك ...تتربي من جديييد ولا العصا علي جلللدك

مودة... انته تفكييرك خااامر  هكي وتشبح في ماضييك لمعفن وعلي بالك الناس كلها زيييك ... نعرف من وين انجيب حاجاتي بمكالمه لناس الخامر اتجيني الي عندي و مشكووور يااابطلل .. هوينها مرتتك ..
دلعها واحني من وين جاايين من كناااسه عاادي ميهمش رعد النضيييف يقعد نضييف...

داليا.. نشبح فيهم كلام كبيير رعد عيوونه حمممر من الغيييظ ومودة مش امقصرة ..مابيتش ندخل ..الا لما حسييت رعد ..شدها مع شعرها  .اني اهني ..نزلللت نجري طووول ..
ونسيت وجعي ونسيت النزييف وقتلي الدكتورة ارتاحي..

وصلت لوطي ...رعددددد لاااااا متضربهاااش ..

رعد.. داليا انتي ارقي فوووق ومتدخليييش اركبي ...

اروي.... رعد عيييب خليييها عيييب ..

داليا...رععد كانك تحبني خلليها ... عيون رعد حمر واعصاابه واااصله للخشم...... وكلاام كبيبر قالاته مودة محسيتش غير رعد ايكر فيها مع ايدها ورجلها المجروووحه مش قادرة تمشي دخلها لدااار وصكر عليييها ...

واني واروى انعييطو وراااه ..رعددد
وانطقو في الباب.... رعد افتتتح رعددد

رعد ... جتنا عييطه رعد فتح البااااب في وجووهنا زلزلت قلوووبنا ....

رعد ... اقلببببببببببببي وجههههههك انتي ويااااهاااااااا ....

وطربق الباب في وجوووهنا يااااربي شن هالايااااااام السوووود هذوووو...

رجليا خلاااص اول مرة انشووف رعد هكي ... مع انه ميضربش نهااائي ايكشخ ..وهيبته اتخوووفك من غييير فعل ....

مشيت قعمزت ... واروى واااقفه .. نستنو في اي صووت من مودة ايدل علي انه يضرب فيها. مهناش ....

رعد...اسمعي مزبوووط وحطي كل كلمه انقووووولها فيها في ودنننك خرررس تسمعي ..

اقسسم بالله ياامودة نسمع بيييك لاعبة لعب من وراي ولا مكلمه كلب ابن كلللب من وراااي اقسم بالله نقتلك بطلقه وما ايرفلي جفن   تسمعي...

مودة... اي تفلح تفللح فيا اني لعلمك اني لكلاااب هذو الي تحكي عليهم ياااشييييخ املعبتهم علي اصااابعي لعبببب ..جوااد بكلمه مني ايجي يزحف لرجليييا 

رعد.. اخخخخخخخخخ اخخخخ معشش تجيبي سيييرت اصل اصصله فيييي فمممك ياااامصخه يااااكلللبه لو سمعك حد غيييري ياااحمااارة يمشي باله وييين ..
اه وييين شن تسحابي رووحك ولا مستهترة  بلكلب الي قداامك وسااكتلك تي جوااد خوووك قداامك مقدراش بتقدرييه انتي يا ......... يا.............

وقسم بمن احل القسم منولي رعد لو ما ربيتكش من جديد

مودة... كلاامك البيئي المنحط خليييه لي عمرررك لاكن حتي الخيييير الي درته معاك مينفعش ..

رعد.. تعرفي قاااعد شاااد ايدي من قداااك منبيش نضربك ..لانه مش رعد الي بسترجل علي مراااء لاكن والله هالمرة شديت روحي المرة الجااايه قتتتتتل دببببح....كللللبة..

طلعت دمي فاااير من الدااار ...لقيت اروي وداليا واقفااات ..عيوون داليا فيهم لوووم وعتب ...
واني واااصله الي الستااار ...من الكلبه الي الدااخل ..
سكرت اعليها في الدااار ..نبي انحل قصة جواد قبل لا اتلبزها هذي ....

اشرتلهم بايدي ..
قسم بالله وحدة فييكم تفتح علي اصللل اصلها الدااار اندخلها معاااها ....فااااهماااااات ...

طلعت من الحوش شااايطه في جد جدي النااار ..ركبت في السييااارة ومش عارف وين الوجها...فكرت بنمشي لحوش  سمير في الزاويه رافعيين جواد هو ونااصر ... شفت تليفوني لقيت روحي نااسيه في الحوش

واني بعدت مافيهاش كيف انولي انجييبه منبييش من ايكلمني منهم عارف داليا بتحرق الهاتف حرق ...

مشيت لنوري في الحوش عمتي سالمه مشبحتهاش الا مرة في المستشفي هيا عاارفه اني عااايش ...
حسب ماقالي نوري وداليا قالت مبكتش بكل عرفتها تعرف شي ...

