الرجل الاربعيني باللهجة الليبية

البارت الرابع

وقد تاتيك الاقدار دفعه واحدة ...
لاتعلم بمن تتق بعقلك او بقلبك...
او ان للقدر راي اخر يحرق كل شي
متأكد حين أنكسر لن يرممني سوى نفسي ، وحين أنهزم لن ينصرني سوى إرادتي ، فقدرتي على الوقوف مرة أخرى لا يملكها سواي 🌴

#الرجل_الاربعيني

#جميله_جاسم

رعد... شفت للبنت لقيتها في توته صيفيه ومن غير حجاب شعرها اصفر صفاار الشمس عيونها دموع وجها خريطه علي اثار ضرب علي اثاار دم
وحفيانه مش لابسه شي...

اني انصدمت من المنضر مهلووع مش قاادر نععبر ....ويين قاعدين احني ويصيير فينا هكي معقوله ليبيا هكي صاااير فيها

كلمتها مرة اتنين ماردتش عليا اشرتلها  بايدي اسكتييي خليني نفهم صوت شهقاتها وعبرة ودموع ما سكتتش لو بنقعد هكي معش تخلص اشرتلها تعالي وراي
قعدت خاايفه وعيوونها اتغطي في روحها
بالله هو انتي شن لابسه وتغطي في روحك ااه شن لابسة دنيا ضلام مش واضحه مزبوط ..
تعاالي ورااي...التفتت لقيتها مقعمزة ...

تسمعي انتي ولا طرشه. اشرت  براسها بمعني اييه تعالي الحقييني طلعت مالحقتنيش وليت لقيتها علي تقعميزتها تعااالي اهني متعطلينييش اسطبل واني كيف امبدل تعااالي ياابنتتي
قربت عليها بنشدها مع ايدها خااافت غطت ايدها وبدت تبكي ....
اللهم صبرك يااارعد شن هالمصاايب الي انصبت علي راسي عاايش ناكل ونشرب شن صار بين يوم وليله ..
طلعت وقفت في الفم خشيت جبتلها بطاانيه واشرتلها علي السيارة نوضي اركبي في السياارة ليين انجيي نوضي ...

انتي تتكلمي ولا بكوشه ولا خييرك ..شفت منضرها وجعني حالها لابده في عمر 18 ولا اقل صغييرة هللبه شن صااير معاها وهكي حاالها
ناضت معاي فتحت الباب الجانبي دخلتها  للملحق صغيير دار وحمام ومطبخ باارد خشت اشرتلها علي الدار خشي ارقدي اهني لين نعرف من اماليك ونرجعك لييهم اني قلت هكي وهيا بدت تبكي بصووت
تي شن قلنا احني اسكتيييييي فاتحينهالي دمووع من صبح ربي اسسسسس كلكم ...
قربعت عليهاالباب وطلعت صكرته بالمفتااح اعليها ركبت في سياارتي ونتكلم بصوت عاالي
شن درت في عمرك ياارعد وانصبت عليك الكوارث من كل جيها بس مشيت  مطعم خديت عشي شاورما وطابونه ورز وفاصوليا مييييييت من الجووع وصلت للمستشفي وصلت لقيت سميير وصوت الضحك وااصل الي باب الحجرة لقيت نوري نااايض

الخونه شن ايقولو من ورااي  اااه ذيييبنا نوووري صحييح ياخالي ..

سميير.. فاتك نص عمرك تفكرنا ماضيك الاسود انته ونوري في تانيه

رعد.. اني شن عندي ابيض كلا اسوود  ماضي مدكن رايح زي وجهك..

سميير.. وجهي ابيض اني قول زي وجه نوري من الخوف والبهاذل رايح اسود ..

نوري.. ههههه كيف طالع من غيبوبةويا راجل اني معلياش القشرة قالت امي هههه
  ... شن صاار رعد عرفت من الي هجمو علينا ولا كييف ..

رعد..  نوري انته مدهش رووحك بيهم  خليك بعييد وبذن  الله نحرقهم قدامك وحاليا مافتحتش سرييبهم بكل يطلع وااحد جاري بينا من جماعتك الي جاايبهم كلاب حرايميه طوول هربو اول ما بدي الرمي ..

