အပိုင်း ၃၀၈ : နှမြောစရာပဲ
ဇူရီ၏ မဟာခွန်အား ဓားလမ်းစဉ်သည်၊ ကောင်းကင်ယံတွင် မိုးခြိန်းသံများဖြင့် တုန်ဟီးနေခဲ့သည်။ ထိုဓားကွက်သည် အဆုံးမဲ့ စွမ်းအားများနှင့် ပြည့်နှက်နေ၏။ သူသည် ဟော်မင်၏ အသူရာ ကမ္ဘာဖျက် ဓားသွားအား ထိပ်တိုက်ရင်ဆိုင်ရန် လုံလောက်နေခဲ့သည်။
မဟာကပ်ဆိုး ဓားလမ်းစဉ် အနေနှင့်မူ၊ သူသည် သက်ရှိအားလုံး၏ ဖြစ်တည်မှုအား ပြန်လည်အားဖြည့် ပေးနိုင်၍၊ အသက်စွမ်းအင်များဖြင့် ပြည့်ဝနေခဲ့သည်။ သူသည် အသူရာ ကမ္ဘာဖျက် ဓားသွား၏ သတ်ဖြတ်လိုစိတ်အား၊ ပြန်လည်တုံ့ပြန်နိုင်ခဲ့၏။
ထိုဓားလမ်းစဉ် နှစ်မျိုးအား တစ်ပြိုင်နက်တည်း ထုတ်လွှတ်လိုက်ခြင်း ဖြစ်သည်။ ဟော်မင်၏ ခက်ထန်သော တိုက်ခိုက်မှုအား ချေဖျက်နိုင်ခဲ့သည်။ ထို့အပြင် သူတို့သည်လည်း ကြမ်းတမ်းစွာဖြင့်၊ ဟော်မင်အား လျှင်မြန်စွာ ပြန်လည်တိုက်ခိုက်နိုင်ခဲ့သည်။
ဟော်မင်သည် ဇူရီ၏ တိုက်ခိုက်မှုများကို ရင်ဆိုင်နေခဲ့ရင်း၊ အသက်ပြင်းပြင်း တစ်ချက်ရှိုက်လိုက်၏။
အနက်ရောင် အလင်းတန်း တစ်ခုသည် လျှပ်စီးကြောင်း တစ်ခုအလား၊ ဟော်မင်၏ လက်နက်ပေါ်တွင် သူ့ကိုယ်သူ ရစ်ပတ်လိုက်သည်။ သူသည် အသက်ဝင်လာသည့်အလား၊ ဓား၏ဘေးတွင် လှည့်ပတ်ကခုန်နေခဲ့၏။ အမှောင်ထု၏ အကာအကွယ်နောက်တွင် ဟော်မင်၏ဓားသည်၊ နှစ်မီတာကျော် ရှည်သော တောက်ပနေသည့် ဓားတစ်ချောင်းအဖြစ်သို့ ပြောင်းလဲသွားခဲ့၏။ မြင်ရသည်မှာ ကြောက်မက်ဖွယ်ရာ ကောင်းလှပေသည်။
သို့သော်လည်း ဟော်မင်က သူ့ကို ဝှေ့ယမ်းလိုက်သည်နှင့်၊ ထိုဧရာမ ဓားကြီးသည် နဂိုမူလ အရွယ်အစားသို့ ပြန်ပြောင်းသွားခဲ့သည်။ သို့သော် ဤအချိန်တွင် သူ့အပေါ်တွင် ကခုန်နေသော အနက်ရောင် အလင်းတန်းများ မရှိတော့ပဲ၊ ဓားသွားသည် လုံးဝမည်းနက်သွားခဲ့၏။ ဖုံးကွယ်ထားသော ခွန်အားနှင့် ရက်စက်မှုတို့မှာ၊ သူ၏ ပတ်ပတ်လည်မှ လေထုနှင့် ဟင်းလင်းပြင်တို့အား တွန့်လိမ်သွားစေခဲ့သည်။
ဟော်မင်က သူ၏ဓားကို ခုတ်ချလိုက်သောအခါ လေထုအတွင်းတွင် လှိုင်းတွန့်များ တုန်ခါသွားခဲ့ပြီး၊ ကမ္ဘာဖျက် စွမ်းအားမျိုးဖြင့် သိပ်သည်းသော အနက်ရောင် ဒဏ်ရာတစ်ခုကို ချန်ထားရစ်နိုင်ခဲ့သည်။
ဇူရီက သူ၏ခေါင်းအား အနည်းငယ် ညိတ်လိုက်ကာ ပြောလိုက်သည်။ "အသူရာ ကမ္ဘာဖျက် ဓားသွား… တကယ်ကို အထင်ကြီးဖွယ် ကောင်းလှပါတယ်"
