အပိုင်း ၂၄၀ : စိတ်ဝင်စားစရာ တစ်စုံတစ်ခု
လင်းဖုန်းဟာ မုယုံယန်ရန်ကို စိတ်ဝင်စားစွာနဲ့ ကြည့်လိုက်ပြီး၊ သူ့ရဲ့စိတ်ဟာ တွက်ချက်မှုများစွာနဲ့ လှုပ်ရှားနေခဲ့ပါတယ်။
"မင်းက ဘာဖြစ်လို့ အလင်းဓားမြန်ဂိုဏ်းကနေ တိတ်တိတ်လေး ထွက်ပြေးလာခဲ့တာလဲ? မင်းပြောပုံ အရဆိုရင်၊ မင်းက ရှောင်ယန်နဲ့ တိုက်ခိုက်ဖို့ ရှောင်လွှဲချင်ပုံလည်း မရပါဘူး"
တကယ်လို့များ သူမက တိုက်ပွဲကို ရှောင်လွှဲဖို့ အကြံအစည် မရှိဘူးဆိုရင်၊ ဒါက အလင်းဓားမြန်ဂိုဏ်းဟာ သူမကို တစ်ခုခု စီစဉ်ခဲ့ပြီး၊ သူမက ဒီအစီအစဉ်ကို လက်မခံနိုင်လို့ပဲ ဖြစ်ပါလိမ့်မယ်။
ဒီကောင်မလေးဟာ အလောင်းအစားကို လိုက်နာမှာမဟုတ်ပဲ၊ သူမရဲ့ အသက်ကိုသာ လျှော်ကြေးအဖြစ် ပေးဆပ်ချင်နေခဲ့တာပါ။
ဒါက သူမဟာ ခြေနင်းကျောက်တုံး အဖြစ်မခံချင်လို့ ရှောင်လွှဲခြင်းလို့ ပြောလို့ရပေမဲ့၊ သူမရဲ့ သဘောထားကနေ သူမဟာ စိတ်ဓာတ်ကြံ့ခိုင်ပြီး ပြတ်သားတဲ့သူတစ်ယောက် ဖြစ်တယ်ဆိုတာကို သိနိုင်ပါတယ်။
"ငါတို့ကရော ငါတို့ရဲ့ လက်ထပ်မှုကို ကိုယ်တိုင် ဆုံးဖြတ်တာပဲလား?" လင်းဖုန်းက ဖြေးဖြေးချင်း တွေးနေခဲ့ပြီး ခေါင်းထဲကနေ စဉ်းစားနေခဲ့ပါတယ်။ "တကယ်လို့များ ငါက အလင်းဓားမြန်ဂိုဏ်းက ဖြစ်ခဲ့ရင်၊ ဒီလိုမျိုး ပြဿနာနဲ့ ကြုံလာလို့ရှိရင် ဘာလုပ်မလဲ?"
တကယ်လို့များ ငါက ငါ့ရန်သူရဲ့ ပြိုင်ဘက်မဟုတ်ပဲ အနိုင်ကျင့်လည်း မခံချင်ဘူးဆိုရင်၊ အကောင်းဆုံး အဖြေက တခြားနေရာက အကူအညီကို ရယူပြီး ဖိအားတွေကို လျှော့ချရမှာ ဖြစ်ပါတယ်။
လင်းဖုန်းက စိတ်ဓာတ်ကျနေပြီး ဂဏှာမငြိမ်ဖြစ်နေတဲ့ မုယုံယန်ရန်ကို ကြည့်လိုက်ပြီး၊ ရုတ်တရက် မေးလိုက်ပါတယ်။ "ငါကို ပြောပြပါဦး၊ အလင်းဓားမြန်ဂိုဏ်းက မင်းကို လက်ဆက်ပေးချင်နေတဲ့ သူက ဘယ်ကများလဲ? စူတောင်ဓားဂိုဏ်းကလား? မဟာချင် အင်ပါယာကလား?"