نوري .. هذووك معروفيين كلمت نااصر المصراتي جابلي نعتتهم  قالي مجرمه متاع سلاح وعارفهم. .

رعد . ناصر معروف راجل يخدم فيينا ميديرهاش واول ما سمع كلمني طووول يسال اعلييك..

سميير..قولتك جماعة ايوب تبع البنزينة..

رعد ..فتحت الشاورما ولعشي وبديت نااكل مييت جووع .. شن علاقته ايووب بالقصه  اه..

سميير .. مدلي مشروب نبي فاصوليا اني ..شن نعطييك نوري ..

نوري ..عطيني شاورما قبل لا ايجو يمنعو عليا الماكله فييسع ..

رعد .. كووول مدور شي ذييب يااكل اللحم ومايصيرلا شي..ماقتليش سميير شن علاقة ايوب ..

سمير.. يوم بتطلعو الصبح لقيته في الميناء قتلا نبو بنزينه  طالعين اليوم وخديت منه وسالني علي الوقت وسااعه ..

رعد .. يطلع هوا تو ناخد رقم ناصر المصراتي انكلمه ونسال علي من الي بعتهم يطلع صاير فيه تبذيل بسيارات وطلعو هما مكان جماعة نوري ..

نوري.. مرااات مش نفس السيارة قالي بنبعتلك خمس شباب والي جو تلاته مركزناش علي هالشي هذا..

رعد.. والله ماني عاارف منين اتجيني لمصايب توة منين امروح لقيت بنت في الاسطبل حالتها حااله لا وشاح لا عبايه جايه في راس توته وتبكي قلبت الدنيا  صكرت عليها الملحق وجيت قعد ما كملتش لكلام شرق سميير بالمشروب وبدي ايكح ..
خيييىرك اشرب هاااك بشوي شن جبنا سيرة البناويت وليت لي عوايدك ..

سميير.. بنت وفي الاسطبل وين اني في ليبيا ولافي الولايات المتحدة الأمريكية ولاية كاليفورنيا تري انشوف مع الروشن  ...

رعد .. اتقققل يااراجل مش طاايب بكل خييرك .. اني بروحي معرفتش شن قصتها شن بنلزها وهيا الدنيا لييل وحوشي جاي في حوازه بروحه ونزيدك متتكلمش شورها قتلها انرجع لي اماليك دارت مناحه هكي كبره..

نوري . مش عارف رد بالك مرات عندها شي ولا تسجيل ولا تنسط رد باالك منها ..

سميير.. وااك حسيت روحي في وادي الذئاب الموسم الثامن على قناه النهار .هههههههه.

نوري ..هههههههه ياراجل لخياااط بنفك معش اضحكني ..

رعد... هي توووكل هي مايصلحش بينا قعادك نووض لحوشك ..

سمير.. لاله يااراجل شن حوشي بنمشي للبنيه حسها وجعتني الزفتي برووحه ....

رعد .. يعن بو الي قاالكم علي المواال ..

سميير... هههههههههههه رايح فيها بووك بسبان عييب ياااراجل اعقل مش طاايب بكل. .

رعد .. وتعلق اعليا ياولد فتحيه ..تي والله ماك  طاايب بكل تبي حرقه...

نشبح لي سميير ايعلق ويضحك جوه ملييح بكل طبعه مرح وكوميدي والوحيد الي نضحك معاه حياتي شبه غمووض لاكن مع سمير ونوري شي تااني ..
اسمع سميير حق منبيش من يسمع ولا واحد اني وانته ونوري ..

سميير.. اني الاسبوع الجاي ماشي للاردن معش نبيها نقعها وشرب اميتها نمشي للاردنيات سمحات بكل ..

رعد .. تعرف شعرها اصفر تطلع مش ليبيه ..

سميير.. شعرها اصففففر لالا وين الاردن ياراجل عندي ضروف والله مايواتيني ..ههههههه تبدى هكي ..