ဘာပဲပြောပြော ဟော်မင်သည် ရွှေရောင်ဗဟိုချက် နောက်ဆုံး အဆင့်မှ ကျင့်ကြံသူ တစ်ယောက်ဖြစ်၏။ သူ၏ မှော်စွမ်းအင် ရေအိုင်မှာ သိပ်သည်း၍၊ ဇူရီထက် ပိုကြီး၏။ ဇူရီအနေဖြင့် သူ့အား ထိပ်တိုက်ရင်ဆိုင်၍၊ အသာစီး မရနိုင်ချေ။
ဇူရီသည် သူ့ရန်သူ၏ ခွန်အားကို သူ၏အားနည်းချက် တိုက်ခိုက်ရန်၊ ရည်ရွယ်ချက် မရှိခဲ့ပေ။ ဟော်မင်၏ ကြမ်းတမ်းသော ဓားသွားနှင့် ရင်ဆိုင်ရာတွင်၊ သူသည် ဓားကို လျှင်မြန်စွာနှင့် နှစ်ချက်ဝှေ့ယမ်းလိုက်၍၊ အလင်းနှင့်အမှောင် ဓားချီနှစ်တန်းအား ထုတ်လွှတ်လိုက်၏။ အလင်းရောင် ဓားချီတန်းမှာ မျက်စိကျိန်းလောက်အောင် တောက်ပလှ၍၊ အနက်ရောင် ဓားချီတန်းမှာ သေမင်းစွမ်းအင်များဖြင့် မှောင်မည်းနေ၏။
ထိုဓားချီနှစ်တန်းတို့သည် လေထုထဲတွင် အချင်းချင်း နှောင်ပတ်ရစ်ဖွဲ့သွားကြကာ၊ ကောင်းကင် အလင်းနှင့်အမှောင် မန်ဒလာ မဟာနယ်နိမိတ် အဖြစ်သို့ အသွင်ပြောင်းသွားကြသည်။ သူသည် ဧရာမ အဝတ်အိတ်ကြီး တစ်ခုအား ဖွင့်ထားလိုက်သည့်အတိုင်း၊ ဟော်မင်၏ ဓားကွက်နှင့် ရင်ဆိုင်ရန် ဟန်ပြင်လိုက်၏။
ဟော်မင်၏ သူ့ထံသို့ တဟုန်ထိုး ပြေးဝင်လာမှုသည်၊ သူ၏အရှေ့မှ ဧရာမ အဝတ်အိတ်ကြီး အတွင်းသို့ ပြေးဝင်လာခြင်းနှင့် တူနေပေသည်။
ဇူရီ၏ ကောင်းကင် အလင်းနှင့်အမှောင် မန်ဒလာ မဟာနယ်နိမိတ်ကို မြင်ဖူးထားကြသူများမှာ၊ ဟော်မင်က သူ၏လမ်းကြောင်းကို ရုတ်ချည်းရပ်တန့်လိုက်လျှင်ပင်၊ ဇူရီ၏ မန်ဒလာမှာ အရှေ့သို့ တိုးဝင်လာခဲ့၍ သူ့အား မျိုချလိုက်လိမ့်မည်ဟု သိထားကြ၏။
ကောင်းကင် အလင်းနှင့်အမှောင် မန်ဒလာ မဟာနယ်နိမိတ် အတွင်းသို့ ရောက်သွားခဲ့လျှင်၊ ဟော်မင်သည် သူ၏ ရှင်ခြင်းသေခြင်းတို့အား ကိုယ်တိုင်ထိန်းချုပ်ပိုင်ခွင့် ရှိတော့မည် မဟုတ်ပေ။ ဇူရီသည် ကမ္ဘာပျက်သည့် ပုံစံအသေးစားလေး တစ်ခုအတိုင်း၊ သူ၏ မန်ဒလာအား ပြိုကျပျက်စီးစေနိုင်သည်။ ထိုဖျက်ဆီးမှု စွမ်းအားသည်၊ ရွှေရောင်ဗဟိုချက် အဆင့်မှ ကျင့်ကြံသူ တစ်ယောက်က ခုခံနိုင်သော အရာမဟုတ်ချေ။
ဟော်မင်၏ အေးစက်သော မျက်လုံးအစုံသည်၊ သူ၏အရှေ့မှ ဧရာမ အဖြူနှင့်အနက် အရာဝတ္ထုအား စိုက်ကြည့်နေဆဲ ဖြစ်သည်။ သူသည် သန့်စင်သော အလင်းနှင့် အမှောင်တို့ဖြင့် ဖွဲ့စည်းထားသော၊ သေးငယ်သော စကြာဝဠာ တစ်ခု၏ ဝင်ပေါက်နှင့် တူနေပေသည်။
