အပိုင်း ၂၅၄ : ကိုယ့်အကြံနဲ့ကိုယ်ပဲ
ဝူချင်လျှို၏ လေသံမှာ တပည့်ကို စိတ်ရှည်ညင်သာစွာ သင်ပြနေသော ဆရာတစ်ယောက်၏ လေသံနှင့် တူလေသည်။
အခြားအချိန်တွေဆိုလျှင် ချုံးယွင်မင်းသားသည် ဝူချင်လျှိုအား မည်သို့ပင် သတိထားသည် ဆိုစေကာမူ၊ ဤလေသံဖြင့် သူ့ကိုပြောမည်ဆိုပါက သေချာပေါက် ဒေါသအိုး ပေါက်ကွဲမည်ဖြစ်သည်။
သို့သော်လည်း ယခုအချိန်တွင်မူ၊ ချုံးယွင်မင်းသားသည် ယခင်ကဲ့သို့ တည်ငြိမ်ဆဲဖြစ်ကာ၊ သူ၏အကြည့်သည် ဝူချင်လျှိုထံမှ မခွာခဲ့ပေ။
သူ၏အနောက်တွင် ကြယ်စင်သူတော်စင်သည်လည်း လေပေါ်မှ ဝူချင်လျှို၏ ပုံရိပ်ကို ကြည့်နေခဲ့သည်။ သူ၏မျက်လုံးတွင် ဝေခွဲမရနိုင်သော အရိပ်အယောင်များကို တွေ့နေရသည်။ "ဝူချင်လျှိုက သူ့ရဲ့ဝှက်ဖဲတွေကို တကယ်ပဲ ပြနေပြီလား၊ ဒါမှမဟုတ် နောက်ထပ် ဆင်ခြေဆင်လက် တစ်ခုပဲလား?"
"မဟာချင်ရဲ့ မိသားစုကြီး လေးခုနဲ့ ဂိုဏ်းကြီးတွေကလွဲရင်၊ ကျွန်တော်က တခြားလူတွေကို စဉ်းစားလို့ မရဘူး" ချုံးယွင်မင်းသားက တိတ်ဆိတ်စွာနှင့် ပြောလိုက်သည်။
ဝူချင်လျှိုက ခေါင်းညိတ်လိုက်သည်။ "ဟုတ်တယ်၊ မင်းသားပြောတာ မှန်တယ်။ အင်ပါယာ တစ်ခုက တိုးတက်ကြီးပွားဖို့ဆိုရင်၊ ဗဟိုအင်အားစုကို စုစည်းရမယ်၊ ဘုရင်နဲ့ မှူးမတ်တွေက တစ်ခုတည်းအဖြစ် ညီညွှတ်ရမယ်။ မဟာကျိုး အင်ပါယာက အကောင်းဆုံး ဥပမာပဲ"
သူသည် သက်ပြင်းဖွဖွလေး ချလိုက်သည်။ "မဟာကျိုး အင်ပါယာရဲ့ စွမ်းအားဟာ အခုအထိ အရှိန်ပြင်းပြင်းနဲ့ ချဲ့ထွင်နေတုံး ရှိသေးတယ်။ တကယ်လို့များ မဟာချင်က အတွင်းမှာ ဆက်ပြီးတော့ ကွဲပြားနေသေးရင်၊ တစ်ချိန်ချိန်မှာ မဟာကျိုးက လာကျူးကျော်လိမ့်မယ်"
ချုံးယွင်မင်းသား၏ မျက်လုံးတို့မှာ အရောင်လက်သွားသော်လည်း၊ ဘာတစ်ခုမှ မပြောခဲ့ချေ။
အားလုံးသိကြသည့်အတိုင်း လွန်ခဲ့သော နှစ်ပေါင်းတစ်ရာတွင်၊ မဟာချင် အင်ပါယာသည် နတ်ဘုရား နယ်မြေတွင် အထွန်းကားဆုံး အင်ပါယာ ဖြစ်ခဲ့သည်၊ မဟာကျိုးထက်ပင် ကြီးပွားတိုးတက်နေသည်။
သို့သော်လည်း နှစ်ပေါင်းတစ်ရာလေး အတွင်းတွင်၊ မဟာကျိုးသည် လျှင်မြန်သော အဟုန်ဖြင့် တိုးတက်လာချိန်တွင်၊ မဟာချင်က ရပ်တန့်နေခဲ့သည်။ တဖြည်းဖြည်းနှင့် သူသည် မဟာကျိုး၏ လုံးဝကျော်တက်သွားခြင်းကို ခံလိုက်ရပေတော့သည်။
ဗုဒ္ဓဝါဒကို နှိမ်နှင်းသည် တိုက်ပွဲတွင်၊ မဟာကျိုး အင်ပါယာသည် အကြီးမားဆုံးသော အောင်နိုင်သူ ဖြစ်ပြီး၊ အကျိုးအမြတ် အများဆုံး ရရှိခဲ့သူလည်း ဖြစ်သည်။ သူ၏စွမ်းအားတို့မှာ ဆထက်တံပိုး တိုးတက်လာခဲ့ပြီး၊ မဟာချင် အင်ပါယာကို လုံးဝနောက်ကောက်ချနိုင်ခဲ့သည်။
"မိသားစုကြီးတွေရဲ့ အင်အားကို ဖယ်ရှားပြီး၊ ဗဟိုအုပ်ချုပ်မှု စွမ်းအားကို တိုးမြှင့်ဖို့က ခင်ဗျား အကြံအစည်ရဲ့ ဒုတိယအဆင့် ဖြစ်မယ်" ချုံးယွင်မင်းသားက မေးလိုက်သည်။ "ဒီလိုဆိုရင် တတိယအဆင့်က ဘာလဲ?"
