الرجل الاربعيني باللهجة الليبية

البارت الخامس عشر

البارت 15

#الرجل_الاربعيني،

#جميلة_جاسم

وإن سألتني ماذا أُحب
سَـ أقول أُحب أربعاً :
صداقةُ بلا ابتعاد
...ۆ قلباً بلا قسوه
، و بقاءً بلا تغير ،
و حباً بلا استغفال...

داليا..كل يوم نستني امتي انكوون علي دمة رعد نبي انعيش حياة منضمه مرتاااحه معااه نبني عييله متماااسكه ومتراابطه اني حسيت في عيونه اعجااب لاكن مرتبك ..
بنحااول قدر الامكان انه ايحبني
اليوم لما سألني موافقه ولا لا قلبي منحكلكمش علي دقاااته الف دقه في التاانيه صح مافيش مراسم عرس وزواج وزفه لاكن عندي رعد يسوي الدنيا كلللها ..

واقفه في المطبخ علي قوولته بنطييب غداء خفييف لانه العشاء قالي طبااخ من المطعم هو داابح حطييت شربة ورز علي النااار ومشيت اندوور في القصر الي عنده نضااامه غرييب ماتحسيش رووحك في ليبيا كل شي فيه منضم نضااامي درجه مع انه راجل برووحه لاكن النظام يجري في دمه خشيت  لصاله الجانبه فيها سلااح وصناديق فااضيه مش امفرشه نمشي وقلبي طاااير من الفرح
معقووله اني مرت رعد توة ..

خلاااااص هكي واخيرا يعني مستغربه في روحي كيف قدرت انحبه في شهرين ونص ممكن اول مرة انشوف راجل حرييص لدرجه هذي ..

ماشيه ونتخييل فيه لما شدلي ايديا ولما باااسني انحس في قلبي بيطلع وبطني من الخووف والرهبه مقدرتش انتكلم نشبحلا وخلاااص تمنيت معاي امي اختي اني بروووحي لما طلعت من حوش بوي طلعت هاااربه خااايفه منهم توقعت انه حياتي بتنتهي في الشوارع ممكن اني يتيمه ومضلومه ربي جابلي رعد علي طبق من ذهب .

واني في تفكييري ونتخيل في روحي بنتزوحه زوااج عادي طبيعي نطلع وندهور وندور في الحوش علي راااحتي
وصلت لي الدروج وقفت علي الحديد جيااات في نص الحووش يعني اول ما تفتح الباب الرئيسي ايقاابلوك علي شكل دااائرة في النص ..التفتت ممكن معش بيخشلي

رقييت فووق نمشي ونلتفت خاايفه قلبي ايقول هذا حوشك من اليوم وعقلي ايقوول لا مزاااال
خيرني اني صدقت طووول هكي ...

اول ماوصلت لدور الفووقي لقيت باب كبييير علي الايمين وقاطع المونيوم امقاابل والباقي صااله كبيييرة مفتووحه فيها زوز كراسي عاديات

خشيت لدار فتحتها بشوي دار نوووم رعد هذي
واااي يااااربي قداااش امنضم قلبي ميتحملش...

الدار عبارة عن سريير ودولاب اسوود كبيير وكلها لونها غاامق غرييبه في الشكل قابلني باب تااني الباين دوووش وفوق السرير صورة مراء ممكن امه لانه واضح قديمه لاكن محلااااه شكلها حقها جابت رعد هكي بالطول والهييبه زعمه عنده خوات خوت امه متوفيه حيه اكيد متوفيه لانه من حبه ليها داير صورتها.. نسال ونجاوب ونفسر في تفسيرات بروحي ....

والا علاش مش ساكن معاها بووه ويين غريييب يارعد .. ..
مشيييت  للمرايه كبيرة لقيت سااعه وخلاس وبيرو اوراااق ولفت نضري
عطره اخخخخخ هذا الي خلاني نكبر ونحب ونعييش وخاطري نعرف نووعه كل ما ايجي للملحق تقعد الريحه فيه الي تااني يوووم ..

فتحته لقييته اسوود كاامل وعليه بلاااك ممكن اسمه بلااك خديته بخييت شوي علي ايدي وشمييتها .. غمضت عيوني وقعدت نتخييل لما جاني ورى الملحق ومدلي ايده ..ولما وقف علي راسي واني راقده لقطات بسيطه وحبييته ..اووف فتحت عيوني ..

