الرجل الاربعيني باللهجة الليبية

البارت السابع عشر

البارت 16

#الرجل_الاربعيني

#جميلة_جاسم

وين مـــا نقـول نهونك
يلي مذبلني سواد عيونك
لا حذاك في الدنيا علم لا دونك
ولكن خسارة فيك عاكس عوني
ما زال ما عندي نقص قانونك
كيف ماأنت عندك نقص قانوني
ونجن قيس من ليلي ونا مجنونك
حتي ونا سليم الناس يحسابوني
وين ما ثمر غيري قطف عرجونك
ونا الهم لو يقتل كبار غبوني
...

رعد ...اخر حاجه كنت انتوقعها حاتم يغتالوه معقوله محاوله اغتيااال ايدي علي الهاتف واقف فم الباب وانكلم في ناااصر..

معرفوش من الي هاجم اعليهم ناااصر ..

ناصر .. لاله قالو طالع من حوشه ومطوقينه زوز سيارات وراميين في السواق والي جنبه وهو جايه فيه طلقه ..

رعد.. تو كيف الحل نمشولا في المستشفي زعما...

ناصر .. تي شن نمشولا مقلووووب المستشفي والسيارات علي السااحلي واحتمال حتي بووك غادي  لوح اعليك ...

رعد... تسحابني عز كماااله اتكمله اعرفلي نوع السيارات الي مطوقيينه كان فيها كيف ..

ناصر .. ان شالله توة اكييد اينزلو الي حضرو الحادت

رعد .. خلاص نعبى اعلييك

ناصر.. اي شوي ونرد علييك .. لاكن كيف بتقول لي بنته

رعد.. انقلها بوك مضروب و ان شالله فجهنم وباس المصييير شن بدييير ..
اسمع نااصر  اول ما ايموت قووولي اه

ناصر.. ههههههه اول مرة انشوف واحد فرحان بموت نسيبه ...

رعد.. اني هذا الي قاااهرني الا هو نسييبي وزبكت في بنته طوول العمر انراجي في موته .  
...
صكرت من ناااصر وكيف بنخش فتحت الباب لقيت في وجهي داليا حاطه ايدها علي خدها وتبكي ..اهووووووو والله ماهو وقتها المنايح توة ..

احم داليا اكيد سمعتييي........

قعد ماكملتش كلامي اشرتلي بايدها بمعني اسكت التفتت وخشت لدااار بلا كلام ولاعبرت ولا قااالت شي ...

والله ماني ناااقص  غضب وبكااء ونرضي هذي وهذي اني بروحي مش  متحمل روحي انحير علي ايه علي داليا علي حوراء الي قاعدة في القلب ..
عمر كااامل ماشبحلي حد في خلقتي ولعتها في مرة

سكرت باب الحوش وطلعت للمربوعه قعمزت الي العشاء ومافيش خبر علي حااتم متكتميين علي اخباااره ... قمت هاتفي في بالي انكلم حوراء ..معقوله اني شن انديير اليوم مش طايق روحي وتكلمت بحدية معاها اترد عليا زعما   الساعه 11 في اليل
حطيت علي رقمها وقعدت نشبحلا ..

حوراء... روحت من المستشفي راسي يوجع فيا لقطه رعد قعدت في قلبي تمنيت انه ايقولي شي حلو صح كنت نضايق منه لما يدخل في خصوصياتي..

وتعاملت معاه بغل ومكر لاني مش متعوده لاكن توة حسيت العكس تمنيت اشدني مع ايدي ويقولي نبي نخطبك يشبح لي عيووني نضرته اتريحني ..
اااخخ
بس لو نعرف هذو من بس وخايف اعليهم معقوله هذو خواته ..
مستحييله هو بووه متقاطع هو ويااه
.
خشيت للحوش لقيتهم كلهم امقعمزيين سلمت وفتت لي داري طووول
صليت المغرب وبدلت من ريحة المستشفي ..
لقيت امي في الكوجييينه متعبتها برووحها واني في المستشفي من الصبح الي العصر دواام كاامل
نبي انديير حل انغيير الوضع ..

سلاااااام ..

امي ..وعليكم السلاام. .شني روحتي واخيرا ..

حوراء... اي روووحت ومليييت الحق من المستشفي علي صبح ربي حادت اليوم ودميات وحااله  ..

امي.. لما بوك بيقعمزك درتي بكاء وغضب وتوة ملييتي هذي خدمتك دم ياما نصحتك اقري لغات مابيتي ...غييير هكي احشيشة اعنااد انتم ..