မုယုံယန်ရန်ဟာ သူမရဲ့ခေါင်းကို မော့လိုက်ပြီး၊ လင်းဖုန်းကို တုန်လှုပ်ချောက်ချားစွာနဲ့ ကြည့်လိုက်ပါတယ်။ လင်းဖုန်းကတော့ တည်ငြိမ်နေလို့ပါ။ အံ့ဖွယ် ကောင်းကင်ဘုံဂိုဏ်းရဲ့ ဖိအားတွေကို ခုခံဖို့ အလင်းဓားမြန်ဂိုဏ်းက အကူအညီတောင်းနိုင်တဲ့ နေရာတွေဟာ၊ စူတောင်ဓားဂိုဏ်းနဲ့ မဟာချင် အင်ပါယာတို့ပဲ ရှိပါတယ်။
"ကျွန်.. ကျွန်မက အရှင်ဘာပြောနေသလဲ ဆိုတာတွေကို မသိပါဘူး" မုယုံယန်ရန်က သူမရဲ့ ခေါင်းကို ငုံ့ထားလိုက်ပါတယ်။
လင်းဖုန်းရဲ့ နှုတ်ခမ်းထောင့်စွန်းတွေဟာ သိမ်မွေ့သော အပြုံးတစ်ခုအဖြစ်ကို ပြောင်းသွားခဲ့ပြီး၊ သူ့ရဲ့ လေသံဟာ နွေးထွေးပြီး ချစ်ခင်နှစ်သက်ဖွယ် ကောင်းလှပါတယ်။ ဒါပေမဲ့လည်း သူပြောတဲ့ စကားလုံးတိုင်းဟာ၊ မုယုယန်ရန်ကို ကျောရိုးတစ်လျှောက် စိမ့်သွားစေခဲ့ပါတယ်။
"မင်းက မင်းရဲ့ မိသားစုနဲ့ ဂိုဏ်းကို အရှက်မရစေဖို့၊ ငါ့တပည့်ရဲ့ အစေခံ ဖြစ်မှာကို လက်မခံနိုင်ဘူး။ ဒါပေမဲ့ မင်းက နောက်ဆက်တွဲတွေကိုရော စဉ်းစားမိရဲ့လား? မင်းက စီစဉ်ထားတဲ့ လက်ထပ်ပွဲကနေ ရှောင်ပြေးလိုက်ရင်၊ မင်းတို့ရဲ့ အလင်းဓားမြန်ဂိုဏ်းနဲ့ တခြားတစ်ဘက်က သူတွေရဲ့ ဆက်ဆံရေးက ညှိနှိုင်းလို့ မရအောင် မပျက်ဆီးသွားနိုင်ဘူးလား?"
"စူတောင်ဓားဂိုဏ်းဆိုရင်တော့ ကိစ္စသိပ်မရှိသေးဘူး။ ဒါပေမဲ့လည်း အခြားတစ်ဘက်က မဟာချင် အင်ပါယာက ဆိုရင်တော့၊ မင်းရဲ့ လုပ်ဆောင်ချက်တွေက မင်းရဲ့မိသားစု တစ်ခုလုံးကို ပျက်ဆီးခြင်းတွေ ဖြစ်စေလိမ့်မယ်။ ငါမှတ်မိတာက မမှားခဲ့ရင်၊ မုယုံမိသားဟာ မဟာချင် အင်ပါယာထဲမှာ မိသားစုကြီး လေးခုထဲမှာ မပါပေမဲ့၊ သူ့ရဲ့ ဂုဏ်သိက္ခာကလည်း မသေးလှဘူး"
"ပြီးတော့ မင်းတို့ရဲ့ မိသားစုရဲ့ ဂေဟာက မဟာချင် အင်ပါယာရဲ့ မြို့တော် ရှီးလင်မြို့ အတွင်းမှာ ရှိနေပြီး၊ မဟာချင် ဧကရာဇ်ရဲ့ မျက်စိအောက်မှာတင် ရှိနေတာ"
မုယုံယန်ရန်ရဲ့ တစ်ကိုယ်လုံးဟာ အဆက်မပြတ် တုန်ခါလာခဲ့ပြီး၊ သူမရဲ့ မျက်စိထဲမှာ ကြယ်တွေ မြင်လာခဲ့ပါတော့တယ်။ အစပထမမှာ သူမရဲ့ စိတ်တွေဟာ ရှုပ်ထွေးနေခဲ့ကာ၊ သူမရဲ့ စိတ်ထဲမှာ လက်ထပ်ပွဲကနေ ရှောင်ရှားပြီး ရှင်းယွင်တောင်ကနေ ဝေးနိုင်သလောက် ဝေးအောင် ထွက်ပြေးချင်နေခဲ့တာပါ။ သူမဟာ သူမလက်ထပ်ရမယ့်သူက မဟာချင် အင်ပါယာရဲ့ အိမ်ရှေ့စံမင်းသား ဖြစ်တဲ့၊ ချုံးယွင်ဖြစ်တယ် ဆိုတာကို စဉ်းစားဖို့ မေ့နေခဲ့ပါတယ်။
သူမရဲ့ လက်ထပ်ပွဲကနေ ထွက်ပြေးခဲ့ခြင်းဟာ၊ သူမရဲ့ မိသားစု အပေါ်ကို သက်ရောက်မှု ကြီးကြီးမားမား ဖြစ်စေနိုင်တယ် ဆိုတာကို စဉ်းစားဖို့ မေ့နေခဲ့ပါတယ်။
သူမရဲ့ စိတ်ထဲကနေ ဝမ်းနည်းကြေကွဲမှုတွေဟာ ထိုးတက်လာခဲ့ပြီး၊ သက်ပြင်းတစ်ချက်ကို အကြီးကြီး ချလိုက်ပါတယ်။ "ဒါက ငါ့ရဲ့ ကံကြမ္မာပဲလား? ဒီကနေ လွတ်မြောက်ဖို့ နည်းလမ်း မရှိတော့ဘူးလား?"
