အပိုင်း ၁၄၀ : စနစ်ကြီးဟာ သူ့ရဲ့ ချီးထုပ်သဘာဝကို ဖော်ပြခဲ့ပြန်ပါပြီ
"သင့်ရဲ့ဂိုဏ်းကို တည်ထောင်ဖို့အတွက် သင့်တော်ပြီး... လိုအပ်ချက်တွေနဲ့ ပြည့်စုံတဲ့ ကောင်းချီးမင်္ဂလာ နေရာတစ်ခုကို ရှာတွေ့ခဲ့ပြီ ဖြစ်တဲ့အတွက် ဂုဏ်ယူပါတယ်!"
"သင်ဟာ တတိယ အဓိက မစ်ရှင်ကို ပြီးမြောက်သွားပြီ ဖြစ်တဲ့အတွက် ဂုဏ်ယူပါတယ်!"
"အဓိက မစ်ရှင် ပြီးမြောက်တဲ့အတွက်... အထူးဆုကို ထုတ်ပေးနေပါပြီ!"
စနစ်ကြီးရဲ့ အကြောင်းကြားချက်ဟာ လင်းဖုန်းရဲ့ နားထဲမှာ အဆက်မပြတ်ပဲ အော်မြည်နေခဲ့ပါတယ်။ သူတို့ကို ကြားလိုက်ရတော့... လင်းဖုန်းဟာ ပြုံးလိုက်ပြီး... "ဟဲဟဲ... ငါက သူ့ကို အပြည့်အဝ မထိန်းချုပ်နိုင်သေးပေမယ့်... အနည်းဆုံးတော့ ငါက သင့်တော်တဲ့ ကောင်းချီးမင်္ဂလာ နေရာတစ်ခုကို ရှာတွေ့ခဲ့ပြီး... စနစ်ကြီးက ဒါကို ငါရဲ့ ဂိုဏ်းရဲ့ ဗဟိုဌာနချုပ် နေရာကို ရှာဖွေတဲ့ မစ်ရှင်ပြီးမြောက်တယ်ဆို့ သတ်မှတ်လိုက်တာပဲ..."
"မဆိုးဘူး... တကယ်ကိုပဲ မဆိုးဘူး... ဟီးဟီး... ဆုက ဘာများလည်း ဆိုတာကို ကြည့်လိုက်ရအောင်..."
စိတ်လှုပ်ရှားလှစွာနဲ့... လင်းဖုန်းဟာ ရတနာ သေတ္တာအဖုံးကို ဖွင့်ကြည့်လိုက်ပါပြီ။
သူ့ရဲ့ အရှေ့မှာက သေးသွယ်တဲ့ နွယ်ပင် တစ်ခုပါ... ဒီအတိုင်း ကြည့်လိုက်ရင်တော့... ဘာမှထူးခြားနေတဲ့ပုံ မပေါ်နေပါဘူး။
ဒါပေမဲ့လည်း သူ့ရဲ့ ဖော်ပြချက်တွေကို ဖတ်ကြည့်လို့ အပြီးမှာ... လင်းဖုန်းဟာ ပျော်ရွှင်တက်ကြွလို့ လာခဲ့ပါပြီ။
စကြာဝဠာ အလင်းတန်း နွယ်ပင်သစ်မြစ်... သီးသန့် ဒိုင်မန်းရှင်း ကောင်းချီးမင်္ဂလာ နေရာတစ်ခုမှာ စိုက်ပျိုးနိုင်ပြီး... ဒီသီးသန့် ဒိုင်မန်းရှင်းရဲ့ အထဲမှာ သင့်ရဲ့ အလိုဆန္ဒအတိုင်း အချိန်စီးဆင်းမှုကို အပြောင်းအလဲ ပြုလုပ်နိုင်ပါတယ်။
အမြင့်ဆုံးအနေနဲ့... အဆတစ်ရာ မြန်ဆန်ခြင်း.. နှေးကွေးစေခြင်းတို့ကို ပြုလုပ်နိုင်တာပါ။
"ဟာ... ဒါက အငြင်းပွားဖွယ်ရာ မရှိပဲ အရမ်းကောင်းတဲ့ ပစ္စည်းလေးပဲဟ..." လင်းဖုန်းဟာ ပျော်ရွှင်မြူးတူးလို့ နေခဲ့ပါပြီ။
စဉ်းစားကြည့်လိုက်ဦးလေ... မင်းက နှစ်ပေါင်းတစ်ရာ ဒီနွယ်မြစ်ရဲ့ ဒိုင်မန်းရှင်းထဲမှာ ကျင့်ကြံမှုတွေ ပြုလုပ်ပြီး... အပြင်ကမ္ဘာမှာက တစ်နှစ်ပဲ ကုန်ဦးမှာ။ မင်းရဲ့ စွမ်းအားအပေါ်မှာ ဘယ်လောက်အထိတောင် အကျိုးသက်ရောက်မှုတွေ ရှိနိုင်မှာလည်း?
