အပိုင်း ၁၅၉ : မော်တယ် စိတ်ဝိညာဉ် ဆေးလုံး
ဒီဆေးအိုးကြီးထဲက ကောင်ကလေးရဲ့ ခန္ဓာကိုယ် အခြေအနေကို အသေးစိတ် လေ့လာပြီးတဲ့ နောက်မှာတော့… လင်းဖုန်းဟာ ဒီမော်တယ် စိတ်ဝိညာဉ် ဆေးလုံးရဲ့ နောက်ကွယ်က အခြေခံ ဓာတ်တွေကို နားလည်သွားခဲ့ပါတော့တယ်။
ကောင်လေးရဲ့ ကိုယ်ထဲက လုံခွက်ဟာ… အခြေခံအုတ်မြစ် နောက်ဆုံး အဆင့်က ကျင့်ကြံသူတွေရဲ့ လုံခွက်နဲ့ များစွာကွာခြားနေတာပါ။ သူ့ကို 'အတုအယောင် လုံခွက်'လို့သာ ဆိုနိုင်ပါတယ်။
ဒီအတုအယောင် လုံခွက်ကနေပြီး ဖန်ဆင်းထားတဲ့ ဗဟိုချက်ဟာလည်း… အစစ်အမှန် မဟုတ်နိုင်ပဲ အတုအယောင် ဗဟိုချက်ပဲ ဖြစ်တာပါ။
ဒီမော်တယ် စိတ်ဝိညာဉ် ဆေးလုံးဟာ အခြေခံအုတ်မြစ် အဆင့်က ကျင့်ကြံသူ တစ်ယောက်ကို… ရွှေရောင် ဗဟိုချက်ကို ဖော်ဆောင်ဖို့ ကူညီပေးနိုင်သလို… ရွှေရောင်ဗဟိုချက် အဆင့်က ကျင့်ကြံသူတွေကိုလည်း သူတို့ရဲ့ ရွှေရောင် ဗဟိုချက်ကို အဆင့်မြှင့်ပေးဖို့တောင် တတ်နိုင်ပါသေးတယ်။
ဒါရဲ့ နောက်ကွယ်က အကြောင်းခံဟာ… ရှောင်ပုတန်လေးရဲ့ ဝမ်းကွဲအကိုက ရှောင်ပုတန်လေးရဲ့ အန္တိမ စိတ်ဝိညာဉ် လုံခွက်ကို ခိုးယူသွားတာနဲ့ ပုံစံတူနေတာပါ။
ဒီကောင်လေးရဲ့ ကိုယိထဲက အတုအယောင် လုံခွက်ဟာ ရင့်ကျက်လာခဲ့ပြီ ဆိုရင်တော့… သူ့ကို လုံခွက်လိုအပ်နေတဲ့ ကျင့်ကြံသူထံကို ပေးလိုက်မှာဖြစ်ပြီး… လျှို့ဝှက်မှော်ကျိန်စာ တစ်ခုကို အသုံးပြုကာ ဒီကောင်လေးရဲ့ ကိုယ်ထဲက အတုအယောင် လုံခွက်နဲ့ ဗဟိုချက်ကို ထုတ်ယူလိုက်မှာပဲ ဖြစ်ပါတယ်။
လုံခွက်ကို မဖော်ဆောင်နိုင်ပဲ… အခြေခံအုတ်မြစ် အလယ်အလတ် အဆင့်မှာ တစ်ဆို့ကြန့်ကြာနေတဲ့ သူတွေဟာ… ဒီကောင်လေးဆီက အတုအယောင် လုံခွက်ကို ရရှိပြီးသွားတဲ့နောက်မှာ… သူ့ရဲ့ ကိုယ်ပိုင် မှော်စွမ်းအင်ကို အသုံးပြုပြီး ဒီလုံခွက်လေးရဲ့ ပုံစံအတိုင်း အစစ်အမှန် လုံခွက်တစ်ခုကို ကျင့်ကြံနိုင်မှာပဲ ဖြစ်တာပါ။
ပြီးတာနဲ့ သူ့ရဲ့ အတုအယောင် ဗဟိုချက်ကို အသုံးပြုပြီးတော့… အစောနက နည်းလမ်းအတိုင်းပဲ အစစ်အမှန် ဗဟိုချက်ကို ကျင့်ကြံနိုင်မှာဖြစ်ပြီး… ဒီဖြစ်စဉ်ဟာ ဒီကျင့်ကြံသူက ရွှေရောင်ဗဟိုချက် အဆင့်ကို ရောက်သွားတဲ့အထိ ဆက်နေမှာ ဖြစ်ပါတယ်။
ဒီအတုအယောင် ဗဟိုချက်ရဲ့ ထူးခြားတဲ့ ဓာတ်ပစ္စည်းတွေကြောင့်.. သူဟာ သေခြင်းရော.. ရှင်ခြင်းရောပါ ပါဝင်နေတဲ့ စိတ်ဝိညာဉ် ဓာတ်တွေ ပါဝင်နေတာပါ။ သူဟာ စိတ်ဝိညာဉ် စွမ်းအင်တွေကိုသာ အထောက်အပံ့ ပေးနိုင်ရုံတင် မကပဲ… အရေးအကြီးဆုံး အပိုင်းဖြစ်တဲ့ သေမင်းရဲ့ အတားအဆီးတွေကိုလည်း ကျော်လွှားနိုင်အောင် ကူညီပေးမှာလည်း ဖြစ်ပါတယ်။