شبحت للمرايه وجهي صح بيضه وعيوني زرق
لاكن تاااعب من الارهاق والتفكيير
لابسه وشااحي وقفطااني زي لعزووزة

في حيااتي كااامله متوقعتش نلبس قفطاان قبل ديما برمودا شورت ولا توته صيفه جينزات وبلايز

خديت الوشااح نحييته حطييته علي المزيين وفتحت شعري اصفر مصووف معنديش خلااس من اول ماجييت انلف فيه هكي واخلاص لقيت خلاس قداامي اكيد لي رعد خلسته وطلقته طوووويل وااصل الي خصري واني ضعييفه ومش طوييله عجبني منضره اول مرة انحب شعري وفي بالي اكيد رعد بيحبه ....
ولايوم كنت مركز علي هالشيي ..
نشبح لي وجهي تو هذا وجه عروس اليوم قاارين فااتحتها انتكلم بصووت عااالي
قربت من لمرايه عدلت شعري وقعدت نشكل ايمين وايسااار ..
هالقفطاان هذا  يقهر ....نبي حاجه اقنيينه نلبسها
معقووله اني عرووس وهكي شكلي ..
سمعت حد قالي

اقنيينه مانااقصك شيي
التفتت لقيت رعد في الفم
ياااحشمتي والله خديييت الوشاااح بنحطه علي راسي قالي رعد ..
خلييييك خليييك ..

شبحته جاي باتجااهي وعيونه علي شعري طووووول....

رعد......

طلعت وقفت في الفم انراجي في حضرة جناابه شن يبي اشرف ....فتح الباب ونشبح  لخالي جاي باتجااهي دخلته للحوش ..من غير كلام
الصراحه اخر لقطه دارها كان يوزنوه دهب مصبووب
معش نشبحلا في عين ..
وصلت لمربوعه قعمزت واشرتلا بي ايدي قعمز ..

عبدالله.. السلام عليكم ...

رعد.. نشبح لجميعتي كلهم عيونهم في عيوونه ردو السلام عليه اني ساااكت ..

عبدالله.. شن حتي سلام الرحمه ماتبيش اتردا

رعد.. كافي الشباااب قايمين القدر وردو اعللليك ... ان شالله جيتك فيها خييير مش زي المرة الي فااتت..تفضل قعمز .... اي خدمه ..

عبدالله..... اني جاي نبي نعرف قصة حياتك وين عااايش اذا كلامك حق مامشيتش في طريق بووك نبي نعرف شي وااحد حاااتم شن ايدير عندك يومها ومن وين لييك هالدنيا كلها ..

رعد.. اني نبي نعرف شي ..مشكلتك معاي ولا مشكلتك مع حااتم ..والشي التااني هذي حياتي وحر فيها انسلم واندخل من مانبي لي حووشي متحاسبنييش..

عبدالله.. الباين ماتمشيش بالهادي وباللين ..

رعد.. لا لا لاه مانميش بكل مش طريقي اللين والهداوة نمشي بهوااااه جبدت سلاحي وانشرلا بيييه ...شبحته هذا اني حشييييشه اي حد مايعجبنيش مش مستخسر فيييه طلقه لانه بدل الطلقه طلقاااات عندي ..

عبدالله.. اني لولا ما انته ولد اختي ونبي نعرف اقسم بالله مانعتبلك باب ولا انجييك ..

رعد... عااادي وراسك انته مدور اندير روحي ماجتنيييش ...
تي تعرف لو وجيتني قبل كنت تعاملت معاك بالاازم لاكن بعد البهاذل والضرب والمحاكم ولحبووس اقسم بالله لو واااحد تاااني كنت دفنته شفت وجه امي فييك بس وانقول ميصيرش اتعامل خالك هكي لاكن انته شني ولا شييي
..انييي غضبب غضب الليل عارف لما ربي اينزل عليك الغضب في الليل شن ادييير ادييير الي متقدرش اديره ف نهااار وانته مالقيتش علي من اتخلط اني نااااار ودخاان لذلك خليييك بعيييد عليا واني بعييد اعليييك

عبدالله.. والله انته خسااارة اني نعطيييك وجه مفروض ماسمعت كلاام حد وجيييتك شيباني كبير محترمتش شيباتي وقلت انقعمزه انضيفه ..