ဝူချင်လျှိုက ပြန်ဖြေလိုက်သည်။ "မိသားစုကြီး လေးခုက ခေါင်းဆောင်တွေ ဖြစ်ကြတယ်။ သူတို့ကို ဝိုင်းထောက်ခံကြတဲ့ တခြားမိသားစုတွေကလည်း ရှိနေကြသေးတယ်။ သူတို့ကို ဖယ်ရှားဖို့ ဆိုတာတော့ မလွယ်ကူဘူး။ ဒုတိယအဆင့်က အတတ်နိုင်ဆုံး သူတို့ကို ဖိနှိပ်ထားပြီး အားနည်းအောင် လုပ်ဖို့ပဲ။ လက်တွေ့လုပ်ဆောင်မှုတွေကိုတော့ တတိယ အဆင့်မှာမှ လုပ်ရမယ်"
"တစ်ချိန်တည်းမှာပဲ၊ တတိယအဆင့်မှာ ဒီအစီအစဉ်မှာ အကြီးမားဆုံးသော အတားအဆီးကို ရှင်းပစ်ရမယ်"
ချုံးယွင်မင်းသား၏ မျက်လုံးတို့မှာ အရောင်တောက်လာခဲ့ပြီး၊ "ရှီမိသားစု၊ ဒွိစုံသူငယ်အိမ်နဲ့သူ!"
မဟာချင် အင်ပါယာ၏ တော်ဝင်မိသားစု အနေနှင့်ဆိုသော်၊ ရှီမိသားစုနှင့် ဆက်ဆံရေးမှာ ရှုပ်ထွေးသော ဆက်ဆံရေးဖြစ်သည်။ ရှီမိသားစုသည် တော်ဝင်မိသားစုနှင့် အမျိုးတော်စပ်သည်။ တစ်ချိန်တည်းမှာပင်၊ သူသည် တော်ဝင်မိသားစုအစား ကိစ္စများကို ဆောင်ရွက်ပေးသည်။
သို့သော်လည်း ရှီမိသားစုသည် တော်ဝင်မိသားစုနှင့် ဆွေမျိုးတော်စပ်နေသည့် အချက်ကပင်၊ တော်ဝင်မိသားစုက သတိထားနေရသည့် အချက်ဖြစ်သည်။ ရှီမိသားစုသည် နတ်ဘုရား သားတော်များကို အဆက်မပြတ် မွေးဖွားပေးနေခဲ့သည်။ အထူးသဖြင့် လက်တလောတွေ မွေးဖွားထားသော ဒွိစုံသူငယ်အိမ်နှင့်သူ ဖြစ်သည်။ ရှီမိသားစုသည် နောက်ထပ် နတ်ဘုရား သားတော်တစ်ပါးကို မွေးဖွားထား၍၊ မဟာချင်၏ အကြီးမားဆုံး မိသားစုကြီးအဖြစ် ခိုင်မာစွာ ရပ်တည်နေပေသည်။
တော်ဝင်မျိုးဆက်များမှာ အကန့်အသတ် ရှိ၍၊ ရှီထျန်းရီ၏ နန်းတက်မည့် ကောလဟာလများမှာ ပျံ့နှံ့၍ နေပေတော့သည်။
ချုံးယွင်မင်းသားက ပြောလိုက်သည်။ "ကျွန်တော်က ဝန်ခံရလိမ့်မယ်၊ ကျွန်တော့်ရဲ့ မျိုးဆက်အတွင်းမှာ၊ ဒီဒွိစုံ သူငယ်အိမ်နဲ့သူက ကျွန်တော့်ကို ဖိအားအကြီးကြီးတွေ ပေးနေတာပဲ။ သူအသက်ရှင်နေသရွေ့၊ ကျွန်တော်က ငြိမ်းငြိမ်းချမ်းချမ်းနဲ့ နေလို့ရမှာ မဟုတ်ဘူး"
