#دُجى_في_جوف_البغي
#بقـلم_الراويه
#الفصل_الثالث_والعشرون
بسـم الله ♥
صلوا على النـبي 🧡
.
دجى
وگـف السيارة گدام العنوان الي انطينه اله
التفت عليه و گـال
- متأكده هذا العنوان
هـزيت راسـي بدون ما انطق كلمة و نظراتي تجـول على واجهة الصالـون النسائـي
تحامـلت على وجعـي و فتحت الباب
حاولت انـزل من السيارة بـدون مساعدته بس چانت المهمه صعـبة
لذلك استسلمت للامر الواقـع و خليته يسـند ايدي و نـزلت
وگفت و اني انحنـي بـوجع و خليت ايـدي على مكان العـملية
صعدت على الرصيف و انـي اتقدم ناحية الصالون
و بقـى ألـياس واگف يراقبنـي
فتحت باب الصالـون الزجاجي المطلي بالـون الابيض و حاجـب الداخـل عن الخارج
چـانت گـاعدات زبونات اثنيـن گدام المرايـات
و اربع بنات ماخذت دور للانـتظار و وحدة من الي گدام المـرايه واگـفه يمها بنية تسويـلها شعـرها
كلهن باوعلي و الريبه دخلت لگلوبهن مـن هيئتـي الغربية
- داليا صاحبة الصالون موجـوده؟؟
جاوبتني الي دتسوي بشعـر الزبونه
- فاتت تجيب شغلة من البيت هسا تجي
حچتها و هي تأشـر على الباب الثاني الي مفتـوح على الحديقـة
- عفواً بس منو انتِ؟؟
سألتني و هي تباوع لشكلي
و قبل لا اگوللها هـويتي گـلت برجاء
- ممكن اگعد عندي عملية
حچيتها و اني اضغط على العمليـة و ملامحـي بين عليها الـوجع
خطيـة من حست بـوضعـي سنـدتني و گامت وحدة من البنات كذلك و خلنـي اگعـد على الكـرسي
رجـعت انطتنـي گلاص مي و اني تنهدت متشكـرتها
- هسا اناديها
حچتـها و طلعت بخطوات سريعـة
- شبيچ عملية شنو مسوية
- كلـى
- يا عيني الله يساعـدچ
بس شلون تـطلعين بهاي الـحالة
رجعـت تسألنـي
و اني همست بدون لا اباوعلهـا
و عينـي على البنية الي چانت تسويلها شعرها شكلها عروس
- مجبـورة اطـلع
- منو هاي البنيـة
دخـلت داليـا و هي تتسأل
صاحبة الصالـون الي اشتغلت عدها سابقاً..و الي تركت الشغل يمها بدون ما انطيـها اي خبر
وگعت عينها عليـه و اني نهضت بصعوبة
رفعت حاجبها و هي تگول
- تفضلي عيـني محتاجه شي؟
- انتِ ما عرفتيني
- لا والله معرفتچ بـلا صغراً بيچ
حچتها و هي تتقدم باتجـاهي
قبل لا اغمـض عيوني بألم و گـلت بنبرة وجـع
- اني دجـى اذا تتـذكريني
فتحت عيوني و باوعتلـها
بقت لحـظات تباوعلي قبل لا تـشهگ و هي تگول
- دجـى ما غيرچ تذكرتچ عيني، ولچ ويـن اختفيتي فجـاة گلت بس لا بيها شي
ابتسمت بـخمول و اني اهمس بداخلي و اخـيراً احد يقلق بشأني
- زين اگدر ارتاح شوية عندي عملـية
- اعذرينـي ما انتبهت لوضـعچ
حچتها و هي تمد ايدها تساعدنـي
طلعتني من الـصالون و هي تنطي تعليماتـها للعاملة
و گالت اجي اكمـل العروس انتظرينـي