رعد... ماتسمع كلام حد بدات النسون ... وبعدين لما دخلناك وقلنالك الحوش حوشك درتلي فيها دور النضيف الي قلبه علي لبلااد وسمعتني مايصدعني ... ضربت علي ركبيا وقفت واشرت لي اشرف وصل عبدالله بييك للباب ...

ونضت خليتهم جماعتي مصدوميين حضور بس ولا وااحد تكلم اول ماطلعت نسمع فيهم يتكلمو .. صح كبييير وخاااالي ومفروض منعاملاش هكي لاكن هذا كلامه لو جي وقالهولي قبل لا ايديرلي مداااعك والسمعه الزفت الي انتشرت استقبلته احسن استقبااال ..
وصلت للحوش الداااخل

خشيت للكوجيينه لقيتها امطيبه غدي ..
والله يابنت حاااتم لولا مش بوووك حاااتم بس هذي العرقله الوحيدة
اتحسها ربة بيييت علي الاصول فتحت الطنجرة لقيتها
رز وشربه ولا اشبح شني اني في تاريخي كله من غير لمبكبكه واخلاص
طلعت ضبحت اعلييها ..في الصاله
دالياااا وييينك ..تي وين مشت
فتحت باب الدااار الي كانت فيها مهناااش
معقوووله رقت الفوووق
هذي خدت راحتها وزااايد لو رقت الفووق

رقيت الدروج جري درتهم درجه وحدة وصلت الفوق
لقيت باب داااري مفتوووح
اني انمووت من ايخش لي دااري خصوصياتي منبيش من يقربها ..

وقفت في الفم لقيتها واقفه علي المزين ومنحيه وشااحها وشعرها وااصل الي الضهر .. خلييت لعراك علي جيها وقعدت مركز علي شعرها معقووله بصفااار هذا طبيعي مش مصبووغ ..
مشييت لي عندها
وربكه باينه في عيوونها ..
اني في بالي هدف وااحد بس نبي انشووفه علاش جذبني اكثر ..صورته من غير حجاب ردتني لي اول يوم جت فييه لما تبكي في الاسطبل وجايه في توته صيفيه وشعرها علي عيونها
وصلت عندها شديت خصله منه قعدت نتفقد فيها
هيا عيونها باين عليهم الخوووف اني واقف اطول منها وهيا امطبسه راااسها .. قتلها
هذا طبيعي ولا لاعبه فييه

داليا.. اه ااا اي طبييعي ..

رعد .. طوييل واصل الي خصرها قعدت شادة حسيتها توترت  شميتها خسللة ريحتها غريبة.....طلقتها وبعدت شعرها
ااحمممم مسحت وجهي بايديا ومشييت لي الجيهة التااانيه فتحت الدولاب وهيا قعده واااقفه ولاحركه عيونها في عيوني
... باه شن دخلك لي داااري ااااه .....

داليا .. رقيت اندووور مشي جبتني رجلي اهني

رعد .. اااااه باهي شن رايك في الدار ...طلعت لبسة من الدولاب وقفت وانلهي في روحي  ..

داليا حلوة عجبتني.... لاكن مني هذي الصورة ..

رعد.. سالتني علي امي وموضوع طويل تبي وقت نشرحهولها خديت التشيرت الجديد وسلبت السوريه واشرتلها بعيني ..شني بتخليني انبدل ولا انبدددل عاادي ..

داليا.. حيييي شن هذا لاله بنننزل توة

رعد.. هههههه خدت الوشاااح وطلللقه نسمع في جريها علي الدروووج ..
انردد في داااخلي مستحييله اتكووون بنت حااتم هذي الطيبه والهداوة والعقل واتحسها ربة بييت عيااار تقيييل هذاك الهمجي الخااانب هذي بنته

بدلت حوايجي وقعمزت علي السرير شبحت  لصورة امي تفكرت اللعنه حوراء تو اني عفنتها مع خاالي شن نبي منها بس لو انموت مش حيعطيهاالي وزيااده متزوج بنت حااتم وبنته الدكتورة المتكبرة بترضي بيا غير كان نقدر ننساه خديت الهاتف
انكلمها زعما كيف حطييت رقمها

خييرني نجري في جرت الصااعب والساااهل موجود قدامي..
لاله البنت معاي ومرتي منبيش نضلمها اول يوم بنكلم حوراء ...
صكرت الهاتف
ونزلت ونكلم في روحي اقل شي تحشم علي وجهك ياارعد البنت حتي علي بوها ماتعبتش وقفت معاك وتحملت شهرين محبووسه
وقفت فم الكوجينه لقيتها فاتحه التلاجه ..

