« 29».
- الكاتبة: آية مصطفى فرغلي.
- رواية: لماذا لم تبحث عني؟
- لا تنسى التصويت بنجمة وكتابة رأيك.
_________________
في طريقنا راجعيين للبيت وطول الطريق رياض مش باصص عليا في العربية، أنا عارفة إنه زعل من تصرفاتي مع نوح النهاردة، بس أنا مش هينفع أعمل غير كدا، نوح لوحده، نوح مكسور بشكل كبير، نوح مبقاش معاه حد غيري أنا وبس، مش عارفة أفهم رياض وعيلتي النقطة دي ازاي بجد؟
أول ما دخلت البيت
نمت على سريري بحاول أفوق من الصدمة
وبقول جوايا: يعني ماما فاطمة مبقتش في حياتي تاني خلاص؟ هي مش راضية عني، أخر مرة لما سافرت مكلمتنيش، تواصلي معاها ضعيف، حاسة بوجع، أحن واحدة كانت محتوياني مبقتش موجودة خلاص، ومش كدا لاء، نوح!!! نوح لوحده بجد.
رياض بيرن عليا في الليل والكل نايم
رياض: أنتِ كويسة؟
أنا وأنا بعيط: مش قادرة اصدق خبر وفاة ماما فاطمة.
رياض: ربنا يرحمها، أنا النهاردة افتكرت مريم اختي، هي الدنيا بتوجعنا قوي في اعز ناس بنتمناهم، ربنا يصبرنا، ويصبرك ويراضيكي يا حبيبتي.
أنا: أنا بفكر أنام، أنا محتاجة أنام وقت طويل يا رياض..
رياض: وأنا هقفل واسيبك تنامي وبالله متفكريش كتير علشان خاطري وارتاحي وخففي عن روحك شوية.
أنا: حاضر يا رياض، تصبح على خير
رياض: وأنتِ من أهل الخير..
سمعت كلام رياض وسبت الموبايل جمبي وحاولت أنام، كنت بفتكر كل ذكرى مع ماما فاطمة، كل أكله كانت بتعملهالي مخصوص، كل كلمة حلوة قالتهالي، كل دعم، كل مساعدة، كل حاجة كل حاجة، مش قادرة أنسى مواقفنا ولا حنيتها ولا كل حاجة لطيفة زي قلبها قدمتهالي، أنا واثقة إن ماما فاطمة مكانها الجنة، كفاية إنها مسابتنيش للدنيا، خدتني و حضنتني وربتني زيي زي نوح، كنا واحد مفرقتناش.
نمت مكملتش ساعة، موبايلي بيهز تحت المخدة
صحيت على صوت الهزة، ببص لاقيت نوح.. فتحت بسرعة
أنا بسرعة: ألو نوح أنتَ كويس؟؟؟؟
نوح: أنتِ كنتي نايمة؟ أسف بجد
أنا: لاء لاء، كمل بس، مالك أنتَ كويس؟
نوح بعياط: لاء مش كويس
وقتها سمعت صوته وهو بيعيط وينهد وكل نفس منه خارج من قلبه بصعوبة وبحُزن وألم
فضلت وقتها ساكتة، أنا بسمع عياطه وبس، وهو فاتح موبايله ونايم على السرير وساكت بيعيط، بيتألم..
وقتها مكنتش قادرة استحمل وجعه.
قلبي مكنش هاين عليه وجع نوح لأول مرة.
أنا: نوح أنتَ مش لوحدك، أنا وبابا وسُهير وعُمر ورياض عيلتك، أحنا كلنا معاك كلنا جمبك..
نوح: محدش بيحبني، أنا مفيش حد معايا في حياتي علشان عايز نوح، أنا محدش عايزني
أنا: مفيش الكلام دا، أنتَ بس علشان تعبان وموجوع دلوقتي لكن كلنا حواليك بنحبك و مش هتهون علينا.
نوح مبتسم للحياة وجواه خذلان ووجع: عارفة أنا قاهرني إنك بتكلميني دلوقتي تعاطف منك مش اكتر، واقفه جمبي علشان شايفاني وحيد فعلًا.
أنا سكت وقتها، مش عارفة أرد أقول اي، عايزة أقوله كفاية، أنا والله خبر موت ماما فاطمة واجعني، بحاول اصبر نفسي واصبرك الموضوع صعب صعب بلا حدود..
رياض معرفش ينام يومها وفضل قلقان على فريدة كالعادة، مبيحبهاش تنام خايفة أو قلقانه، رغم زعله من تصرفاتها النهاردة مع نوح
قرر يمسك الموبايل ويرن يشوفها نامت ولا اي، مع إنه واثق إنها نامت من وقتها، بس حاسس إنه عايز يسمع صوتها، ميخلهاش تكمل نومها وهي حزينة وموجوعة، خايف على قلبها يحصله حاجة..
رياض على الواتساب الأول
فريدة مش عايزك تفضلي نايمة وأنتِ مكسورة قوي كدا، اصحى من النوم..
وفجأة قرر يرن.
لاحظ إن فريدة في مكالمة الآن.
فريدة بتكلم مين الساعة3:00 الفجر.
صبر نص ساعة..
بعدين رن تاني، بس لاحظ إن المكالمة شغالة.
لكن فريدة وهي بتكلم نوح لاحظت بالصدفة إن في رسالة من رياض ظاهرة في الإشعارات على الموبايل من فوق.
فتحت الواتساب وهي مكملة مكالمة مع نوح.
ردت على رسالة رياض بخضة.
ايوا معاك
رياض: كنتِ فين؟ باعتلك من بدري
أنا لأول مرة أكذب على رياض: كنت نايمة.