လင်းဖုန်းက မုယုံယန်ရန်ကို တိတ်ဆိတ်စွာနဲ့ အကဲခတ်နေခဲ့ပြီး၊ သူရဲ့စိတ်ထဲကနေ နှုတ်ခမ်းတွေကို တွန့်နေခဲ့ပါတယ်။
သူမရဲ့ အကျပ်အတည်းတွေကို ရှုထောင့်နှစ်မျိုးကနေ ရှုမြင်နိုင်ပါတယ်။ အကောင်းဘက်ကနေ ကြည့်ရရင်၊ သူမဟာ လွတ်လပ်မှုကို မြတ်နိုးပြီး မှီခိုလိုမှု ကင်းမဲ့ကာ သူမကိုယ့်ကိုယ် ဆုံးဖြတ်ချက်တွေကို ချလိုသူ ဖြစ်ပါတယ်။
အခြားတစ်ဘက်မှာတော့၊ သူမဟာ မုယုမိသားစုရဲ့ အဖိုးတန်သမီး အဖြစ်နဲ့ရော အလင်းဓားမြန်ဂိုဏ်းရဲ့ အထူးတပည့် အဖြစ်နဲ့ပါ၊ လူအတော်များများက အိမ်မက်မက်ရုံသာ တတ်နိုင်တဲ့ အခွင့်အရေး၊ အဆင့်အတန်းနဲ့ အရင်းအမြစ်တွေ မြောက်မြားစွာကို ရရှိခဲ့ပေမဲ့၊ သူမဟာ ဒါတွေအတွက် ပြန်လည်ပေးဆပ်လိုခြင်း မရှိခဲ့ပါဘူး။
သာမန်ကမ္ဘာမှပဲ ဖြစ်ဖြစ်၊ ကျင့်ကြံမှု ကမ္ဘာမှာပဲ ဖြစ်ဖြစ်၊ ကြိုတင် စီစဉ်ထားတဲ့ လက်ထပ်ပွဲ၊ ဒါမှမဟုတ် နာမည်ကြီး မိသားစုတွေ၊ ဂိုဏ်းတွေရဲ့ အကြားမှာ မဟာမိတ်ဖွဲ့တဲ့ အနေနဲ့ လက်ထပ်ပွဲတွေဟာ အထူးအဆန်း မဟုတ်လှပါဘူး။
ကိုယ်စိုက်ပျိုးတဲ့ အရာကို ကိုယ်ပြန်ရိပ်သိမ်းရတယ် ဆိုတဲ့ စကားရှိပါတယ်။ တခြား စကားလုံးတွေနဲ့ ပြောရရင်၊ တစ်ယောက်ဟာ ကိုယ့်အပေါ်ကို ချီးမြှင့်ထားတဲ့ အခွင့်အရေးတွေအတွက်၊ ပြန်လည်ပေးဆပ် ရမှာပဲ ဖြစ်ပါတယ်။
မုယုံယန်ရန်ဟာ သူမရဲ့ မိသားစုနဲ့ ဂိုဏ်းတွေက စီစဉ်ပေးတဲ့ လက်ထပ်ပွဲတွေကို မနှစ်မြို့ပါဘူး။ ဒါပေမဲ့လည်း သူမက သူမဟာ မုယုံမိသားစုရဲ့ အဖိုးတန်သမီး ဖြစ်ပြီး၊ အလင်းဓားမြန်ဂိုဏ်းရဲ့ အထူးတပည့် တစ်ယောက် ဖြစ်ခြင်းကြောင့်၊ ဒီလိုမျိုး အထူး အခွင့်အရေးမျိုးကို ခံစားရတယ် ဆိုတာကို မေ့နေခဲ့ပါတယ်။
ဒါမှမဟုတ်၊ သူမဟာ သာမန်မိသားစုမှာပဲ ဖွေးဖွားချင်လိုတဲ့စိတ်လည်း ရှိနေနိုင်ပါတယ်။
ဒါတွေကတော့ လင်းဖုန်းက ခန့်မှန်းနိုင်တဲ့ အရာမျိုး မဟုတ်တော့ပါဘူး။ သူဟာ သူတွေ့ခဲ့ရတဲ့ သဲလွန်စတွေ အပေါ်မှာသာ အခြေခံပြီး သုံးသပ်ရတာဖြစ်ပြီး၊ မုယုံယန်ရန်ရဲ့ နှလုံးသားထဲကိုတော့ ထွင်းဖောက်ပြီး မမြင်နိုင်ပါဘူး။