အခြေခံအုတ်မြစ် နောက်ဆုံး အဆင့်မှာ ရောက်နေကြတဲ့ ကျင့်ကြံသူ တစ်ချို့ကလည်း… ဒီနည်းလမ်းကို အသုံးပြုပြီးမှ ဗဟိုချက်ကို ဖွဲ့စည်းနိုင်မှာပါ… ဒါပေမဲ့လည်း သူတို့ကတော့ အတုအယောင် လုံခွက်ကိုတော့ မလိုတော့ဘူးပေါ့။
ရွှေရောင်ဗဟိုချက် အဆင့်က ကျင့်ကြံသူတွေကလည်း… ဒီအတုအရောင် လုံခွက်နဲ့ ဗဟိုချက်ကို သူတို့ရဲ့ ကိုယ်ပိုင် ခန္ဓာကိုယ်ထဲကို သွင်းလိုက်ပြီး… လုံခွက်ကို အခြေခံအနေနဲ့ အသုံးပြုပြီး ဗဟိုချက်ရဲ့ စွမ်းအားကြီးတဲ့ စိတ်ဝိညာဉ် စွမ်းအင်ကို အာဟာရ အဖြစ်နဲ့ သုံးစွဲကာ… နောက်ထပ် ရွှေရောင်ဗဟိုချက် တစ်ခုကို ဖော်ဆောင်ဖို့ အခွင့်အရေး ရှိပါတယ်။
ဆေးမီးဖိုဟာ ဆေးအမယ်တွေကို ပုံသွင်းနိုင်သလိုမျိုး… သူကလည်း အောင်မြင်စွာနဲ့ ပုံသွင်းနိုင်ခဲ့လို့ ရှိရင်တော့… သူ့ရဲ့ ရွှေရောင်ဗဟိုချက်ဟာ အဆင့် နောက်တစ်ဆင့်ကို တက်သွားမှာပါ။
လင်းဖုန်းဟာ အနည်းငယ်ထပ်ပြီး တွေးတောလိုက်တဲ့ အခါမှာ… အားနည်းချက် အချို့ကို ရှာဖွေတွေ့ရှိခဲ့ပြီး… မေးစရာ မေးခွန်းလေးတွေ ရှိလာခဲ့ပါတယ်။
ဒီနည်းလမ်းဟာ ရွှေရောင်ဗဟိုချက် အဆင့်က ကျင့်ကြံသူ တစ်ယောက်ရဲ့ ရွှေရောင် ဗဟိုချက်ကို အဆင့်မြှင့်ပေးနိုင်ပေမဲ့… သူဟာ အဆင့်လေးက အဝါရောင် ဗဟိုချက်ကို အဆင့်သုံး အစိမ်းရောင် ဗဟိုချက် အဖြစ်သာ ပြောင်းပေးနိုင်မှာပါ။
တကယ်လို့များ အစိမ်းရောင် ဗဟိုချက်ကနေ ထပ်ပြီးတော့ အဆင့်ထပ်မြှင့်ချင်တယ် ဆိုရင်တော့… သူ့ရဲ့ အောင်မြင်မှုနှုန်းဟာ သုညနီးပါး ဖြစ်သွားမှာလေ။ တကယ်လို့များ သူက အခြေခံအုတ်မြစ် အဆင့်က ကျင့်ကြံသူတွေကို ဗဟိုချက်ကို ဖော်ဆောင်ပေးခဲ့မယ် ဆိုရင်လည်း… အတုအယောင် ဗဟိုချက်ကနေ အင်အားကို ယူရတဲ့အတွက် သူက အဆင့်အနိမ့်ဆုံး အဝါရောင် ဗဟိုချက်သာ ရနိုင်မှာပါ။
ပုံမှန်အတိုင်း ပြောရရင်… ဗဟိုချက်က အရည်အသွေး ကောင်းလေလေ… ခန္ဓာကိုယ်ရဲ့ ကိုယ်ခံအားဟာ ကောင်းလေလေပါပဲ။ ဒီမော်တယ် စိတ်ဝိညာဉ် ဆေးလုံးကို တစ်ခေါက်သုံးပြီးသွားရင်တော့… နောက်တစ်ခေါက်မှာ ဘာအကျိုးသက်ရောက်မှုမျိုးမှ ရှိတော့မှာ မဟုတ်ပါဘူး။
ဒါကြောင့်ပဲ… အလွန်ဆုံး အနေနဲ့… ဒီမော်တယ် စိတ်ဝိညာဉ် ဆေးလုံးရဲ့ အကျိုးသက်ရောက်မှုဟာ အခြေခံအုတ်မြစ် အလယ်အလတ် အဆင့်က ကျင့်ကြံသူတွေ အတွက်ကတော့ အကောင်းဆုံးပါပဲ။ အတုအယောင် လုံခွက်ရဲ့ အရည်အသွေး အပေါ်မှာ မူတည်ပြီး… သူ့ရဲ့ စွမ်းအားဟာ အလွန်ဆုံး အဆင့်၃ လုံခွက်အထိကို ရောက်နိုင်တာပါ။
အတုအယောင် ဗဟိုချက် မရှိရင်တောင်မှပဲ… အဆင့် ၃ လုံခွက်နဲ့ဆိုရင် တစ်ယောက်ဟာ ရွှေရောင်ဗဟိုချက် အဆင့်ကို ရောက်ဖို့ အခွင့်အရေးတွေ ရှိနေပါတယ်။