وصلت للحوش وقفت ..طقيت الباب ...
فتحلي نوري ...

نوري... اووووه غضب الليل شن صاااير من كوارث عيوونك مايطمنووش بكلللل ..فوووووت فووت داخل ..

رعد... تي  شن مش صاااير بس الي ايخلط علي النساوين ينجي من الكوارث يووم بااهي وميه مزقحااات مغبرات..

نوري .. ههههههه شكلها واصله الي الستاااار  ..

رعد .. قعمزت في المربوعه..... والله الواحد ايقولا خااطرة ولي للجنوب وانقتل غادي خييرلك ..

نوري... ارفعني معااك هالمرة انموتو مع بعض هيا مغبرة مغبرة العيشة ...
شن صاااير  بالزبط...

رعد... مودة الكلبه فشييت غلي فيها وحبستها ...

نوري .. ضربتهاااا .

رعد.. خيييرك فريييت من ايمته رعد ايمد في ايده ...ناويه بتجلطني تنقرز علي شفرة املوحها منها ...ليها يومين ...

نوري..... مش عارف شن بنقوولك لاكن البنت فكرتني في شبابك نسخه منك ...

رعد... والله عاارف هالشي انها اتهني  علي روحها وعلي حقها ..لاكن مش بطريقه هذي ...

نوري... شن دايرة بالزبط ... قعدة اتكلم فييي جماعه بووها ال....... لكلاب

رعد ... ياريتها هكي هيا اتفشخ بالكلااام وتقول في كلام اكبر منها ليين شكيييت انها عندها عمله مع جوااد وعارف رووحي بننصدم لو بيقوولي شي عليها بنقتلا في مكاانه ...

والي قاهرني اكثر الماضي لمصخ الي عندها معش نقدر انسيطر عليه ..

نوري...عندك شي انته توة ...

رعد.. ماعندي شي بنهرب من الحوش الي المغرب ..مع انه داليا ..خليتها مريضه ..لاكن بينها معاها اروي اتهني اعليها...

نوري.. اهو النقال كلمها منه علي رقمك قلها طالعين لزاويه نمشو نتفااهمو مع جواد انديرولا حل ...

رعد.. وانته قلتها عطيني هاتفك ...خديت الهاتف  كلمت مرة مردتش المرة التاانيه رنيت علي هاتفها وعاودت علي رقمي اني

داليا...
من صبح ربي نضت متكهربه ..منضر رعد ايخوف ..مع اني حسيت بعمري كاامل بالامان معاه لاكن مش عارفه علاش تصرفه مع مودة هكي ...
صح مودة مش هادية امرها وكلاامها كبييير في حق خووها ..وانها كلمت اعدائهم بالهاتف لاكن ..
مفروض من المعامله باللين ...

الي زي مودة محتااجه اهتمام اكثر لانه راسها يااابس اكثر من الازم ..

وهذا تاني طلع من غير ما ايقولي كيف حالك متقولش امس نايضه من المووت والنزيف مستمر ..واني بطني ومصاريني بيتقطعو ..اوووف ...
خشيت للكوجينه لقيت ..
اروي واقفه علي الغاز ...

والله يا اروي مافيش حد امبرد رااسه زييك...
صحه ليييييك

اروي.. الي بيجري وراي المشاكل بتجيه الي عنده وحدة زي حالتي بنتي اهم شي عندي واخلاص ...

داليا.. مودة شن انديرو فيها من بكري ساااكته ولا حركه من قال اديير في روحها حااجه ..

اروي... مستحيييله مودة اكبر من انها تنتحر.. تعرفي من الي خدالي حقي من بو جيهان ...اه مودة..

خسرته فلووس عمره وضحكت اعلييه لانها بحكم شغلها تعرف كل شي...

داليا.. والله اني انحس فيها نسخه من رعد لذلك مقدروش يتفااهمو ..

اروي... عليك نور . الراجل الي زي رعد غاااضب وااعر وصااعب في التعامل امعااه متقدرش اتعيش معاه وحدة زي مودة ... تعرفي علاش ..

لانه في نفس الطبقه الفكريه لاحضي انه رعد تعلق بيييك وحبك هلللبه لانك هادية قدرتي تمتصي غضب رعد ... لاكن مودة ..اهو انقوولك مش حيتفااهمو ..

داليا.. نبي نسالك مودة كانت تشتغل مع بوك الله يرحمه في شني يعني كيف تعرفت علي صحابه الي رعد مش طايقهم ...

اروى... تفضلي طاسة العصيير ونقصي القهوة مش كويسة لييك انتي توة مع النزيف ...

مودة كانت علي الماليه ..عند بوي يعني فلوسهم هذو كلهم تحتها واكثر من مرة متعاركة هي وبوي ادير في حاجات من راسها صح احني توؤم لاكن مختلف هلبا لذلك توة ماحد يعرف شن في راسها ....