فوتـتني للبيت و چان بسيط كلش
اتذكر من چنت اشتغل وياها قبل دخلت اله لو مرتـين
صالـة و 3 غرف نـوم و مطبخ
دخـلتني للصالة و چـانت كـحال البيت بسيطه
بيها ديوان عـربي و تلفزيـون
خلت مخـده و خلتنـي اتمدد، غمضت عيـوني من حسيت بـ احد غرز الجـرح تنفك
و اني اردد يا الله
- ولچ شصايـر بيچ
الوجه ذبلان و تعبانه
بللت شفتي و گـلت بهدوء
- روحي لشغلچ ما اريد اعطلچ
و بس تكمليـن نحچـي
- زيـن انتِ نامي و ارتاحي
جـوعانه محتاجه شي
هـزيت راسـي بـلا گامت و ورا شوية جابتـلي غطا و خلته بلطـف عليه
طفت ضو الصالـة و طلعت
و هنـا حسيت النوم بدا يداهمـني
ردت بس انـام و انسى كل الي صـار، خليني اتنعم بهاي الراحة الي يمكن ما ادوم طـويلاً اذا عرفت داليـا حقيقتي
گعدت على صوت يمي
فتحت عيوني و شفتها لـ داليا شغـلت الضو و هي تخلي كـيس ادوية يم راسـي
ابتسمت و هي تگول
- كملت شغلي من زمان بس ما ردت ازعج نومتـچ
سندت نفسي بأيدي ردت اگعد و هي ساعدتنـي
ارتچيت على الحايط و باوعت لكيس الادوية و گـلت الها باحراج
- ليش تعبتي نـفسچ
- بصراحة مو اني الي جـبت هذا العلاج
ورا ما فتي جوا ورا ساعة هيچ اجا رجال و سألني اذا بعدچ هنا و گال هاي ادوية الها و كاتب بورقة شوكت تنأخـذ
ها و گـال گوليلها اسمي ألياس عبد القادر و اشتغل بمستشفى أبن سينـا اي شي تحتاجه اني موجود
ابتسمت و اني ادنگ راسـي
ألـياس يحاول يكفر عن ذنبه لأن چان اله يد بعمـليتي
ما گدرت ارفض الادوية لأن محتاجـه الهن
- جوعانه مو؟
اگوم اسوي عشا و وياه تحچيلي كلشي تمام
- تمـام
حچـيتها و هي گامت من مكانها
باوعـت الساعة بالـسته
فركت صدغـي و اني افكر بالمدة الي نمت بيـها، هواي نمـت عبالك صارلي سنين مو نايمه
ورا ساعة دخـلت داليا و هي شايلة صينية عشـا
چانت وجبة نـواشف و كاسه بيها مرگـة صفرة لحـم
- ليـش كلفتي نفسچ
- مسويت شـي هاي عندي بالثلاجة من البارحة
ضحكت و اني اخذ منها الخـبزة
و بـ هدوء گلت
- بعدچ مثل ما چنتِ متحبين المجاملة
- شسوي ابو طبع ميغير طبـعه
حچتها و هي تاخذ الحمه و تفتـفتها بخبزة و تخـلي عليها خـضراوات و انطتها الي
- اكلي و اخـذي علاجچ
اكلت لگمه و هزيت راسي بأي
فجـاة تذكرت امر و گلت و اني انزل ايدي
- لعد الحجـيه وين
- امي توفت قبل 5 اشهر
حچتها و اني شهگت و گبل همست باعتذار
- اسفة
الله يرحمها
- و يرحم والديـچ
باوعتلها و حسيت دمعتها تريد تنزل لكن تجاهلتها و هي تكمل اكلـها
انقهرت على الحجـيه الي رغم مرة لو مرتين شايفتها
چـانت ما تمـشي رجليها مشلولـه
كملت العشا و حسـب التعليمات الي كاتبهـن أليـاس
اخذت علاجي
انطتنـي گلاص الچاي و تربعـت گدامي و هي تگول