ဆေးဝါးတစ်ရာ ဂရန်းမာစတာဟာ ဒီဆေးကျမ်းကို စတင်တီထွင်တဲ့ အချိန်တုံးက သူဟာ ရွှေရောင်ဗဟိုချက် ဖန်ဆင်းခြင်းကနေ လုံခွက်.. ပြီးမှ စိတ်ဝိညာဉ် တာဝါ… စသဖြင့် အနောက်ကို နောက်ပြန်ပြန်ပြီးမှ ဖန်ဆင်းချင်နေခဲ့တာပါ။ ဒါက သူ့ကို ထိပ်တန်း အဆင့်၃ စိတ်ဝိညာဉ် တာဝါနဲ့ ကုန်ကုန်ပြောရရင်… နောက်ဆုံး အန္တိမ စိတ်ဝိညာဉ် တာဝါ အထိတောင် ဖန်ဆင်းနိုင်မှာလေ။
ဒါပေမဲ့လည်း ဒီအဆင့်ဟာ လုံခွက်အနားကို ရောက်လာတော့… ဆေးဝါးတစ်ရာ ဂရန်းမာစတာဟာ ဆက်ပြီးတော့ ရှေ့မဆက်နိုင်ခဲ့ပါဘူး။
ဒီဖြစ်စဉ်ကိုပဲ စမ်းသပ်ရင်း.. ပြုပြင်ရင်းနဲ့… အခုလက်ရှိ မော်တယ် စိတ်ဝိညာဉ် ဆေးလုံးပုံစံမျိုး ဖြစ်လာခဲ့တာပါ။
"အင်း… ဒီလိုမျိုး အားနည်းချက်တွေ ရှိပေမဲ့… ဒီဗဟိုချက်ဟာ ဆေးထဲမှာ ရောင်းအားအကောင်းဆုံး ဖြစ်မှာပဲ…" လင်းဖုန်းက သက်ပြင်းချရင်းနဲ့ တွေးနေခဲ့ပါတယ်။
ရွှေရောင်ဗဟိုချက် အဆင့်ကို သွားတဲ့လမ်းကြောင်းဟာ… သေခြင်းနဲ့ ရှင်ခြင်းတို့ရဲ့ အခြေအနေတွေကို ဖြတ်ကျော်ရတာပါ။ ဒီကြီးမားလှတဲ့ ကမ္ဘာကြီးမှာ… ဒီအဆင့်ဟာ ရာနဲ့ထောင်နဲ့ချီနေကြတဲ့ ကျင့်ကြံသူတွေအတွက်တော့ အတားအဆီးကြီး တစ်ခု ဖြစ်နေမှာလေ။
ဒီလမ်းကြောင်းကို လျှောက်လှမ်းရတာဟာ ရှည်ကြာတဲ့ ဖြစ်စဉ်တစ်ခု ဖြစ်ပေမဲ့… စောင့်စားရကျိုးတော့ နပ်ပါတယ်။ အနည်းဆုံး အဝါရောင် ဗဟိုချက်ကိုပဲ ဖန်ဆင်းနိုင်ပြီး နောက်ထပ် ဆက်ပြီး မတိုးတက်နိုင်တော့ဘူး ဆိုဦးတော့… ကျင့်ကြံသူ တစ်ယောက်ဟာ သက်တမ်းတစ်ထောင်ကို ရရှိပြီး အတိုင်းမသိနိုင်တဲ့ ပျော်ရွှင်မှုတွေကို ခံစားနိုင်မှာပဲ ဖြစ်ပါတယ်။
တကယ်လို့များ တစ်ယောက်ဟာ ဒီလမ်းကို မကျော်ဖြတ်နိုင်ခဲ့ဘူး ဆိုရင်တော့… အချိန်နဲ့အမျှ သူ့ရဲ့ ခန္ဓာကိုယ် ကျန်းမာရေးဟာ ယိုယွင်းလာမှာဖြစ်ပြီး… ဒီကျင့်ကြံသူဟာ အသက်နှစ်ရာ မပြည့်ခင်မှာပဲ အိုမင်းရင့်ရော်လာကာ… နောက်ဆုံးမှာတော့ မြေပုံထဲကို ရောက်သွားမှာပါ။
သေချာ တွေးကြည့်လိုက်ရင်တော့… ကံကြမ္မာရဲ့ ကွာခြားမှုဟာ အလွန်ကိုမှပဲ ကြီးမားလှပါတယ်။
ဒါပေမဲ့လည်း ရွှေရောင်ဗဟိုချက် အဆင့်ကို အောင်မြင်စွာနဲ့ ရောက်သွားပြီးကြတဲ့ ကျင့်ကြံသူတွေ အနေနဲ့ ဆိုရင်တော့… သူ့ရဲ့ ဗဟိုချက်ဟာ အဝါရောင်လား.. အစိမ်းရောင်လား ဆိုတာက အလွန်အမင်းကိုမှပဲ ကွာခြားတာလေ။
တစ်ယောက်နဲ့တစ်ယောက် တိုက်ခိုက်ကြပြီ ဆိုရင်တော့… အစိမ်းရောင် ဗဟိုချက်ကို ပိုင်ဆိုင်ထားတဲ့ ကျင့်ကြံသူဟာ… အဝါရောင် ဗဟိုချက်ကိုသာ ပိုင်ဆိုင်ထားတဲ့ သူကို အသာအယာပဲ အနိုင်ယူနိုင်မှာပါ။