လင်းဖုန်းဟာ မုယုံယန်ရန်ရဲ့ စိတ်ထဲက အတွေးအားလုံးကို သိဖို့ မလိုပါဘူး။ ရှုထောင့် အမျိုးမျိုးကနေ စဉ်းစားရင်၊ ဖြစ်နိုင်တဲ့ သုံးသပ်ချက်တွေ အမျိုးမျိုး ထွက်လာမှာပါ။
လင်းဖုန်း အလေးထားတဲ့ ပြဿနာကတော့၊ ရှောင်ယန်နဲ့ ပတ်သတ်တဲ့ ကိစ္စပဲ ဖြစ်ပါတယ်။
ဒီအချိန်မှာတော့ မုယုံယန်ရန်ဟာ အနည်းငယ် ပြန်လည်တည်ငြိမ်လာခဲ့ပြီ ဖြစ်ပါတယ်။ သူမဟာ တုန်လှုပ်နေခဲ့ပြီး မျက်နှာကလည်း စက္ကူစလိုမျိုး ဖြူဖွေးနေခဲ့သေးပေမဲ့၊ သူမဟာ လင်းဖုန်းကို ရိုသေစွာနဲ့ ပြောလိုက်ပါတယ်။ "အရှင်၊ ကျေးဇူးပြုပြီး ကျွန်မကို မိုးပြာရောင်တိမ်တိုက် ဂရန်းမာစတာ ရှိရာကို ညွှန်ပြပေးပါရှင်"
"အရှင်တို့ အဖွဲ့ဟာ အဝေးကနေ လာခဲ့တော့၊ ကျွန်မတို့ရဲ့ ဧည့်သည်တော်တွေပဲ ဖြစ်ပါတယ်။ အလင်းဓားမြန်ဂိုဏ်းရဲ့ တပည့်တစ်ယောက် အနေနဲ့၊ ကျွန်မဟာ လမ်းပြအဖြစ် ဆောင်ရွက်ပြီး ရှင်းယွင်တောင်ထိပ်ကို ခေါ်သွားပေးပါမယ်"
လင်းဖုန်းကတော့ ဖွဖွလေးသာ ပြန်ပြုံးလိုက်ပြီး၊ ဘာကိုမှ ပြန်မပြောခဲ့ပါဘူး။
မုယုံယန်ရန်ဟာ ချက်ချင်းဆိုသလိုပဲ စိတ်ပူပန်လာခဲ့ကာ၊ လင်းဖုန်းက သူမရဲ့ ဂရန်းမာစတာနဲ့ မာစတာတို့ရဲ့ အကြံအစည်တွေကို သိသွားခဲ့ပြီ ဆိုတာကို သဘောပေါက်လာခဲ့ပါတယ်။ ဘယ်လိုလုပ်ပြီး သူက သူမကို အလွယ်တကူ လွတ်ပေးပါ့မလဲ?
သူမကသာ ဓားစားခံအဖြစ်နဲ့ အဖမ်းခံလိုက်ရရင်၊ မဟာချင် အင်ပါယာနဲ့ အလင်းဓားမြန်ဂိုဏ်းတို့ဟာ အငြင်းပွားမှုတွေ ဖြစ်လာနိုင်ပါတယ်။ မိုးပြာရောင်တိမ်တိုက် ဂရန်းမာစတာရဲ့ နဂို အစီအမံတွေဟာ ဖီလာကန့်လန့် ဖြစ်သွားမှာ ဖြစ်ပြီး၊ အံ့ဖွယ် ကောင်းကင်ဘုံဂိုဏ်းဟာ အလင်းဓားမြန်ဂိုဏ်းကို လွယ်ကူစွာနဲ့ ပြဿနာရှာနိုင်မှာပဲ ဖြစ်ပါတယ်။
လင်းဖုန်းက ရှောင်ယန်ကို နဂို အလောင်းအစား အရ ရှင်းယွင်တောင်ထိပ်ကို ခေါ်လာခဲ့ပေမဲ့၊ မုယုံယန်ရန်ကို မတွေ့ရဘူးဆိုရင် အလင်းဓားမြန်ဂိုဏ်းဟာ အကျပ်အတည်း ဆိုက်သွားမှာ ဖြစ်ပါတယ်။ သူတို့က ဘယ်လိုများ ဖြေရှင်းနိုင်မှာလဲ?
