الرجل الاربعيني باللهجة الليبية

البارت الثامن

البارت 8

#الرجل_الاربعيني

#جميلة_جاسم

سَـآَبـقَـىْ گـمَـا آنــا ..~ خُــرافــيَ الْــتــگويْـن خِــيَـآلِيَ

الْــعِــبـآرَاتِ..! سـأبــقـىّ عــرآبّ آلــگـبـريــآء .. غـآمـضّ آلـظَـروفّ..

گــلـمـآتــيّ بِــدوْنِ قـيــوْد.. خــوآطـريّ بِــدوْنِ حُــدوْد.. و كرامتي

لـَيسّ لـِـهـآ مَـثـيلْ فـْـيّ آلـُوجُـودّ..!!رعد

رعد... اول ماشبحت الولد ايقلع في باب الملحق علي طول جاء في بالي حااتم اكيد حد قاله علي مكان بنته وجاي بيهربها مشيييت الي عنده لقيته ضربته بسيطة سطحيه في الرجل ...

نووووض فوووق ياكلب ننوووض من بعاتك من ويين انته تككككلم شبحتلا شكله كاني نعرفه وجها مش غريب عليا قمته مع اكتااافه وسندته علي حيط الملحق شديت رقبته خنننقته لين نفسه انقطع طلقت ايدي وتكلمت هالمرة بشوي ..
انته من وييين ومن بااااعتك راني ماخاسر شي طلقه في راسك ونلوحك بري الحوش بس..

اني باعتيني ملياش ذنب ولا علاقه نبي انهرب بنت حاتم ..

من قالك انه بنت حاتم عند رعد اه مني ومن الي باعتك بالاصل.نشبح لي شكلا عرفته الي طااالع معانا في السيارة الي هربت ناديت اشرفففففف بصوت عالي وايدي خانقه مع رقبته ...

اسرار المهمه منقدرش انقول . ايقوول فيها ونفسه متقطع من الخنقه شديت اعلييه اكثر ...اعترف بي من بااعته  ...تو نعرف شن انديير معاااك ...

اني حاليا في سيااارتي ونشوف للعداد تخطيت 180 في زحمه طرابلس فكري وبالي مشوش من الي صااار معقوله بنت حاتم تطلع تتجسس اعليينا ولا اتوصل في معلومات من قال معندهاش تليفون الغلط مني مفروض جيبت مرت ناصر فتشتها ولا كيف بيعرف بوها انه مكانها عندي والهجوم صار نفس يوم الاجتماع لو في حد بيوصل المعلومات خدي وقت مش طوول الي زايدني من جيها سفرة نوري وسميير .. نااصر ديمه عنده لزووم ..شبحت جنبي لقيت انور الشرقاوي كلمته اول ما شديت الولد ..
عدلت لمرايه شبحت اشرف مقعمز وجنبه الولد مكتفييينا ..
اشرف صكرلا عيووونه الكلب الي جنبك  وحطلا الورقه في فمه ودبسلا اعلييها ...

انور ..كنك ياراجل متبيش اتقولي علييش ماشيين لحاتم بكرعينا ..

رعد.. معليشي اصبر انور نوصلو وتعرف القصه كلها احني مش ناازلين بنلوحوه في الفم ومجرد طلقتين تنبييه وبنمشو الورقه فيها المضمون ..

انور... عليش في الفم خلي انخشو جوا ونشربو شاهي معاه هذينا نساباتنا  ..

رعد.. انور انوووور رااصي ضااارب فيوزاته خليني ساكت اني خدمتي هكي تحمل معاي شرقاوي باهي ..

انور.. متحمليين وسكتنا. 

رعد طبعا حوش حااتم كبيير وساكن في تاجوراء وعنده في قرقارش احني بنمشو لي حوازته في تاجوراء شيباني كبيير وقعد شاد في الدنيا وبنته يبي يخطفه لييين ايموت بنته مش شابحها واني رعد ....
كان ما خلييته يتمني الموووت باش نرحمه اني ضد دولتهم الي بانيينها اني عايش والدوله وري كتاافي  ..