داليا ... مش عارفه شن بنقلك ان شالله ربي يستر قمت طاسه العصير رن تيلفوني جنبي رقم نوري . .

شن يبي نوري زعما رنه بس ...

قعدت انراجي
جتني رساله اني رعد ونسيت تليفوني في الحوش طالع لي الزاويه صكرو الباب اعليكم مروح المغرب ..

اروي.. شن فييه خيرك تقري وعاقدة حواجبك

داليا .. شووفي هي البي رعد امخلي تليفووونه ومااشي لزاويه شن عنده غاادي  بس ولا ايقول عندي مرتي مريضه قريب اتموووت حتي كيف حالك اليوم ماقاالها ...

اروي.. هههههه خليي يهرب اقل شي من المشااكل كيف امروح من نص المووت ولقي مصايب قداامه مابعدة الحق...

داليا... حطيت طااستي بالله اني وين وانتي وين يااروي ...

رقيت فوق شبحت تليفونه لقيت قعد لقيت اربع مكالمات ... من نوري ... ورسااله. ..

حطيته علي جيها .. أكيد باعت نفس الرساااله ...

مشيت رقدت علي ضهري وانفكر شن مصيير مودة ..كيف ماشي ومخليها محبوسه مش تبي تطلع لحمام ..وهو مروح المغرب ..خديت التليفون وبنبعتله رسااله علي تليفون نوري...

كيف شديته رن في ايدي رقم غريييب من زعما ...
قعدت شاداته قداش  في ايدي لييين  وقف ...

خشيت فتحت الرسالة والي بيصير ايصيير ..اكيد مش حيقولي شي.

لما فتحتها انصدمت  بنت الي راسله ونفس الرقم الي امكلم توة الصيغه واضحه انها بنت...

كاتبه فرحت بي رجووعك يااارعد وان شالله ربي ايبعد علييك الحزن واصحاب السوء والمشاكل ولا اني عارفاتك انته تشري فييهم لمشااكل  بربع .....

  فكرت من هيا هذي من وين بيجيه والرقم ليبي مش دولي ولو دولي اكيد حوراء من وين بيجيها هو كيف شاااريه جديد بعد ما روح ومغيير الشفرة ..

اخخخخخ بس الكلبه هذي تعرف انه متزوج وتلعب اعلييه ..

خديت الرساله ورديت اعليها معش اتكلمني رجاءا  ومسحتها والمكالمات مسحتهم .مش عارفه وقتها شن الي خلاني نصرف هكي ممكن غيرة ممكن منبيش رعد ايضييع مني وزيادة مشااكل راابخه في الحوش ...

خديت الرقم درتلا بلوووك . ... ومسحت العلامات علي انه كلم ومسحت الرساله وحطيته في مكانه ...

اول مرة نجرأ نفتح تليفونه بالعادة معنداش نت ولا فاايبر ولا واتس ..كل شي اعتمادة علي المكالمات والرسايل النصيه  واصلا تليفون كيم قديم ...

من التفكيير حسيت روحي راااقدة وراسي زي الطببل وبطني مش نااقصه وجع اوووف من هذي الي بتاخد رعد مني ...

رعد....
طول الطريق اعصاابي واصله الي الستاار وخايف نمشي لجواد ويقولي شي علي مودة ننصدم منه ...وصلنا الساعه تلاته دايره في سانيه بين الزاويه وطرابس  جدايم ...

نزلت لقيت سمير وناصر امقعمزين في الفم والباين انه جواد الداخل ...

وصلت سلمت علي جماعتي وافكاري ساابقتني الدااخل نبي جوااد نبي انمصمصه تمصمييص ...

وين صاحبنا الداخل

سمير... الدااخل راقد متريح واحني انعسو ليل كامل

خشيت الداخل لقيته رابطينه علي كرسي ومقابلته كنبه الاستراحه صغيره كوجينه وحمام ودار جانبه وصاله توزيع ..

قعمزت قدامه وسكرت الباب نبي كان قال شي علي مودة ماحد يسمع ...

توة مافي حد من غير اني وانته وتالتنه ابلييس لذلك تكلللم واني بنسمع ..

جواد.. تعرف انك نذل..

رعد..  كل واحد ايشوف بعين طبعه صحيييت

شن تعرف علي بوي وشن تبي مني ومن بااعتك وتقتل رعد ورث بوي من المسؤول اعليه ..

جواد.. الاسئله هذي تلقاهم عندك اختك واجابتهم ..مش عندي..

رعد.. نضت من علي الكنبه وشديتله حناااكه وراس علي سنوووني ...
سسسسسسيرتهااا معش اتجيبها في فمك ي .... يا ...... يا .....