داليا حطيلنا لغدي كان واتي ..

ردت عليا بلا ما تشبحلي ..هذي خيييرها مش طبييعيه البنت حشم زيادة علي اللزووم .. واني امكييف قعمزت اربعين عام ونضت انرااهق عقااب عمري ....
سمعتيييني

اي اي شويه ونحط اندير سلاطه
خمسه انفااار ديري .. هزيت بايدي بتعبني البنت هذي وهيا عذاب
قفطان حوش وهكي طاالعه
استغفر الله العلي العضيم

مشيت لقيت الجماعه اتكرط وعياطهم واصل لي سابع جااار .. خشيت قعمزت علي الكنبه وهما فااارشين لوطي واشرف قايم القدر داير القهوة

روح العله الي كان اهني ..

خيري... تي حااط الرشاش علي الصلي وتبييه يقعد ..والله وانته وكانك مش خاالي الراجل هبطله السكر ..

رعد ..تعلللق امالا شن تبيني انحدف برشااد من غيير صلي المرة الجايه يبدي فيه الرزم بالتقيييل

انور.. لنقالك فااااتك شوووط شكبه مش عادي تعال كرط ..

خيري.. تي داااهيه الراجل في الورق كله سحبه من تحتنه ..... كويس الي متقمرش بس ..

انور.. لا له انا نلعب بلحلاااال لقمار مش شوري..

ناااصر.. وقت علي الراااحه واللعب تعااال العب معانا رعد تعااال انزل فكنا من جو العروووس..

رعد... لاله معنديش فيه اني عطيني شطرنج من تاني تحريكة بيدق كششش مااات ..
نضرب علي الملووك والوزرااء انطييح فيهم خليتلكم الورق ..

خييري .. والله حتي حياتك الطبيعيه ضارب علي الوزراء وبدليل بنت الوزير الداخل ..منحصلوش فيها ابتزاز زعمه مليون ولا اتنين منك من حاتم ههههههه

رعد... جرب حط ايدك عليها نمحييك ..

خيري .. يااااستااااار محي ياراجل مرة وحده. .. هذي الي خدت قلب رعد حاجه كبيرة ..

ناااصر.. للامانه البنت مشااالله علي الزيين تي مرتي زمان فرحان بيها انقول قنيينه طلعت طنجرة احدااها ..

رعد.. ولقت مغطاااها حتي انته زيها هههههه ..

ضحكو مع بعضهم سنيين علي اللمه من غير مشاااكل ان شالله ربي ايدوومها علينا والله اني قلبي ناغزني حاسه انه بتصيير حاجه ..
اسمعو شبيبه من عندي فيس وجو كلمونا سميير وخييري ..

ناصر الواي ماكس في السيارة تو انجيبه ونعلقو اعلييه ..

رعد.. كويس خلي انبشرهم بزواجي ي امخلل في رقبة نوري واجعني الزفت علي اساس عرسي معااه ..

ناصر ..دير نت وفييس ياراجل خيرك غبرة ..

رعد.. اني مرااقب مرااقب وزيد ديرلي فييس دوة فااضيه ..

خيري.. تي تعرف بنجيبو فرقه الليله ونولعووها الي الصبببح ان شالله ..

رعد.. اني اليله سلطاان انتم ديرو رايكم مدورونييش بكل. خودو راحتكم لانه الاسبوع الجااي عنندنا طلعه للجنووب عندي واحد بنوصله بضااعه وبنطلعو الكل غيير خلوها ساااكت منبوش ضرب ورمي لانه امن طرابلس طالعيين بيدخلو سلاااح للبلاد واحني بنطلعو ..تبادل مصلحه ..

خيري.. خلاص علي الموعد لو تبي جماعه سبعه وعشريين من الجبل عندي جو السته مضمونيين

رعد.. خلاص ان شالله سبوع ونتفااهمو ان شالله تفوت علي خيير ..

ناااصر.. تعال اهو سميير فاتح خلي انكلمه فيديو ...

سمييير ... تي نحلم ولا نايض اني ..

رعد..نايض يااراس شن الاخبااار ..

سميير..اقسم بالله وجوهكم نسحاب روحي في جهنم انتعذب ..