- و هسا احچـيلي كـلشي
- احچـيلچ و قرارچ بيدچ تخليني هنا لو تطرديني مثل البقية
قطبت حواجـبها و هزت راسها باستفـهام
و انـي بديت اسرد الها كلشي
بدون ما اضيف لو انـقص شي، و هي چانت تسمعنـي بدون ما تقاطعـني
كلشي حچـيت الها بالتفصيل الا ان وصلت لباب صالونهـا
لكن ما حچيتلها عن هوية ألياس گلتلها شافني بالطريق و ساعدني
ما ردت ادخله بمشكلة و هو ساعدني
- و هاي قصتـي
اذا تريدين تطرديني صـدگيني محد يلومچ
- مو اني بيت حجي قاسـم حتى اطـردچ
حچتها بانفعال و كملت بنبرة تجوبها العصبية
- يمه احترگ گـلبي
حسبي الله و نعم الوكيل بكل شخص تسبب بأذيتچ
و بالاخص امـچ العار الي ان شاء الله تحـترگ بنار جهنم هي و امـثالها
و الا خطيبچ سبـع الـبرمبه ما گال هاي الي طايح حظها وين تروح وين تجـي بأي مكان نامت و اكلـت
هيچ اهم شي عنده سمعة القصـر الملكي
مسحت دمعتي و اني اگـول بـدفاع عنهم لأن اعرف هالشي من حقهم ما يتقبلون انـسانه مثلي
- بس حـقه داليـا
تخيلي ورا كل هاي المدة اطلع اكذب عليه و اني عكس تصوراته
- بس هالـشي مو بيدچ افتهمي
لأن عرفتـي اذا حچيتي محد بيهم يستقبلـچ، المفروض يفتهمون قصتـچ و بعدين يتخذون موقف مو هيچ طرد و حتى محد حاول يعرف عنچ شي
عبالك ما صدگوا يلگون زلة عليـچ
سكتت و هي تضرب على رجلها و بحرگة گلب كملـت
- من حچـيتي عن الحجي گلت يمه
هذا اكيد انسان شريف ابن شريف و يخاف الله، بس لا والله طلـع كل دينـه و صلاته بس هيچ شكليات
- لا تگولين هيچ
والله ماكو احد بطـيبة گلبه، هواي علمني و هواي اهتم بيه
- و هواي ذلچ من عرف سالفتچ و اول واحد طـردچ
مو يحچي بالدين و قال الله و قال الرسول، ما قرا بالقران و لا تزر وازره وزر اخرى، ما فهم انتِ ما الچ ذنب بكل الي صار و هذا قدرچ خلاچ بنت انسانه جشعه و انانيـه
يابـه لا يمسح على راسچ و يگلچ يلا الفات مات امشي نكمل تحظير عرسچ انـتِ و السبع مالـي
اگعد احچي وياها افهم منها صير الچبير سودة بوجـهي و گول لـ عائلته يابه على كيفكم
و خلي يسطـر الهم كم ايه و حديث من الي چان يعلمه الچ
ما حچـيت شي و اني ادنگ راسـي
اريـد أيدها بالبرأي بس ما اگـدر، اعرف كلامها بي نوع من الصحه بس ما بيدي اتقبلـه
معزته بگـلبي چبيرة تخلـيني اتقبل كلشي منه
- و هاي جودي مدري مودي مو على اساس خيتچ و صـديقتچ
ما گالت هاي نفس عمري خلي اتفهمها
- ادورين عليهم الغلط داليا
همـا ناس هاي طبيعتهـم مـا يتقبلون اي احـد مو زين منهم استقبلوني اشهـر و عمرهم ما بينـوا رفضهم لوجودي بينهم
- حتلو فعلتهم بحقچ كلش محلوة
- اني ما امحي كل افـضالهم بسبب موقف واحد
كتفت ايديها و تنهدت
