الرجل الاربعيني باللهجة الليبية

البارت العاشر

البارت10

#الرجل_الاربعيني_ج1

#جميلة_جاسم

ناس خربت
ناس ع حلوين هبت
ناس نامت بلمصالح
ناس زعلت ما تصالح
ناس عاميها الغرور
ناس نامت بلفجور
ناس نامت بلغروب
اقعد يا رعد وفتح عيونك
خربت سمعتك كامو يسمونك.. داعشي..

رعد.. اكثر كلمه وجعتني داعشي من فم حوراء تخيلت انه امي هيا الي قالتها ...
قداش احساس صعب لما اتحس روحك بروحك وانته بين نااسك بووك عايش خواتك عايشات خالي ريحه الغاليه أمي يتهمني داعشي....
من وين لي ويين ايقولا لكلاام مشبحنيش بكل ولا يعرفني مجرد ما سمع عليا كلام الله واعلم من وين جايبه صدق طوول ممكن علي باله اني زي بوي لما حرم امي منه وخلاه يهرب من لبلاد...
افكاار متلخبطه ومش واقض بي روحي نضرب في ايدي علي باب التاكسي من بري شبحت لي مولي التااكسي خااايف مش عاارفه وجهي عبووس لدرجه انه الي يشبحني ايخااف ولا هيبتي تفرض سيطرتها في وين مانمشي شبحتلا في وجها ..

خييرك شن فيه داعشي اني وجهي ارهاابي ..

خايف وجها رد مرعووب قال
لاله سلامتك وخيي ..

حطني علي السااحلي وربي ايسهلك ..

نزلت من السيارة وتمشيت علي رجليا شبحت الساعه 12 وصلت للحوش في بالي موضوع حوراء لما شبحت الملحق مضلم تفكرت داليا...
اني امدخل روحي في مصااايب مش معروف من وين نطلع منها خشيت الحوش رقدت في الصاله منبيش انخش ونشبح صورة امي بنتفكر حوراء طووول .حطيت راسي علي الكنبة والنوومه نووومه الي الصبح...

حوراء...شعور غريب لما شبحت رعد في الحجرة الجرأة الي عنده اكدتلي انه قريب جدا وبدات لما قااال زهرة معقوله يطلع ولد عمتي الي مشبهيني عليها لاكن هيا ملامحها ناااعمه ولاحاجه يشبها فيها...
كل شي فيه غاضب منكسر ولما باس ايدي حسيت برجفه وربكه خووووف سري في جسمي لاول مرة في حياتي نكره خدمتي نكره انه خشيت مستشفي وتعرفت علي رعد في ليله مضلمه صح منكدبش علي روحي كل مانشبحا نتمني انعيييش معاه

نتمني نقعد طوول عمري نشبحلا معقووله هذا الحب الي يحكوولي عليييه اعلاش حبيت شخص زي رعد .... مع اني متخوفه منه لدرجه قارنت مكانتي بيه ...

بوي ايقوول عليه داعشي وتصرفاته تتبت انه حق داعشي روحت للحوش مع خوي مراد  قرابه الساعه 11 افكاري مشوشه نشبح لأيدي الي فيها اسم رعد تلاتي  غطيتها بكم الكاب وحطيت شنطي عليها خوف علي رعب من الي صاااير مش قاادرة انسييطر علي روحي ..
اني ولا مرة سالت بوي عمتي من متزوجه ايقوول راجل ندل مش ضروري تعرفو اسمه لما كبرنا عرفنا انه هو وري طلعتنا الاردن يعني بوي كان مطلوب من النضام وهو الي وشي فيييه مراد ايسووق وينفخ مش عااجبه الوضع اول مرة انحس انه مضااايق مني شبحتلا ...

مراااد خييرك تنفخ شني فيه مش عاااجبك ..

مراد.. اني تبي الصراحه خدمتك امقلقتني الحق تقعدي الي هالوقت مش في الاردن احني وعادي هكي احني في ليبيا والناس كلت وجوهنا تخدم وتخدم  وتطلع وتقعد...

حوراء... عيييب اعليك تقولا لكلام هذا بعدين اني اختك اكبر منك مش بتعلمني انته ولا الست نرجس مش عاجبها الي صاااير..