ရွှေရောင်ဗဟိုချက် အဆင့်ကို ဝင်ရောက်နိုင်တဲ့ စွမ်းရည်ကို ထည့်မတွက်နဲ့ဦး… ကလန်တစ်ခုမှာဆိုရင်… အဝါရောင် ဗဟိုချက်က ကျင့်ကြံသူ အချို့ဟာ အစိမ်းရောင်ကို အဆင့်မြှင့်လိုက်နိုင်လို့ရှိရင်… ဒီကလန်ရဲ့ တိုက်ခိုက်နိုင်စွမ်းဟာ နောက်ထပ် အဆင့်တစ်ခုကို တက်သွားနိုင်မှာဖြစ်ပြီး… တကယ်လို့များ ကလန်တစ်ခုလုံးဟာ ရွှေရောင်ဗဟိုချက် အဆင့်ကို တက်လှမ်းနိုင်မယ် ဆိုပါက… သူ့ရဲ့ အဆင့်အတန်းကို ခန့်မှန်းလို့တောင် ရတော့မှာ မဟုတ်ပါဘူး။
"အင်း…နှမြောစရာ ကောင်းတာက…" လင်းဖုန်းက သူ့ရဲ့ စိတ်အာရုံကို အသုံးပြုပြီးတော့ ဒီအိုးကြီး ငါးဆယ်ကို စစ်ဆေးကြည့်လိုက်တဲ့ အခါမှာတော့… ကလေးလေး သုံးဆယ်တို့ရဲ့ အတုအယောင် လုံခွက်နဲ့ ဗဟိုချက်တို့ဟာ ကျေမွနေကြပြီ ဖြစ်တယ်ဆိုတာကို တွေ့လိုက်ရပါတော့တယ်။
ဒီဖြစ်စဉ်ဟာ သဘာဝအတိုင်းပဲ ဖြစ်နေတာပါ… အခြား စကားလုံးနဲ့ ပြောရရင်တော့… ဒါဟာ ရွှေရောင် ဗဟိုချက်ကို ဖွဲ့စည်းတဲ့ ဖြစ်စဉ်မှာ ဖြစ်ပေါ်တတ်တဲ့ သဘာဝအတိုင်း ပျက်စီးသွားခြင်းပါပဲ။
ဒါဟာ ဒီကလေးငယ်တို့ရဲ့ ခန္ဓာကိုယ်ဟာ ဆေးပြင်းအားကို မခံနိုင်တာလည်း ဖြစ်နိုင်သလို… အတုအယောင် လုံခွက်နဲ့ ဗဟိုချက်တို့ရဲ့ မတည်ငြိမ်မှုတို့ကြောင့်လည်း ဖြစ်နိုင်ပါတယ်။ ရယ်စရာ အနေနဲ့ ပြောရရင်… ဒါက ဆေးဝါးတစ်ရာ ဂရန်းမာစတာရဲ့ အမှားကြောင့်လည်း ဖြစ်နိုင်တာပါ။ ဒီအချိန်မှာတော့… ဘယ်အကြောင်းအရာကြောင့်မဆို ဖြစ်နိုင်တာလေ။
ဒါပေမဲ့လည်း လင်းဖုန်းဟာ ဒီမြင်ကွင်းကို ကြည့်နေရင်နဲ့… မျက်နှာက တဖြေးဖြေးနဲ့ ပိုပြီးတော့ ပျက်လာခဲ့ပါတယ်။ အချိန်ကြာလာတာနဲ့အမျှ… ဒီအိုးတွေထဲက ဆေးရည်တွေဟာ ခန်းခြောက်ကိုတော့မှာပါ။ ဆေးဝါးတစ်ရာ ဂရန်းမာစတာဟာ ဆေးရည်တွေကို လှဲလှယ်တဲ့ အချိန်ကျလို့ရှိရင်… သူဟာ မအောင်မြင်ခဲ့တဲ့ ကလေးငယ်တွေကို အပြတ်ရှင်းပစ်မှာလေ။
တနည်းအားဖြင့် ဆိုရရင်… အခုလင်းဖုန်း တွေ့ခဲ့ရတဲ့ မအောင်မြင်တဲ့ ကလေးလေး သုံးဆယ်တို့ဟာ… ဆေးဝါးတစ်ရာ ဂရန်းမာစတာက ဆေးရည်တွေကို လှဲလှယ်လိုက်လို့ အတုအယောင် လုံခွက်နဲ့ ဗဟိုချက်တို့က ကျေမွသွားကြတာပါ။
လင်းဖုန်းက အချိန်အနည်းငယ်လောက် ဆက်ကြည့်နေခဲ့ပြီး… ဒီဆေးရည်တွေဟာ အမတန်ကို လျှင်မြန်စွာနဲ့ပဲ ခန်းခြောက်ကုန်ကြတာကို တွေ့လိုက်ရပါတယ်။
ဒီအချိန်လေး အနည်းငယ် အတွင်းမှာပဲ… ကလေးငယ်တို့ရဲ့ ငါးပုံသုံးပုံဟာ ကျရှုံးသွားကြပါပြီ။
ဆေးရည်တစ်ခေါက် ထပ်ဖြည့်တဲ့ အချိန်တိုင်းမှာ… အရှင်းခံလိုက်ရတဲ့ ကလေးပေါင်းဟာ မြောက်မြားစွာ ရှိနေမှာပါ။ ဒီအောင်မြင်တဲ့ ကလေးငယ် နှစ်ဆယ်ရဖို့ အတွက်ကို… အနစ်နာ ခံလိုက်ရတဲ့ ကလေးငယ်ပေါင်းဟာ ဘယ်လောက်တောင် ရှိသွားပြီလည်း?