သူက အချိန်အနည်းငယ်လောက် ငြိမ်သွားပြီး တည်ငြိမ်စွာနှင့် ဆက်ပြောလိုက်သည်။ "ဒီကနေ့ကစပြီး၊ အံ့ဖွယ် ကောင်းကင်ဘုံဂိုဏ်းက ရှောင်ယန်ကလည်း သတိထားရမယ့် သူအထဲမှာ ပါတယ်"
ဝူချင်လျှိုက ဖွဖွလေး ပြုံးလိုက်သည်။ "ကျွန်တော်မျိုးက အရှင်မင်းသားကို မပြောရသေးတာ တစ်ခုရှိတယ်။ သိပ်မကြာခင်တုံးက၊ ကျွန်တော်က အရှင်မင်းသား နာမည်နဲ့၊ ရှောင်ယန်ရဲ့ မွေးရပ်ဇာတိဖြစ်တဲ့ ဝူကျိုးက ရှောင်မိသားစုကို အထောက်အပံ့တွေ ပေးထားခဲ့တယ်"
ချုံးယွင်မင်းသားသည် အနည်းငယ် မကျေမနပ် ဖြစ်သွားခဲ့သော်လည်း၊ ဘာမှမပြောခဲ့ချေ။
ဝူချင်လျှိုက ဆက်ပြောလိုက်သည်။ "ဒါကလည်း အစီအစဉ် ပထမ အဆင့်ရဲ့ တစ်စိတ်တစ်ပိုင်းလို့ ဆိုနိုင်ပါတယ်။ အံ့ဖွယ် ကောင်းကင်ဘုံဂိုဏ်းနဲ့ ဆက်ဆံရေးကောင်းတွေ တည်ဆောက်ထားခြင်းက၊ တတိယအဆင့်ကို အကောင်အထည်ဖော်တဲ့ နေရာမှာ လွယ်ကူစေမယ်"
သူသည် အသံတိုးတိုးဖြင့် ရယ်လိုက်သည်။ "အံ့ဖွယ် ကောင်းကင်ဘုံဂိုဏ်းခေါင်းဆောင်ရဲ့ အငယ်ဆုံးတပည့်၊ ရှီထျန်းဟောင်။ အရှင်မင်းသားက သူ့ရဲ့နောက်ခံကို သိမယ်လို့ ထင်ပါတယ်"
"ဒါပေါ့။ ဟိုဒွိစုံသူငယ်အိမ်နဲ့သူရဲ့ ဒီကနေ့ စွမ်းဆောင်မှုတွေက သူ့ဆီက အကူအညီ တစ်စိတ်တစ်ပိုင်း ပါနေတာပဲ" ချုံးယွင်မင်းသားက ပြောလိုက်သည်။ "ဒါပေမဲ့ ကျွန်တော်တို့က သေပြီလို့ ယူဆထားတဲ့ ကောင်လေးက ဒီကနေ့အထိ အသက်ရှင်နေလိမ့်မယ်လို့ မမျှော်လင့်ထားခဲ့ဘူး"
"သူက အသက်ဆက်ရှင်နေရုံတင် မကဘူး၊ စွမ်းအားတွေလည်း အတော်ကြီး တိုးတက်လာခဲ့တယ်။ ဆယ်နှစ်ကျော်လေးပဲ ရှိသေးပေမဲ့ ရွှေရောင်ဗဟိုချက် အဆင့်ကို ရောက်နေပြီ။ သူက လူသားသမိုင်းထဲမှာ ရှားပါးတဲ့ ကျောက်ရိုင်းတုံး တွေထဲမှာ တစ်ခုအပါအဝင်ပဲ"
ချုံးယွင်မင်းသားသည် စကားဝိုင်း၏ ဦးတည်ချက်ကို ပြောင်းလိုက်သည်။ "ဒါပေမဲ့လည်း အခုလက်ရှိ အချိန်မှာ၊ သူရဲ့စွမ်းအားတွေက ဟိုဒွိစုံမျက်လုံးနဲ့သူနဲ့ မယှဉ်နိုင်သေးဘူး"
ဝူချင်လျှိုက မယုတ်မလွန် ပြန်ဖြေလိုက်သည်။ "ဒါပေမဲ့လည်း ဒီကနေ့ မတိုင်ခင်မှာ၊ အရှင်မင်းသားက ရှောင်ယန်ဟာ ဒီလောက်အထိ ဖြေရှင်းရခက်လိမ့်မယ်လို့ မထင်ထားဘူးမလား?"