مراد.. شن جاب نرجس في النص اني نحكي علي عمري اني اختي تخدم في المستشفي وفي عز الهدرزة اني وصحاابي اتكلمني انروح بيها ويقعدو ايعقبوو..

حوراء... اعصااابك خدمتي وحرة فيها واني نشتغل لي نفسي بعدين لو متحشم مني ياسيد مرااد معش انكلمك انكلم بوي ايروح بيا وراااضي انته ماتدخلش .
ولو ياريت معش تفتح الموضوع مرة تانيه مليت منها نفس الاسطواانه قووول مدام المستقبل تبي تشتغل وانته قتلها لا وتقارن في روحها بيا وتبيني انبطل علي خااطرها ...

مراد.. انتي ماعندك غير نرجس نرجس خليها في حاالها تبي تشتغل وانتي تشتغلي تشتغل اني مقتلهاش لا اني نحكي علي اختي بس ياافهيمه ...

حوراء.. الي هديك الساعه ايصيير خيير صكرلي علي الموضوع رااااسي كيف طالعه من عمليه متبهدلنيش...

مراد.. بالك اتقولي مراد بس خاايف حتي بوي اليوم قبل لانطلع لشغل قالي خايف علي حوراء نبيها اتقعمز وتشد الحوش ..

حوراء ... كذب لكلام ميقولاش بوي هذا ...

مراد.. اهو قريب نوصلو الحوش وشوفي من الي يكذب ...

حوراء.. قعدت ساااكته وهوا ساااكت لين وصلنا للحوش افكااري ملخبطه وصوت رعد قعد في اوداني ايدي خايفه انمدها ويسألني حد من بايسك عليها ...
حسيت روحي مفضووحه ممكن لاول مرة ايصير معاي هالشي وصلت سلبت كندرتي وخشيت لقوني نور ويزن توؤمي انحسهم صغاااري مش خوتي علي مايكبرو انحس فيهم صغاار يتعاركو يتنااقرو بينااتهم واني راسي خلاااص شبحت بوي مقعمز علي التلفزيوون والعربيه الحدت الي ديمااا واحني عليها حفضتها بالحاجه امي امقعمزة اتقشر في الفواكه لي بوي تفاح ونجاص ..وصلت عندهم قعمزت ...

السلام عليكم كيف حاالكم..

بوي.. الحمدالله خيرك عطلتي اليووم حسيتك بديتي اتوخري

امي.. بشوي اعليها كيف وااصله..

بوي.. لا معش فيه بشوي اعلييها ومعش فيه مستشفي بعد المغرب حاولي تديري جهدك تطلعي قبل المغرب من المستشفي...

حوراء.. انصدمت من انفعاال بوي وخوفه معقوله كله وراه رعد يعني هذا حاجه كبييرة الي بوي بكبره خاف عليه منه شبحت لي مراد لقيته ايهز في حواجبه بمعني مش قتلك ...

خييىركم اعلاش الاسطوانه اليوم متغيرة مراد درهلي كبدي في السيارة روحت اهني استلمتوني انتو ..
ويين الي كاانو اقري ياحوراء نبيك ترفعي راسي نبيبك دكتورة متفوقه هو اني طبيبه مساعده قعدة وهكي صااار خييركم شن فييه نتكلم ونشبح لي امي اتفنص فيا متبينيش نتكلم 

بوي.. هكي الوضع في لبلاد ايخوف واني خاايف اعلييك من الانتقامات وانتي بنتي لما كنا في الاردن عكس اهني في لبلاد اهني مش كل شي تقدري اديريه ..

حوراء.. اني خوفك بوي نشبح فيه من لما قتلك ايسلم عليك وااحد اسمه رعد.....قعده ماكملتش نزل فياااا هزاايب..

بوي... انتي متحشميييش قتلك سيرته تبعدي اعلييه واحد سرسري ضااايع بروحه وتقوليلي نوقف اعليه. ويسلم اعليييك  ..