وصلنا حوش حاتم من بعيد نشبح في سيارات وزحمه اكييد الي كانو معااه وهربو جايين ياخدو في العفو منه.. درست السيارة بعييد وقلت لي انور  اسمع انور انزل انته ميعرفوكش دور من وري الحوش قلهم عندي سياارة خااربه تعالو صلحوها  واني من الشرق منعرف شي في طرابلس وضيعت الطريق ..باهي ..
لما يمشو معاك الاتنين الي وااقفيين احني بنلوحوه واول ماتسمع الطلقات اطلع علي الطريق الرئيسي باااهي واحني بنجو بسيارة ..تو انلف نركبك

انور..لنقالك خطيييير ياغضب الليل خلاص توكل علي الله وعلي انور ..

رعد نزل انور قعدت نشبحلا من بعييد وصل عندهم قعد قريب الخمس دقايق ايفاوض فيهم نشبح فيه تحرك هو وهما تلات انفار مشو وراه قدام الحوش سيارة فااضيه فتحت الدرج طلعت مسدس شبحت لي اشرف شاده ..
وتي رووحك اشرف شوي وافتح الباب نبوش انلوحوه السيارة متعليه غطي وجهك مزبووط ..قتلا هكي خايف اعليه يطلع في الكاميرات ويقعدو ايدورو فيه اني مش خايف حتي من الموووت
طلعت بسرعتي بسياااره وصلت فم الباب فتح اشرف نزلنا حطينااه فم الحوووش وركبت في السيااارة رميييت طلقتييين في الجووو وتحركت بسرعتي ركبت انووور علي الساااحلي وبوجهي لللحوش طووووول
اني درت هكي مش خوف منه او لانه وااصل ويضرني اني نبييه ايجيني برجلييه الي عندي لانه الورقه مكتوب فيها كلااام ايهد جبااال ...

انور.. شغلك يارعد مايمشيش في الوقت هضا  ياصاحبي  ..

رعد.. اكثر حاجه مااشيه في الوقت هذا شغلي اني انهرب في سلاااح خااارج الدوله نشري ونبييع مدخلنييش في وين بيستغلوه اني عندي المهم مش فرخ 12 عام شاد رشاشه ودايرلي فيها رااجل ولا حااتم فضاايحه كلها عندي غدوة ايجيني علي ركبييه يجدي فيا نستره وقول قالها رعد  ...

انور.. تعال شوف غادي عويييل كلهن شادين سلاح ويهددو في بعضهم بعدين حاتم شن شغلك معااه خلييه رايض ويلعب في لبلاد مش هيا رايحه فيها ..

رعد..بلاااد ماشيه للهاويه ياخوي لاكن حااتم دباارة عندي  ..

وصلت للحوش انور روح واني الساعه 11 في الليل كيف الوقت يجري مشييت للحوش نبي نريح غدوة وراي جبهة كبيره خشيت لداري شفت صورة امي قداامي وتفكرت حوراء وسرييب خالي الي مش عارفني ولد اخته رقدت نووووم الي الصبح نضت علي صوووت جوكر الببغاء اينادي رعد رعد رعد رعد
نضت امعصب..

الله يلعنك من ببغااء صكككرلي فممك صبح اوووف حدفت البطانيه ونضت جيعان وعطشان ومتهتك الي امتي بتقعد هكي يااارعد الساعه عشرة ونوري طيارتهم في الليل لاهوا لاسميير سمعو بسريب حااتم وبنته ..

خديت قهوتي ومشيت للملحق فتحت علي عروس المستقبل اول ماخشيت لقيتها في المطبخ وريحة تطييب مشييت للمطبخ تنحنحت ..
اححم .. التفتت شبحتلي لابسه قفطان ازرق وشااح جايينها واسعاات ..
صباح الخيير.. ردت

صباح النووور وقفت فم الباب قتلها ..
شن اديري في المطبخ .. ضحكت نص ضحكه ..
شن ايضحك فيك ..

داليا.. شن قلت مطبخ ..

رعد..اي وشن تبيني انقولك ..

داليا.. كوجينه احني انقوولو..

رعد اي كويس واني بدووري انقولك معليشي بنت حاتم تو انعدلها ونقول كوجينه زيكم ..

داليا..اني مش بنت حااتم ولا عندي بووو ..