ဥပမာ အနေနဲ့... ရှောင်ယန်နဲ့ မုယုံယန်ရန်တို့ဟာ စာရင်းအပြတ်ရှင်းဖို့ကို သုံးနှစ်အကြာမှ အချိန်းအချက် ပြုလုပ်ထားခဲ့တာပါ။ တကယ်လို့များ ရှောင်ယန်က ဒီစကြာဝဠာ အလင်းတန်း ဒိုင်မန်းရှင်းထဲမှာ ဝင်ပြီးမှ ကျင့်ကြံမယ် ဆိုရင်တော့... သုံးနှစ်အချိန် ပြည့်မြောက်သွားခဲ့ပြီး သူက ယှဉ်ပြိုင်ဖို့အတွက် ထွက်လာခဲ့ရင်... သူဟာ နှစ်ပေါင်းသုံးရာ ကျင့်ကြံပြီးသား ဖြစ်နေမှာလေ။
ဒါပေမဲ့လည်း... ကျင့်ကြံသူတွေရဲ့ သက်တမ်းကလည်း အကန့်အသတ်တွေ ရှိတာပါ။ တစ်ယောက်ရဲ့ ကျင့်ကြံမှု အဆင့်တွေ မြင့်မားလာတာနဲ့အမျှ... သက်တမ်းတွေက တိုးလာမှာပဲ ဖြစ်ပါတယ်။ တကယ်လို့များ တစ်ယောက်က တစ်ဆို့ကြန့်ကြာနေတဲ့ အခြေအနေတွေနဲ့ ကြုံတွေ့လာခဲ့မယ် ဆိုရင်တော့... သူ့ရဲ့ အဆင့်တွေဟာ တိုးတက်မလာခဲ့ခင်... သက်တမ်းကုန်ဆုံးသွားမှာပဲ ဖြစ်တာလေ။
တကယ်လို့များ မင်းက ဒီစကြာဝဠာ အလင်းတန်း ဒိုင်မန်းရှင်းထဲက မထွက်ပဲ နေခဲ့ရင်... အထဲမှာပဲ အသက်ကြီးပြီးမှ သေဆုံးသွားမှာပါ။
တကယ်တမ်း ဆိုရရင်... ထိပ်တန်းဂိုဏ်းတွေ အားလုံးဟာ ဒီလိုမျိုး အချိန်ကို မြန်ဆန်စေနိုင်တဲ့ ဒိုင်မန်းရှင်း အမျိုးမျိုးကို တီထွင်ဖန်တီးထားကြပြီး... သူတို့ရဲ့ ကိုယ်ပိုင်တပည့်တွေကို ကျင့်ကြံနိုင်အောင် အပြိုင်အဆိုင်ဖြစ်အောင် လုပ်ထားကြပါတယ်။
ဒါပေမဲ့လည်း ဂိုဏ်းတစ်ခုချင်းဆီရဲ့ ဒိုင်မန်းရှင်း အတိုင်းအတာတွေက ကွာခြားမှုတွေ ရှိတာပေါ့။
အလင်းဓားမြန်ဂိုဏ်းမှာလည်း အဲ့ဒီလိုမျိုး ဒိုင်မန်းရှင်းတစ်ခု ရှိတဲ့အတွက်... လင်းဖုန်းကလည်း ရှောင်ယန်နဲ့ မုယုံယန်ရန်တို့ရဲ့ ယှဉ်ပြိုင်မှုအတွက် စိတ်ပူနေခဲ့တာလေ။
အခုတော့ သူတို့ဆီမှာလည်း ဒီလိုမျိုး အချိန်ကို မြန်ဆန်စေနိုင်တဲ့ ကိုယ်ပိုင်ဒိုင်မန်းရှင်း ရှိပြီဆိုတော့... ဒီအပိုင်းနဲ့ ပတ်သတ်ပြီးတော့ နောက်ကျကျန်ခဲ့မှာကို စိတ်ပူနေစရာ မလိုတော့ပါဘူး။