ချက်ချင်းဆိုသလိုပဲ၊ သူ၏ ခန္ဓာကိုယ်သည် တွန့်လိမ်ကွေးကောက်သွားခဲ့၏။ ထိုကဲ့သို့သော လှုပ်ရှားမှုမျိုးသည်၊ ဇူရီက သူ၏ပစ်မှတ်အား အစကတည်းက ချိန်ရွယ်ထားလျှင်ပင် လွတ်မြောက်သွားစေနိုင်၏။
သာမန်မျက်စိ အမြင်တွင် ဟော်မင်၏ ခန္ဓာကိုယ်သည် နဂိုနေရာတွင် တည်ရှိနေသေးသော်လည်း၊ သူ၏ ကြီးမားသော ကိုယ်ကြီးသည် လျှပ်တစ်ပြက် အတွင်းတွင် ကျုံ့ဝင်သွားခဲ့၍၊ မျက်နှာပြင် ဧရိယာသည် လျော့နည်းသွားခဲ့သည်။
ဇူရီပင် မဆိုထားနှင့်၊ ပုန်းကွယ်နေသော နဂါးချောက်၏ ပြင်ပမှ စောင့်ကြည့်နေကြသော ပရိသတ်များသည်ပင်၊ ဟော်မင်သည် ပါးလျသော လေထုအတွင်းသို့ ပျောက်ကွယ်သွားသည်ဟု ခံစားလိုက်ကြရသည်။
အချိန်တခဏလေး အတွင်းတွင်၊ ဘာမှမရှိခြင်း အဖြစ်သို့ ပြောင်းလဲသွားခြင်း ဖြစ်သည်။
ဇူရီ၏ အကြည့်များသည် အေးခဲသွား၏။ တိုက်ရိုက်တိုက်ခိုက်နေရသော သူတစ်ယောက် အနေဖြင့်၊ သူ၏ အတွေ့အကြုံသည် အားအကောင်းဆုံး၊ အထက်မြက်ဆုံး ဖြစ်သည်။ သူသည် ဒီမတိုင်ခင် အဖြစ်အပျက်များ အားလုံးသည်၊ ဟော်မင်၏ တွက်ချက်မှုများ အတွင်းတွင် ရှိနေသည်ဟု ရေးရေးလေး ခံစားနိုင်ခဲ့၏။
ထုတ်လွှတ်လိုက်သည်နှင့် တပြိုင်နက်၊ သူ၏ ကောင်းကင် အလင်းနှင့်အမှောင် မန်ဒလာ မဟာနယ်နိမိတ်သည်၊ အခြားသူက ကြိုတင်ပြင်ဆင်ထားမှု မရှိခဲ့လျှင် ရှောင်ရှားနိုင်ရန် အမတန်မှပင် ခက်ခဲလှ၏။
ကြည့်ရတာ ဟော်မင်သည် ဒီအကွက်အတွက် ကြိုတင်ပြင်ဆင်ထားပြီး ဖြစ်သည်။ အစောက ကြမ်းတမ်းခက်ထန်သော ဓားကွက်သည်၊ ဇူရီက ကောင်းကင် အလင်းနှင့်အမှောင် မန်ဒလာ မဟာနယ်နိမိတ်အား ဖော်ထုတ်လိုက်စေရန် ထောင်ချောက်ဆင်လိုက်ခြင်း ဖြစ်သည်။ ဇူရီက ထုတ်လွှတ်လိုက်သည့် အချိန်ကို စောင့်နေခဲ့ကာ၊ ပြီးတာနှင့် တပြိုင်နက် ဆုတ်ခွာသွားခဲ့ခြင်း ဖြစ်သည်။
အကယ်၍ ဇူရီကသာ ကောင်းကင် အလင်းနှင့်အမှောင် မန်ဒလာ မဟာနယ်နိမိတ်အား အသုံးမပြုခဲ့လျှင်၊ အစောက ဓားကွက်သည် တကယ့်တိုက်ကွက် ဖြစ်သွားပေလိမ့်မည်။ ယခုလက်ရှိ အခြေအနေတွင်မူ၊ သူသည် ပြိုင်ဘက်အား မျှားခေါ်ခဲ့သည့် ဖိန့်ကွက်တစ်ခုသာ ဖြစ်သွားခဲ့သည်။
