#قصة_فراقـ💔
.
.
.
.
الحلقة 34 🔖
.
.
.
.
عماد..ميار انتِ مرتي صح وام صغاري صح وحتقعدي طول عمرك هكي بس اني الحق نبي نتزوج وحدة تانية مشاءالله عليك علم وزين وكل شي فيك ولحد توا انتِ كل شي عندي بس اني نبي نتزوج😁 وماتناقشينيش
ميار زي من صب عليها اميا مصقعة معاد عرفت شن تقول من هدا اللي قدامها هدا عماد نفسه والا لا من هدا
عماد..الووو ميار خيرك
صاخت ميار عليه
عماد..ميار ميار نوضي ياربي شن درت اني ميار حبيبتي نوضي
جابلها عماد ريحة وبخهالها فاقت ميار لقت روحها في حضنه
ميار ناضت طول..وين بتسكنها!!!
عماد..وين يعني اهني بس اول الايام في فندق
ميار..واااو برااافو عليك مقرر زيادة
عماد..والفاتحة والدخلة الخميس
ميار شدت راسها..خلاص معاد تزيدني اطلع امشي دير اللي تبيه ومعاد توريني وجهك بكل😡
عماد..احترمي نفسك واعرفي شن تقولي هدا حوشي
ميار..حوش صغاري هدا وتحلم تجيبها اهني فاااهم وسيورك يا عماد تجيني وتقولي سامحيني💔✋
طلع عماد وهو متعفلق وميار انهارت بعده وقريب هبلت خبطت وكسرت
ميار..اااااه ياقلبي اااه😭😭😭💔💔حسبي الله ونعم الوكييل فيكم اهئ اهئ اهئ
قعمزت ميار تبكي جوها صغارها قعدو مقعمزين يبكو معاها لانة شافو امهم تبكي💔😭
بكت بكت ميار لعند مارقدت فوق السرير ورقدو معاها الصغار
خش عماد في الليل لقي الزهريات مكسرات والحوش هدوء خش للدار لقي ميار راقدة وصغاره جنبها قام الصغار حطهم في الدار وخش لقي ميار مش راقدة زين ساواها وغطاها وبدل ورقد
الكل عرف ان ميار راجلها بيتزوج عليها ومستغربين من ردة فعل ميار مش معدلة بكل ولا معبراته
ميسم..ادوي تكلمي
ميار..شن بنقول😒ااه شنو بنسحن كبدي بنسحن روحي ع خاطره قولي😢علاش علاااش يا ميسم علاش تزوج علاش شن درتله اني مش مقصرة معاه في شي😭😭مخلياته زي الملك في يوم وليلة وجه الشطان قلباته عليا الله يقلبها يارب حسبي الله ونعم الوكيل💔💔مش مصدقة عماد حبيبي راجلي تزوج عليا 😭😭
ميسم حضنتها وخلتها تبكي في حضنها لعند ما ارتاحت ورقدت
ميسم..حسبي الله ونعم الوكيل ..ايوا احمد
احمد..نجيك؟
ميسم..تخليني نبات؟
احمد..لا
ميسم..الليلة بس نخاف ادير في روحها حاجة وصغارها وهي اللي فيها مكفيها
احمد..باهي تمام
ميسم..روح ارقد مع امك
احمد..هههههههه حاضر
ميسم..لا يمين ولا يسار
احمد..باهي الله لاتربحه عماد هدا 😂😂
ميسم..باه باه
احمد..حبيبتي اني وانتِ وصغارنا والبيبي اللي جاينا بسس
ميسم..نحبك
احمد..نموت في حبك اني هي تصبحي على خير واي شي يصير اتصلي بيا
ميسم..حاضر سلام
احمد..سلام
مشت ميسم بدلت للصغار توتهم وحطتهم في دارهم وطلعت خشت لي ميار لقتها راقدة غطتها وقعد مقعمزة لقت دار مسكرة عرفتها هيا هدي دار العروسة الجديدة💔
ميسم..ربي يصبرك ياوخيتي وياخدلك حقك💔
رقدت ميسم لعند الصبح ناضت لقت ميار مش جنبها انخلعت دورتها لقتها ادير في الفطور لمت ميسم شعرها..خيرك مانوضتينيش