သူဟာ အလင်းဓားမြန်ဂိုဏ်းရဲ့ ဒိုင်မန်းရှင်းဟာ အချိန်ကို ဘယ်နှစ်ဆ မြန်နိုင်သလည်း ဆိုတာကို အတိအကျ မသိပေမယ့်... လင်းဖုန်းက သူ့စကြာဝဠာ အလင်းတန်း ဒိုင်မန်းရှင်းရဲ့ အဆတစ်ရာ မြန်ဆန်နိုင်မှုဟာ... မူလကောင်းကင် ကမ္ဘာကြီး တစ်ခုလုံးမှာတော့ အကောင်းတကာ့ အကောင်းဆုံးထဲမှာ ပါမယ်ဆိုတာက သေချာနေခဲ့ပါတယ်။
ပြီးတော့လည်း... ဒီစကြာဝဠာ အလင်းတန်း နွယ်ပင်ဟာ ဆက်ပြီးတော့ ကြီးထွားနိုင်စွမ်းလည်း ရှိနေခဲ့တာပါ။ သူဟာ ပိုပြီးတော့ ကြီးထွားလာပြီး အားကောင်းလာမယ်ဆိုရင်... မြန်ဆန်နှုန်းဟာလည်း လိုက်ပြီးတော့ ပိုမြန်လာမှာလေ။
လင်းဖုန်းဟာ အပျော်လုံး ဆို့နေဆဲမှာပဲ... စနစ်ကြီးရဲ့ အကြောင်းကြားချက်ကို ထပ်ပြီးမှ ကြားလိုက်ရပါပြီ။
အဓိကမစ်ရှင် ၂.၀ - ဂိုဏ်းတည်ထောင်ခြင်း... တပည့်တွေကို အလုံးအရင်းနဲ့ လက်ခံခြင်း
မစ်ရှင်၏ အကြောင်းအရာ :
ထူးချွန်ပြောင်မြောက်သော လက်ရင်းတပည့်များ... မကြုံဖူးသေးသော ကိုယ်ပိုင်တီထွင်ထားတဲ့ တာအိုနည်းစနစ်များ... ပထမအဆင့် ပတ်ဝန်းကျင်ရှိသော ကောင်းချီးမင်္ဂလာ နေရာတစ်ခု...
သင်ဟာ ပထမအဆင့် ပြင်ဆင်မှုတွေ အားလုံးကို ပြီးမြောက်သွားတဲ့အတွက် ဂုဏ်ယူပါတယ်... အခုဆိုရင် ဂိုဏ်းကို တရားဝင် တည်ထောင်လို့ ရပါပြီ။
ဒီကနေ့က စပြီးတော့... သင်ဟာ ဂိုဏ်းရဲ့ အခြေခံ စည်းမျဉ်းစည်းကမ်းတွေကို တရားဝင် ထုတ်ပြန်ပြီး... အလားအလာ တန်ဖိုး ၂၅ကျော်တဲ့ တပည့်သုံးဆယ်ကို လက်ခံကာ... ဂိုဏ်းရဲ့ အခြေခံ အုတ်မြစ် အဆင့်၂ အဖြစ် တည်ဆောက်ရမှာပါ။
မစ်ရှင်၏ အချိန်ကန့်သတ်ချက် : ၁၀နှစ်... တကယ်လို့များ ဒီအချိန်အတွင်း မစ်ရှင်မပြီးမြောက်ခဲ့ရင်... သင့်ကို တိုက်ရိုက်သုတ်သင်ပါမယ်။
လင်းဖုန်းက မျက်တောင်တွေကို ပုတ်ခတ်ပုတ်ခတ် လုပ်လိုက်ပြီး... "ဟာ... အလားအလာ တန်ဖိုး ၂၅ကျော်တဲ့ တပည့်သုံးဆယ်?"