"ငါ့ရဲ့ လျှို့ဝှက်ဖဲချပ်ဟာ၊ အရင်ကငါ့ကို တစ်ခါမှ စိတ်မပျက်စေခဲ့ဖူးဘူး။ အခုအချိန်မှာ လွှဲချော်သွားခဲ့တော့၊ ငါ့ရဲ့စိတ်ဓာတ်က ကျသွားခဲ့မယ်" ဇူရီက ကိုယ့်ကိုယ်ကိုယ် တွေးနေခဲ့၏။ "ငါက သူ့ရဲ့ လှည့်ကွက်အတွင်းကို ကျရောက်သွားတော့၊ ငါ့ကိုယ်ငါ အလှည့်စားခံလိုက်ရတဲ့ လူပြက်တစ်ယောက်လို့ ခံစားမိပြီး၊ ငါ့ရဲ့ ဂုဏ်သိက္ခာနဲ့ ယုံကြည်ချက်တွေက ကျဆင်းသွားလိမ့်မယ်"
"ဒီလိုမျိုး အခြေအနေတွေမှာ ငါက စိတ်ပျက်ဒေါသထွက်ပြီး၊ ငါဆုံးရှုံးသွားရတဲ့ အရာတွေကို ပြန်ယူဖို့ ရှေ့တက်ပြီး အလောတကြီး တိုက်ခိုက်လိမ့်မယ်။ ငါက သွေးရူးသွေးတန်း ဖြစ်လာပြီး၊ အမှားတွေကို ပိုပြီးပိုပြီး ကျူးလွန်မိမယ်"
ဇူရီက အတွင်းတွင် ကိုယ့်ကိုယ်ကိုယ် ကြိတ်ရယ်နေခဲ့သည်။ "ကြည့်ရတာ ငါ့ရဲ့ စိတ်ခံစားချက်တွေကိုပါ၊ သူက ထည့်တွက်ထားတယ်နဲ့ တူတယ်? စိတ်ဝင်စားစရာပဲ။ ကောင်းပြီလေ၊ မင်းက ဘာများဆက်လုပ်ချင်နေသလဲ ဆိုတာကို ကြည့်ရတာပေါ့"
ထိုအချိန်တွင် ဇူရီသည် ဟန်ပန် အမူအရာ ကင်းမဲ့နေခဲ့သော်လည်း၊ သူ၏လက်အတွင်းမှ ဓားရှည်သည် တုန်ခါသွားခဲ့၍ တွေ့ဓားနည်းစနစ် အလင်းတန်း တစ်ခုနှင့်၊ လီဓားနည်းစနစ် တစ်ခုက ပေါက်ကွဲထွက်လာခဲ့သည်။
အပေါ်ကတွေ့၊ အောက်ကလီ - ရေအိုင်အတွင်းမှ မီးတောက်မီးလျှံများ၊ ပြောင်းလဲစမ်း!
ဒါသည် ဇူရီ၏ အပေါ်ယံ ဓားလမ်းစဉ်အတွင်းမှ၊ တိုက်ခိုက်မှုစွမ်းရည် အကောင်းဆုံး ဓားကွက်ဖြစ်၏။ သူသည် လွှမ်းမိုးနိုင်စွမ်း အကောင်းဆုံးဖြစ်ပြီး၊ ခြိမ်းခြောက်နိုင်မှု အရှိဆုံး ဖြစ်သည်။ ထိုနည်းစနစ်တွင် ရပ်တန့်၍ မရနိုင်သော၊ ကမ္ဘာကို ပြောင်းလဲနိုင်သော တောက်ပမှုတို့နှင့် ပြည့်နှက်နေကာ၊ အဖြူရောင် အလင်းတန်း တစ်ခုအဖြစ်သို့ အသွင်ပြောင်းသွားခဲ့၍ ဟော်မင်ထံသို့ ခုတ်ချခဲ့လိုက်သည်။
ပုန်းကွယ်နေသော နဂါးချောက်၏ ပြင်ပတွင်၊ ထိုမြင်ကွင်းအား စောင့်ကြည့်နေခဲ့သော ကျောင်ကျုံချန်းသည် ခေါင်းတစ်ချက်ကို ခါလိုက်ကာ၊ သူ၏မျက်လုံးအစုံတွင် လုံးဝကို စိတ်ပျက်သွားသည့် အရိပ်အယောင်များကို မြင်နိုင်ပေသည်။
"မင်းက အလှည့်စား ခံရမှန်း သိသိနဲ့၊ ဒီလောက်အထိ စိတ်တိုရသလား? ဒီလိုမျိုး စိတ်အခြေအနေက နည်းနည်းလေး စိတ်ပျက်စရာ မကောင်းနေဘူးလား? ဒီစိတ်ဓာတ်မျိုးနဲ့ တိုးတက်အောင် ဘယ်လိုလုပ်ပြီး မျှော်လင့်လို့ ရမှာလဲ?"