ရှကျိုးမြို့ပြင်က တောင်ပေါ်မှာ ဂိုဏ်းဖွင့်ပွဲ ပြုလုပ်ပြီးသွားတဲ့နောက်မှာ၊ လင်းဖုန်းနဲ့ အံ့ဖွယ် ကောင်းကင်ဘုံဂိုဏ်းတို့ဟာ နာမည်အတော်ရသွားခဲ့ပါတယ်။ လင်းဖုန်းကလွဲလို့၊ ကျန်တဲ့ သူ့ရဲ့ တပည့်တွေ အားလုံးရဲ့ နောက်ခံ အကြောင်းအရာတွေဟာ လျှို့ဝှက်ချက် မဟုတ်တော့ပါဘူး။
လင်းဖုန်းနဲ့ တွေ့ပြီးနောက်မှာ၊ ရှောင်ယန်ဟာ သူ့ရဲ့ ပင်ကိုစွမ်းရည်တွေကို ဖြုန်းတီးပစ်ပြီး အဓိပ္ပာယ် မဲ့နေတဲ့ ဘဝကနေ၊ သူ့ရဲ့ အစွမ်းတွေဟာ မိုးထိုးတဲ့အထိကို တိုးတက်လာခဲ့ပါတယ်။ သူ့ရဲ့ဇာတ်လမ်းဟာ ဒီကနေ့ လူငယ်တွေရဲ့ လှုံ့ဆော်မှု ဖြစ်လာခဲ့ပြီး၊ သူကလည်း စံပြပုဂ္ဂိုလ် ဖြစ်လာခဲ့တာပါ။
မုယုံယန်ရန်ရဲ့ စေ့စပ်ပွဲ လာဖျက်ခဲ့တဲ့ သတင်းကလည်း ပျံ့နှံ့နေပြီ ဆိုတာက ရှောင်လွှဲလို့ရတဲ့ အရာမျိုး မဟုတ်ပါဘူး။ ဘာပဲပြောပြော လူတွေဟာ အတင်းတုတ်ရတာ ဝါသနာပါပြီး၊ ဒီလိုမျိုး ဇာတ်လမ်းဟာ လူတိုင်းကြိုက်တဲ့ အရာမျိုးလည်း ဖြစ်နေတာပါ။
အစပထမကတော့ ပတ်ဝန်းကျင်က လူတွေ အနည်းငယ်ကသာ သိကြတာပါ။ ဒါပေမဲ့လည်း လင်းဖုန်းရဲ့ တိုးတက်လာတဲ့ ရေပန်းစားမှုနဲ့အတူ၊ ရှင်းယွင်တောင်ထိပ်ကို ရှောင်ယန်နဲ့ ကိုယ်တိုင်ကိုယ်ကျ လိုက်ပါလာခြင်းကြောင့်၊ ပိုပိုများတဲ့သူတွေက ဒီအကြောင်းကို သိနေကြပါပြီ။
အလင်းဓားမြန်ဂိုဏ်းကတော့ ပြဿနာက ပိုမိုကြီးမားလာမှုနဲ့အတူ၊ ခေါင်းကိုက်စရာတွေက ပိုပိုများလာခဲ့ပါတယ်။
တကယ်လို့များ တိုက်ခိုက်မဲ့ အချိန်အထိ မုယုံယန်ရန်က ပေါ်မလာခဲ့ရင်၊ အပြင်လူတွေကတော့ သူမဟာ ကြောက်ရွံ့နေလို့လို့ပဲ ထင်ကြမှာပါ။ ဒါဟာ တိုက်ပွဲကို ရှုံးနိမ့်ခြင်းထက်ကို ပိုပြီးတော့ အရှက်ကွဲခြင်းပဲ ဖြစ်ပါတယ်။
ပြီးတော့လည်း အလင်းဓားမြန်ဂိုဏ်းဟာ ချုံးယွင်မင်းသားကို ချစ်ကြည်ရေးချိုးငှက် လွှတ်လိုက်ပြီး ဖြစ်ပါတယ်။ နှစ်ဦးနှစ်ဘက်လုံးရဲ့ ဖိအားတွေကနေ၊ အလင်းဓားမြန်ဂိုဏ်းဟာ ပြိုကွဲသွားနိုင်ပါတယ်။
မုယုံယန်ရန်ဟာ လင်းဖုန်းကို မော့ကြည့်လိုက်ပြီး၊ သူမရဲ့ အတွေးတွေဟာ ရပ်တန့်သွားခဲ့ပါတယ်။ သူမရဲ့ မျက်လုံးထဲမှာ ကြောက်ရွံ့မှုတွေကို သိသာထင်ရှားစွာ မြင်နိုင်ပါတယ်။
လင်းဖုန်းရဲ့ အာရုံတွေကတော့ သူမရဲ့ အနားမှာ ရှိမနေပါဘူး။ သူက အသိစိတ် တစ်စကို ထုတ်လွှတ်လိုက်ပြီး၊ အသံလွှင့် ကျောက်တုံးတစ်ခုကို ချေမွလိုက်ကာ တစ်ဘက်ကလူနဲ့ တိတ်တဆိတ် ဆက်သွယ်လိုက်ပါတယ်။
"အခုတလောမှာ စိတ်ဝင်စရာ ကောင်းတဲ့ အရာတစ်ခုများ ဖြစ်ပျက်ခဲ့သလား?"