و اني بقيت ملتزمـة الصمت، حركت اصبعي على الغطـا و گلت ورا لحظـات
- اذا ما تگدرين تستقبلـيني اني متـفهمتچ
- و گتلـچ اني مو بيت حجي قاسم حتى اطـردچ
صح ضجت لأن اشتغلتي وياي اشهر و فجاة اخـتفيتي و انتِ ظامه عليه حقيقتچ
زفرت و هي تكـمل بعتب
- لو حـاچيه چان والله نفس موقفي هسا اتقبلچ و اگلچ ابقي وياي
تكملين شغل بالصالـون و اوفر الچ مسكن ويايه اني و الحجـيه
چان ما دخلتِ بكل هاي المعمعه
ما جـاوبتها و للحظات فكرت يا ريت يرجع الزمن و بقيـت اشتغل وياها چـان ما صار كل هذا
رفعت راسـي الها لمن طبطبـت على ضهر ايدي و هي تگـول
- انتِ متعرفين اهـلچ و لا تعرفين احد قريب الچ
وحيدة بهالدنـيا، و اني ابويه و امي و اخواني اثنين اخذهم الله لمكان احسـن
و صفيـت وحدي رغم وجود عمام بس شنو نگـول بس بالاسم
و خوال مو عاجبهم وضعـي
فـ اني و انتِ اثنينه وحيدات و نفس المعاناة، ابقي هنـا وياي و اشتغلي مثل قبل بالصالـون
و أسسي نفسچ و لا تضعفين و هذاك البيت و الي بي انـسيهم و لا كانهم مروت بالچ
اعرف صعب و انتِ تحسيهم اهلچ و واحد منهم خطيبچ و حبيبچ
بس يا دجى الي ما يريدنا كحل بعـينه ما نريده حذاء برجـلنا
ضحكت و اني اگول معقبه على اخر كلامها
- منين جايبه هالمثـل
- من الاشكال الي اشوفها بالصالـون غير
بس هسا ما گلـتلي شنـو رأيچ
- و اذا بيـوم غيرتي رأيچ؟ و شفتيني حمـل
سألتها بتوجل و هي ردت
- لا حمل و لا جمـل
انتِ هنا راح تعيشين من تعب جبينچ، تتـشافين بخير و سلامة و تبدين تشتغلـين وياي بالصالـون يعني لا اصرف عليچ و لا تـصرفين عليـه
و حتى شغل البيت نتقـاسمه..بس من هسا اني اطبخ لأن بصراحة ما احب اكل من ايد احد و غسـل المواعين عليچ لأن تدرين اني ام صالون لازم اكون انيقة و مرتبه
ختمت كلامها بضحكه خلتني رغمًا عني ابتسم رغم دمعتي على خـدي الي مسحتها بسرعـة
و هي حچت بـحنيه تهون عليه
- ربچ من سابع سماه ما ينـساچ
و ما خلاچ بهذا الطريق الصعب الا يختبرچ و انتِ گد هذا الاختبار
هسا اريدچ توعـديني تكونين اقوى من هيچ و دموعچ تبطل تنزل و ما تظمين عليه شي
لأن اني مو اي احد..اتغاضـى و اعبر بكيفي، تبقين هنا لكـن بشروط
ما احب الطلعات و الطبات..ابعد مكان اروحله هو شغلي و السوگ
ساده بابي و مرتاحه و مطنشـه الكل لأن اني اعرف نفسي شنو و الاهم ربي يعرفنـي و انتِ كذلـك تسوين هيچ
شغلي اهم شي عـندي لازم يكون هو من اولوياتـي
تسخيت و ما اگدر و تعبانه ما احبهن
زين ؟
هـزيت راسي بأي و اني اگـول مطمنتها
- لا تخـافين راح اكون ملتزمـه بالشغل و بكلشـي
ابتسمت و هي تگـلي
- عفية دجـى لو نگـول نور
ضحكت و انـي ارد عليها
- بكيفچ الي تحبينه
.