ထိုစကားလုံးများသည် ချုံးယွင်မင်းသား၏ ဒဏ်ရာများအပေါ်တွင် ဆားဖြူးလိုက်သည်နှင့် တူနေ၏။ သူ၏မျက်နှာသည် ခဏတာမျှ မည်းမှောင်သွားသော်လည်း၊ မပေါက်ကွဲသွားခဲ့ပေ။ သူသည် နှာတစ်ချက်သာ မှုတ်လိုက်သည်။
ဝူချင်လျှိုက သက်ပြင်းတစ်ချက် ချလိုက်သည်။ သူ၏ မျက်လုံးအစုံမှာ သတိအပြည့်နှင့် ဖြစ်၏။ "အံ့ဖွယ် ကောင်းကင်ဘုံဂိုဏ်းခေါင်းဆောင်က ဘယ်လိုများ လုပ်သလဲတော့ မသိဘူး။ သူက ပါရမီရှင် တစ်ယောက်ကို မွေးထုတ်နိုင်တယ်ဆိုရင်၊ ကျွန်တော်က သိပ်ပြီးတော့ မအံ့ဩပါဘူး။ ဒါပေမဲ့ သူ့ရဲ့ တပည့်တွေအားလုံးက ပုံမှန်မဟုတ်ပဲ ကြမ်းလွန်းလှတယ်၊ ဒါက တစ်ခုခုတော့ တစ်ခုခုပဲ"
"သူက သာမန်လူတော့ လုံးဝမဖြစ်နိုင်ဘူး"
ချုံးယွင်မင်းသား၏ အမူအရာတို့မှာ ပုံမှန်သို့ ပြန်ရောက်သွားသည်။ သူက တည်ငြိမ်စွာဖြင့် ပြောလိုက်သည်။ "သူက အရမ်းကို ဘက်လိုက်တတ်တယ်။ ရှောင်ယန်နဲ့အတူ ရှင်းယွင်တောင်ထိပ်ကို လိုက်လာတာကို ကြည့်ခြင်းအားဖြင့်၊ အနာဂတ်မှာ ရှီထျန်းဟောင်က ဒွိစုံသူငယ်အိမ်နဲ့လူနဲ့ တိုက်ခိုက်တဲ့အခါမှာ၊ သူက ဘေးကနေ ရပ်ကြည့်နေပြီး ဘာမှမလုပ်မှာတော့ မဖြစ်နိုင်ဘူး"
ချုံးယွင်မင်းသားသည် ဝူချင်လျှိုကို ကြည့်လိုက်သည်။ "ဒါကလည်း နန်းရင်းဝန်ဝူက တတိယအဆင့်ကို အကောင်အထည်ဖော်တဲ့နေရာမှာ၊ ထည့်သွင်းစဉ်းစားထားတဲ့ အချက်တစ်ခုပဲ ဖြစ်မယ်"
ဝူချင်လျှိုက တည်ငြိမ်စွာနှင့် ခေါင်းညိတ်လိုက်သည်။ "ဒါကလည်း ပုံသေပြောလို့မရဘူး။ ကျွန်တော်တို့က မိသားစုကြီး လေးခုရဲ့ အင်အားကို အသုံးပြုပြီး၊ အံ့ဖွယ် ကောင်းကင်ဘုံဂိုဏ်းကို ခက်ခဲအောင် လုပ်လို့လည်း ရတာပဲ"
"မဟာကျိုး အင်ပါယာက အဝေးက အင်အားစုတွေနဲ့ ချစ်ကြည်ရေး ရယူနေပြီး၊ အနီးကလူတွေကို တိုက်ခိုက်ဖို့ ကြံစည်နေတယ်။ သူက စူတောင်ဓားဂိုဏ်း၊ အံ့ဖွယ် ကောင်းကင်ဘုံဂိုဏ်းတို့နဲ့ မဟာမိတ်ဖွဲ့ပြီး၊ မဟာချင် အင်ပါယာကို ကျူးကျော်ဖို့ ပြင်ဆင်နေတယ်။ ကျွန်တော်တို့က ဘာမှမလုပ်ပဲ ထိုင်ကြည့်နေလို့ ဘယ်ဖြစ်မလဲ?"
ချုံးယွင်မင်းသားက သရော်လိုက်သည်။ "တကယ်လို့ နန်းရင်းဝန်ဝူက မဟာကျိုး အင်ပါယာကို သတိထားနေတယ်ဆိုရင်၊ ခင်ဗျားက ခင်ဗျားရဲ့ အစီအစဉ်တွေကို အကောင်အထည်ဖော်ရင်း အလုပ်ရှုပ်နေတဲ့ အချိန်မှာ၊ မဟာကျိုးက လူတွေကလည်း ဝင်ရောက်နှောက်ယှက်ပြီး တစ်ခုခုလုပ်မယ် ဆိုတာကိုတော့ သိထားမှာပေါ့"
ဝူချင်လျှိုက ညင်သာစွာ ပြုံးလိုက်သည်။ "အရှင်မင်းသား၊ သတိပေးမှုအတွက် ကျေးဇူးတင်ပါတယ်။ ဒါပေမဲ့လည်း စိတ်ချသာနေပါ၊ အချိန်ကျလာလို့ရှိရင် မဟာကျိုး အင်ပါယာက သူတို့ရဲ့ ကိုယ်ပိုင်ပြဿနာတွေနဲ့ အလုပ်ရှုပ်နေပြီး၊ ကျွန်တော်တို့ရဲ့ အစီအစဉ်ကို လာနှောက်ယှက်ဖို့အားမှာ မဟုတ်ပါဘူး"
"အိုး?" ချုံးယွင်မင်းသားသည် သိလိုစိတ် အလွန်ပြင်းပြနေခဲ့သည်။ သို့သော်လည်း သူသည် ဖိအားပေးကာ မမေးမြန်းခဲ့ပေ။ "မိသားစုကြီး လေးခုတို့ရဲ့ နိုင်ငံရေးစွမ်းအားနဲ့ အံ့ဖွယ် ကောင်းကင်ဘုံဂိုဏ်း၊ နန်းရင်းဝန်ဝူက အရှေ့က သူတွေရဲ့ စွမ်းအားတွေကို လျှော့နည်းစေပြီး၊ အနောက်ကသူကို အားကောင်းအောင် လုပ်ပေးမလို့လား?"