မအောင်မြင်ကြတဲ့ ကလေးငယ်တို့ရဲ့ ကံကြမ္မာကရော… ဘယ်လိုများလည်း?
လင်းဖုန်းကလည်း အသက်ပြင်းပြင်း တစ်ချက်ကို ရှူလိုက်ပြီး… သူ့ရဲ့စိတ်ကို တည်ငြိမ်အောင် ကြိုးစားလိုက်ပါတယ်။ သူဟာ ဒီဆေးအိုးတွေက ဆေးဝါးတစ်ရာ ဂရန်းမာစတာရဲ့ စိတ်နဲ့ ဆက်သွယ်မှုတွေ ရှိနေတယ် ဆိုတာကို သိနေခဲ့တာပါ။ ကလေးလေးတွေကို ကယ်လိုက်ရင်ပဲ ဖြစ်ဖြစ်.. ဖြိုးမောက်မြေကြီးကို ယူလိုက်ရင်ပဲ ဖြစ်ဖြစ်… ဆေးဝါးတစ်ရာ ဂရန်းမာစတာဟာ ချက်ချင်းကိုပဲ အကြောင်းကြားပြီးသား ဖြစ်သွားမှာလေ။
ဒီနေရာကို ထိန်းချုပ်ထားတဲ့ စွမ်းအားတွေဟာ… အပြင်ဘက်က ရေခဲခံတပ်ကြီးနဲ့ မတူပါဘူး။ ဒီမော်တယ် စိတ်ဝိညာဉ် ဆေးလုံးကို ဖော်စပ်တဲ့ ဖြစ်စဉ်ဟာ… ဆေးဝါးတစ်ရာဂိုဏ်းအတွက်တော့ အလွန်ကိုမှ အရေးကြီးတဲ့ကိစ္စ ဖြစ်လို့… လင်းဖုန်းဟာ မလိုအပ်ပဲ မစွန့်စားချင်တဲ့ အတွက်ကြောင့်… ကောင်းကင်၏ စည်းရိုးများကို အသုံးမချခဲ့ပါဘူး။
"ဟာ?" လင်းဖုန်းဟာ တစ်ချက်ရေရွတ်လိုက်ပြီး… ကိုယ့်ကိုယ်ကိုယ် ဖုံးကွယ်လိုက်ပါတယ်။
ကျောက်တုံးအိမ်လေးဟာ ငြိမ်သက်သွားခဲ့ပြီး… ဆေးအိုးတွေရဲ့ အထဲက ဆေးရည်တွေဟာ အမြှုပ်ထလာခဲ့ပြီး… ပေါက်ကွဲသံ တစ်ခုကို ကြားလိုက်ရပါပြီ။
လင်းဖုန်းကတော့ ထောင့်တစ်ထောင့်မှာ ပုန်းနေခဲ့ပြီး… သူက ဝင်ပေါက်ဘက်ကို မကြည့်နေခဲ့ပဲ… ဒီကျောက်တုံး အခန်းလေးရဲ့ ထောင့်တစ်ထောင့်ကိုသာ စိုက်ပြီးမှ ကြည့်နေခဲ့ပါတယ်။
ခဏအကြာမှာတော့… အစိမ်းရောင် ဖျော့ဖျော့ နရံလေးဆီကနေ အရာတစ်ခုဟာ ဖြေးဖြေးချင်းပဲ ပေါ်ထွက်လာတာကို တွေ့လိုက်ရပါပြီ။
ပေါ်ထွက်လာတဲ့ အရာကတော့ သဲစလေး တစ်စပါ။ တကယ်လို့များ သာမန်လူ တစ်ယောက်က သူ့ရဲ့ အကြည့်တွေကို မစူးစိုက်ထားခဲ့ရင်တော့… ဘာထူးခြားမှုမျိုးကိုမှ တွေ့မှာမဟုတ်ပါဘူး။
ဒါပေမဲ့လည်း လင်းဖုန်းရဲ့ အကြည့်တွေဟာ နရံပေါ်မှာ ရုတ်တရက် ပေါ်လာတဲ့ သဲမှုန်လေးကို အာရုံစိုက်နေခဲ့တယ်လေ။
ဖြေးဖြေးချင်းပဲ… ဒီအစိမ်းရောင် ဖျော့ဖျော့ နရံကြီးကနေ ရွှေရောင်သန်းနေတဲ့ အရာတစ်ခုဟာ ဖျစ်ညှစ်ပြီးမှ ထွက်လာခဲ့ပြီး… သိသိသာသာကြီးကို မြင်နေရပါတယ်။
ဒါကတော့ ရွှေရောင်ဖျော့ဖျော့ သန်းနေတဲ့ ကျောက်စရစ်ခဲလေးပါ… သူဟာ ရွှေရောင်အလင်းတန်း ဖျော့ဖျော့လေးကို ထုတ်လွှတ်နေခဲ့ပြီး… အချိန်ကြာလာတာနဲ့အမျှ အရောင်ပိုရင့်လာခဲ့ပါပြီ။