ميار..مابيتش نتعبك وانتِ حامل
ميسم..المهم صباح الخير
ميار..صباح الفل قعمزي افطري هيا
ميسم..هي
قعمزو يفطرو وميسم حست بأن جوها متحسن
ميار..اليوم صباحيته هه😏😔
ميسم..حبيبتي انسي خلاص اهتمي بي روحك وحوشك وماليكش اي علاقة بيها فاهمة حتى تجي تقعد اهني معاك اتفقو ديرو يوم بيوم وخلاص تفاديها
ميار..مش متحملة يا ميسم كل مانتخيلهم مع بعض قلبي ينحرق💔💔كسرلي قلبي
تررن تررن
ميار..هه يتصل
ميسم..ردي
ميار..نعم
عماد..كيف حالك
ميار..من ربي الحمدلله اما من عبده😏
عماد..معاد تقولي هكي حبيبتي انتِ حبيبتي ومرتي
ميار..لا حبيبتك لا سو تراه فوتني
سكرت في وجهه
عماد..اوففف كيف بندير اني بينهم
خش من البلاكونة لقي هبة ادوش في الحمام نزل طلب الفطور وركب جابوهوله وفطرو مع بعض
وفات شهر عماد يجي لي ميار ديما كل يوم يشوفهم وشن ناقصهم ويطلع يروح للفندق تم الشهر وانتقلو لي نفس الحوش
هبة..خير كيف حالك
ميار شبحتلها فوق لوطة وشبحت لي يدها وفاتتها مشت قعمزت ع الكنبة ودارت رجل ع رجل وقعدت تتفرج وولا كأنهم واقفين قدامها استكردتهم
هبة تعفلقت وخشت لي دارها طول
عماد..عيب يا ميار مفروض سلمتي
ميار..كان تعرف العيب راه هدا كله مادرتاشي انت😒 وفتحتTV وقعدت تتفرج شبحتله
ميار..من اليوم الست هانم يوم اني ويوم هيا لا تقولي اني عروسة ولا شي فاهم يوم هيا اطيب ويوم اني يوم هيا عليها الحوش ويوم اني الااا دااري ماتخشلهاش واني دارها مستحيل نعتبها والصغار لو تعتبرهم زي صغارها مش حنطق فيها بس لو هيا اطق فيهم تتحمل مايجيها غير الكلام هدا ماعنديش😒
عماد..باهي كلام معقول
ميار..كلام الحق هدا والحق حق وانت تعرفني😉
عماد..اني طالع توصي على شي نجيبه للحوش
ميار.تلقا قائمة فوق الطاولة جيب اللي فيها😏
عماد جي باسها ع جبينها..نحبك
ميار..كان تحبني راك ماشفتش لي غيري😏
ناضت ميار مشت للدار
عماد تنهد وطلع
هبة..هدي لازم ماندبرلها تصريفة كلامها اللي قالاته مايمشيش عليا😠
فاتو ايام
ميار..شن ماطيبتيش اليوم عليك خيرك😡
هبة..مانبيش نطيب اني حرة
ميار..قعمزي مالياش علاقة فيك لانة عمااد عنده جدول ويعرف دور منو اليوم😉😈
ناضت هبة دارت روحها بطيب
لبزت ع بعضه
اتصلت ميار بي ديليفري وجابولها وجبة ليها ووجبة لي صغارها وكلت وشبعت هي وصغارها ورقدتهم وقعمزت تشرب في القهوة وتاكل في الحلو
هبة..ميار😅
ميار..خير😒
هبة..ءء تعالي شوفي المعكرونة طابت؟ ماعرفتش هل هيا طابت او لا
ميار حست ان وراها حاجة..فوتيني مالياش علاقة بيك اماليك لاش عاطيينك مدامك ماتعرفيش اطيبي😒
هبة..باهي كملي تطييب انتِ شوفيني ها مبهدلة مش حلوة يروح عماد ويلقاني هكي شوفي روحك انتِ مبدلة ومتكمة
ميار..خمسة في عيونك امشي دبري روحك اعتبريني مش موجودة مادخليش فيك اني😏😒
مشت هبة متعفلقة كملت تطييب ودارت روحها زيناته واول ماكملت خش عماد
عماد..اففف شن هدا
هبة..خيرك حبيبي
عماد..اي حق انتِ مطيبة؟
هبة..ايه شن مش عاجبك؟