သို့သော်လည်း ထိုတိုက်ပွဲအား ကြည့်နေကြသူ အားလုံးတို့မှာ၊ ဤကဲ့သို့ မတွေးမိကြပေ။ ဇူရီ၏ ယခုနည်းစနစ်၏ စွမ်းအားမှာ၊ ရွှေရောင်ဗဟိုချက် အဆင့်က ကျင့်ကြံသူ အားလုံးတို့အား တုန်လှုပ်စေနိုင်ခဲ့၍၊ လူအုပ်ထဲမှ အချို့လူများက အော်ဟစ်လိုက်ကြသည်။
ထိုကဲ့သို့သော အားကောင်းသော ဓားချက်မျိုးနှင့် ရင်ဆိုင်လိုက်ရသော်၊ ဟော်မင်၏ နှုတ်ခမ်းထောင့်စွန်းများသည် လှောင်ပြုံးတစ်ခုအဖြစ်သို့ တွန့်သွားခဲ့သည်။
သူ၏ ကျုံ့ဝင်သေးငယ်သွားခဲ့သော ခန္ဓာကိုယ်သည် ရုတ်ချည်းပင် နဂိုမူလ အရွယ်သို့ ပြန်လည်ပြောင်းလဲသွားခဲ့ကာ၊ ခက်ထန်ကြမ်းတမ်းသော သတ်ဖြတ်လိုစိတ်များသည် ရုတ်တရက် ပေါက်ကွဲထွက်လာခဲ့သည်။ ဟော်မင်သည် တိုက်ပွဲအစကတည်းက မထုတ်ဖော်ခဲ့ဖူးသော ရက်စက်ကြမ်းကြုတ်မှုနှင့် ခြိမ်းခြောက်နိုင်မှုတို့ကို ပြသခဲ့၍၊ ပုန်းကွယ်နေသော နဂါးချောက် အတွင်းမှ အပင်များသည် ညှိုးခြောက်ရင့်ရော်သွားသကဲ့သို့ ဖြစ်သွားခဲ့၏။
တိုက်ပွဲအစကတည်းက သူနှင့်ဇူရီတို့၏ တိုက်ပွဲသည်၊ သူကသာလိုက် ကိုယ်ကလွန်လိုက် ဖြစ်နေခဲ့ကာ အကြိတ်အနယ် ဖြစ်နေသည်ဟု ထင်နေရသော်လည်း၊ အမှန်တွင်မူ ဟော်မင်သည် သူ့ကိုယ်ကို ဖိနှိပ်ထားခဲ့ကာ သူ၏ မှော်စွမ်းအင်များကို ထိန်းချုပ်ထားခဲ့ခြင်း ဖြစ်သည်။ သူသည် သူ့ခန္ဓာကိုယ် အတွင်းမှ၊ ကြောက်မက်ဖွယ်ရာ ပေါက်ကွဲနိုင်မှုများကို ချုပ်နှောင်ထားခဲ့ခြင်း ဖြစ်သည်။
ယခုအချိန်တွင် သူထိန်းထားခဲ့သမျှ အရာအားလုံးတို့အား ဖောက်ထုတ်လိုက်ခဲ့ကာ၊ ဘာကိုမှ ထိန်းသိမ်းထားခြင်းမျိုး မရှိတော့ပေ။
ဟော်မင်သည် သူ၏ ဘဝတစ်လျှောက်လုံးတွင် အကြီးမားဆုံး အဟန့်အတားကို ချိုးဖောက်ဖျက်ဆီးနိုင်ခဲ့ကာ၊ ခန္ဓာကိုယ်ရော စိတ်ဝိညာဉ်ပါ မကြုံဖူးသော အထိတ်အထိပ် အဆင့်သို့ ရောက်သွားခဲ့သည်ဟု ခံစားနေရ၍၊ လွတ်လပ်ပေါ့ပါး သက်တောင့်သက်သာ ဖြစ်ခြင်းမျိုးကို ခံစားနေရသည်။
စိတ်ရှည်လက်ရှည်နှင့် စောင့်ဆိုင်းနေခြင်း၊ ပြင်ဆင်ထားခြင်းများ အားလုံးသည် ယခုအချိန်အတွက် ဖြစ်သည်။
ဟော်မင်၏ လက်အတွင်းမှ ဓားသည် အပေါ်သို့ မြှောက်လိုက်သော်လည်း၊ အောက်သို့ ကျဆင်းမလာခဲ့ချေ။ သူ့ဓားကွက်သည် ပတ်ဝန်းကျင်ထံသို့ အားပြင်းသော သက်ရောက်မှုများ မရှိပဲနှင့်၊ လွမ်းခြုံထားနိုင်ခဲ့သည်။
ထိုဓားကွယ်၏ အလယ်တွင် ရောက်ရှိနေခဲ့သော ဇူရီသည်၊ သူ၏ ဘေးပတ်ပတ်လည်မှ လေထုနှင့် လေဟာနယ်များသည် ဟော်မင်၏ မှော်စွမ်းအင်တို့၏ ပိတ်ဆို့မှုများကို ခံလိုက်ရသည်ဟု ခံစားနေရ၏။
ဤနေရာသည် ပြင်ပကမ္ဘာနှင့် မသက်ဆိုင်သည်၊ သီးသန့်လေဟာနယ် တစ်ခုအဖြစ်သို့ ပြောင်းလဲသွားခဲ့သည်။ သူ၏ အတွင်းမှ အမှောင်ထုသည် ကမ္ဘာမြေမှ ငရဲနှင့်လည်း တူမနေခဲ့ချေ။ အတွင်းသို့ ကြည့်လိုက်လျှင် ဦးခေါင်းခွံများ၊ အရိုးများ၊ အလောင်းများနှင့် သွေးပင်လယ်ကြီး တစ်ခုကိုသာ တွေ့နိုင်ပေသည်!