နောက်ဆုံးမှာတော့ ဒီနေရာ တစ်ခုလုံးဟာ ရွှေရောင်အတိ လွှမ်းသွားခဲ့ပြီး… ရွှေရောင် အလင်းတန်းတွေရဲ့ အကြားမှာ… ဒီကျောက်စရစ်ခဲရဲ့ မျက်နှာပြင်ဟာ ဆယ်ပေပတ်လည် အထိကို ကြီးလာခဲ့ကာ… ထွင်းဖောက်မြင်နိုင်ခဲ့ပြီး အထဲက လူနှစ်ယောက်ရဲ့ ပုံရိပ်ကို ဖော်ပြပေးခဲ့ပြီလေ။
ပြီးတာနဲ့ ဒီရွှေရောင် အလင်းတန်းလေးဟာ တဖြေးဖြေးနဲ့ မှေးမှိန်လာခဲ့ပြီး… ကျောက်တုံးကြီးကလည်း ပျောက်ကွယ်သွားခဲ့ကာ… လူနှစ်ယောက်ဟာ မြေပြင်ပေါ်ကို ဆင်းသက်လာခဲ့ပြီး လေးနက်တဲ့ မျက်နှာထားတွေနဲ့ ဆေးအိုးကြီးတွေကို ကြည့်နေကြပါတယ်။
သူတို့နှစ်ယောက်ထဲက တစ်ယောက်ဟာ နီရဲနေတဲ့ ဝတ်စုံကို ဝတ်ဆင်ထားတဲ့ ကောင်မလေး တစ်ယောက်ပါ။ သူမရဲ့ ဆံပင်နဲ့ မျက်လုံးတွေဟာ နီရဲနေခဲ့ပြီး… မျက်ခုံးမွေးတွေကတော့ သေးသွယ်ကာ တိကျပြတ်သားတဲ့ပုံ ပေါက်နေခဲ့တာပါ။ သူမဟာ ရှေးဟောင်းကမ္ဘာ စိမ့်မြေမှာတုံးက သူတွေ့ခဲ့ရတဲ့… ပြင်းထန်သောမုန်တိုင်း အဖွဲ့အစည်းက ကျင့်ကြံသူ တစ်ယောက်ဖြစ်တဲ့ ယွဲ့ဟုန်ယန်ပဲ ဖြစ်ပါတယ်။
အနီရောင် ဝတ်စုံနဲ့ မိန်းမချောလေးဟာ အခုဆိုရင်တော့ စိတ်လက်မကြည်မသာ ဖြစ်နေတဲ့ပုံပေါက်နေခဲ့ပြီး… သူမဟာ သူမ ကြိုးစားပြီး ဖိနှိပ်နေရတဲ့ နာကျည်းခံပြင်းမှုတွေကို သယ်ဆောင်ထားခဲ့ကာ… အချိန်မရွေး ပေါက်ကွဲသွားနိုင်တဲ့ မီးတောင်တစ်လုံးလိုမျိုး ဖြစ်နေခဲ့တာပါ။
သူမရဲ့ဘေးမှာ ရှိနေတာကတော့ အဖြူရောင် ဝတ်စုံနဲ့ ပိန်ပိန်ပါးပါး ခန္ဓာကိုယ်ရှိကာ သန့်ပြန့်တဲ့ ရုပ်ရည်ရှိပြီး… သူကတော့ ခန်းနန်းဟွာပဲ ဖြစ်ပါတယ်။
ခန်းနန်ဟွာဟာ နီမြန်းနေတဲ့ အသားအရေတွေ ရှိနေပြီး… အသက်ရှုပုံကလည်း တည်ငြိမ်နေခဲ့တာပါ။ သူဟာ အပြည့်အဝကို ကျန်းမာလာခဲ့ပြီဖြစ်ပြီး… ဟိုအရင်က ရှေးဟောင်းကမ္ဘာ စိမ့်မြေမှာ တွေ့ခဲ့ရတုံးကလိုမျိုး နာမကျန်း ဖြစ်နေတဲ့ပုံ ပေါက်မနေတော့ပါဘူး။
ဒါပေမဲ့လည်း လင်းဖုန်းကို စိတ်ရှုပ်ထွေးသွားစေခဲ့တာက… သူ့ရဲ့ မျက်ခုံး နှစ်ခုကြားက မည်းမှောင်နေတဲ့ အော်ရာတစ်ခုပါ။ လင်းဖုန်း မှတ်မိနေခဲ့တဲ့ ခန်းနန်ဟွာဟာ… ချွေးတွေ တစ်ဒီးဒီး ကျနေခဲ့ပြီး ဖြောင့်မတ်အောင်တောင် မတ်တတ်မရပ်နိုင်တဲ့ အခြေအနေမျိုး မှာတောင်မှ… ငြိမ်သက်တည်ကြည် နေတဲ့ လူစားမျိုး ဖြစ်ပါတယ်။