သူ့ရဲ့စိတ်ဓာတ်တွေဟာ အောက်ဆုံးအထိကို ပြုတ်ကျသွားခဲ့ပါပြီ။
သင်္ချာနည်းအရ တွက်ကြည့်လိုက်ရင်... သူ့ရဲ့ တပည့်လေးယောက်အနက်... ရှောင်ပုတန်လေးဟာ အရိုးအရင်းမြစ် ၁၀.. သဘောပေါက် နားလည်နိုင်စွမ်း ၈.. စိတ်စွမ်းအား ၈.. ကောင်းချီးမင်္ဂလာ ၈ ရှိပြီး... စုစုပေါင်းတန်ဖိုးက ၃၄ ရှိတာပါ။
ရှောင်ယန်က အရိုးအရင်းမြစ် ၈.. သဘောပေါက် နားလည်နိုင်စွမ်း ၉.. စိတ်စွမ်းအား ၉.. ကောင်းချီးမင်္ဂလာ ၈ ရှိပြီး... စုစုပေါင်းတန်ဖိုးက ၃၄...
ဇူရီက အရိုးအရင်းမြစ် ၇.. သဘောပေါက် နားလည်နိုင်စွမ်း ၉.. စိတ်စွမ်းအား ၈.. ကောင်းချီးမင်္ဂလာ ၁၀ ရှိပြီး... စုစုပေါင်းတန်ဖိုးက ၃၄...
ဝမ်လင်းက အရိုးအရင်းမြစ် ၅.. သဘောပေါက် နားလည်နိုင်စွမ်း ၁၀.. စိတ်စွမ်းအား ၁၀.. ကောင်းချီးမင်္ဂလာ ၈ ရှိပြီး... စုစုပေါင်းတန်ဖိုးက ၃၃...
အရင်က လင်းဖုန်းဟာ... စနစ်ကြီးက သူ့ရဲ့ လက်ရင်းတပည့်တွေကို ရွေးချယ်ဖို့အတွက် ဘယ်လို အချက်အလက်တွေကို အသုံးပြုသလည်း ဆိုတာကို... အမြဲတမ်းပဲ သိဖို့ ကြိုးစားနေခဲ့တာပါ။
တကယ်လို့များ... အနည်းဆုံး အချက်အလက် တစ်ခုက အမှတ်ပြည့် ရရမယ် ဆိုရင်တော့ ရှောင်ယန်က စာမေးပွဲအောင်မှာ မဟုတ်ပါဘူး။
တကယ်လို့များ အချက်အလက် တစ်ခုစီမှာလည်း အနည်းဆုံးတန်ဖိုး ရှိမယ် ဆိုရင်လည်း... ဝမ်လင်းက စာမေးပွဲအောင်မှာ မဟုတ်ဘူးလေ။
လင်းဖုန်းက အချက်အလက် လေးမျိုးစလုံးရဲ့ စုစုပေါင်း ရလဒ်ဟာ... အနည်းဆုံး တန်ဖိုးတစ်ခုကို ကျော်ရမယ်ထင်တယ်လို့ တွေးတောနေခဲ့တာပါ။
အခုအဖြစ်ကို ကြည့်ရမယ် ဆိုရင်တော့... ဒီအနည်းဆုံး တန်ဖိုးက ၃၀ဖြစ်မှာလေ။
လက်ရင်းတပည့်တွေအတွက် စနစ်ကြီးရဲ့ သတ်မှတ်ချက်ဟာ အလားအလာတန်ဖိုး ၃၀နဲ့ အထက် ရှိရမှာဖြစ်ပြီး... အခုမစ်ရှင်က သတ်မှတ်ထားတဲ့ အလားအလာတန်ဖိုး ၂၅နဲ့ အထက်ဟာ... ထူးချွန်တဲ့ အတွင်းစည်းတပည့်တွေအတွက် သတ်မှတ်ထားတာပဲ ဖြစ်မှာပါ။