جودي
دخلت للصالة و لگـيت والدي گاعد وحدة
لگـيتها فرصة ما تتعوض احچي وياه بيها بما انـو شكله هادئ
گعدت بصفه و هو باوعلي و رجع باوع للتلفزيون الي يعرض فيلم وثائقـي
- يابه
- هـا بنيتي
حچاها و انـي لملمت كلماتي و شابكت اصابـعي و بتردد گـلت
- يابه اريد احچي وياك بموضوع
- اي؟
- الموضوع يخص دجى
اعرف شگد يأذيك بس لازم نحچـي، يابه انـت ما تشوف انو ظلمناها لو بس اني احس بهالـشعور
التفتت عليه بقوة و اني كملت بدون ما اخلي عيني بعينه
- عاشت ويانا اشهر و كلنا تعودنا عليها
على سوالفها و ضحكاتها..على الفراغ الي مـلته بوجودها بينا
و يمكن انت اكثر واحد تسـتفقدها مو يابه؟
طول بصمته لدرجة حسيت انو ما سمعني
لكن قطع هذا الصمـت بقوله
- كلش استفقدتها، چان ما ان تشوفني گاعد وحدي تجي تشاركني الحديـث
تسألني و اجاوبها فرحان و اني اشوفها شلون متحمسه لـكلامي، چانت مثل الطفلة كلشي متعرف علمتها و خليتها توعى و تـصير بردودها احسن مني
- چنت شاهد على تغيـيرها و انت اكثر واحد عرفتها من بيـنا
بس يابه انت اول واحد طردتـها
حچيتها و وگعت دمعتـي
و كملت بغـصة و تأنيب ضميـر
- حتى ما حاولنا نعرف عنها شي وين راحت و شلون عايشه، يابه گالت ضربت ابنه للرجال الي اعتدى عليها
گمت افكر بس لا يلگاها..راح يأذيها يابه و سبب اذيتها راح نكون احنا لأن ما حميناها
باوعتله شفـت بعيونه نظرات الخـوف
ابتلعت ريگي و كملت و انـي الزم ايده
- يابه خلي نروح للبيت الي على اسـاس لبنت خالها
اني..انـي دگيت على الرقم الي بالجهاز مالها بأسم جوان بس يگلي الرقـم مغلق ما گدرت احصله
نروح للبنية و نسألها اكيد تعرف عنها شي
مسح على گصته و طلع صوته متردد
- و اذا ما لگيناها
- نسأل
يابه مو شرط ترجع ويانا على الاقل نتطمن على اخبارها، والله گلبي نار عليها و كلشي سيء دافـكر بي
- و اخوچ..غياث ننطي خبر
رفعت اكتافي و گلـت
- خليـنا نعرف هويته هاي البنية بلكي تگدر توصلنا لـ دجى
هز راسه بأي و همس
- ام شاء الله
- يابه الله يخليك خلي باچـر نروح
حتى ما نضـيع وقت اكثر
- تمام الصبح نروح
حچـاها بهدوء و اني ابتسمت
دنگت بست ايده و تشكرته..