حوراء.. هذا ولد عمتي زهرة بوي... اني قلت الكلمه هذي والعيله سكتت كلها ويشبحووولي كلهم ...
خييركم سكتو اليوم قااالي قولي لي بوووك ولد زهرة الداعشي ايسلم اعليك وكتبلي رقمه يببني نعطيهووولك  ..

بوي... هو قالك اني ولد زهرة ..مستحيل ولدها قلا انته ولد العااار بوووك ..

حوراء.. يعني الي نفهمه انكم خايفين عليا من رعد ..ولد عمتي زهرة شبيهتي الي طول عمري اتقول لي ريحه زهرة اختي الحنينه الطيبه ..
توة عندكم ريحتها ولدها رعد تقدرو تمشولا اتكلموه تعرفو منه وين عاش وشن شااف ..ونضت وخليتهم وصلت الدار قالي بوي ..
تنسي الدوااام نهااائي وهذا رقمه جيبيه توة..

حوراء.. قربعت الباب وخديت ورقه كتبت فيها الرقم وطلعت حطيته علي الطااوله بدون مانتكلم .. واصله من المستشفي جيعانه وراسي مصدع استلمووني شن داير يارعد هكي لين بوي كارهك...
خشيت لداري قعمزت ونشبح لأيدي مش هاين عليا نمسحها خديت تليفوني كتبت الرقم فيه ونضت  خشيت غسلت الرقم ورقدت من غيير عشي ولا نقاش مع اي حد لاني مش متحمله روحي...

تاني يوم الصبح نضت لقيت الكل علي لفطوور جيعانه بنضيع صبحت اعليهم وجريت الكرسي وقعمزت صبيت طاسه شااهي ومانشبح لي حد ولا واااحد هدوووء سيد الموقف كملت ونضت كيف بنوصل لي داري تكلم بوي..

ديري في بالك اليوم مافيش شغل نهائيا من اليوم وبري الحوش لين انشوف صرفه في المصيبه الي جتني..

حوراء.. لاله ساامحني يابوي مش اني الي تهرب هذي شغلتي واحد ماليهش علاقه بالمستشفي بنسيب علي خااطرة بنمشي ونشتغل انتو علمتوني ناخد حقي ولا .....لذلك مشكلتك انته واختك ولدها مدخلونيش فيها ...

بوي.. انتي معش  اتحشمي ولاعاد تستحي طلعه بري من الحووش ممنوع ولا اتجيبي سيرة اختي في لساانك ...

حوراء.. نبي نعرف اني انته شن سامع اعليه هكي بوي خييرك اني حوراااء الي طول عمرك اتقولي لو مية مليون راجل يقفو قدامك كملي طرييقك بين يوم وليله خوفك رعد...لهدرجه هذي

بوي.. كلمه معش نبي من ايعاااااود تااني بري من الحوش ممنوع تطلعي فااااهمة ...

حوراء... مصدومه من اعصاب بوي نتفكر فيه اول ماروحنا ايقول متمني نشبح ولد اختي رعد نبي انشوف ريحه اختي وين عايش...
اني متأكدة انه سأل عليه وسمع علييه شي وهكي وضعه قعدت نمشي في الدار بين اهني واهني معش عرفت كيف نصرف شن هاللعنه الي طلعتلي خايفه بوي ايدير شي لرعد او ايبلغ اعلييه مع اني عارفه بوي لاكن حسيت في عيونه انتقام ..
ويبي ايبرد كبدة من راجل عمتي الي هجرنا سنيين من عمرنا ...
خديت تليفوني  كلمت دعاء قتلها مريضه مش جايه قعمزت في الدار نسمع فيهم طلعو كلهم وامي بتمشي للمدرسه جت فتحت الدار عليا...

حوراء.. يااااام كان بتقوليلي رعد مارعد فكيني منها الدوة هذي..

امي.. مش قايله شي بنقولك اصبري متعانديش توة ربك ايحلها بوك بيمشيلا يفهم منه هوا سامع عليه كلام ايخوف اني كنت متبيش انقولك لاكن انشووف فييك اتعاندي لذلك كلمي خودي ايجازة اسبوع ولا اتنين ارتااحي فيهم...