သလင်းကျောက်ရဲ့ အခြားတစ်ဖက်ကနေ၊ ချိုသာတဲ့ အမျိုးသမီး အသံတစ်ခုဟာ ထွက်လာခဲ့ပါတယ်။ ဒီအသံဟာ ဟင်းလင်းပြင် ဘုရားကျောင်းရဲ့ အတိတ်က မြင့်မြတ်သော အပျိုစင် သမီးတော် ယန့်မင်းရွဲ့ရဲ့ အသံနဲ့ တူပါတယ်။ "မာစတာလင်းက စိတ်ဝင်စားစရာ ကောင်းတဲ့ တစ်ခုခုကို ရှာချင်နေတယ်ဆိုရင်၊ ရှင်ကိုယ်တိုင်ပဲ ဖြစ်ပါလိမ့်မယ်။ ရှင်က မဟာချင် အင်ပါယာ တစ်ဝက်ကျော်ကို ဖြတ်ကျော်ပြီး၊ ရှင့်တပည့်တွေနဲ့အတူ ရှင်းယွင်တောင်ထိပ်ကို သွားနေတာလေ"
သူတို့နှစ်ယောက်ဟာ သိနေခဲ့တဲ့ အချိန်တွေ ကြာလာခဲ့ပြီ ဖြစ်လို့၊ လင်းဖုန်းဟာ ယန့်မင်းရွဲ့ရဲ့ စနောက်တတ်မှုတွေကို ကျင့်သားရနေပြီ ဖြစ်ပါတယ်။ "မင်းက ငါဘာလိုချင်သလဲ ဆိုတာကို သိပါတယ်"
ယန့်မင်းရွဲ့ကလည်း သိတာပေါ့။ လင်းဖုန်းက သူက နဂါးနဲ့ နယ်မြေပေါင်း များစွာကို ဖြတ်ကျော်ပြီး ခရီးသွားခဲ့တဲ့ ဖြစ်စဉ်မှာ၊ အခြားထိပ်တန်း စွမ်းအားစုတွေရဲ့ တုံ့ပြန်မှုကို ဆိုလိုခြင်း ဖြစ်ပါတယ်။
"မဟာချင် အင်ပါယာရဲ့ အိမ်ရှေ့မင်းသား ချုံးယွင်က လတ်တလောမှာ ရှီးလင်မြို့ကနေ ထွက်သွားပြီး၊ သူက ဘယ်ရောက်နေသလဲ ဆိုတာကိုတော့ ဘယ်သူကမှ မသိကြဘူး" ယန်မင်းရွဲ့က တိုးတိုးလေး ပြောလိုက်ပါတယ်။ "လူတွေကတော့ သူဟာ မဟာချင် အင်ပါယာရဲ့ အရှေ့တောင်ပိုင်းကို သွားနေတာလို့ ပြောနေကြတာပဲ"
မဟာချင် အင်ပါယာရဲ့ အရှေ့တောင်ပိုင်းဟာ အလင်းဓားမြန်ဂိုဏ်းရဲ့ နယ်မြေဖြစ်ပြီး၊ ရှင်းယွင်တောင်ထိပ် တည်ရှိနေတဲ့ နေရာလည်း ဖြစ်ပါတယ်။
"သူက ကိုယ်တိုင်ကိုယ်ကျ လာခဲ့တာလား?" လင်းဖုန်းက အနည်းငယ်ကြာအောင် စဉ်းစားလိုက်ပြီး ရုတ်တရက် မေးလိုက်ပါတယ်။ "မဟာချင် အင်ပါယာမှာ တောက်ပလာတဲ့ ကြယ်ပွင့်တစ်ပွင့် ပေါ်ထွက်လာတယ် ဆိုတာကို ကြားထားတယ်၊ ဟုတ်ရဲ့လား?"
ယန့်မင်းရွဲ့က ပြန်ဖြေလိုက်ပါတယ်။ "မာစတာလင်းက သူတို့ရဲ့ နန်းရင်းဝန် အသစ်ကို ဆိုလိုတာပဲ ဖြစ်ရမယ်? ကောလဟာလတွေ အရဆိုရင် သူက ကျင့်ကြံမှု စွမ်းရည် တစ်စက်မှ မရှိပေမဲ့၊ သူက မဟာချင် အင်ပါယာရဲ့ အမတ်တွေကို ဩဇာလွှမ်းနိုင်ပြီး၊ သူ့ရဲ့လက်အောက်မှာ ထားနိုင်ခဲ့တာပဲ"
"သူကိုယ်တိုင်က ကျင့်ကြံသူ မဟုတ်ပဲနဲ့ ရုတ်ရုတ်သဲသဲ ဖြစ်အောင် လုပ်နိုင်တယ်။ ဒီလူက တော်တော့်ကို ထူးခြားတဲ့သူပဲ ဖြစ်ရမယ်" လင်းဖုန်းက ပြုံးလိုက်ပြီး နောက်ထပ် တွက်ချက်နေခဲ့ပါတယ်။ "ကျေးဇူးတင်ပါတယ်၊ တာအိုရောင်းရင်းယန့်"
ယန့်မင်းရွဲ့ရဲ့ အသံဟာ တည်ငြိမ်နေခဲ့ပြီး ပြန်မေးလိုက်ပါတယ်။ "ရပါတယ်၊ မာစတာလင်း။ ကျွန်မကလည်း မေးပါရစေ၊ ရှင့်ရဲ့တပည့် ဇူရီဟာ ဘယ်အချိန်မှာ ထျန်းကျင်းမြို့ကို ပြန်လာမှာလဲ? သူက မာစတာမုန့်ရဲ့ အုတ်ဂူကို မရောက်တာ အချိန်အတော်ကြာသွားပြီရှင့်"
လင်းဖုန်းက ဘွင်းဘွင်းပဲ ပြန်မေးလိုက်ပါတယ်။ "ခင်ဗျားက ခင်ဗျားကိုယ့်ကိုယ် မေးတာလား၊ ဒါမှမဟုတ် ရွှမ်ကျိအမတ် ဇူဟုန်ဝူအတွက် မေးတာလား?"