حوراء ..  تي شن دم اني تجميييل غير ليبيا دراهات كبد حطوني علي العمليات من فقر الدكاترة .... خلينا منهم تعرفي  من جي للمستشفي اليووم ..

امي.. من جي بوووك  ولا من..

حوراء ... لاله شن بوي ايدييير غادي... رعد ولد عمتي زهرة ..حطت الصونيه من ايدها والتفتتلي

امي..  اني هذا رعد متخوفه منه وانتي فرحاانه شن فيه بينك وبين

حوراء... شن فيي مافي شي لاكلمني لاكلمته من هذاك النهار ... نحكيلك معاه عزوزة كبييرة ومعاه زوز بناات متخمرات ...

امي.. باهي وين المشكله ..

حوراء.. تييي خيرك ياام شن وين المشكله من عنده هو من اماليه مش بوي بس من وين بيجووه ..

امي .. بالك اقاارب بووه ولا شي ..

حوراء.. لاله هو قال بروحه وميتكلمش معاهم ..

امي.. وايمته قاااله لاكلام هذا ..

حوراء... هههه اقسم بالله انتي يااااام  كان ايحطوك علي التحقيق في الجيش خييير .. تو ركزتي
علي كلمتي هذي سمعتكم انتي وبوي اتكلمو ..
بعدين هو ايعارك فيهم واخد راحته كانهم خوااته ..
مايطلعش متزوج وهدو عيال مرته ..

امي..وكان متزوج انتي شن عندك فييه ..

حوراء... ووووووه ياااام نمشي انفكر بروحي خييرلي حتي لعشي منبيش
خليهم لماعين تو نغسلهم بنرتاح شوي وبعدين انووض ..

امي.. ايييه غيييييييير اهربي يوم من الايام بنطيح من وراك ..

حوراء.. تو بالله شن قلت اني ..نمشي ننقبر وان شالله لا من ارتاح ولا هدرز ..

خشيت لدار ونسمع في امي تلعن اكييد زابطتني علي رعد واني زي المهبوووله انهدرز علني ...

اوووف منك بس خديت التاب و فتحت علي اليوتيوب وكتبت  عبد المجيد عبدالله نبي اندور علي اغنيه رعد مافهمتش كلامها هذاك اليوم لاكن الموسيقي زابطتها ...

قعدت نبحت عليها سمعت اغاانيه كلهم في جرت رعد
اووووف بس
خيرني اني منحبش عبدالمجيد شن جاني

وصلت لي اغنيه لقيتها  اسمها ...قبل اعرفك... وقلبي قالي هيا
ولعتها لقيتها نفسها ..
غمضت عيوني وقعدت نسمع فيها
وصورة رعد بين عييوني شكله طووله هيييبته حتي ريحة عطره حفضته ..
اخخخ لو مش فيه مشاااكل بينه وبين بووي بس ..

واني سااارحه في افكاااري رن تيلفووني ..
شبحت
لقيت رقم رعد يتصل قمته من الخلعه وطيحته ونزلت من علي سرير
ولقيته قعد ايرن حطيته علي السرير ونزلت سكرت الباب
وشبحت شكلي في لمرايا لقيته احمممر وقلبي وتنفس خلاااص ايدي علي قلبي بيطلع من مكاانه   ..

صكر ..مشيت قمته نشبح للشاشه امتي ايعاااود ..
عليت في الاغنيه ونحيت السماعات وقعدت نستني

رن المرة الاولي
والتاانيه
التالته
ردييت وسكتت وقربت التاااب من السماااعه ..

سمعت صوووت ضحكه فرحت ..في دااخلي الف شعووور ..
مش امصدقه
اني حوراااء الي طووول عمري منحبش العلاقاات قلبلي كيااني رعد ..

هو ما تكلمش ولا اني تمت الاغنيه ...
سكرت منه ضحكته بسسمعتها وصوت تنفسه ..
لو يتكلم معاي ويغازلني شن بيصييير فيا ..

قعدت نشبح لتليفوووني وصلتني رساااله ..

رعد.. كلمتها بعد تفكييير طويييل انه غلط الي انديير فيه اني متزوج وداليا الداااخل معقوووله هكي توصل بيا لاكن مقدرتش منكلمهااش اولا واخيرا داليا مرتي وحوراء مرتي مستحييييل نستغني علي هالشي واني كبيييير ونبي صغااار يعني شررط اني نتزوج ونعوض السنين الضيييم والقهرة الي عشتها ..
منعرفش اني انببرر لي روحي ولا غلط الي اندير فييه
الحاجة الوحيده الي نعرفها اني محتااج نسمع صوتها ونبرة صوتها العنوووديه  كانها امي ......