حوراء.. اني مش عاارفه علاش مكبرين الموضوع مجرد مريييض لانعرفه لايعرفني  جي ومشي نفس الوقت اني مش صغيرة وتعلموني كبيييييرة وفااهمه وعاارفه...

امي.. خلاص اني بنمشي للمدرسه وريحيني كان جي بوووك وقال شي تسكتي ولا كلمه لين نعرفو وين بتوصل بيه بوك...

...
حوراء.. اووووف من هالموضوووع ...
......

رعد ...
نضت الصبح متهتك وخلوقي ضااايقه الي يجي قدامي نقتلا دخان وقهوة ونفكر في حياتي الي مش راضيه تستقر  كيف بنواجه بوي وبنواجه حاتم وبنواجه خالي عبدالله ...
كلمت نوري وسمير وهيتم وصلو الاردن وخشو للعيادة دخول فوري واحتمال عمليته بعد اسبووع  نوري وهيتم عمليات تجميل وعلاج طبيعي ..

نضت مشيت لشهاب ومهرة طلعتهم من الاسطبل
قعدت انمشي فيهم في الدوره ونشبحلهم التفتت لقيت داليا فاتحه روشن الكوجينه وتشبحلي عيونها علي الاسطبل والخييل ..
تفكرت اني من اول يوم جت فيه محبوووسه ممكن ربي ايعاقبني بيها حق لاكن هيا مرتاااحه وماقالتش نبي نطلع اليوم حسيتها في عيونها كلام ولا حزن ولا هيا متعودة علي الوحدة زي حااالي ...

قربت علي الروشن وقتلها

صباح الخيييير نااايضه ..

داليا ..صباح النوور اي ناااايضه ليا هلللبه وسمعت صوت الخيل فتحت الروشن شبحتك معاهم ...

فطرت ولا نحسبك ..

رعد... نشبحلها مافيش حاجه ناقصتها شكلها طولها بيوضيتها عيونها زرق السماااء قعدت مدة نشبحلها  تغير لون وجها احمر ...ركزت علي روحي ...

احمم عادي ديريلي طاسه قهوة معااااك ...

خليت مهرة وشهاب البراء ومشيت  فتحت الملحق وقعمزت علي الكنبه نبي انكلمها اذا مجاش بوها بنحطوه قدام الامر الواااقع ايوكل حد علي العقد ونبي نعقد عليها تطلع وتخش علي راحتها هكي ضلم في حقها محبوسه ليها قريب الشهر ونبي انفهمها مانبيش نضلمها  اذاكان متبينيش  نتواصل مع اهلها من جيهة امها ونوصلها بايدي المهم عتقتها من مرت بوها وبوها الي متبيهمش ...

قعمزت في فم الملحق وخليته مفتوح نبيها تطلع شوي بما انه اشرف مش قااعد واني بروحي بس ...

كفختني ريحة القهوة طلعت حطتلي طاسه القهوة وخشت .
رعد..قبل لا اتخشي داليا تعالي نبييييك شوي ...كلني نختلق في كلام معاها نبي نشوفها

داليا .. نعم ..

رعد ... بوووك عطل واني حاس روحي بنضلمك لو عندك اقااارب تتواصلي معاااهم قوليلي اني انوصلك بايدي وانسي الزواج وبوك وكل  شي ..

داليا.. اني نعرف خالتي خارج ليبيا لاكن معنديش رقمها واني نبي نقعد اهني ..

رعد.. داليا اني راجل حياتي مش ملكي ملك الوقت

يعني متعارك مع روحي ومع بوي ومع خالي وحتي الدوله بكبرها متعارك معاها ....
وعايش علي ارضها منبيش نضلمك معاي انتي صغيرة اطلعي شوفي حياتك اني كبييير علييك عمري مش من عمرك ممكن انتي توة في فترة الصبا واني خلاااص رااحت عليا اربعيني ممكن نديد امك اني..

داليا.. بالعكس انته اجمل واحسن شخص شفته وتعرفت اعلييه انته صح عمرك كبييير لاكن دااخلك صغييير حياتك قعدة مابدتش ورح تبدي واني لما قتلك موافقه علي الزواج مش لاني بنهرب لا بالعكس لاني حسيت بي رااحه معاك في حياتي محسيتها ..