رياض بخضة واستغراب: نايمة؟؟
أنا بتوتر : أه مش قايلالك إني هنام؟
رياض بيحاول يكمل على أساس إنه مش عارف إني بكدب: طب وأي ال صحاكي دلوقتي؟ مش كنتِ نايمة.
أنا بكل صراحة
رياض بصراحة نوح رن عليا.
رياض: ودا يستدعي تكدبي عليا؟
أنا: لاء، بس خوفت
رياض: خوفتي علشان عارفة إنك بتعملي حاجة غلط
أنا: مش هينفع مقفش جمبه في وقت زي دا
رياض: جربي كدا تقلبي الآية؟ يعني لو كان في حياتي بنت بحبها وهي في فترة زي دي، تفتكري كنتي هتتقبلي فكرة إني أقف جنبها بالشكل إل أنتِ بتعمليه مع نوح؟
أنا: رياض أنا اسفة قوي، أسفة حقيقي
رياض بكل حنية وجواه نار في نفس الوقت: دا مش وقت أسف، أنتِ تعبانة ربنا يهون عليكي، وبعدين كمل كلامه علشان ميحسسنيش إنه جاي عليا بالكلام ويسببلي ضيقة، ها كلتي؟؟؟
أنا: لاء، مش جعانة
رياض: طيب نفطر بكرا سوا.
أنا: لازم اصحى بدري اروح عند نوح
رياض: أنتِ للدرجة مش محترماني؟
أنا: رياض بالله متفهماش كدا، بالله عليك، لازم تفهم إن دا وقت مينفعش مقفش جمب نوح نهائي، ال ماتت دي تفرقلي أنا ونوح جدًا، مهما حصل من معاناة في حياتي خبر موتها واجعني أنا وهو قوي، ف أنا عارفة بوجعه ومقدرة قيمة الألم ال هو عايش فيه، مينفعش مهما حصل إن نوح يبقى لوحده على الأقل لمدة أسبوع
رياض: حتى لو قولتلك إني رافض وإني مش عاجبني تفكيرك في النقطة دي؟؟
أنا: حتى لو قولت كدا لإن ببساطة مش هينفع مهما حصل
رياض: حتى لو قولتلك إني ممكن علاقتنا نخسرها لو قربتي منه الفترة دي؟
أنا سكتت وقتها معرفتش أقول اي، بس فعلًا علاقتي برياض تهمني جدًا، لكن مش هينفع مقفش جمب نوح مهما حصل مهما حصل فعلًا.
أنا: رياض أنتَ كل مرة تفهمني ليه المرادي رافض كدا.
رياض: علشان أنا شاب وعارف قلوب الشباب بتتفهم إزاي، وقفتك جمبه مش هيفهمها تعاطف يا فريدة، هيفهمها حُب خصوصًا إن هو لسة مشاعره اتجاهك باقية لسة مخصلتش، أنتِ ليه مش مقدرة إن الشخص دا مسببلي غيرة وحرقة دم طول الوقت بمجرد إن قريبك ومش عارف أمنعك من إنك تعرفيه تاني؟ ليه مش قادرة تفهمي إني مش قادر استوعب فكرة إنك يكون ليكي علاقة ب أي راجل، ف ما بالك شخص بيحبك وإبن خالتك؟ يعني لا محالة هتقابلية وهتسلموا على بعض ف دا في حد ذاته شيء يقلقني ويضايقني طول الوقت، وبعد كل دا عايزة تقربي منه؟؟ لاء و بقالك فوق التلات ساعات بتكلميه..
بصي لحظة
فجأة رياض خرج من المحادثة
ورن على فريدة، بس للأسف لقى فريدة لسة مكملة في المكالمة
أنا : بترن عليا؟
رياض: أنتِ لسة بتكلميه؟
أنا مصدومة حاسة إني بعمل حاجة غلط، بس محتارة مش عارفة اعمل اي غلطة توجع نوح، واقفل معاه خصوصًا إنه عايزني الليل كله معاه في المكالمة.
رياض بحرقة دم: مش عايز اعرفك تاني، وقفل الموبايل بتاعه خالص.
أنا مكنتش عارفة اتصرف ازاي، بس وضحت لنوح إني نعسانه ولازم أنام علشان هصحى أجيله بكرا.
نوح قالي تمام وأنا كمان هحاول انام.
يادوب ما صدقت المكالمة خلصت وبعتت رسائل كتير لرياض علشان يكلمني، ورنيت عليه كتير قووووي.. زعلت من نفسي قوي وزعلت إن رياض زعل مني للدرجة دي، مهمنيش الجملة أكتر من إن اتضايق قوي بسببي، أنا فعلًا غلط بس مش بإيدي..
رياض فتح تاني مهنش عليه ينام بعد ما قال الجملة دي: عايزة أي؟
أنا: آسفة قوي، آسفة بجد
رياض بيحاول ميضغطش عليا الليلة دي علشان عارف ماما فاطمة كانت عندي اي: لاء خلاص ولا يهمك..
أنا: رياض.
رياض: نعم؟
أنا: أنا بحبك قوي والله وعارفة إن الجملة دي مش من قلبك.
رياض: مستحيل تكون من قلبي، أنا معرفتش أتحكم في أعصابي، رغم واثق فيكي وعارف المكالمة مجرد بتهوني عليه، بس مش عايز كدا، أنا فعلًا مش قابل دا، مش حابب فكرة إنك تكلميه اصلًا سواء بنية صافية أو دعم أو غيره وغيره، الموضوع بعيد عن ثقتي بيكي والله، أنا واثق وكل حاجة، بس مشاعري مش هتستحمل دا.
« المهم لو الرواية عجبتك، متسناش تسيب كومنت برأيك وتدوس على النجمة لإن دا بيدعمني جدًا».
[ نهاية الفصل التاسع والعشرون ]