نوري..ههههه هههههههه تي نووض اقلب هيا خلاص بنطيح في جرتك نووض  بنرقد عطيني رعد حبتين مسكن الجرح يوجع ..

رعد ..طلعت اني وسميير من الحجرة بعد ما غطيت نوري ونعس لانه الجرح قعد ملتهب وجهاز اللتهاب عالق قعد لاكن الحمد الله حي ولاميت مشيت لي هيتم اطمنت اعليه  وسمير روح اني اليوم بايت مع نوري مشيت للفم وااقف نبي اندخن بعيد علي المرضي ممنوع وقفت البراء شبحت حوراء طالعه لابسه عبايتها وشاح غريبه قتلي كيف امروحه  لليبيا يعني وين بتكون وملتزمه بلبسها هكي وقفت في الفم العيااده علي بالي بتروح شكلها بااايته المدام ..
مشاالله مش عاارف وين اماليها عليها شبحتلي من فوق الي لوطي اشرتلها بعيني ..
شني عجبتك وتبلحقي في عيوونك ..

حوراء.. سبحان الله علاش انته ماتتحاكاش بكل الاعصاب عندك ديما شغااله لعلمك بوي وخوي عمرهم ماقالو لكلام الي اتقول فيه بعدي......... ..

رعد.. اني منحبش لمراء الي ترد في لكلام نعتبر فيها مش مربيه وانتي الكلمه بعشره اني رعد بتمشي كلامك عليا صوتي علي اسمي وممنوع تدخلي..

حوراء.. اللهم جيبك ياطولة البال هو انته يوومين عرفتني فيهم طلعت انرد في لكلام بابا كلام الحق وجااع اني قتللك نقص في صوتك وين الغلط مرضي وناااس اتراجع بسس .

رعد.. بري خشي برييي  كان تقعدي دقيقه قدام عيووني نقتلك العيب مش فيك في المخنت بوك وخوك الي طالقينك علي حل احباالك ولا انقوولك خلييك اهني اني مااشي طفيت دخااني وخشيييت نسمع فيها تلعلع وراي..

حوراء...لعلمك اني مربيه احسن منك ومن الي جابووك واخر مرة تجيب سيرة بوي في فمك فاااهم .

رعد.. التفتت وقتلها ..الي مربيه ماتوقفش علي راجل متعرفاش واني انربييك ان شالله ..

وخشيت ..منبيش انكثر الدوة معاها لاكن حطيتها في بااالي واني رعد غضب الليل كسار خشمها وعناادها مهرة وتبي الترويض واني خياال انجيب راسها لطريق ..وصلت للحجرة لقيت نوري في سابع نومه فرشت علي السرير وكيف بنرقد جت في بالي البنت في الحوش كلمت سمير روح لي حوشه ولا وين ..
اه سميير وين انته في حوشك ولا في حوشي..

سمير..لاله في الطريق كيف مروح ..

رعد ..تمام بري بات في حوشي البنت بروحها والمفتاح عندي ارقد بس في الحوش وهني عمرك لا تطلع اهني لا اهني يااويلك ياسميير ..

سميير.. تمام يافندي ههههههه..

رعد.. طق اعليها الباب كان سمعاتك وشوفها مع الروشن ومتفتحلهاش ورد عليا سمير اياني وياك تلعب اهني ولا اهني  ..

سميير..هو المفتاح عندك كيف بنفتح اعليها مسكينه طيحه ربي في واحد ضالم زييك شن رايك تتزوجها وتريحنا .

رعدد.. اني صااايد وحده بنكسر خشمها..

سميير.. اي كويييس كانها الي في باالي زييد تورب طرابلس علي روسنا انته وياها ..

رعد.. اي وهذا الي عجبني فيها ..صكرت منه وشبحت لي نوري المسكن واخد مفعووله ولا حركه واني ندرز بصوتي زي الرعد ..رفعتني افكاااري لي البنت وقعدت انفسىر في ملامحها طويله وبيضااء وعيونها سوود غرييبه البنت كاني نعرفها معقووله تطلع اقارب امي هما من اقارب امي راس خال وهارب من السته وتسعيين خارج ليبيا ومن توفت امي منعرفش اعليه شي الي يسمع قصتي يستغرب كيف اني مقطووع من شجرة والناس خايفه مني ودايرتلي هيبه هيبة ملك ومن بين الافكاار حسيت روحي ماشي في سااابع نوومه ..