ဝူချင်လျှိုက ပြန်ဖြေလိုက်သည်။ "ဟုတ်ကဲ့ပါ၊ အရှင်မင်းသားပြောတာ မှန်ပါတယ်။ တကယ်လို့ အဖွဲ့တစ်ဖွဲ့ကပဲ အမြဲတမ်း အနိုင်ယူနေနိုင်မယ်ဆိုရင်၊ ပိုအားကောင်းတဲ့ အဖွဲ့က ပိုပိုပြီးတော့ပဲ အားကောင်းလာမှာပဲ။ ဒါက ကျွန်တော်မျိုးရဲ့ ဆန္ဒနဲ့ မကိုက်ညီပါဘူး။ သူမသာ ကိုယ်မသာ ဖြစ်နေမှသာ မဟာချင် အင်ပါယာအတွက် အကျိုးရှိမှာပဲ ဖြစ်ပါတယ်"
ချုံးယွင်မင်းသားသည် ခေါင်းကိုညိတ်လိုက်ကာ ဝူချင်လျှိုအား သေချာစွာ စိုက်ကြည့်လိုက်သည်။ သူကို ထွင်းဖောက်ပြီး မြင်ချင်နေသကဲ့သို ဖြစ်၏။
ဝူချင်လျှိုက သူ့ကို မျက်လုံးချင်းဆုံကာ ပြန်ကြည့်လိုက်၏။ သူ၏မျက်လုံးအစုံတို့မှာ ပင်လယ်ကဲ့သို့ နက်ရှိုင်းနေခဲ့သည်။
အချိန်အတော်ကြာမှသာ ချုံးယွင်မင်းသားသည် အကြည့်ကိုလွှဲလိုက်ကာ တိတ်တဆိတ် ပြောလိုက်သည်။ "နန်းရင်းဝန်ဝူက ရလဒ်တွေကို စိတ်ချတယ်ဆိုတော့လည်း၊ ကျွန်တော်က သတင်းကောင်းတွေကို စိတ်ရှည်စွာနဲ့ စောင့်နေပါ့မယ်" ပြီးနောက်သူသည် ခြေတစ်လှမ်း ရှေ့တိုးလိုက်ကာ လေထု၏အလယ်တွင် ပျောက်ကွက်သွားလေတော့သည်။
ကြယ်စင်သူတော်စင်သည် ဝူချင်လျှိုအား တစ်ချက်ကြည့်လိုက်ကာ၊ သက်ပြင်းတစ်ချက်ကို တိုးညှင်းစွာ ချလိုက်သည်။ "နန်းရင်းဝန်ဝူရဲ့ သုံးဆင့် အစီအစဉ်က အံ့ဖွယ် ကောင်းကင်ဘုံဂိုဏ်းနဲ့ မိသားစုကြီး လေးခုတင် မကဘူးနဲ့တူတယ်"
ဝူချင်လျှိုက ဖွဖွလေး ပြုံးလိုက်သည်။ "ခင်ဗျားရဲ့ ချီးမွမ်းတာကို ကျေးဇူးတင်ပါတယ်"
ကြယ်စင်သူတော်စင်သည် သူ၏ခေါင်းကိုခါလိုက်သည်။ ပြီးတာနှင့် ကြယ်စင်အလင်းတန်း တစ်ခုအဖြစ်သို့ ပြောင်းသွားခဲ့ကာ လေထုအတွင်းသို့ ပျောက်ကွယ်သွားခဲ့သည်။
မဟာချင် အင်ပါယာ၏မြို့တော် ရှီးလင်မြို့၊ မြို့မြောက်ဘက်ပိုင်းရှိ နန်းရင်းဝန်အိမ်တော် အတွင်းဝယ်၊ ဝူချင်လျှိုသည် သူ၏စာဖတ်ခန်းထဲတွင် ထိုင်နေကာ ဆယ်သွယ်ရေး ကိရိယာ စက်ဝိုင်းပြားလေး၏ အပေါ်မှ အလင်းတန်းများ ပျောက်ကွယ်သွားသည်ကို ကြည့်နေခဲ့သည်။ သူသည် စကားတစ်ခွန်းမှ မပြောပဲ ခုံကိုသာ ညင်သာစွာ ခေါက်နေခဲ့သည်။
သူ၏အနောက်တွင် ရပ်နေသော လူငယ်တစ်ယောက်က ရုတ်တရက် မေးလိုက်သည်။ "ရှီချုံးယွင်ကို ဘာဖြစ်လို့ ရွေးလိုက်တာလဲ?"