ရုတ်ချည်းပင် သူသည် အသေကောင်ပုပ်များ၊ သေမင်းတို့နှင့် ပြည့်နှက်နေသော ငရဲပြည် အတွင်းသို့ ရောက်သွားသည်ဟု ထင်နေရ၏။
"အသူရာ အခင်းအကျင်း!" ပုန်းကွယ်နေသော နဂါးချောက်၏ ပြင်ပတွင်၊ ကျောင်ကျုံချန်းနှင့် ရှီရှင်းယွမ်တို့ နှစ်ယောက်စလုံးသည် တုန်ခါသွားကြသည်။
အသူရာ ကမ္ဘာဖျက် ဓားသွား၏ လူသတ်ဓားကွက် တစ်ခုဖြစ်သော - အသူရာ အခင်းအကျင်း!
မရပ်တန့်နိုင်သော သတ်ဖြတ်ခြင်းနှင့် သေဆုံးခြင်းများ၊ လူသားဘဝ၏ နောက်ဆုံးအဆုံးစွန်၊ ကမ္ဘာပေါ်မှငရဲ!
"တကယ်ကိုပဲ အသူရာ အခင်းအကျင်းပဲ! သူက တကယ်ပဲ ကျင့်ကြံနိုင်ခဲ့တာကို!" ရှီရှင်းယွမ်၏ မျက်လုံးအစုံတွင် အံ့ဩချီးကျူးမှုများနှင့် ပြည့်နေခဲ့သည်။ "ဟော်မိသားစုက ဒီတစ်ခေါက် အတော်တန်သွားပြီ။ အသူရာ အခင်းအကျင်းကို လေ့ကျင့်နိုင်တဲ့ ရွှေရောင်ဗဟိုချက် အဆင့်က နောက်တစ်ယောက် ထပ်ပေါ်လာခဲ့ပြီ"
အသူရာ အခင်းအကျင်း၏ ကြောက်မက်ဖွယ် စွမ်းအားသည် လှိုင်းထနေခဲ့၍၊ သေမင်း၏ သွေးရနံ့များနှင့်အတူ ပေါက်ကွဲထွက်လာခဲ့သည်။ ချောက်၏အပြင်ဘက်တွင်၊ ကြည့်နေသူများ အားလုံးသည် စိတ်လှုပ်ရှားစွာဖြင့် အုန်းအုန်းကျွတ်ကျွတ် ဖြစ်၍နေလေ၏။
စုန့်ချင်းယွမ်သည် မျက်နှာပေါ်တွင် အပြုံးတစ်ခု ပန်ဆင်ထား၍၊ ထိုပြိုင်ပွဲအား အမှုမထားသလို ကြည့်နေခဲ့သော်လည်း၊ ထိုအချိန်တွင် သူ၏မျက်နှာပေါ်မှ အပြုံးသည် မှေးမှိန်သွားခဲ့ကာ၊ ပုန်းကွယ်နေသော နဂါးချောက် အတွင်းသို့ ပို၍လေးနက်သော မျက်နှာထားဖြင့် ကြည့်လိုက်လေသည်။
တိုက်ရိုက်တဲ့တိုး စရိုက်ရှိ၍ ကျောက်ယန်နဲ့ အခြားသူများအား စကားပြောနေခဲ့သော ထောင်ရောင်ရောင်သည်လည်း၊ ဟော်မင်အား ချီးကျူးစကား ပြောလိုက်သည်။ "အသူရာ အခင်းအကျင်း။ ငါက ဒါ မမြင်ခဲ့တာ အချိန်အတော်ကြာသွားခဲ့ပြီ။ ဟော်မိသားစုက ရွှေရောင်ဗဟိုချက် အဆင့်သာ ရှိသေးတဲ့ နောက်ထပ်ကျင့်ကြံသူ တစ်ယောက်က၊ ဒီအကွက်ကို သုံးနိုင်လိမ့်မယ်လို့ ဘယ်သူက ထင်ထားမိမှာလဲ?"