و صعدت فوگ لغرفتي و على نهاية الدرج قابلنـي مجيد الي خلى ايده بجيب بنـطرونه و گال
- راح ادورين عليها
- اي
رديت عليه بجمود و هو كز على اسنانه و ضغط على ايدي و گـال
- تخبـلتي ادورين ورا هيچ نماذج
سحبت ايدي منه بقوة و گلت بعصبـية
- لا تتدخل مجيد و اي ادور وراهـا الا ان اعرف مكانها
هي ما الها اي ذنب بالي عاشتـه، مو هي الي اختارت حياتها
- و كذبها علينا و اخفاء حقيقـتها
قطبت حاجبي و همست بأسى
- لأن چانت تدري محد بينا يتحرك ضميره و يوگف وياها
كلنا وگفنا ضدها..بس الحمد لله ضميري و ضمير ابوية صحى يوماً الك و لـ غياث
- ضميري ما يصحى على الكـذاب و الي بعشر وجـوه
تخصرت و اني اگول بسخرية
- انت مو ناقص ضمير..لا والله ناقص غيرة تتحرك على مراة لا حول و لا قوة الها
و انت تعرف الي صارلـها و تعرف مجتمعنا و تعرف شنو الزلم الي بلا ذمه و لا ضمير شنو يسوون بالمستـضعفه الوحيدة
و تركته و اني احس بقرف من تفكيـره و نظرته لـ دجى من اول يوم اجت هنا ليوم طلعـتها
الصبح گعدت من وكـت و لگيت ابوية گاعد
غيرت ملابسي و نزلت من فوگ و اني اتجه للمطبخ
- يابه اني كمـلت نطلع
- اي بنتي يلا
امـي گالت و هي تتحسر
- ابوچ الليـل كله يحچي براسي و خلاني اراجع تصرفي
ان شاء الله نعرف عنها شي
- ادعي يمه ان شاء الله نلگاها
حچيتها و طلعت انـي و ابوية
و قبل لا نطلع من الباب الخارجي استوقفنا صوت مجيد
تنهدت و اني اهمس
- راح يبدي يعلـق و يعترض
- انتظروا اجي وياكم
التفتت اله مصدومه و هـو لبس حذاءه
و تقدم علينا
ابتسمت اله و هو گال لمن مشى بمحاذاتي و احنا متوجهين لسـيارة بابا برا
- كلمتچ ظلت بالي اني بلا غيرة
شكراً عليها لأن خلتني اصحى
احتضنت ايده و اني اگول
- هيچ اعرفك مجيد صاحب مواقـف
صعدنا بالسيارة و مجيد تولى القيـادة
و على حسب توجيهـات والدي وصلنا للمنطقة
نزلنا من السيارة و اتجهنا للبيت لأن ما تدخل للفرع السيارة
دگ مجيد الباب و مـاكو رد
بقينا نطرق و محد يـفتحه..اخر شي انفتح باب البيت الي بصفه
و طـلع رجال بمتقبل الاربعين
و هو يگول
- لو تبقون ادگون منا للصبح محد يفتح الكم
- لـيش حجي
حچاها مجيد و الرجال رد عليه
- اهل البيت طلعوا
بالليل قبل اسبوع اجوهم ناس و صارت هـوسة وراها جمعوا اغراضهم و شردوا حتى الايجار ما دفعوا لصاحبـه
- زين متعرف رقمهم او اي شي نگدر نتواصل بي وياهم
سأله ابوية و الاخر رد
- لا والله حجـي ما نعرفهم اصلاً ناس ما يحبون يختلطون
بس شكلهم مو راحه ابداً
تشكره مجيد و ابوية و رجعنا للسيارة خائبين الامال
ما ان صعدت بالمـقعد الخلفي گلت
- معقولـة دجى راحت وياهم
- الله اعلم
حچاها ابوية الي رجع التفتت عليه و گال
- الرقم ما گدرتلي تحصلينه؟
هزيت راسي بلا و مجيد سأل عن هوية الرقم و گلتله عنه
سكت شوية و رجع گال و احنا نطلع من المنطقة
- انطينا عندي صديق يشتغل بهاي السوالف اخلي يعرفلي صاحبـة
- ميخالف من نوصل للبيـت
حچيتها بتنهـيده و اني اسند ايدي على جام السـيارة و سؤال واحد يدور بعقلي
دجى ويـن رحتي
.