ဝူချင်လျှိုက အမှုမထားသည့်ဟန်ဖြင့် ပြန်ဖြေလိုက်သည်။ "ဘာဖြစ်လို့လည်းဆိုတော့ သူက ရည်မှန်းချက် ကြီးလို့ပဲ"
လူငယ်က ဆက်မေးလိုက်သည်။ "ဒါပေမဲ့ သူက အောင်မြင်မှုထက် ပြဿနာတွေကို ပိုလုပ်မယ့်သူလို့ ကျွန်တော့်စိတ်ထဲမှာ ထင်နေမိတယ်"
"ချုံးယွင်မင်းသားရဲ့ ကိုယ်ကျင့်စရိုက်မှာ ကြီးမားတဲ့ ချို့ယွင်းချက်ရှိတယ်။ ဒါက မောက်မာမှုနဲ့ ဒေါသကြီးမှုတို့ပဲ" ဝူချင်လျှိုက မယုတ်မလွန် ပြန်ဖြေလိုက်သည်။ "ဒါပေမဲ့ သူက အင်မော်တယ် ဝိညာဉ် အဆင့်ကို ရောက်ချင်တယ် ဆိုရင်တော့၊ သူက သူများပြောစရာ မလိုပဲ ကိုယ့်ကိုယ်ကို ကြိုးစားပြီးမှ သူ့ရဲ့အကျင့်ကို သူပြင်လိမ့်မယ်"
"ငါပြောထားတဲ့ အတိုင်းပဲ၊ သူက ရည်မှန်းချက် ကြီးမားတဲ့ သူတစ်ယောက်ဖြစ်တယ်၊ ဒါကြောင့်ပဲ သူက လိုအပ်တဲ့ ပြောင်းလဲမှုတွေကို ပြုပြင်လိမ့်မယ်။ ဒီတစ်ခေါက် ရှင်းယွင်တောင်ထိပ် ခရီးမှာ၊ သူက အံ့ဖွယ် ကောင်းကင်ဘုံဂိုဏ်းက တပည့်တွေရဲ့ အရှက်ခွဲမှုကို ခံလိုက်ရတယ်။ ဒါကနေ သင်ခန်းစာယူပြီး ကိုယ့်ကိုယ်ကိုယ် ပြုပြင်ဖို့ ကြိုးစားလိမ့်မယ်လို့ မျှော်လင့်ရတာပဲ"
ထိုလူငယ်က အချိန်အနည်းငယ်ကြာအောင် ငြိမ်သက်သွားပြီးနောက် ဆက်မေးလိုက်သည်။ "ဒွိစုံသူငယ်အိမ်နဲ့ လူကိုရော ဘာဖြစ်လို့ မရွေးတာလဲ?"
ဝူချင်လျှိုက ရယ်ရမ်းသွေးလိုက်သည်။ "သူက တခြားတစ်နေရာမှာ အသုံးဝင်လာလိမ့်မယ်"
"အစ်ကိုကြီးကတောင် အံ့ဖွယ် ကောင်းကင်ဘုံဂိုဏ်းကို ဂရုစိုက်နေတာလား?" ထိုလူငယ်၏ မျက်လုံးအစုံမှာ တောက်ပလာခဲ့သည်။ သူ၏ တည်ငြိမ်နေသော မျက်နှာ အသွင်အပြင်တို့သည် သူ၏ အံ့အားသင့်မှုတို့ကို ဖုံးကွယ်မထားနိုင်ချေ။
ဝူချင်လျှိုသည် မယုတ်မလွန် ပြန်ဖြေလိုက်သည်။ "ဒီမူလကောင်းကင် ကမ္ဘာကြီးမှာ၊ မျိုးနွယ်စုအားလုံး သက်ရှိအားလုံးတို့ကို ငါက ဂရုစိုက်တယ်"
စားပွဲခုံကို ခေါက်နေသော လက်ချောင်းသည် ရုတ်တရက် ရပ်တန့်သွား၏။ "သွားပြီးတော့ စစ်ဆေးလိုက်ဦး။ ငါက ရှီချုံးယွင်ကို ရှင်းအောင်ပြောထားပေမဲ့၊ သူ့ရဲ့ ဒေါသတွေက မရပ်သေးပဲ ဝူကျိုးကိုသွားပြီး ရှောင်မိသားစုကို ပြဿနာ မရှာဘူးလို့ အာမမခံနိုင်ဘူး"
"သူ့ရဲ့ အဆင့်အတန်းနဲ့ဆိုရင်၊ ရှောင်မိသားစုကို ဒုက္ခပေးချင်ရင် စကားလုံး အနည်းငယ် ပြောလိုက်ရုံပဲ" ဝူချင်လျှို၏ မျက်နှာပေါ်တွင် အပြုံးတစ်ခု ပေါ်ပေါက်လာ၏။ "ရှီချုံးယွင်က ဖြည်းဖြည်းချင်းတော့ တိုးတက်လာမှာပဲ။ ဒါပေမဲ့ သူက အခြေတည်ဝိညာဉ်ရဲ့ နောက်ပိုင်းအဆင့်တွေကို မရောက်သေးပဲနဲ့၊ အင်မော်တယ် ဝိညာဉ် အဆင့်ကို ရောက်ဖို့ စိတ်ဓာတ်စာမေးပွဲတွေက ဘယ်လောက်ခက်ခဲသလဲ ဆိုတာကို သိမှာမဟုတ်သေးဘူး"