နောက်ပိုင်းမှာ... အဆင့်သတ်မှတ်ချက်တွေကို နောက်တစ်ဆင့် ထပ်နိမ့်လိုက်ရင်တော့... အပြင်စည်း တပည့်တွေကို လက်ခံရမှာ ဖြစ်နိုင်ပါတယ်။
လင်းဖုန်းရဲ့ မျက်နှာဟာ ရှုံ့မဲ့သွားခဲ့ပါပြီ။ လူအယောက် သုံးဆယ်ဟာ ကြည့်ရတာ မများဘူးလို့ ထင်နေရပေမယ့်... အလားအလာတန်ဖိုး ၂၅ ဆိုတာက ဒီလောက်လွယ်လွယ်နဲ့ ရမှာ မဟုတ်ပါဘူး။ အချက်အလက် တစ်ခုစီရဲ့ ပျှမ်းမျှတန်ဖိုးဟာ အနည်းဆုံး ၆ရှိရမှာဖြစ်ပြီး... ဒီသတ်မှတ်ချက်ဟာ ဟင်းလင်းပြင် ဘုရားကျောင်းရဲ့ စံနှုန်းထက်တော့ အနည်းငယ် နည်းတယ်လို့ ထင်နေရပါတယ်။
ဒါပေမဲ့လည်း စူတောင်ဓားဂိုဏ်းနဲ့ အရင်က မဟာမိုးကြိုး ကျောင်းတော်ကြီး အနေနဲ့ ဆိုရင်တော့... ဒါဟာ အတွင်းစည်းတပည့်.. ဒါမှမဟုတ် ဗဟိုတပည့်တွေရဲ့ စံနှုန်းနဲ့ ကိုက်ညီနေတာပါ။
နောက်ထပ်တစ်ဆင့်နိမ့်တဲ့... အလင်းဓားမြန်ဂိုဏ်းတို့.. မီးလျှံဓားဂိုဏ်းတို့ ဆိုရင်တော့... ဒီလိုမျိုး အလားအလာတန်ဖိုး ၂၅ကျော်တဲ့သူတွေကို အသေရရ.. အရှင်ရရ လိုချင်နေမှာလေ။
ဒီလိုမျိုး တပည့်မျိုးကို... တစ်ခါတည်းနဲ့ အယောက်သုံးဆယ် ရှာရမယ်? ဒါဆိုရင်တော့ တကယ်ပဲ လွယ်ကူတဲ့ ကိစ္စမျိုး မဟုတ်ပါဘူး။
အချိန်ကန့်သတ်ချက်ကို ဆယ်နှစ်အထိ တိုးမြင့်ထားပေးပေမယ့်... လင်းဖုန်းဟာ စနစ်ကြီးက နောက်ဆုံးတော့ ချီးထုတ်ကျတဲ့ သဘာဝကို ပြန်ထုတ်ပြ လာခဲ့ပြီလို့ ခံစားနေခဲ့ရပါတယ်။
"တစ်ယောက်ချင်းတစ်ယောက် လိုက်ရှာနေရင်... ဘယ်လောက်အထိတောင် ရှာရမှာလည်း?" လင်းဖုန်းဟာ ခပ်မြန်မြန်ပဲ စဉ်းစားခန်း ဝင်လိုက်ပါတယ်... "အင်း... ကြိုးစားပြီးမှ ငါ့ရဲ့ ကျင့်ကြံမှု အဆင့်တွေကို မြင့်အောင်လုပ်ရမယ်... ပြီးတော့မှ နာမည်ကြီးအောင် ကြိုးစားပြီးမှ အရည်အချင်း ရှိတဲ့သူတွေကို ဆွဲဆောင်ရမယ်... ဒါမှပဲ ရမယ်ကွ!"