دجى
بعد يومين من وصلـولي لبيت داليا الي بالحقيقـة ما توقعت راح تستقبلني لمن تعرف حقيقـتي بس اجا كلشي منافي للتوقعات
يمكن بسبب تصرف بيت الحجـي صارت عندي ردة فعل و خوف انو محـد يتقبلـني بعد
لكن داليا اكدت انو تفكيري غلـط
ما اعرف شلون راح اگدر ارد الها الجمـيل
ساعدتني بتبديل الضماد رغم انو وحدة من الغرز انفتـحت و العملية توجعني كلش مع انـو اخذ العلاجات الي جابهن الي أليـاس لكن بدون فائدة
انطتني من ملابسها وخلتني اغير الگلابيه الي لابستـها
الصبح لگـتني گاعده و اني بالفراش
لمت شعرها و هي تگول بنعاس
- شوكت گعـدتي
- ما گدرت انام..عمليـتي كلش توجعني
حچيتها و نزلت ايـديها و گالت بعتب
- لـيش ما گلتيلي، زين اخـذتي من المسكنات الي كتبهن الچ
- اخذت 3 لحد هسا من الليل و ماكو اي مفعول الهن
حچيتـها و اني اكتم دمعتي و الزم مكان جرحي
هي بسرعة گالت ورا ثواني من الصمـت
- گومي نروح للمستشفى ما تبقين هيـچ
هذا ألياس مو گال اشتغل بأبن سينا نروح و نسأل عنه
- لا داليا ما اريد، اكو حـب اخذته شوية سكنها جيبيـلي منه لأن خلصت
- ياا امي انتِ كافي مسكنات و مهدئات راح تدمنين عليهن
و جرحچ لازم دكتور يشوفـه
حچتها و طلعت من الغرفة الي نمت بيها
ماكو دقايق معدودة و فاتت و هي لابسه عبايتها و حجابها
سندتني و اخذتني غسلتلي وجهي و لبستني حجاب و العباة تحت اعـتراضي و اصرارها
چنت خايفة ما اريد اروح
صـرت اخاف من شي اسمه دكتور او جراحه بسبب الي شـفته
و الخوف الاكبر چان متشكـل انو المح غياث لأن يشتغل بنفس المستشفى
اخذت تكـسي داليا و صعدنا الها
مسافة الطريق و الازدحامات خلت توتري يزادد و قلبي تزيد نبـضاته الى جانب تـقلص جرحي و وجعه
وصلنا للمستشفى و دخلنـا للطوارئ
و اول شي سوته داليا هو سألهم عن ألياس عبد القادر
اكثر من شخص يشتغل هناك سألته يلا عرفوا
و تبرع واحد و گال هسا انادي الكم
تمددت على السـدية و داليا حچت للممـرضة عن وضعي
و فكت الضماد و شافت الجـرح
- يا عيني وين چنتوا عنها..الجرح كلش مو نظـيف لازم يتعقم و خياطه من جديد
لو باقيين هاملينها هيچ حالتها تسوء بالزايـد
حچتها الممرضة بعدم رضـى و ازعاج
لحظات و فات ألياس الي بس شافني تنهد براحه وصل يمي و گـال
- سلامتچ شبيچ
ما رديت عليه و تكفلت داليا بالرد و هي تگول
- ما فادتها لا المسكنات و لا الادوية
و هسا الممرضة تگول الجرح مو نظيف و لازم خياطه
من جديد
و كملت بهمس
- ان شاء الله كلمن خلى ايده عليچ و سوالچ هالعملية يتعلگ من رمشه بجهنم
باوعـت لـ ألياس ابتلع ريقه و بتغيير للموضوع گال
- خليني اشوفه
رجع شال الضماد و هو يشوف الجرح
و اني سألته
- لازم خياطه
- لازم اكو غرز مفتوحه بسبب الحركه و لازم يتنظف
- زين شلون عينـي هسا شنو نسوي
سألته دالـيا و هو باطمئنان گال
- اني احل الموضوع هسا و اخيطه الها بس لا تخاف تمام؟
هسا شوية و ارجعلكم
راح و اني باوعـت لـ داليا بـ ألم و هي مسحت على راسي و گالت بحـنان
- لا تخافين اني وياچ