جواد .. هههههههه محرووق من عماايلها السوودة رقع شن بترقع فيها...

رعد... يحرم عليا دييني ياجواد كان مزال شفت الضي انولي كلللب ابن كلللب ..تكلم متكفرش ديييني
تكلللللللم ..

جواد... تبي انتكلم علي اختك وعارها ولا علي بووك ال

قعد ماكملش كلمته حسيت علي نوري ضاااربه بوكس علي وجها طيحه هو والكرسي...
اني انصدمت من الموقف امتي لحق نوري ايخش وامتي لحق يسمع ...

قمته من عليه ..نوري خليه مزااااال نبو نسمعو كلام تااني خلييه...

نوري... تيييييي شن خلييييه اقتل الكلبببب ولوحه في البحر حيوااان ...

جواد... ههههه ماهو هاماته سمعه اخته...

رعد ...نشبحلا وجها غل وكفر ديييين ماقعدش في راااسي ... شدييته من علي الكرسي ....وضربته بوكس ايمين وبوكس ايساااار ...
وهو ايكح ... واني تنفسي رايح فيها ضربته ضرب في حياتي كامله مضرب حد ويا كسرته تكسيير

سيييرته اختي يااااا.كللللب ياااا.......  معش اتجيبها في فمك...

.شفت لي نوري لقيته اعصااب ...

حدفت الكرسي بعييد وخليناها دميات امعبي... ونفضت كتفي ... حسيت الجرح يوجع ... اخخخ ...

طلعت وصكرت علييه ... نوري طاالع البراء ..
وفاش غله في الدخان ..

اني راسي بيطربق اعصااب ناصر وسميير منصدمين فينا شن الي صاااير ...

مشيت لنوري ومستغرب من ردة فعله ان شالله بس الي في خاطري مايطلعش صح...

نوري الي سمعته الداخل خلييه بيناتنه ..باهي لين نعرف شن املبزة...

نوري... رعد انته من كل عقلك اتكلم هذا جرد كلب بلعاني يبي ايشكك تقتك في اختك..

اني مرتين شبحتها مستحيله ادير شي خااطي خييرك هكي ..
ساكتله متخليش يتكلم علي حسابه ..وين قااعدين احني ..

رعد.. اني عارف تقتي بيها اكبر لاكن مرات شاد اعليها شي ..انته كان سمعتها اليوم اتشك فيها اكثر مني

نوري .لخاااطر ربك متزيدنيش كيف بنفهمك انه كذاب ..
تي انته مشبحتهاااش كيف اتوعد لوطلع حد قاتلك بتقتلا..مشبحتاهش في المستشفي لما خشت وعرفت انك حي مش مييت قريب طربقت العيادة علي راسي  ..عندك حق اتقولا لكلام هذا ...

رعد.. ..اخخخخ اني هذا الي حارقني بس انه بوي خلاها بين التريس تخدم وتعرفت علي نمادج حقيرة فروخ حرااام سرسرية  ....

نوري... خلييك ساااكت وهادي وخلااص ..اليوم جوااد انحلوها معاااه ...معش فيها كلاام .

رعد.. مش سااهله ياراجل هذا واصل في الدوله ولو قتلناه بنتحاكمو ..

نوري... مستحيل نقتلووه ...

رعد.. خلاص عندي دبارته... تعال امعاي الدم الي ركبته وغلنه انفشوه فيه ...

قعدت اني ونوري الي الليل كل مرة اتجيه ضربه اعترف بكل شي ..وياريته سكت ولا تكلم ...خدينا منه اوراق مهمة ..لبوي ...ودرنااه في سيارة ولينا الاربعه العصر لطرابلس ...
قعدنا انلفو علي مكاان اخر شي .. لوحناه مكان القبر. .وعطينا علم لي جماعته بشفرة واخدها نوري جديدة ..ولوحنااها...
يووم كاامل دمااغي يطبخ ..وصلت تقريبا الحوش المغرب نوري ..وصلته ..وروحت ..
خشيت ..للحوش لقيته مسكت ... اروي وداليا ...
امقعمزات في الصاله ..

خشيت سلمت اعليهم  عيونهم متبشرش بخيير. .قعمزت جنب داليا ...

كيف حالك توة...

داليا... صح النوم راجلي العزييييز

رعد... شفتلها لقيتها امكشمه ..والفم ميترو قدامها.. ابتسمتلها ...مش طالع اعليك الاعصاب..

وانتي خييرك مخلوعه...

اروي... عندي خبر وخايفه انقولا ...

رعد.. هو رعد طول عمرة في المصاايب قولي شن فييه خلصيينا حطييي الكلمه ..

اروي... مرام في ليبيا امس روحت واليوم كلمتني وقالت تبي تطلق من راجلها  مروحه بروحها وقاعدة في الحووش  ...

للحكايه بقيه...

جميله جاسم ..