ဒါပေမဲ့လည်း အခုလက်ရှိ စွမ်းအားပြည့်စုံနေတဲ့ပုံ ပေါက်ပြီး… ဟိုးအရင်က ရှေးဟောင်းကမ္ဘာ စိမ့်မြေမှာ ရှိနေတုံးကထက် အစွမ်းထက်နေတဲ့ ခန်းနန်ဟွာဟာ အရင်ကလိုမျိုး အသက်မဝင် နေခဲ့တော့ပဲ… ခံစားချက်တွေ.. လိုအင်ဆန္ဒတွေ ကင်းမဲ့နေတဲ့ လူအိုကြီး ပုံစံမျိုး ပေါက်နေခဲ့တာပါ။
အတိတ်က မိတ်ဆွေဟောင်းတွေကို ပြန်တွေ့ရတာဟာ ပျော်ရွှင်ဖွယ်ရာ ကိစ္စမျိုး ဖြစ်ပေမဲ့… လင်းဖုန်းဟာ သူတို့နှစ်ယောက် ပေါ်လာတဲ့ အချိန်မှာ ကိုယ့်ကိုယ်ကိုယ် မဖော်ပြခဲ့ပါဘူး။
ဒီလူနှစ်ယောက်ကို ကြည့်နေရင်းနဲ့… လင်းဖုန်းဟာ မျက်မှောင်အတန်ငယ် ကြုတ်လိုက်ရင်း… "အင်း… ပြင်းထန်သောမုန်တိုင်း အဖွဲ့အစည်းမှာ တစ်ခုခုများ ဖြစ်သွားခဲ့လို့ သူတို့နှစ်ယောက်စလုံးဟာ ဒီလိုမျိုး အမူအရာတွေ ဖြစ်နေရတာလား?"
"အဲ… ပြီးတော့… သူတို့က ဒီနေရာကို ဘာများ လာလုပ်ကြပါလိမ့်?"
ယွဲ့ဟုန်ယန်ဟာ ဆေးအိုးကြီးတွေ ရှိရာဆီကို လျှောက်လာခဲ့ပြီး… အိုးအဖုံးကို ဖွင့်ကြည့်လိုက်ပါပြီ။ အိုးအဖုံးထဲမှာ ရှိနေတဲ့ အရာကို သေချာစွာ မြင်ပြီးသွားတဲ့ နောက်မှာတော့… သူမဟာ ထိန်းချုပ်လို့ မရလောက်အောင် တုန်ခါသွားခဲ့ပြီး… "ဟာ… ဒီဆေးဝါးတစ်ရာဂိုဏ်းက ဒီလိုမျိုး အရာတွေကို လုပ်တဲ့အထိကို ယုတ်မာရက်စက်ကြတာပဲ…"
ခန်းနန်ဟွာကလည်း သူ့ရဲ့အာရုံတွေကို စုစည်းလိုက်ပြီး… ကျောက်တုံးအိမ်ကြီးကို စစ်ဆေးလိုက်ကာ… "အင်း… ငါတို့က အရင်တစ်ခေါက်တုံးက အပြင်က ရေခဲနရံကြီးရဲ့ တားဆီးမှုကို ခံထားရပြီး အထဲကို မဝင်နိုင်တဲ့ အချိန်မှာ… အခုတစ်ခါမှာတော့… ဒီရေခဲနရံကြီးမှာ အပေါက်ကြီး တစ်ပေါက်က ပေါက်နေခဲ့ပြီး… ဆေးဝါးတစ်ရာ ဂရန်းမာစတာကလည်း ဘာကိုမှ မတုံ့ပြန်ခဲ့ဘူး။ ဒီရေခဲနရံကို ဖောက်ထွင်းတဲ့ နည်းစနစ်ဟာ တကယ်ကိုပဲ ပြောင်မြောက်လှပါပေတယ်…"
"သူက ဒီနေရာမှာ ရှိနိုင်သေးတာပဲ…" ယွဲ့ဟုန်ယန်ကလည်း ဆေးအိုးတိုင်းရဲ့ အဖုံးတွေကို လိုက်ဖွင့်ကြည့်နေခဲ့ပြီး… တစ်ချိန်မှာတော့ စိတ်လှုပ်ရှားပြီး ဝမ်းသာအားရ ဖြစ်လှစွာနဲ့… "အား… ရှောင်ဟွမ်းကျိလေးက ဘာမှမဖြစ်ဘူး! မစ္စတာခန်း… ရှောင်ဟွမ်းကျိလေးက ဘာမှ မဖြစ်ဘူးရှင့်!"