ربع ساعة و دخل ألياس و اثنين ممرضين وياه
و گـالي ننقلچ لصالة العمليات احسن
نظف الجرح و نخطية من جديـد
و فعلاً نقلني للصالة و اني كلش ما افقه بهاي الامور
و هو تكفل بكلشـي، ضربني بنج موضوعي و نظف الجرح هو و ممـرضة و اعاد الخياطة
و ضمده من جديد..و خلالي كانولـه كل هذا و اني ما سألتـه عن اي شي
طلعوني من الصالة على السـديه و اخذوني لغرفة لگيت بيها داليا
و ألياس اجا يطمن عليه گال فد ساعة ارتاحي و تطلعين
و بهاي الساعة غفيـت بيها و داليا يمـي گاعده
شكـلي طولت بالنومه و صحيت ورا ساعتين
و اجا أليـاس و وياه كرسي متحرك
گتله اگدر امشي بس هو اعترض گعدت عليه و دفعني و داليا وياه تمشي و هي تسأله عن مصاريف العلاج و هو گاللها كلشي كملت اني ما عليچ الا تاخذيها للبيـت
حاولت وياه لكن قـافل چـان
و اني ما اعترضت خلي هـو يدفع المصاريف مو هو اله يد بحالتي حتلو چان غصب عنه
بعدنا بالممـر نمشي متجهين للباب الخارجي و المكان فارغ
حطيت ايدي گبل على عجلات الكرسي و انـي اهمس برجاء
- غير الاتـجاه عفية لا تخليه يشوفني
هو ما حچه شي گبل استـدار و انطى ضهره لـ غياث الي چـنت خايفة من لمحه
صار وجهي بوجهه لولا لطف رب العالمين چان شافني
او يمكن لمحني بس ما تعرف عليه
- واحد مـن زلم ابو وائل
حچاها ألياس الي دنگ عليه و سألني
و داليا گالت بـ وجل
- منو شفتي
بللت شفتـي و گلت بتوتر
- خطيـبي
حـسيت بـ ألياس التفتت و گال بـ استغراب
- منو بيهم
- الدكتور
- ماكـو غير دكتور واحد واگف عند ممرضة
حچتـها داليـا
و فجاة توقـف ألياس و وقفني وياه التفتت ليـورا و رجع گال بعدم تصديـق
- لا تگـولين دكتور غياث خطيـبچ ؟؟
- اي
حچيـتها و كملت برجاء
- ما اريده يشوفنـي الله يخليـك
طلعني من غير باب
- زين ليـش
سألني بفضول و داليا الي تعرف كلشي گالت بـ غضب
- هسا مو وكـت اسأله خلي نطلـعها و بعدين تسألها
و فعلاً دخلنا لمـمر ثاني و طلعنا من المستشفـى
و اخذلنـا تكسي و رجعنا للبيت
اخذت من العلاج و تمددت بالفراش و داليا گالت اروح اكمل شغلي بالصالـون العاملة وحدها خطـية
بقيت متمدده و اني لازمه گلبي متذكرة وگفـته
شگد اله هيبه بين الناس ما ادري عيني شافتهم كلهم صغـار
وگعت دمعتي على خدي و سرعان ما مسحتها مذكرة نفسـي
دجى انتِ اقوى من هيچ، لازم تتأقلمين على الحياة بدونه من اليوم و رايح
و تتعايشيـن وي فكرة فراقة
.
السلام عليكم و رحمة الله و بركاته
شلونكم ان شاء الله الكل بخيـر
اتمنى البارت عجبكم
ارائكم و توقعاتكم
و هاا قبل لا احد يگول قصير
اليوم مو موعد النـشر لكن تلبيه لطلبكم نزلت 😭❤
والله اكثر من عشرين مسج على الانستا كلها اطالب ببارت حتلو قصير و ها انا ذا نزلت الكم بارت من 3500 كلمة بس حتى يصبركم 🫂😂
المهم اريد رائيكم بـ شخصية داليا 🤭
و بيت حجي قاسم و تصرفهم اليوم و بحثهم عن دجى
و بالاخير القفلة و يا ترى غياث شافها ل دجى 🤫
و بس والله
نلتقي على خير احبتي
و لهذاك الوقت استودعكم الله الذي لا تضيع ودائعه ❤