"အဲ့ဒီအချိန် မရောက်သေးတဲ့ အချိန်အထိ ငါတို့က သည်းခံစောင့်ဆိုင်းရဦးမှာပဲ"
ထိုလူငယ်က ခေါင်းညိတ်လိုက်ကာ ခြေတစ်လှမ်းဆုတ်လိုက်ပြီး၊ ဟင်းလင်းပြင်အတွင်းသို့ ဝင်သွားခဲ့ကာ ပျောက်ကွယ်သွားခဲ့လေသည်။
မဟာကျိုး အင်ပါယာ၏ မြို့တော်ထျန်းကျင်းအတွင်းမှ တော်ဝင်နန်းတော် အတွင်းတွင်၊ ကျိုးဧကရာဇ် လျှမ်ပန်းသည် သူ၏ နဂါးပုလ္လင်အထက်တွင် ထိုင်နေခဲ့သည်။ အောက်ဘက်တွင် ယန့်မင်းရွဲ့နှင့် ဇူဟုန်ဝူတို့သည် မျက်နှာချင်းဆိုင် ထိုင်နေခဲ့ကာ၊ မေဝူလန်သည် လျှမ်ပန်း၏ အရှေ့တွင်ရပ်ကာ လတ်တလော သတင်းတစ်ပုဒ်ကို တင်ပြနေလေ၏။
"…. နောက်ဆုံးမှာ ဒါက တိုက်ပွဲရဲ့ နောက်ဆုံးအဖြေပဲ ဖြစ်ပါတယ်" မေဝူလန်သည် ဧကရာဇ်အား တင်ပြနေခြင်းကို အဆုံးသတ်လိုက်သည်။
ကျိုးဧကရာဇ် လျှမ်ပန်းသည် ခေါင်းညိတ်ကာ မေဝူလန်အား ကြည့်လိုက်၏။ "ဝူလန်၊ မင်းက ဒီအကြောင်းကို ဘယ်လိုထင်သလဲ?" သူက အနည်းငယ် နားလိုက်ကာ ဆက်ပြောလိုက်သည်။ "ငါက အံ့ဖွယ် ကောင်းကင်ဘုံဂိုဏ်းကို ဆိုလိုနေတာ"
မေဝူလန်သည် ရိုသေစွာ ဦးညွှတ်လိုက်ကာ ပြန်ဖြေလိုက်၏။ "အရှင်မင်းမြတ်၊ ဒီဖြစ်ရပ်ကနေ ကျွန်တော်မျိုးက အံ့ဖွယ် ကောင်းကင်ဘုံဂိုဏ်းရဲ့ ခေါင်းဆောင်ဖြစ်တဲ့ လင်းဖုန်းဟာ၊ သူ့ရဲ့တပည့်တွေကို အရမ်းအကာအကွယ်ပေးတယ်လို့ ပြောနိုင်ပါတယ်။ သိပ်မကြာခင်ကပဲ အံ့ဖွယ် ကောင်းကင်ဘုံဂိုဏ်းကနေ ဇူအမတ်ရဲ့ သားဖြစ်တဲ့ ဇူရီဟာ၊ မဟာကျိုး အင်ပါယာကို ဒီတစ်နှစ်မှာ ကျင်းပမယ့် နိုင်ငံတော် စာမေးပွဲကို လာဖြေမယ်လို့ သတင်းရရှိထားပါတယ်"
"အံ့ဖွယ် ကောင်းကင်ဘုံဂိုဏ်းရဲ့ ခေါင်းဆောင်ဟာ ဒီတစ်ခေါက်မှာ မဟာကျိုးကို အတူလိုက်ပါ လာနိုင်ပါတယ်"
ယန့်မင်းရွဲ့သည် ထိုစကားကို ကြားလိုက်ပြီးနောက် ပြုံးလိုက်ကာ ဘာမျှ မပြောခဲ့ပေ။
တစ်ချိန်တည်းမှာပင် ဇူဟုန်ဝူသည် သူ၏ထိုင်ခုံတွင် သစ်သားရုပ်ထုကဲ့သို့သာ ထိုင်နေဆဲဖြစ်သည်။ လက်ရှိ အကြောင်းအရာမှာ သူနှင့်လုံးဝ မသက်ဆိုင်သကဲ့သို့ ဖြစ်သည်။
"ဝူလန်၊ မင်းက ဒီတစ်ခေါက်မှာတော့ မှားနေပြီထင်တယ်" လျှမ်ပန်းက သူ၏ခေါင်းကို ညင်သာစွာ ခါလိုက်သည်။ "ငါခန့်မှန်းတာ မမှားဘူးဆိုရင်၊ အံ့ဖွယ် ကောင်းကင်ဘုံဂိုဏ်းခေါင်းဆောင်က သူကိုယ်တိုင် လာမှာ မဟုတ်ဘူး"
သူက ဆက်ပြီးတော့ မရှင်းပြခဲ့သလို၊ မေဝူလန်ကလည်း ဆက်ပြီးတော့ မမေးရဲခဲ့ချေ။