ဒီအထိ စဉ်းစားလိုက်ပြီးတော့... လင်းဖုန်းဟာ အချိန်တစ်မိနစ်မှ ဖြုန်းမနေတော့ပဲ... ချက်ချင်းပဲ မဟူရာကောင်းကင် ရတနာသစ်ပင်ရဲ့ သီးသန့်ဒိုင်မန်းရှင်းထဲမှာ... စကြဝဠာ အလင်းတန်း နွယ်ပင်သစ်မြစ်ကို ချက်ချင်းပဲ စိုက်လိုက်ပါတော့တယ်။
သေးသွယ်လှတဲ့ နွယ်ပင်လေးဟာ... ဒီဒိုင်မန်းရှင်းရဲ့ အထဲက မဟူရာကောင်းကင် ရတနာသစ်ပင် အသေးစားလေးနဲ့ တွယ်ကပ်သွားခဲ့ပြီး... ထိတွေ့လိုက်တာနဲ့ တပြိုင်နက် အမြစ်တွယ်သွားခဲ့ပြီး... သစ်ပင်ပင်စည် အပေါ်မှာ ရစ်ပတ်သွားခဲ့ပါပြီ။
နဂိုက လက်မအနည်းငယ်သာ ရှိနေတဲ့ နွယ်ပင်လေးဟာ... လျှင်မြန်စွာနဲ့ပဲ ကြီးထွားလာခဲ့ပြီး... ဒီမဟူရာကောင်းကင် ရတနာသစ်ပင်ဆီကနေ အာဟာရတွေကို စုပ်ယူနေခဲ့ကာ... မျက်စိတစ်မှိတ်လေး အတွင်းမှာပဲ... ဆယ်မီတာကျော်လောက် ကြီးထွားလာခဲ့ပြီလေ။
စကြာဝဠာ အလင်းတန်း နွယ်ပင်ဟာ သူ့ဆီကနေ အာဟာရတွေကို စုပ်ယူနေခဲ့တာကို... မဟူရာကောင်းကင် ရတနာသစ်ပင်ကလည်း မတွန့်တိုနေခဲ့ပဲ... ဝမ်းသာအားရနဲ့ ထောက်ပံ့နေခဲ့တာပါ။
စွမ်းအားနှစ်မျိုးဖြစ်တဲ့... အချိန်ကာလနဲ့ လေဟာနယ်တို့ဟာ... တစ်ခုနဲ့တစ်ခု လိုက်လျောညီထွေရှိစွာနဲ့ ပြည့်စုံစွာ ပေါင်းဖက်သွားကြပါတော့တယ်။
ဒီအချိန်ကစပြီး... ဒီကမ္ဘာငယ်လေးကို ကောင်းကင်စကြာဝဠာ အလင်းတန်းကမ္ဘာလို့ နာမည်ပေးလိုက်ပါပြီ။
တစ်ခုရှိတာက... ဧရာမ မဟူရာကောင်းကင် ရတနာသစ်ပင်နဲ့စာရင်... စကြာဝဠာ အလင်းတန်း နွယ်ပင်ဟာ အပင်ပေါက်လေး လောက်သာ ရှိနေခဲ့တာပါ။
စကြာဝဠာ အလင်းတန်း နွယ်ပင်လေးဟာ ပိုပြီးမှ ရှင်သန်လာတာနဲ့အမျှ... လင်းဖုန်းဟာ သူနဲ့ မဟူရာကောင်းကင် ရတနာသစ်ပင်.. ယုကျင်းတောင်နဲ့ ကောင်းကင်ကို လှည့်ပတ်နေသော ခရမ်းရောင် တိမ်တိုက်တို့ရဲ့ ဆက်သွယ်မှုတွေဟာ ပိုပိုပြီးမှ နီးကပ်လာခဲ့တယ်လို့ ခံစားမိနေခဲ့တယ်လေ။
သူတို့လေးခုသားဟာ... ယုကျင်းတောင်မှာ ကမ္ဘာလေး တစ်ခုကို ဖွဲ့စည်းခဲ့ပြီး... တဖြေးဖြေးနဲ့ ပိုပိုပြီးမှ သန်မာပြီး တည်ငြိမ်လာခဲ့ပါပြီ။