رعد... هههههه قعد في عوايدك ..وين نووري ..

سميير ..نوري نوووم امس طلع من المصحه وعلي نهايه الاسبوع ان شالله مروحيين شنحالكم شن دايريين ..

ناصر..صاحبكم اليووم عريييس باعكم بترااب ..

سميير.... درتها يااراجل من الحولاء ولا الشقراء ..

رعد.. لقيت الجماعة يشبحولي مش قايللهم علي حوراء وهذا فضحنا ..والله ماينشد بيك ضهر الشقراء ياكلب ..

سميير.... تي خلي انوض نوري الهم داير عرس وجو وزفه ..وفاتنا رقيص ..

رعد.. لاله عشي بسيط اني وشبيبه وخلاص ..
روحو باذن الله انديرلكم احلي زفه ..

قعدنا انكلمو فيهم وفرحت لما قال نهايه الاسبوع لانه نوري جزء مني يوميا انكلمه ودولي غالي مش زي لما يبدي جنبك خوي وصاااحبي ... سكرنا منهم وخليت الجماعة وطلعت لي عمتي سااالمه نبي انسلم اعليها
نبي دعوة طيبه مراء بركه كبيرة وطيبه
مشيت خديت حاجات في ايدي عصير ومواد غدائيه وبضاعه فطوور ..
وصلت للحوش طقيت الباب .قعدت وااقف نسمع في ايه اتكلم مني مني
تي ديما طالعتلي امشغلينها بوااب هذي ..
اححم افتحي اني رعد ..
مشت خشت وقعدت انراجي اني والي خاطم يشبح ..طلعت لابسه وشااح فتحت الباب ةقعدت واقفه في الفم ..
السلام عليكم كيف حالك عمتي سالمه قعدة ..

ردت ..اي قعدة غير مريضه شوي وتطلعلك في المربووعه خش تفضل

فتحت الباب وخشيت حطيت لبضاعه في المربووعه وقعمزت طلعت نسمع فيها ..
معنديش وجه انقابلها مريضه واني مشيتلها ممكن ست مرات بس وهيا اتكلم فيا ..

وقفت خشت ساندة ايدها علي باب المربووعه مشيت باتجاها سلمت اعليها وبست ايدها وكبيت علي رااسها ..
كيف حالك عمتي سامحيني علي التقصيير ..

سالمه.. لااا ياوليدي حشااك من التقصييير كيف حالك اني كل يوم انقول لي اية رعد الي مجاش هذا عنده حااجه ملهيته علينا ..

رعد.. والله ياعمتي الا حااصل مشااكل فهالبلاد هذي معش اتحز ومنين كلمتيني اني في المركز يومها ..

سالمه.. اممم اني عرفتك والله الا قلت اني انحسها زيك زي نوري وليدي مربيتك وماجبتكش لاكن عرفتك ..شن انشالله خيير ..

رعد..والله ياعمتي قصه طوييله وحصلت فيها حكيتلها علي بنت حااتم لاكن مقتلهاش بنت حاتم قتلها اخت صاحبي توفي في ضربة نوري ومعندها حد اتزوجتها وخالي امبلغ عليا يعني كذبت وحدفت نص.الكلام ..قعدت تبكي وتمسح في دمووعها ..

سالمه..والله ياوليدي انراجي في عرسك امتي انهني اعلييك ان شالله تكسب فيها اجر وان شالله اجعلها ياارب خضراء قداامك وين ماتمشي ان شالله نشوف وليداتك قبل لا ربي ياخد هالرقبه ..

رعد.. ساااالم راااسك عمتي بعد عمر طوييل ان شالله تفرح بنوري ولبنيااات واني تزوجت حتي بسااكت لاكن وان شالله انهنو عليهم كلهم . كملت الكلمه سمعت صوت تكسييير طواسي ومرش استغربت ..

سالمه.. شن الي طاااح هذا زعمه وليدي اخف مني شووف الفم من فييه ..

رعد.. وقفت لقيت ايه علي طوولها طاايحه وطواسي العصير قدامها ..
يستااااار هذي ايه ياعمتي ..

ناضت مسيكينه من الخلعه شافتها اني وااقف معرفتش شن انديير نمشي ونجي ..

وهيا لا ايد لا رجل معش عرفت شن انديير .....

للحكايه بقيه..
جميله جاسم  ..