كلمتها مرة مردتش عاودت المرة التاانيه وفي بالي الف كلام واعتدار وافكااار في دااخلي انطفت
لما فتحت الخط .
جاني صوت الاغنيه المفضله .. عندي
ضحكت اعليها
معقووله حاافضه كل شي فيا حتي الاغنيه عرفتها ..
قعدت نسمع فيها
وصوت التنفس في الهاااتف
تخيلاتي رفعووني لي بر اخر نبي انكمل معااها حيااتي نبي انعييييش زي ما اني نبي لاكن هيا مدلعه مع بوها مستحييل تتحملني وتتحمل طبعي عكس داليا متربيه علي الحرمااان  اني شفت فيها امي ممكن هالشي خلاها في باالي .. ...

صكرت الهاااتف وبعتلها رسااله ...

اني صاااعب وحياتي صاااعبه وعندي ماااضي اسود صح كلام بووك واجعني لاكن لو حابه اتكملي معاي انجييك الي حوشك وترضي بعيوبي كلها انتي صح مدلعه لاكن اني طيير حر مايمشيش معاي لعنااد  ...

بعتتهالها نبيها تفهم انه مختلفيين هللبه لو شاريتني بتقعد معااي ولا بتوخر قعدت انراجي مدة وصلتني رساله فتحتها وانصدمت من الرد ...

حوراء.. اني نستني علي احر من الجمر جاني كلام  حطمني ..
معقوله رعد هكي يشبح فيا شاايفه روحي وهو بروحه وبعييد عليا وهيبته ماتسمحش انه يغلط حي علي اممك ياارعد تو تشبح  .. رديت علييه برساااله ..

انته مش متاع احتراام قلت معليشي انكلمه طلع كلام بوي معاه الحق ..

وبعتتها .. سكرت الهاتف ورقدت ...

رعد... والله اني الفاااضي الحق ..مرتي ماتدريش علي بوها ميت ولا حيي واني قااعد انرااهق في المربوعة.. خديت شفرتي لوحتها وطلعت الرقم التااني  وعلقتها بدلها ..

فكرت في داليا شن صاااير فيها ..
خشييت للحوش لقيته مسكتت ولا حركه مشيت لي الدار فتحتها لقيتها امقعمزة عيوونها حمممر وتبكي اول ما خشييت  هيا ناااضت  طووول مشت لي الرووشن وقفت علييه .
يعني عطتني بالقفي
هذا شن ايقولولا  تو تقول اني قاتل بووها ..

دالياااا تعالي قعمزي خيييرك نضتي طووول ..تعالي اهني ..

داليا.. خلييني في حاالي وياريت تطلع ..

رعد..لالا هذي نغمه جديدة قضاء وقدر الله غالب ...التفتت في وجهي وعيوونها حمر ..

داليا.. اي من اليوم وبراء هكي النغمه هذي الي بتمشي اني كرهت الحيااه كلها ..

رعد.. تعالي خودي كفف من وجهي باش تبردي ..
تعااااااااااااااالي اهنييييييييييييييي  قلتهالها بصووت عالي قمزت من الخوووف وانفجرت بكاااء مش متوقع.

حيرتني شن صاارلها  خيييرها توة كااانت حالها باهي معاي وتهدرز  معقوله علي بوها كله مشيت قربت منها حاطه ايديها علي وجها وتبكي شدديت ايديها بعدتهم من علي وجها .

وطبستلها ..خييييرك هذا كلا علي بووك صح اني بنقووولك اعلييه لما بنخش لاكن انتي سمعتيني وقلت خلاص هذا هو..
قوليلي لبكاء بووك وحقك تبكي الزعل والغضب مني اني اعلاش ..

قيمي راسك اشبحيلي في عييني رفعت عينها حطتهم في عيووني زرق وحمر في نفس الوقت ...
قعدت امركز عليهم وهيا تشبحلي وقريب منها هللبه  ..

داليا.. انته ممتحبنيش علاش متزوجني وخليتني علي قلبك وبوي حااتم ..

رعد..  منقااال منحبكش اني شن قتلك مش قتلك اصبري عليا .. تو من جاااب لكلام هذا بوك ومابووك..