ဒီထက်ပိုပြီး ပြည့်စုံချင်ရင်တော့... လင်းဖုန်းဟာ ပထမဦးဆုံး ရွှေရောင်ဗဟိုချက် အဆင့်ကို ရောက်ရမှာလေ။
"ကဲ... အချိန်မြန်ဆန်မှု မြင့်တင်စမ်း... အဆ၁၀၀!" လင်းဖုန်းဟာ ခဏလောက် စဉ်းစားလိုက်ပြီး... စကြာဝဠာ အလင်းတန်း နွယ်ပင်ကို အမိန့်ပေးလိုက်ပါပြီ။
ဒီကောင်းကင်စကြာဝဠာ အလင်းတန်းကမ္ဘာထဲမှာ... လေဟာနယ်-အချိန်ကာလ ပေါင်းစပ်ဖွဲ့စည်းမှုတွေဟာ အနည်းငယ် ကမောက်ကမ ဖြစ်သွားခဲ့ပြီး... ခဏကြာတော့ အရာအားလုံးဟာ ပုံမှန်အတိုင်း အေးချမ်းသွားခဲ့ပါတော့တယ်။
"ဟင်း... နှမြောစရာ ကောင်းတာက... အခုက ဒီစကြာဝဠာ အလင်းတန်း နွယ်ပင်လေးက မရင့်ကျက်သေးတော့... ဆရာဖြစ်တဲ့ ငါကပဲ... ဒီအချိန်မြန်ဆန်မှုကို ခံစားနိုင်သေးတာပဲ..." အချိန်အနည်းငယ်လောက် လေ့လာအကဲခတ်လိုက်ပြီး... လင်းဖုန်းဟာ လက်မှိုင်ချလိုက်ပါတယ်... "နို့မဟုတ်လို့ ရှိရင်တော့... ငါက ရှောင်ပုတန်လေးတို့ တတွေကို ခေါ်လိုက်ပြီး အတူတူ ကျင့်ကြံမှုတွေကို ပြုလုပ်လိုက်မယ် ဆိုရင်တော့... အချိန်တွေ အများကြီး သက်သာသွားမှာပဲ!"
"အင်း... အခုဆိုရင်တော့... ဒီစကြာဝဠာ အလင်းတန်း နွယ်ပင်လေး ပိုပြီးရင့်ကျက်လာအောင် အချိန်နည်းနည်းလေး စောင့်လိုက်ပြီးရင်တော့... သူတို့ကိုပါ ခေါ်နိုင်မှာပဲ..."
လင်းဖုန်းဟာ ဒီမဟူရာကောင်းကင် ရတနာသစ်ပင်ရဲ့ အပေါ်က ပုလ္လင်ပေါ်မှာ ထိုင်လိုက်ပြီး... ကျင့်ကြံမှူတွေကို စတင်လိုက်ပါပြီ။
စနစ်ကြီးရဲ့ မစ်ရှင်အချိန်ဟာ လင်းဖုန်းရဲ့ ကိုယ်ပိုင်အချိန်တွေရဲ့ အပေါ်မှာ မူတည်တာဖြစ်ပြီး... သူဟာ ကောင်းကင်စကြာဝဠာ အလင်းတန်းကမ္ဘာထဲမှာ ရှိတာဖြစ်စေ... အပြင်ကမ္ဘာမှာ ရှိတာဖြစ်စေ... ဆယ်နှစ်က ဆယ်နှစ်ပါပဲ။
ဒါပေမယ့်လည်း လင်းဖုန်းဟာ လုံးဝကို အချိန်မဆွဲခဲ့ပဲ စတင်ပြီးတော့ လေ့ကျင့်လိုက်ပါပြီ... ဘာဖြစ်လို့လည်းဆိုတော့ သူက... ကောင်းစွာ အမြှုပ်ထအောင် လုပ်ထားတဲ့ မုတ်ဆိတ်ဟာ တစ်ဝက်ရိတ်ပြီးသားဖြစ်တယ် ဆိုတဲ့ အဆိုကို ယုံကြည်လို့ပဲ ဖြစ်ပါတယ်။