ယန့်မင်းရွဲ့နှင့် ဇူဟုန်ဝူတို့သည် တောက်လျှောက်ငြိမ်သက်နေကြသော်လည်း၊ လျှမ်ပန်းသည် ဂရုမစိုက်ခဲ့ပေ။ သူသည် သက်ပြင်းတိုးတိုးကိုသာ ချလိုက်သည်။ "ရွှေရောင်ဗဟိုချက် အဆင့်နဲ့ အခြေတည်ဝိညာဉ် အဆင့်က မှော်လက်နက်ကို တစ်ချက်တည်းနဲ့ ဖျက်ဆီးနိုင်တယ်။ အံ့ဖွယ် ကောင်းကင်ဘုံဂိုဏ်းက တပည့်တွေဟာ ကျန်တဲ့သူတွေထက် တကယ်ကို ခေါင်းတစ်လုံး ပိုသာနေတာပဲ"
"ငါတို့ ကြည့်ရသမျှဆိုရင်၊ သူတို့က သင်ယူတိုးတက်နေတဲ့ အဆင့်မှာပဲ ရှိနေသေးတယ်။ သူတို့က ပြည့်ပြည့်ဝဝ ရင့်ကျက်လာတဲ့ အချိန်ရောက်ရင်၊ သူတို့က ကြုံတွေ့ဖို့ ခဲယဉ်းတဲ့ ပါရမီရှင်လေးတွေ ဖြစ်လာကြမှာပဲ"
"အံ့ဖွယ် ကောင်းကင်ဘုံဂိုဏ်းရဲ့ ခေါင်းဆောင်၊ လင်းဖုန်းဟာ တကယ့်ကို အထင်ကြီးဖွယ်ရာ ကောင်းလှပါတယ်" လျှမ်ပန်းသည် ဇူဟုန်ဝူအား တစ်ချက်ကြည့်လိုက်ပြီး၊ "ဟုန်ဝူကိုလည်း ဂုဏ်ပြုရမယ်၊ မင်းရဲ့သားကလည်း သူတို့အထဲက တစ်ယောက် အပါအဝင်ပဲ"
ဇူဟုန်ဝူသည် မတ်တတ်ရပ်လိုက်ပြီး၊ "အရှင်မင်းမြတ်ကို ကျေးဇူးတင်ပါတယ်"
လျှမ်ပန်းသည် ယန့်မင်းရွဲ့ကို ကြည့်လိုက်ကာ ဖြည်းဖြည်းချင်း ပြောလိုက်သည်။ "ယန့်ရှမ်ကျိကို ပိုင်ယွင်တောင်ပြန်တဲ့ လမ်းတစ်လျှောက်မှာ အဆင်ပြေ ချောမွေ့ပါစေလို့ ဆုတောင်းပေးလိုက်ပါတယ်"
ယန့်မင်းရွဲ့က ပြုံးလိုက်ကာ ပြန်ဖြေလိုက်သည်။ "အရှင်မင်းမြတ် ချီးမြှင့်တဲ့ မင်္ဂလာစကားတွေ အတွက် ကျေးဇူးတင်ပါတယ်"
သူမသည် အတန်ငယ် စိတ်ပျံ့လွင့်သွားခဲ့၏။ "မီးတောက်နဂါး ကောင်းကင်ချပ်ဝတ်တန်ဆာ… သူက ဇူရန်မိစ္ဆာမျက်လုံးကို မှော်ရတနာအဖြစ် သန့်စင်ဖို့ အချိန်အနည်းငယ်သာ ယူခဲ့တာလား?"
အင်မော်တယ် ဝိညာဉ် အဆင့်မှ ကျင့်ကြံသူ တစ်ယောက်မှပင် မှော်ရတနာ တစ်ပါးကို ထုလုပ်မည်ဆိုလျှင်၊ အချိန်နှင့် ခွန်အား မြောက်မြားစွာ ယူရပေမည်။ မှော်ရတနာများသည် နှစ်ပေါင်း ရာနှင့်၊ ထောင်နှင့်၊ အချို့ဆိုလျှင် သောင်းနှင့်ချီ၍ အချိန်ယူကာ သန့်စင်ရခြင်းဖြစ်သည်။
"လင်းဖုန်း၊ ရှင်က ဘယ်ကမ္ဘာကနေ လာခဲ့တာလဲ?" ယန့်မင်းရွဲ့သည် မျက်မှောင်အနည်းငယ် ကြုတ်လိုက်ကာ "ပြီးတော့ ရှင်က ဘာကို လုပ်ချင်နေတာလဲ?"
ယန့်မင်းရွဲ့သည် ရုတ်တရက် ရယ်ရမ်းသွေးလိုက်သည်။ "ရှင်က ရှင့်ကိုယ်ရှင် သိချင်မှ သိပေမဲ့၊ ဒီတစ်ခေါက် ကျွန်မရဲ့ ပိုင်ယွင်တောင် ပြန်နိုင်ဖို့ကို ရှင်က အများကြီး ကူညီခဲ့တာပဲ။ ဒါပေမဲ့လည်း ဘာမှန်းကြောင့်မသိပဲ၊ ကျွန်မကရှင့်ကို ရုတ်တရက် ကြောက်လာသလိုမျိုး ခံစားလာခဲ့ရတယ်"
Novel : History's Number 1 Founder
Author : August Eagle
Translator : Master Shifu