داليا.. انته قلت بكري في الهااتف هذا الي قاهرني انها بنت حااتم. .اني بوي ماوجعنيش لانه هو الي بااعني وجعتني انته .. هكي معتبرني من غدوة انكلم عمتي وطلقني وافتك مني ..

رعد... تو هذا شن العقل الي عندك اني قلت لكلام عفوي مش قاااصد شي ..

داليا.. كذااااب واكبر كذااب قلته وسمعتك متقصد ..

رعد.. قعدة ماكملتش كلمتها جاااها كف مني طيحها لوووطي ... اني كذااااااب اه اني تعلمي كييف اتكلمي ..
اول يوووم وتقولي لرااجلك كذااااب ..
يبنت الكلللب  يابنت ........اني لحمااار الي خلطت روحي علي النساوين .العن بوووك علي بووواصصلك. .ياااااا.....    ياا..........

طلعت وطربقت الباب بقوة مشيت للباب الرئيسي كيف بنطلع نسمع في صوت بكااها ..

شن درت انيي بس ...
كيف ضربتها معقوووله اني رعد هكي اندييير خييرني اني نشبح لي ايدي ونفتح ونسكر فيها شعري من الاعصااب قريب جبته في ايدي  ..اليوم اعصاابي تعبااانه .
الله يللعن حااتم والي جاب عم حااتم ..
وقفت في الفم مش هااين عليا نمشي ونخلييها
كيف بنواجها بس ....
مفرووض مسرعتش وضربتها وجت فيها هيا

مشيت للباب بنفتح عليها نبيها تفهم غلط اتقوول هكي سمعتها سكتت حطيت ايدي علي المقبض
بعديين وليت
مفروض هيا تعتدر مش اني مشييت طلعت ركبت في السياارة السااعه 12 مش عاارف وين نمشي وين انقعمز نبي نهرب من العاالم كله  انصبت عليا مشاااكل خدمتي وقفت من لما طلع نوري ..

من راجل وحداني اقتحمو حياتي زوز في مرة ..
واخت نوري الي ومرضها الي توة ما كلمتاش ولا قتلا اعلييها ..

نمشي بسيااارة ومش عاارف وين نمشي جابتني الطرييق للمقبره لقيت روحي في فم المقبره ..قبر امي قعد في مكاانه كل ما بيديرو ازااله امنبهم اعلييه ودافعلهم مخليينا ..
خشييت السااعه 12
وضلاام مشييت وقفت علي القبر ..
تمنيت روحي راقد اني بداالها ومرتااح ولا هالهوول الي عااايشه ..

قريت الفااتحه وطلعت اندوور في الشوارع واخلاص مافيش فايدة من لكلاام  ..
لقيت روحي قريب من الحوش السااعه 2 روحت خشييت للحوش رقدت في الصاااله طحت من التعب 
معش حسييت بشي الي الصبح..

..داليا.. اول ما روح رعد فرحت وشفت في عينه حب واهتماام ومرتااح معاي صح اني مش مستعدة نتزوجه زواج كااامل وهو كذلك نبي نصبر اعليه ويصبر عليا لما رن تليفونه وطلع عرفت انه فيه شي
حسيت فيه حاجه بتصيير ....

اني مش من عوايدي نسمع علي الناس لاكن
كلاني الفضوول نبي نعرف
سمعت انه بووي مغتالينه انقهرت الحق مهما ايكوون بوي لو مربانيش ولا دورني
ولا صرف عليا طوول عمري مع الخداامه وبنتها صفااء نلعب وناكل ونرقد معاها ..
اصلا لو توفي بوي اني بنرتااح مع رعد لاكن الي سمعته منه قهرني
حسسني انه هو مش طاايقني وقاعده علي قلبه ..
خشيت للحوش بكييت لين عيييت قعدت منها نبكي علي
عمري الي ضاع نبكي علي حياتي
علي بوي الي بيموت
ولا علي رعد الي مش طايقني وعلي قولته ازبكت في بنته ..

لما جااني الي قهرني اني انه مدورش كلامه ونكر قاالي اني ماقلتش هكي
اني سمعته هو قالي هكي وتماديت معااه عارفه رووحي قريب انمووت معقووله شهرين ناكل ونشرب معاه وعلي حسابه الراحه الي حسيتها معاه طووول عمري ماحلمتش بيها .