ပြီးတော့... သူဟာ သူ့ရဲ့ ကျင့်ကြံမှု အဆင့်ကို ယုကျင်းတောင်ရဲ့ ဒိုင်မန်းရှင်းကို ထိန်းချုပ်နိုင်ဖို့... လုံလောက်အောင် မြင့်တင်နိုင်မှု မရှိနိုင်ဘူး ဆိုခဲ့ရင်... ဒီယုကျင်းတောင်ဟာ ခွန်းလွန်တောင်ရဲ့ အပေါ်မှာ ဘွားဘွားကြီး ပေါ်နေခဲ့မှာဖြစ်ပြီး... သွားရည်ကျတဲ့ လူတွေရဲ့ နှောင့်ယှက်ခြင်းကို ခံရမှာပဲ ဖြစ်တာပါ။
တံခါးပိတ်ပြီး မကျင့်ကြံခင်... လင်းဖုန်းဟာ ကြိုတင်ပြီးမှ ပြင်ဆင်မှုတွေကို ပြုလုပ်ထားခဲ့ပါတယ်။ ပထမဦးစွာ သူဟာ ယင်-ယန် ဖန်ဆင်းခြင်းနဲ့ ယိုယွင်းခြင်း ဝင်္ကပါကို... တောင်ထိပ်ပေါ်မှာ ခင်းကျင်းထားခဲ့တာပါ... ကောင်းကင်ကို လှည့်ပတ်နေသော ခရမ်းရောင် တိမ်တိုက်တွေ မရှိသေးခင်မှာ... သူဟာ အနည်းဆုံးတော့ အကာအကွယ် တစ်ချို့ကို ပေးနိုင်တယ်လေ။
တစ်ချိန်တည်းမှာပဲ သူဟာ... သူ့ရဲ့ တပည့်လေးယောက်ကို ယုကျင်းတောင်ပေါ်မှာ နေပြီး ကျင့်ကြံမှုတွေ ကြိုးစားပြုလုပ်ကာ... တောင်ပေါ်ကနေ မဆင်းဖို့ မှာကြားထားခဲ့ပါတယ်။ မဟူရာကောင်းကင် ရတနာသစ်ပင် အပေါ်က နေရာကလွဲလို့... ကျန်တဲ့နေရာတွေ အားလုံးကိုတော့ လွတ်လွတ်လပ်လပ် သွားလာနိုင်တာပါ။
ယုကျင်းတောင်ပေါ်မှာက စိတ်ဝိညာဉ် စွမ်းအင်တွေက အမတန်ကိုမှပဲ ပေါကြွယ်ဝတာဆိုတော့... အချိန်လမ်းစဉ်ကို လေ့လာနိုင်တဲ့အပြင်... ရှောင်ယန်တို့တတွေဟာ ကျင့်ကြံမှုတွေကို အာရုံစိုက်ပြီး ပြုလုပ်နေခဲ့ကြပါတယ်။
မျက်စိတစ်မှိတ်လေး အတွင်းမှာပဲ... ပြင်ပကမ္ဘာမှာ အချိန်တစ်လဟာ ကုန်လွန်သွားခဲ့ပါပြီ။
ဒီအချိန်မှာပဲ... အဝေးက မိုးကောင်းကင်ထဲမှာ အတိုင်းမသိတဲ့ မီးတောက်မီးလျှံတွေဟာ တောက်လောင်လာခဲ့ပြီး... မျက်စိတဆုံး မြင်နေရတဲ့ မီးပင်လယ်ကြီး အဖြစ်ကို ပြောင်းသွားခဲ့ကာ... မိုးကုတ်စက်ဝိုင်းက တိမ်တိုက်တွေကို နီရဲတောက်ပ စေခဲ့ပါတယ်။
ဒီမီးပင်လယ်ကြီးရဲ့ အထဲကနေပြီး... အလွန်တရာ ကြီးမားလှတဲ့ မီးလျှံကျီးကန်း တစ်ကောင်ဟာ ပေါ်ထွက်လာခဲ့ပါတော့တယ်။
Novel : History's Number 1 Founder
Author : August Eagle
Translator : Master Shifu