رعد ..كويس كملت اعلييك ياارعد ..حطي الي في ايدك وتعاالي لصاله عندي معاك كلمتين ..

داليا... شن بتقول قولي اهني نسمع فييك ...

رعد... مشااالله القطوسه كبرت ولت اتخبش تعااااااااااالي اهني بسررررررررعه دقيقتين لقيتها قدامي امقعمزة ..
.اسمعي مرة تانيه اي كلمه انقولهااتقووولي حااااضر اني وااحد باااايع الدنيا وصارف حقها معنديش مشكله بككل في المشاكل .....هذا كان اتفاااقنا المرة الي فاتت ولا لا ..

داليا.. اي هو..

رعد.. كويس عااوديلي شن قتلك المرة الي فاتت ..

داليا.. قتلي تقبلي انروح بيك لي اماليك قتلك لا ..
وقتلي .....

رعد.. اي خييرك اسكتي شن قتلك تاااني..

داليا.. قتلي تقبلي نعقد عليك ونتزوجك قتلك اي ..

رعد.. باااهي والبند الاخييير..

داليا.. قتلي اذا كااان تطلعي تلعبي عليا انتي وبوووك ندبح بوك وندبحك ..

رعد... كويييس فاااهمه وحااافضه زيدي عندك

الرابع الكلمه الي انقوولها اطبقييها بدون نقاااش هذا طبعي باش انكون علي بيينه معاااك  ...
وبوووك بجيني اهنيي اتقوليلا مش مروحه معاااااك وافق علي زواجي من رعد ولا انقول الي شبحته عند سكينة كله وهذي مرت بوووك حسابها عندي ...بااااهي ..

داليا...باااهي اصلا اني منبيش انروح بوي عارف ..

رعد.. داليا يابنت الناااس متقوليش كلمه وتسكتي غدوة بعد غدوة تطلعيلي بموال اخر ونقعد اني واحل في حل احباالي..
الي عندك قولييييه اليوووم احكيلي كيف او وين كنتي عااايشه وبوك يعرف بمرته دايرة هكي ولا لا احكي كل شي..

داليا...اني امي جابتني وتوفت منعرفهاش حتي بالشكل تربيت عند عمتي خارج ليبيا الي عمر العشر سنين بعدين بوي اتزوج سكينه سكرتيرته في الوزارة وبعدها عشت معاها عاادي متفرقش في وجودي حياتي كانت مع بنت خدامتها  نطلع ونلعب اني ويااها وعلي بالي انه اني بنتها انقلها ماما ولما جابت ولد بوي بدي ايفرق في المعامله بيناتنا اني كنت نتمني انعيش زيهم مع ام وبوو زي الناس كبرت وعرفت انه امي متوفيه وهذي مرت بوي سكينه شدت العين الحمراء معاي دارتني انضف ونطيب وصلت لي صف تالت اعدادي وبطلتني وقالت لي بوي هيا مش كويسه في المدرسه وقالت نبي انبطل بوي مش امدورني نهائي قعدت سنتين خوتي منختلطش بيهم اتقلهم هذي افكاارها مش كويسه ومتكلموهاش ؟..
حياتي عبارة عن داري وخلاص لانطلع لا انخش مستمرة هكي الي ليين جاء اليووم الي سمعت مرت بوي اتكلم في بوي واني ماشيه للكوجينه.. قتلا بنتك لازم تعطيها لي فتحي يتزوجها ....

ويستر اعليها لانها باين عليها بتجيبلك الشبهات وانته صاحب منصب في الدوله اني سمعتهم وقررت نهرب من الحوش لاني لو انموت منتزوج هذا الي اسمه فتحي ...
واحد قذر يشرب ديما وشابحاته كذي مرة مع مرت بوي في الكوجينه وضعهم ......... مش عارفه كيف

رعد.. نشبح فيها تكلم وتبكي معقووله هذي دوله ليبيا بلاد خربت مشيت للكوجينه علي قولتها  جبتلها اميه وعطيتهالها ...
كملي واذا مش قادرة مره تااانيه عاادي نبيش نضغط اعلييك بس نبي انكون علي بينه لانه بتولي مرتي ومانبيش ولا حاجه ادسيها عليا...

