نصف عاهرة بين مخالب طاغية الكاتبة منال منولة باللهجة الجزائرية

انت حلم لذيذ

تتمة للحلقات السابقة

.. رجوعا الى ايراد الى كان يحكي حتى لقاها كوبات في وجهو .. مسح على شعرو وخذى شهيق وزفير لحتى يقدر يخمم بعقله .. هو شخص الماضي بالنسبة ليه صفحة سوداء بالاخص التهمة الى تلفقتلو وصحابه الى نصهم انقتل لحتى السر يبقى مخفى والحقيقة تتخبى على عيون الكل ولمار جزء من الماضي هذاك .. الى جانب انو شخصية ايراد قاسية وغامضة ويعتريها البرود هو جامي ينسى يمكن يسامح اما النسيان ماشي من الشيم تاعه بالاخص وقت يرع بالذاكرة لهذاك النهار

*** فلاش باك* **

فاتت ايام على الكارثة الى صارت وقلت موازين الكل .. وهو راه متهم الاول في القضية هاذي .. وكل ضده حتى البشير الى نرمالمون يكون واقف وراه خلاه وسط النار والذيابا تنهش فيه وتطعن في الصمعة تاعه ... رسالة واثنين الى وزير الدفاع لحتى يحلو الملف ويرجعوا ينظروا فالقضية ويجيبوا شهود اخرى غير طبيب العيادة وغير البشير والاطباء تاع المصحة النفسية الى كانوا كامل ضده و.. يجيبوا شاهدة وماشي اي وحدة هي الحبيبة الى فوت معاها المر قبل الحلو

تحددت الجلسة .. وتحديدا في المحكمة العسكرية وين كان القاضي هو وهيئة المحلفين قرروا ينظروا مرة اخرى في القضية هاذي .. كان قاعد فالكرسي تاع المتهمين وحاطينلو الكلبشات بعدما كان يحط نجوم على كتافو ..ويلقب بالملازم الاول .. ومقابلوا الدفاع وكل واحد باقي يدافع على الجبهة نتاعه بكل قوة وشراسة مع انه البعض مكانش يبذلو في اقصى جهدهم لانو القضية حسمت

المحامي ( قرب من القاضي ) سيدي هناك شاهدة اريد استدعائها وهي ستدحض موقف موكلي في القضية

القاضي ( ضرب بالعصى نتاعه ) نستدعي الشاهدة لمار ساحلي

المحامي ( رجع للمكان تاعه بجنب ايراد ) هل انت واثق من انها ستساعدك

ايراد ( قرب ليه وبقى يهمس ) اجل هي تعرفني جيدا وشهادتها ستحدث فارقا في القضية

المحامي . حسنا سنرى ذلك

ايراد ( تلفت واذا بيها داخلة .. تما حس بالراحة في قلبو كان يقول راهي جات وضرك تقول الصح ) اليوم رح يبان كلشي

لمار ( قعدت في كرسي الشاهد وحطت رجل على رجل ) مرحبا

القاضي . اقسمي على انك ستقولين الحق ولا شئ غير الحق

لمار ( رفعت يدها الفوق وخذات نفس طويل ) اقسم على اني س اقول الحق ولا شئ غير الحق

القاضي . يمكن للدفاع التقدم

الدفاع ( كان هو الموكل على الدفاع على الكتيبة الى ماتت ) سيدة لمار انت طبيبة ب رتبة ملازم اول اليس كذلك

لمار ( قربت الميكروفون ليها ) اجل وانا دائمة التنقل مع الفرقة اينما حلوا

الدفاع . حسنا اخبريني كيف كان سلوك ايراد المالكي في اخر فترة اقصد قبل الحادث الذي قام فيه ب ارداء جميع رفاقه