رعد.. نشبحلها ونضحك علي روحي كلامها اكبر من عمرها البنت حبتني واني نجري في جرت حوراء المجرمه المتكبرة قياديه ...
ابتسمت في وجها وحكيت شعري ونضت من الفم وقفت شبحتها وااقفه لابسه قفطان ازرق وشال بيج عيونها غريبه براءة علي حزن علي وحده ايديها مشبكات في بعض وتفرك فيييهم .. سمعت صوت الباب الخارجي ايطق سكرت الملحق ومشييت متوجه للباب بنفتح اكييد حد منعرفاش لانه جماعتي عندهم نسخه من كل شي ..

وصلت فتحت الباب ولقيت في وجهي الفقر ولد الفقر جاي بروحه هالمرة عيونه فيهم غل وانتقااام. ..

أسفرت ونورت شن بيقول الواحد توة الطيب عند دكرة اتحسها مش راكبه اعليك حااتم بكل ...

حاتم.. اني مش جاي نضحك معاك جاي انقووولك كلمتين ونمشي ...

رعد.. خش دااخل منبيش كلام يطلع عليا جايبك في حوشي كلمتين وتطلع ومعش اتوريني وجهك

خش قبلي قعمزنا البراء في فم الحوش واني جبدت كرسي وقعمزت امقابلا ..

تفضل شن قررت ..

حاتم.. اني موافق اني نعطيك بنتي ونكون وليها قدام ربي لاني خاايف عليها منك اقل شي لما تبدي عندك بالحلال مدخلنيش فيها شن ادير لاكن بشرط ..

رعد.. اولا تحترم نفسك من لكلام الي اتقول فيه مش لانه عينك عوجي تشبح الناس اكلها عوجا
وتانيا عندي شرط حتي اني قول شرطك قبل ..

حاتم .. بشرط بنزل انه بنتي توفت  ولقيت الجثه وبندير عزي لاني مش مستعد  الناس اتقول حااااااتم ناسب رعد المهرب ...
وبنوكل حد من رجالك بحضوري ايوقع عقد الزواج وتغير الاسم الرباعي بالكااامل تدرجها في كتيب حد من جماعتك اكييييد جو التزوير فااالح فييه ...

رعد... نسمع فيه والشروط التعجيزيه الي ايقول فيها ... شرط ولا شروووط هذا ...
خليك واتق اني اني فرحت بيييه الشرط تعرف اعلاش لانه بنتك مش نفس طييينتك وحرام تسمي باسمك لذلك  منتهية ومحلوووووله جدا ...

غدوة ايكون كتيبها جاااهز اسمها ولقبها لاكن شرطي اني اول ما نعقدو بتوكيل منك تطلع خااارج ليبيا والا السيديات تنتشر نهائي منبيكش في ليبيا ...

حاتم.. اصلا من غير متقووول معنديش علاش نقعد عايلتي اتراجي فيا خارج بلادكم الي خااااااربه من جرتك ..

رعد... تمام توة تقدر تطلع من غيييير مطرووود وغدوة لكلام بيناتنه
ناض وصلت معاااه الي الفم وقف يشبحلي من فوووق الي لوطي مدلي ايده ...

سلمت اعليييه وهو قعد امركز علي عيوني وقااال ..

انهزمت ونعترف بيها لاكن ربحت راااحتي وسمعتي ..

رعد اتفاااقنا ماااشي وغدوة بعد العصر ان شالله ايتم كل شي والعزااء دبر راسك فيييه بعده تطلع من ليبيا طووول ..ماشي ..

حاتم .. اتفقنا ..

رعد ..طلقت ايده واقف في الفم ونسمع في حد وراي ايتكلم بصووت عااالي وصفق ايديه وقااال

مشاااله اتفاااق اخر يامجرمييين علي من الدووور جاي بوووك ورتك الصنعه ياااولد اختي ..

التفتت لقيت خالي عبدالله واااقف ويشبح لي حاتم ويشبحلي  اخر موقف نتمني انه ايشوفني فيييه ..

للحكايه بقيه..

جميله جاسم ..