မြောက်ပိုင်းမျိုးနွယ်စုတို့၏ တော်ဝင်အိမ်တော်မှ တုခွမ်းနှင့် စန်းလျှိုဟဲ၊ ခရမ်းရောင် တိမ်တိုက်ဂိုဏ်းမှ လီကွေရင်နှင့် ဂူလေတို့သည်လည်း လေးနက်သော မျက်နှာထားများ ရှိနေကြ၏။ အသူရာ အခင်းအကျင်းအား ကျင့်ကြံနိုင်ခဲ့သော ဟော်မင်သည်၊ ယခုအချိန်တွင် ရွှေရောင်ဗဟိုချက် အဆင့်မှ ကျင့်ကြံသူ အားလုံး၏ လေးစားမှုနှင့် ထိုက်တန်သွားခဲ့ပြီ ဖြစ်သည်။
အသူရာ အခင်းအကျင်း၏ အတွင်းတွင်၊ ဇူရီ၏ ဓားနည်းစနစ်သည် ခမ်းနားထည်ဝါသော စွမ်းအားအော်ရာများကို ပိုင်ဆိုင်ထားသေးသော်လည်း၊ တဖြည်းဖြည်းနှင့် တစ်စပြီးတစ်စ အသူရာ အခင်းအကျင်းမှ သေမင်းစွမ်းအားများ၏ တိုက်စားခြင်းကို ခံနေရပြီ ဖြစ်သည်။
ဟော်မင်သည် သူ၏ဧရာမဓားကို မြှောက်ထားဆဲဖြစ်၍၊ သူ၏ဓားထိပ်ဖျားမှာ ကမ္ဘာကြီးတစ်ခုလုံးအား ထမ်းထားသည့်အလား ဖြစ်နေခဲ့၏။ သူသည် ဇူရီအား ကြည့်လိုက်ကာ ရယ်ရမ်းသွေးလိုက်သည်။ "မင်းကို ကျေးဇူးတယ်ရမယ်။ မင်းရဲ့ အကူအညီနဲ့ ဒီအတားအဆီးကို ကျော်လွှားနိုင်ခဲ့ပြီး၊ အသူရာ အခင်းအကျင်း နည်းစနစ်ကို အောင်မြင်အောင် ကျင့်ကြံနိုင်ခဲ့တာ"
"မူလက မင်းကို သေဒဏ်နဲ့ အပြစ်ပေးပြီး ငါ့ရဲ့ကျေးဇူးတွေကို ပြန်လည်ဖော်ပြတဲ့ အနေနဲ့၊ ငါ့ရဲ့ ပထမဆုံးအကြိမ် အသုံးပြုတဲ့ အသူရာ အခင်းအကျင်းရဲ့အောက်မှာ ပထမဆုံး အသက်ပျောက်တဲ့သူ ဆိုတဲ့ ဂုဏ်သိက္ခာကို ပေးမလို့ပဲ"
"နှမြောစရာကောင်းတာက၊ ငါတို့က ပုန်းကွယ်နေသော နဂါးချောက် အတွင်းမှာ ရှိနေလို့၊ မင်းကို ဒီနေရာမှာ အသေသတ်လို့ မရတာပဲ။ ဒါပေမဲ့ စိတ်မပူပါနဲ့၊ နောင်လာမယ့် နေ့တွေအတွင်းမှာ အခွင့်အရေးတွေက ပေါ်လာဦးမှာပါ"
"မင်းကို အခုမသတ်နိုင်သေးရင်တောင် မင်းကို ဒီနေရာမှာ အနိုင်ယူပြီးသွားရင်၊ မိုးကြိုးကပ်ဘေးတွေကို ဆင့်ခေါ်နိုင်ပြီး အခြေတည်ဝိညာဉ် အဆင့်ကို တက်လှမ်းနိုင်ဖို့ အချိန်က သိပ်မလိုတော့ဘူး"
ဟော်မင်သည် စကားပြောနေရင်းနှင့်၊ အရှေ့သို့ တစ်လှမ်းချင်း ဖြည်းညင်းစွာ လျှောက်လှမ်းလာခဲ့၏။ ဧရာမဓားကြီးသည် အောက်သို့ကျလာခဲ့သည်၊ သို့သော်လည်း ပက်ကျိတစ်ကောင်၏ နှေးကွေးသော အမြန်နှုန်းဖြင့်၊ ကြည့်နေသူများ အားလုံးအား အသက်ရှူရန် မေ့စေခဲ့သည်။
သို့သော်လည်း ထိုဓားသွား၏ ကျဆင်းလာခြင်းနှင့်အတူ၊ အသူရာ အခင်းအကျင်း တစ်ခုလုံးသည် လိုက်ပြီး တုန်ခါလာခဲ့သည်။ အသူရာ အခင်းအကျင်း၏ သတ်ဖြတ်လိုသော စွမ်းအားများ အားလုံးသည်၊ ဟော်မင်၏ ဓားသွားထိပ်ဖျားတွင် စုစည်းလာခဲ့၏။ အမှောင်သေမင်း စွမ်းအားတို့၏ ပမာဏနှင့် အရည်အသွေးတို့သည်၊ လူတိုင်း၏ နှလုံးသားကို အေးခဲစေနိုင်ခဲ့၏။
ဓားသွား၏ ခုတ်ချလိုက်မှု၏ အောက်တွင်၊ အသူရာ အခင်းအကျင်း၏ ဖျက်ဆီးနိုင်မှု စွမ်းအားများနှင့် ကပ်ဆိုးများသည်၊ ဓားသွားအပေါ်တွင် စုစည်းထားနိုင်ခဲ့သည်။ ထိုဓားသွားသည် အရာအားလုံးကို အောင်နိုင်၍၊ သူ၏ လမ်းကြောင်းတစ်လျှောက်ရှိ သက်ရှိစိတ်ဝိညာဉ် မှန်သမျှအား ချေမှုန်းဖျက်ဆီးနိုင်စွမ်း ရှိလေသည်။
အသူရာ အခင်းအကျင်း၏ အထဲတွင် ပိတ်လှောင်ခံထားရသော ရန်သူများသည်၊ သူ၏အတွင်းမှ ထွက်ပေါ်လာသော စွမ်းအင်များ၏ ဖိနှိပ်ထားခြင်းကို ခံနေရ၍၊ ပြေးရန်မြေ မရှိနိုင်ခဲ့ပေ။
"ဆရာ၊ ဒါက ဆရာပြောတဲ့ ဟော်မင်ရဲ့ အခွင့်အရေး ဆိုတာလား?" ထိုအချိန်တွင် ရှောင်ပုတန်လေး၏ မျက်နှာမှာ တင်းနေ၍၊ လေးနက်သည့်ပုံ ပေါက်နေခဲ့၏။ "တကယ်ကို ကြမ်းတမ်းပါပေတယ်!"