........
سمير..
مشيت للحوش وصلت فتحت الكنشيلو  نضام سحب شفت الحوش هدوء يقتل ولا واحد
اشرف في حوشه ايجازة قبل ضحك هيتم ونوري رعد والسلاح اينضفو فيه ليليا نسمع فيه الي الشارع العاام
وصلت درست سيارتي ومشيت وري الحوش الملحق جاي في جيهة علي اساس انه تبع الحووش مدرق طقيت الباب مرة اتنين مارد عليا حد مشيت
لروشن الدار مهناش حركه والضي مطفي مشيييت لدووش ولا حركه قعدت الصاله ومافيهاش
روشن الا الباب طووول طقيت سااعه واني انطق
شفت الباب مافيش علامه فتح وهروب وهو قالي امصكر اعليا ..
نبي وين مشت البنت كلمت رعد ماردش قريب عشر مكالمات ماردش تي ايقولي رد عليا ويرقد ..مشيت للحوش وخرت السيارة علي اساس مشييت نبي انشوفها شن موالها ونزلت علي رجليا وصلت الملحق من غيير دوشه شبحت الضي ولع وطفي لابده قعده خشيت لوحت روحي علي الكنبه وطحتلها الي الصبح نوووووووم ...

رعد.. تاني يوم الصبح نضت لقيت نوري نايض وجايبنلا فطوووره شبحت الهاتف الساعه سبعه الصبح وقريب عشر مكالمات من سميير صبح يافتااح شن املبز هذا ...

صباح الخيير نوري شن اليوم حالك تمام ..

نوري .. معقوول اليوم مشحط هلللبه ..

طلعت من الحجرة كلمت سمير مكااالمه اتنييين مردش تلات مكااالمه رد عليا...

تييي وييييييبيينك ياااراجل خيييىرك حااارق الهاااتف مكالماات وماتردش شن صااار شن فييه ..

سمييير..صبببح ياراجل قبل كلمت اني البارح ومارديتش البنت قعده صحيحه طقيت ماردتش وبعديين بعدت علي الملحق شفت الضي ولع وطفي يعني قعده متخاافش مش يااخديينها منك ولا يهمك ..

رعد.. خلاص هيا طيييير صبح شوي وبدل عليا نبي نعرف قصتها توة تعاال اقعد مع نووري واني بنمشييلها ..

صكرت منه وطلعت البراء غسلت  وجهي وخديت طاسه قهوة وقعمزت البراء اندخن اني طبعي الاعصاب الصبح ديما شاااغله علي قوولت هذيك

المراء شفت سيارة سميير وصل نزل وصكر الباب والشعر ناايض منسحابش روحي اعصااب ..

شني من لفراش جيت طووول غسلت وجهك قبل ..

سمير ..اي فراش اي وااحد انته تخلي واحد يغسل وجها والله قلت بيحرقني خل انووض. ..

رعد ..ابتسمت مع اني معنديش نيه في الضحك
خلييك مع نوري بنمشي انشوف لمصيبه الي عندي شني ..

سميير.. ماشي هاني فايت جيعان حتي طاسه قهوة ماشربت خلي ناخد من القهوة لمقابله ونفوتله ..

نضت مشيت لسيااارة ركبت وافكااري متضااربه من جيها وين بنرفعها واني مشبووه بروحي واماليها تبكي ان شالله غير مش بهلوله ونبتلي بيها اني بعد هالعمر  من شده التفكيير ماحسيتش بطريق الا لين وصلت للحوش طفيت السيارة ومشيت بتجاه الملحق ..
فتحت الباب تلات طقاات مصكرة مشيت للمطبخ مهناك حد في الحمام مفتوح مش فييه وصلت لي الدار طقيت مرة وتنين وخشييت وملقيتهااش

تكلمت بصوت عالي اطلعيييي صبح متكفريناش ويينك .. سمعت صوت جنب الباب متاع الدولاب ربي ايصبرك يارعد علي مابلاك مشيت قدام الدولاب وفتحته عليها بالقوة وشفتها مقعمزة تانيه ركبيها وحاطه ايديها علي فمها وشعرها اصفر نااازل علي وجها وحمراء جمر من كبت النفس قعدت نشبحلها ..