ယန့်မင်းရွဲ့က ပြန်ဖြေလိုက်ပါတယ်။ "ကျွန်မက ကျိုးဧကရာဇ် အတွက် မေးတာပါ"
လင်းဖုန်းက ရယ်လိုက်ပြီး စလိုက်ပါတယ်။ "ခင်ဗျားက မုန့်ပင်းယွင်ရဲ့ ခြေရာနောက် လိုက်မနင်းပဲ ဇူဟုန်ဝူကို လက်ထပ်ဖို့ မကြိုးစားပဲ၊ နန်းတွင်းကို တိုက်ရိုက်ဝင်ချင်နေတာလား?"
"မာစတာလင်းက တော်တော်နောက်တတ်တာပဲ" ယန့်မင်းရွဲ့ရဲ့ အသံဟာ ရယ်ချင်ချင် ဖြစ်နေခဲ့ပါတယ်။ "ကျွန်မနဲ့ ဆက်ဆံနေတဲ့ ပုဂ္ဂိုလ်ဟာ မာစတာမုန့်ရဲ့ ပုဂ္ဂိုလ်နဲ့ မတူဘူးဆိုတော့၊ ကျွန်မက နည်းလမ်း အတူတူသုံးလို့ ဘယ်ဖြစ်မလဲ?"
လင်းဖုန်းရဲ့ မျက်လုံး သူငယ်အိမ်တွေဟာ ကျဉ်းသွားခဲ့ပါတယ်။ သူသိသလောက်ဆိုရင်၊ မုန့်ပင်းယွင်နဲ့ ယန့်မင်းရွဲ့တို့ဟာ ဟင်းလင်းပြင် ဘုရားကျောင်းရဲ့ ပါတီတစ်ခုတည်းကပါ။ သူမရဲ့ လေသံအရဆိုရင်၊ သူမက အရင်နည်းလမ်းအတိုင်း မလုပ်ချင်တော့တဲ့ပုံ ပေါက်နေပါတယ်။ သူမကများ အစီအစဉ် အသစ်တွေ ဆွဲထားပြီလား?
လင်းဖုန်းက ခေါင်းထဲမှာ အတွေးတွေနဲ့ ပတ်ချာလည်နေပေမဲ့၊ သူ့ရဲ့လေသံမှာ သဲလွန်စတွေ မပေါ်အောင် သတိထားလိုက်ပြီး၊ ပြန်ပြောလိုက်ပါတယ်။ "ကျုပ်ကသိပါပြီ။ ကျုပ်က မှားသွားတယ်လို့ပဲ ထားလိုက်ပါတော့"
ယန့်မင်းရွဲ့က ဆက်ပြောလိုက်ပါတယ်။ "ဟုတ်ပြီ၊ မာစတာလင်းကို ကြိုပြောထားရဦးမယ်။ နောက်ရက် အနည်းငယ်ကျရင်၊ ကျွန်မက ပိုင်ယွင်တောင်ကို ပြန်တော့မယ်။ အဲ့ဒီအချိန်ကျလို့ရှိရင်၊ ဒီလိုမျိုး မာစတာလင်းနဲ့ ဆက်သွယ်နိုင်မှာ မဟုတ်တော့ဘူး"
လင်းဖုန်းက ခေါင်းညိတ်လိုက်ပါတယ်။ ယန့်မင်းရွဲ့က အခုလို ကြိုပြောထားတာလည်း ကောင်းပါတယ်။ သူကလည်း စီစဉ်စရာတွေကို ကြိုတင်ပြင်ဆင်ထားလို့ရပြီး၊ မမြင်နိုင်တဲ့ အခြေအနေတွေနဲ့ ကြုံတွေ့ရလို့ရှိရင် အငိုက်မမိတော့ဘူးပေါ့။
"ခရီးလမ်း ချောမွေ့ပါစေလို့ ဆုတောင်ပေးလိုက်ပါတယ်" လင်းဖုန်းက ပြုံးလိုက်ပြီး ပြောလိုက်ပါတယ်။
ယန့်မင်းရွဲ့ကလည်း ရယ်လိုက်ပြီး၊ "ကျွန်မကို ပြန်မောင်းမထုတ်ရင်ပဲ ကျွန်မက ကျေနပ်နေပါပြီ။ ဪ ဒါနဲ့၊ ဂျူနီယာပန်ကလည်း ပိုင်ယွင်တောင်ကို ပြန်သွားပြီ ကြားတယ်။ သူ့ရဲ့ ပင်ကိုစွမ်းရည်ရယ်၊ ရှကျိုးကနေ ရလာခဲ့တဲ့ သင်ခန်းစာတွေနဲ့ ဆိုရင်၊ သူက သိပ်မကြာခင်မှာပဲ အဆင့်တက်တော့မယ်နဲ့ တူတယ်"