داليا.. ممكن بعد ماتسمع الي بنكمله اتغيير رايك في قصة الزواج..

رعد.. الي بيكون ايكون كملي ..

داليا.. شبحت مرت بوي وفتحي في وضع مزري في الكوجينه وبوي راقد اني لاني صغييره وعلي بالها منفهمش هربت وشبحتني  وهيا علي بالها بنقول لي بوي قررت اتزوجني لفتحي.....
  لماسمعت هكي وتيت شنطي وجيت بنهرب طلعت من الفم معنديش مكان نمشيلا عمتي خارج ليبيا وخلاتي من لما توفت امي منعرفهمش بحكم تربيت خارج ليبيا وصلت فم الباب عندنا درووج سمعت صووت سكينه اتكلم في فتحي ومعاه زوز تانيين قتلهم اني بنقلها اطلعي للملحق يبيك بووك وانته خلووكم البراء لما انخش خشو وراي اني من غبااائي معرفتش شن نصرف طلعت في وجوهم قتلهم سمعتكم والله الامنقول لي بوي عليك انتي وفتحي شن درتو في الكوجينه ..اووو ..

رعد...تحكي وتبكي قداش شافت من اماليها ليين فضلتني اني الغريب عليهم معش عرفت ..كملي ..

داليا.. اني كملت كلمتي شدتني هيا وفتحي صكرو عليا الملحق ونسمع فيها اتقوولا بنتك هربت حتي دبشها رافعاته هربت مع صااحبها اني مكتفه قدرت انحل روحي مشيت خديت سكيين من الملحق وقفت علي الباب نشبح في باب المطبخ انفتح وطلع بوي ومعاه رجاله تانيين علي اساس بيدورو عليا يبو ايرجعوني شبحت سكينه جايه ومعاها فتحي واتنيين رجاله تاانيين فتحو الباب عليا اني دسيت السكين تحت حوايجي وصل فيا فتحي حاولت نهرب نترجي فيه ايخليني في حالي لاكن كان شاارب ميدري علي شي....
ضربته بي تحفه كانت في الدار وطلعت نجري لاقاني واحد تاني خديييت السكيين نضرب ونعييط جت في بطنه طاااح مشيت لباب الخلفي نجري في الظلام قعدت مدة بين السيارات وقفت علي الطرييق نشبح في سيارة متعليه كبيرة لقيت فيها ولد ركبني معااه قتلا اني نبي نهرب سااعدني ونعطيك الي تبيه اني بنت حااتم هربني من اهني هو انصدم لما سمع بي اسم بوي قالي انتي بتجي علي طبق من ذهب لي رعد عرفت انته اسمك رعد وصلني فم الباب وقالي خشي للاسطبل اني قعدت في الاسطبل ليين جيتني ...

رعد.. الولد الي جابك اهني تعرفي شكلا كان ورتهولك ..

داليا.. مع انه ضلام وليل لاكن ممكن نزبطه ..

رعد .. شي ايحير لو طلع الي في بالي عنده مكافأة تسوى ملايين ..طلعت نقالي وريتها صورة اشرف ..اشبحي هذا هو الي جااابك ..

داليا.. اييي ايي هو هذا تعرفه انته ..

رعد.. تمام .. ارتااحي توة  انتي  وماديري شي تو انوصي علي غدي من المطعم ..

داليا.. طيبت فاصوليا ورز ..

رعد.. فااالحه مشالله  ..
طلعت من عندها مشيت لاشرف نبي نعرف علاش ماقاليش عليها انه هو زادت تقتي بييه هالولد هذا خدووم وشغييل وامييين ماشي ونهز في راسي واني انقوول جايب القفاطين مقاسها طلع هوا صااحب العمله لاكن حلااااال عليييه ...

اشررررف..تعااال نبييييك...

اشرف..نعم

رعد.. تعرف البنت بنت حااتم ..

اشرف.. اي انته قتلي يوم جي نااصر وشريت اني الي موصيني عليهم..

رعد.. من جابها اهني ..

اشرف.. مش عااارف...