عماد..لا عاجبني
هبة..هي نحي وتعالى تغدا قبل
ميار تشوفلهم
ميار..اول شي عماد مايحبش المعكرونة تاني شي عماد اول مايروح يحب ريحة البخور في الحوش ويحب مرته تكون منظمة وتالت شي عماد لما يروح يخش يدوش ويصلللي يلي عمرك ماحطيتي ركعة في في وطاء ويرتاح وبعدين ينوض ياكل😏 فهمتي الدرس حبوبة
عماد..هه تعلمي😒
خش عماد لي داره هوا وميار دوش ولقي حوايجه واتيات ولبس وصلى وارتاح
عماد..تغديتي؟
ميار..اصلا يوم اللي اطيب ست الحسن غداي من برا😏 حشا النعمة مش عارفة شن مصبرك عليها لا نظام ولا شي حتى نظافتها زيروو
وفتحو ميار و عماد الباب وقريب طاحت هبة عليهم
عماد..تتصنتي علينااا؟؟؟؟
هبة..ءءء لا ءء ك ك كنت بنقوللكم تعالو تغدو
وتلفتت شدها عماد من شعرها..مزال نشوف ورا الباب تلقي روحك عند اماليك فاهمة😡
ميار..لالا عماد نحي يدك مهما يصير تمدش يدك عليها😠
مشت هبة تجري للدار ودارت روحها تبكي
وفاتت ايام وكل يوم هبة وعماد مشكلة وميار تشبحلهم بكل برود😑
في يوم كانت ميار راقدة في العشية ومسكرة ع روحها الباب هي وصغارها راقدين تسمع في صوت بس ماعرفتش منو فتحت الباب وشافت المنظر اللي ماينشاف هبة ومعاها شخص وكان قريب عليها هلبا💥
ميار..هبببببببة
هبة..😰😱😱
الراجل..من هدي
هبة..برا اهرب
ميار..وين وين منو هدا يا ماماااا اااه شن تحسابي روحك انتِ يا*#٪&
فتح الراجل الباب ويلاقيه عماد
هبة شافاته قلبت الموضوع ع ميار..عماااد باهي اللي جيت شوف مرتك اللي ديما تشكرليفيها الكويسة شوف من جايبة جايبة راجل للحوش
ميار..وتتبلي عليا يا حيوانة ياكدابة تي توا شفتكم بعيووووني انتِ وياه😡😡
هبة..كدااابة
عماد..اسكتووو ميار حق اللي تقول فيه؟
ميار..تكدب كنت راقدة فجأة سمعت صوت طلعت لقيتهم مع بعض😠😠من امتى اني نجيب في الرجالة للحوش اني بنت ناس وبنت #راجل ✋ مربيني وعمري مادرت شي زي هدا
هبة..اهي بدت في اسطوانتها هه كدابة تخون في راجلها في وسط عينه وتتبلى ع الناس
ميار..قوليه لي روحك الكلام هدا😏
عماد..انت لمن جاي
هبة قعدت تفنص فيه
عماد..تكلم يا حيوااان😡😡
الراجل فك روحه وهرب
عماد..في حاجة وحدة حتبين كللل شي
ميار..لحضة لحضة يعني انت مش مصدقني!!
عماد..اني معاد عرفت من نصدق
ميار..اه اوك تمام
خشت ميار خدت فونها..الو بابا تعالى ارفعني توا
محمد..شن في
ميار..تعالالي توااا😭
محمد..جاي جاي
خشت ميار لبست عبايتها وطلعت
عماد..اقلبي وجهك من الحوش معاد نبي نشوفك انتِ طااااااااااالق طاااالق طاااالق
طاحت منها ميار الشنطة وحطت يديها ع فمها😰😭
.
.
.
.
#يتبع ان شاءالله تكون نالت اعجابكم يااااارب ولو لقيت تفاعل قوي عليها حنزل الحلقة 35😌😘 #حـنـو🌸🍃
ВЫ ЧИТАЕТЕ
قصة فراق ( روايات ليبية )
Любовные романыقصة فراق ..... قصة حزينة بين بطلين و لكن فجاء يقلب الفراغ الي شوق و حب اخر للكاتبة : حنو لمحبي قصص حب الحزينة رواية من داخل المجتمع الليبي ؟