ခန်းနန်ဟွာရဲ့ မျက်ခုံးကြားက မည်းမှောင်နေတဲ့ အော်ရာဟာ ဒီစကားကို ကြားလိုက်တော့ အနည်းငယ် လျော့သွားခဲ့ပါတယ်။
ပျောက်ဆုံးနေတဲ့ ရှောင်ဟွမ်းကျိလေးကို ရှာဖွေဖို့အတွက်… သူတို့ဟာ ချန်ချွန်းတောင်ထိပ်ကို ရောက်လာခဲ့ပြီး… ဒီက ရွှေရောင်ဗဟိုချက် အဆင့် ကျင့်ကြံသူ တစ်ယောက်ကို ဖမ်းဆီးခဲ့ပြီး သတင်းအချက်အလက်တွေကို ရယူခဲ့တာပါ။
ကံကောင်းထောက်မ လှစွာနဲ့ပဲ… သူတို့ ဖမ်းဆီးခဲ့တဲ့ ကျင့်ကြံသူဟာ ဆေးဝါးတစ်ရာ ဂရန်းမာစတာရဲ့ မော်တယ် စိတ်ဝိညာဉ် ဆေးလုံး ပထမ အသုတ်ထဲက တစ်လုံးကို ရရှိခဲ့တဲ့ ကျင့်ကြံသူ တစ်ယောက် ဖြစ်နေခဲ့တော့… သူဟာ ဒီအကြောင်းကို သိတဲ့သူ အနည်းငယ်ထဲက တစ်ယောက် ဖြစ်နေခဲ့ပါတယ်။
ခန်းနန်ဟွာရဲ့ စစ်ဆေးမေးမြန်းမှုတွေရဲ့ အောက်မှာ… ဒီကျင့်ကြံသူဟာ ဆေးဝါးတစ်ရာ ဂရန်းမာစတာရဲ့ လျို့ဝှက်ဆေးဖော်ခန်း အကြောင်းကို ဖော်ပြလိုက်ရတာပါ။ ခန်းနန်ဟွာကလည်း သူမှာ ရှိနေတဲ့ လေဟာနယ်နဲ့ အချိန်ကာလကို ထိန်းချုပ်နိုင်တဲ့ ရတနာ ပစ္စည်းတစ်ပါးကို အသုံးပြုပြီးတော့… ဒီတောင်ထဲက ဂူထဲကို ရောက်လာတာပဲ ဖြစ်ပါတယ်။
ဒါပေမဲ့လည်း သူတို့ဟာ ဒီရေခဲနရံကြီးကိုတော့ ကျော်ဖြတ်နိုင်စွမ်း မရှိပဲ… ဆေးဝါးတစ်ရာ ဂရန်းမာစတာကို သတိပေးလိုက် သလိုမျိုး ဖြစ်သွားမှာစိုးလို့… အခြေအနေတွေကို စောင့်ကြည့်နေခဲ့တာ ဖြစ်ပြီး… အခုက ဒီရေခဲနရံကြီးမှာ အပေါက်တစ်ပေါက်က ပေါ်လာတာကို တွေ့လိုက်ရတော့… အလျှင်အမြန်ပဲ ရောက်ရှိလာခဲ့တာပါ။
ယွဲ့ဟုန်ယန်ရဲ့ စိတ်လှုပ်ရှားမှုတွေနဲ့ ဆန့်ကျင်ဘက် ဖြစ်လှစွာပဲ… ခန်းနန်ဟွာကတော့ တည်ငြိမ်လို့ နေခဲ့ပါတယ်… "အင်း… သူက အဆင်ပြေနေတာက ကောင်းပေမဲ့… သူ့ကို ကယ်ဖို့ကတော့ ခက်ခဲဦးမယ်နဲ့ တူတာပဲ။ ဒီဆေးအိုးတွေဟာ ဆေးဝါးတစ်ရာ ဂရန်းမာစတာရဲ့ စိတ်နဲ့ ဆက်သွယ်မှုတွေ ရှိနေတာဆိုတော့… နည်းနည်းလေး လှုပ်လိုက်တာနဲ့ ဆေးဝါးတစ်ရာ ဂရန်းမာစတာကို သတိပေးလိုက် သလိုမျိုး ဖြစ်သွားမှာလေ…"
ယွဲ့ဟုန်ယန်ကတော့ သူမရဲ့ နှုတ်ခမ်းလေးတွေကို တင်းကျပ်စွာ စေ့ထားခဲ့ပြီး… အိုးရဲ့အဖုံးကို တင်းကျပ်စွာနဲ့ ဆုတ်ကိုင်ထားခဲ့ပါတော့တယ်။
Novel : History's Number 1 Founder
Author : August Eagle
Translator : Master Shifu