လင်းဖုန်းက ပြုံးလိုက်ပေမဲ့ ဒီအကြောင်းကို ဆက်မပြောတော့ပဲ၊ နှုတ်ဆက်လိုက်ပါတယ်။ "ခရီးလမ်း ဖြောင့်ဖြူးသာယာပါစေ၊ သူငယ်ချင်းရေ"
"ကျွန်မကလည်း ရှင်းယွင်တောင်ကို သွားတဲ့ လမ်းတစ်လျှောက်မှာ အဆင်ပြေပါစေလို့ ဆုတောင်းပေးလိုက်ပါတယ်" ယန့်မင်းရွဲ့ကလည်း သဘောပေါက်နေခဲ့ပြီး၊ ပန်ကျဲအကြောင်းကို စကားမဆက်တော့ပဲ စကားဝိုင်းကို ရပ်လိုက်ပါတော့တယ်။
လင်းဖုန်းက အတန်ကြာအောင် တွေးနေပြီးနောက်မှာ သူ့ကိုယ်သူ ရေရွတ်နေခဲ့ပါတယ်၊ "ငါရဲ့ သီအိုရီကို စမ်းသပ်ချင်လို့ရှိရင်၊ နေရာတစ်ခုကိုတော့ သွားဦးမှ ဖြစ်မယ်"
သူက ခေါင်းကိုမော့ပြီးကြည့်လိုက်တော့၊ မုယုံယန်ရန်ရဲ့ စိုးရိမ်ပူပန်နေတဲ့ အကြည့်တွေနဲ့ ဆုံခဲ့ပါတယ်။ သူက ပြုံးလိုက်ပြီး လက်ကို ဝှေ့ယမ်းလိုက်တော့၊ ခရမ်းရောင် တိမ်တိုက်တစ်ခုက သူမကို ဖုံးလွှမ်းသွားခဲ့ပြီး၊ သူမကလည်း ချက်ချင်း သတိလစ်သွားခဲ့ပါတယ်။
လင်းဖုန်းက ရှောင်ယန်တို့အုပ်စုကို ပြန်ခေါ်လိုက်ပြီး၊ မှော်စွမ်းအင် အရံအတားကို ပယ်ဖျက်လိုက်ကာ၊ မိုးပြာရောင်တိမ်တိုက် ဂရန်းမာစတာကို အနားလာခွင့်ပေးလိုက်ပါတယ်။
မိုးပြာရောင်တိမ်တိုက် ဂရန်းမာစတာဟာ သင်္ကာမကင်း ဖြစ်နေခဲ့ပါတယ်။ သူက တည်ကြည်ငြိမ်သက် နေတဲ့ပုံကို အတတ်နိုင်ဆုံး ဖမ်းထားခဲ့ပေမဲ့၊ လင်းဖုန်းနဲ့ သူ့ရဲ့တပည့်တွေဟာ မုယုံယန်ရန်နဲ့များ တွေ့ခဲ့သလား ဆိုတာကို အသေးစိတ် အကဲခတ်နေခဲ့ပါတယ်။
ရှောင်ယန်တို့ အဖွဲ့ကလည်း လင်းဖုန်းရဲ့ ညွှန်ကြားချက်တွေကို အစောကြီး ကတည်းက ရထားပြီးသား ဆိုတော့၊ သူတို့ရဲ့ မျက်နှာပေါ်မှာ ဘာခံစားချက်မျိုးမှ မရှိပဲ၊ မိုးပြာရောင်တိမ်တိုက် ဂရန်းမာစတာဟာ ဘာမသင်္ကာစရာကိုမှ မတွေ့ခဲ့ရပါဘူး။
ဒါကြောင့်ပဲ မိုးပြာရောင်တိမ်တိုက် ဂရန်းမာစတာဟာ ပိုပိုပြီးမှ သတိထားခဲ့ရပါတယ်။
လင်းဖုန်းက အရင်စပြီး ပြုံးကာ ပြောလိုက်ပါတယ်။ "ကျုပ်တို့က ရှင်းယွင်တောင်ထိပ်ကို မသွားသေးခင်မှာ တစ်နေရာကို အရင်သွားချင်သေးတယ်။ မိတ်ဆွေကများ လိုက်ချင်နေလား?"
Novel : History's Number 1 Founder
Author : August Eagle
Translator : Master Shifu