هكي انقووله هيا كللمه متعود عليها السااني
واني غلطت ..قعدت انراجي فيه نبيه ايجي بنعتدر منه
اقل شي حتي علي خااطر الملح والزااد الي كلييته معااه ..
نطلع ونخش الي السااعه واحد اتنين نسمع في صووت الباب انفتح قعدت نستمي اهو ايجي اهو ايجي طلعت لقيته راااقد مشيت غطيته وخشيت رقدت ..
الصبح نضت الفجر صليت ومشيت للكوجينه بندير فطوور .ونبي نعتدر منه
نبيه يفهمني اني معش عندي حد في الدنيا غييره ..

خشيت للكوجيينه قعدت انوتي في لفطوور حطيت الشااهي وطلعت ...
مشيت لصاله  قربت من رعد قعمزت علي الطااوله وقعدت نشبحلا متعمق في النووم وعيوونه غااضبات وحواجبه مربووطه حتي هو راااقد

اخخخخ ياربي قداش حبييتك يااارعد  ..

كيف بنووض طااحت الولاعة وباكو الدخاان طبست بنقيمهم ..
شدني مع ايدي ..انخلعت ..

رعد...شن اديري فوووق راسي من صبح ربي اه  قلتها بصيغه غضب ..

داليا.. صباح الخيير ..

رعد .. حطيت ايدي علي عيوني وما رديتش اعليها ..

داليا.. رعد نووض بنكلمك ..

رعد .. ساااكت وشاد ضحكتي  صغييرة وبتعبني وتبي اهتمام ليها عايشه في حرماان زي حااالتي كيف بنوسع بالي معاها بس.  .

داليا.. رعد نبي انقووولك اني اسفه علي البااارح معش انعااودها ..

رعد .. فكرتني لما كنا صغااار ونخافو انجو انقولو معش انعااودها .قمت ايدي من علي عييوني وقتلها
شني الي معش اتعااودييه ..اه

داليا.. الكلمه الي قلتها ..

رعد..شن هيا ..

داليا ..  اني منبيش نخسرك معش عندي حد في الدنيا غييرك كلمه كذاب معش انعاودها ..

رعد .. باهي متبيش تخسرني ولا غييير شي ..

داليا .. اني حسيت بالراحه والحياة الحلوة معااك حبييتك وحبيت الشععور معااك ..

رعد.. وبوووك .. شن وضعه ..

داليا.. ربي ايساامحه لو حي لو مييت ..

رعد .. مش امسااامحك مش ساااهل  انساامح  خليني بنرقد ...
بلعاني قلتها نبيها اتخااف ..بدت تبكي ودمووعها مصصنع مش دمووع
نضت قعمزت خيييرك صببح يافتااح بكااء في كل وقت ..

داليا.. انتي مش امساامحني حتي اني مش امساامحاتك علي الكف شووف وجهي ايديك طااابعه فييه ..

رعد ..شفت لي خدها احمر وعيوونها دموووع .. اي نضربك ونكسرلك راااسك كان عاودتيها ..

داليا.. مش قلت اسفه خلااص ..سامحني ..

رعد . الله علي الطييبه الي عندك هذا حق مقدرتيش اتعيشي مع حاتم ومرته  تعااالي اهني شديتها مع شعرها ولمييتها في حضني .. انتي صغييرة وتو وتفهمي الحيااة قداامك ... ساامحتك ..

داليا ..حاااق ساامحتني ..

رعد.. اي حق مش كذاااب اني .. قعدت تحت ايدي ورافعه وجها فوق ونشبح لي ملامحها وعيونها دموووع ..
معش تبكي وفري دموووعك شوي
عيوونك منتهياات حمرر ومنفوخات
ام دميعه انتي ..

خلاص نوضي ديريلي افطووري  انولي في كلاامي ونغضب واني غضب الليل تعرفيني كييف ..

داليا.. لاله نااايضه تو خلااااص احلي فطوور لااحلي غضب الليل ..

رعد... ناضت داليا ..وفي قلبي قدرت كييف تطفييني يعني مايصلح بييك الا الي تسمع لكلام زي الي قتلها اني صاعب قتلي انته مش امتااع احتراام ..
نضت ضميت البطاانيه
رن هااتفي
اووووووهووو عليينا. صبببح
ناااصر
فتحت الخط
اه ناصر صبااح الخيير ..

صبااح النوور رعد ..كيف الحال شن بنقووولك حاااتم توفي اليووم الصبح نزييف دااخلي وتوفي والمستشفي مقلوووووب ..تعاال كان وتااك ...

للحكايه بقيه
جميله جاسم