حطي حاجة  علي راسك والحقيني براء بسسسسسرعه ..

طلعت قعمزت علي الكرسي شن هالمصيبه هذي والا حجاب ولا شي والبقع علي جسمها  شي غرييب لو زي ماقال نوري تحسس او شي كان عندها حاجه لاكن هيا مش ساترة روحها بحاجه شفت باب الدار انفتح وطلعت لابسه سوريه طويله متاع اشرف وحاطه منشف علي راسها هه شديت ضحكتي والله ربي بلاني بيك وباشرف اشرتلها قعمزي مشت قعمزت امقابلتني وباين في عيونها الرعب ..

انتي من وين وشن جايه تبي اهنايا ..

متكلمتش بكووشه انتي هزت براسها بمعني لا 
باهي انطقي يابابا اعتبرني بووك خووك الي تبيه ..
ساكته وتبكي ..
متقدريش تتكلمي ..هزت بي راسها ايه ..

خشيت لدار جبت ورقه وبيرو حطيتهملها اكتبي ..

قعدت تكتب وتخرتش ..

اكتبي ومتمحييش نبي نعرف وين نعطي بييك وجهي اني راااجل مش فااضي لنساووين بكل لا للبكاء اكتبي وخلصينا ..

هااربه مع حد انتي هاربه من حد وين بووك ويين امك ويين اماليك اني قلت وين امك انفجرت بكاااء ..

اسسسس اسس خييرك اكتبي بلادموع ودراما وراي خدمه نبي نعرف وين انوصلك ..

كتبت ومدتلي الورقه ..

لقيتها خليني اهني ومش حنطلع نهايي ..

انصدمت من الي قريته شن انخليك اهني ويين عاايشين احني حوش رجالي معنديش لا ام لا خت بنخليك اهني علاش مديتلها الورقه ..

قعدت تكتب عطلت بالكتيبه واني انراجي في الجواهر الي بيطلعو انقص ايدي كان ما طلعتش
جاسوسه ..مدتلي الورقه وخشت تجري لداار ..والله ماهي صحيحه مهبووله البنت .قمت الورقه وقريتها وياريتني ماقريتها انصدمت من المكتووب صدمه مش متوقعه معقوووله

اني بنت حاتم ال...... بوي وزير متقاعد وامي متوفيه ومرت بوي جابت زوز رجاله يبو يعتدو عليا واني قتلت واحد منهم وهربت ...

لو انقلكم الف مرة قريتها مصدقتش خليتها وطلعت وصكرت اعليها الباب وبوجهي للمستشفي دماااغي مش راااضي يوقف علي التفكييير معقوله تطلع بنت حاااتم وجتني برجليها الخاانب الي لاعب بفلوس الدوله لعب ليا قرييب اربع سنين نجري نبي انشد ديله وجاني الي عندي ياالطييف  قداش الدنيا الدوور بنت صغييرة ومرت بوها دارت فيها مادارت المغربيه فيا ....
كرهت بوي فيا ولزتني من رزقي ورزق امي ..وصلت للمستشفي جت في عيني حوراء قدام سجل التوقييع شبحتلها قداش راافعه هييبه هالبنت هذي وخشمها مش عاجبها حد نقصت في مشيتي شوي وخليتها لين بعدت ومشيت لسجل...
واكلني الفضول بنت مني وقفت وشفت صدمه تااانيه علي صدمة اليووم ....
شن داير يارعد في عمرك وهكي صاااير قريت الاسم عشر مرات وقمت راااصي وناديتها بصوووت عااالي ..

حوراااااء ..
التفتت مستغربه ..
مشيت باتجاها ..

للحكايه بقيه
جميله جاسم