رعد.. كيف مش عااارف انته جبتها هني ولا هيا قتلي توة ..شبحتلا سكت وخااف ..اعلاش مقتليش اني الي جايبها اهني..وعلاش امنت فيها عندي مش ممكن تطلع بنت غريمي ونقتلها وانته تمشي في رقبتك رقبة كويس هكي

اشرف.. اني لقيتها في الطريق اتوقف وقفتلها بنسألها علي اساس مش امركبها لاكن هيا ركبت طوول وقتلي ساعدني نبي نهرب منهم ولما قتلي اسم بوها عرفتها بنته قلت ممكن نستفادو منهم..

رعد.. باه كوييس اعلاش مقتليش لقيت بنت واني جايبها مش هيا جت بروحها..

اشرف.. انته وقتها كنت شاك فيا وقلت لو بنقولا بقولي انته الي امبلغ علي الطلعه الي انضرب فيها نوري وهيتم لانه واحد من الي كانو معانا شبحتهم اليوم التاني في السوووق سألت اعليهم قالولي جماعة حاتم هذولا ايدورو علي بنته ...

رعد... يعني الي باعونا جماعه حااتم ولا كييف نفهم ..

اشرف.. اني زييك معرفتش من قاللهم علي الطلعه لانه نفس الولد الي كان ايسوق في السبعه وعشريين لقيته في المرسيدس في محلات الي خديت منهم بنقولك اعليهم قلت يمشي سمير وهيتم ونقوولك ...

رعد.. اكببببر غلط درته انك سكتت تعرف لو قايلي اعليه مكنتش خلييتهم يهجمو راني عرفت كيف نصرف ... نضت من جنبه امقعمزين البراء علي لكراسي ...
علي كلن اشرف لقطه الي درتها كبراتك في عيني خليييك هكي لاكن ممنوع انك ادس عليا حااجه ..
جيب غدي من المطعم سمير ونوري قريب يوووصلوو بنتغدو في حوشي وبيطلعو للمطار ...

خشيت غيرت حواايجي وجي نوري واشرف وهيتم للحوش قعمزنا في الصاااله ...

سمييير.. كيف حال مرت خوي الي في الملحق .

رعد.. تعرف ياسميير اكثر حاجه بنستاحشها بصااارتك ..

سميير.. متخافش خود شهرين نقااهة ونروحو ..

نوري.. والله اني كل ما يخطر في بالي المشي نضاايق مش متعود نقعد يوم كامل منشبحكش رعد..

رعد.. خللليني سااكت اني الي مش متعود علي قلتك وكل شي انديرا انشااورك لاكن اهم شي عندي صحتك لو بنسفرك لي اخر الدنيا ولا يقعد ضميري متعبني ..علي سيرتها البارح في اليل صارت رماية اهنايا ..
هجمو علينا بالسلاح جماعة حاتم بيهربو مرت خوكم قبل ..وحكيتلهم القصه كلها ..
نوري.. معقوله احني اخر من يعلم ياراجل ...

رعد ..منبيش انفسد اعليك لعشي واماليك محتفلين بييك الجايات اكثر يااقدر فتحت حرب معاه معش بتسكر..

سميير.. وكيف عرفت انه تبع حاتم ..

رعد.. خنقته مع رقبته وخرط الاول والتااالي ومعقب شي ..

نوري.. وانور خدمك خدمه مزبووطه اعتمد عليه هو ونااصر ان شالله..

رعد.. لاله عاارفه حقااني متااع فزاييع ميعقبش راجل مصارش ان شالله ..

احني في الهدرزه خش اشررف يجري بي لغدي وجها دااهش حط لكيااااس وقف ..

خييييرك شن صاااير اشرف ..

اشرف ..حاااتم ومعاه عشر رجاله فم الباب قالي قووول لي رعد يطلع

رعد... ولع الدم والناااار ..قولا تعاااااال ياكلب برجلييك تعااااال ...

للحكايه بقيه ..

جميله جاسم ..

مساااكم سعييد حبايبي عذرا علي التأخير كنت في رحله صيفيه مفضيتش نكتب ..

طبعا انور شرقاوي تحيه لي خوتنا الشرااقه ساعدوني في الفاااظ شرقاويه لاني معنديش خبرة في اللهجه الشرقاويه حبييت انغييير وندير مكس لهجاات وتستمتعو بيها ..
قراءه ممتعه