ယွဲ့ဟုန်ယန်၊ ယန်ချင်နှင့် ကျန်သောသူများကလည်း မျက်နှာသိပ်မလှကြပဲ၊ ပုန်းကွယ်နေသော နဂါးချောက်၏ အပေါ်မှ ထုတ်လွှင့်နေသော ပုံရိပ်များအား ကြည့်နေကြသည်။
သို့သော်လည်း လင်းဖုန်းမှာမူ အမူအရာ ကင်းမဲ့သော မျက်နှာထားမျိုးဖြင့်၊ ခပ်တည်တည်သာ ကြည့်နေခဲ့သည်။ "ဒါက သူ့ရဲ့ တစ်ခုတည်းသော အခွင့်အရေး ဆိုတာက မှန်ပါတယ်။ ဒါပေမဲ့ ကြည့်ရတာ၊ မင်းရဲ့ အစ်ကိုလေးက သူ့ကို အခွင့်အရေး ထပ်ပေးမယ့်ပုံ မပေါ်တော့ဘူး"
ပုန်းကွယ်နေသော နဂါးချောက်၏ အတွင်းဝယ်၊ ဇူရီသည် ပို၍ပို၍ နီးလာသော ဓားသွားအား တိတ်ဆိတ်စွာ စိုက်ကြည့်နေခဲ့သည်။ သူ၏မျက်နှာပေါ်တွင်လည်း အပြုံးတစ်ခုက ရုတ်တရက် ပေါ်လာခဲ့၍၊ သက်ပြင်းတိုးတိုး တစ်ချက်အား ချလိုက်သည်။ "ငါကလည်း ငါတို့က ပုန်းကွယ်နေသော နဂါးချောက် အတွင်းကို ရောက်နေခဲ့တာ၊ နှမြောစရာကြီးလို့ ထင်တာပဲ"
ဇူရီသည် စကားဆုံးသည်နှင့် သူ၏ဓားအား ဓားအိမ်အတွင်းသို့ ပြန်သွင်းလိုက်ကာ၊ သူ၏လက်နှစ်ဘက်အား နောက်ကျောတွင်ပစ်ကာ အနောက်သို့ လှည့်ထွက်သွားခဲ့သည်။ ကြည့်ရသည်မှာ သူက လက်လျှော့လိုက်၍၊ ဆက်လက် မခုခံတော့မည့်ပုံ ပေါက်နေခဲ့၏။
သို့သော်လည်း ဇူရီအား တစ်ချိန်လုံး အဆက်မပြတ် စောင့်ကြည့်နေခဲ့သည့်၊ ဟော်မင်၏ စိတ်ဝိညာဉ်သည် ရုတ်တရက် တုန်ခါသွားခဲ့ကာ၊ တစ်စုံတစ်ခုက အကြီးအကျယ် မှားယွင်းနေသည်ဟု ခံစားနေခဲ့ရသည်။
ဇူရီ၏ မျက်လုံးများသည် လုံးဝကို မည်းနက်သွားခဲ့၏။ သူ၏မျက်လုံးများသည် အဖြူနှင့် အနက်တို့၏ ခွဲခြားထားခြင်းများ မရှိတော့ပဲ၊ အဖြူများသည် လုံးဝကို ပျောက်ကွယ်သွားခဲ့၏။ သူ၏ မျက်လုံးအတွင်းဝယ် ညသန်းကောင်ယံ၏ တိတ်ဆိတ်ငြိမ်သက် မှောင်မည်းခြင်းမျိုးဖြင့်၊ လုံးဝမှောင်မည်းနေသော အမှောင်ထုကြီးက ကြီးစိုးထားခဲ့၏။
ဇူရီ၏ အသံသည် ပုန်းကွယ်နေသော နဂါးချောက် အတွင်းမှ ထွက်ပေါ်လာခဲ့သည်။ "ငါတို့က အနာဂတ်မှာ အခွင့်အရေးတွေ ရှိဦးမယ်လို့လည်း၊ ငါက ယုံကြည်ပါတယ်။ ဒါပေမဲ့ ငါတို့က ပုန်းကွယ်နေသော နဂါးချောက်ရဲ့ အပြင်ကို ရောက်သွားပြီးရင်၊ ငါ့ကိုမြင်တဲ့အခါ မင်းက ထွက်မပြေးနဲ့ပေါ့ကွာ"
Novel : History's Number 1 Founder
Author : August Eagle
Translator : Master Shifu