نصف عاهرة بين مخالب طاغية الكاتبة منال منولة باللهجة الجزائرية

انت لي ملكي

 تتمة للحلقات السابقة

البروفيسور كان يتقدم منهم بخطوات مدروسة ومحسوبة جدا .. الكلمات تاعو خلات كي فرات كي فضيلة تنطرح على بالهم الاف الاسئلة .. واهمها الراجل هذا كي عرف بالموضوع الى رانا نحكو فيه .. وزيد الطريقة الى يحكي بيها بثقة تامة من المعلومات الى عندو والى بين يديه .. من جهة اخرى اخر كلمة قالها كانت في صالح فضيلة الى راهي في موقع اصابع الاتهام

البروفيسور ( رجع يكرر في هدرتو مرة ثانية ) عايلة المالكي هوما سباب كل مشكل صرالك في حياتك من وقت تولدت لحتى ضرك

فرات ( وقت شاف البروفيسور عينيه طرطقو ) وش راك دير لهنا وكي عرفت وش راني نحكي مع امي

البروفيسور ( ميل راسو شوي ) تقدر تقول اني شخص حابب الخير للكل وعلى هذا جيت اليوم

فضيلة ( كان قلبها يضرب وحست ريقها شاح )

فرات ( قرب من حتى وصل عند وذنو ) كان جيت تهدنني بالفيديو تاع الدروق الى كنت ندوراهلك غير ماكلاه راني على اخري وروحي راهي في نيفي نعطس نجيب القديم والجديد مع بعض

البروفيسور (حط يدو على كتف فرات ) قتلك جيت اليوم على جال الخير برك .. وجيت لحتى نخبرك بكلشي وصدقني امك ماعندها حتى دخل

فضيلة ( حكمت فرات من ذراعو ) فرات امشي ادخل خلينا نحكو الداخل

فرات ( كان تشمخ بالشتا ويقطر دوح براسو وجا داخل للدار ) انت اخر واحد تحكي معايا فالموضوع هذا .. وروح لتحب تسلمني تفضل

فضيلة ( حكمت ذراع فرات لحتى يدخلو ) هيا ولدي خلينا نحكو

البروفيسور ( كي لقى الوقت قرب يخلص منو قرر يفجر القنبلة ) رياض ونجود المالكي .. ماتو في اكسيدون بعدما تقلبت الطموبيل بيهم .. مات رياض فالبلاص والاخ الوسطاني فرات الماء تاع الواد الكبير جرو وماعرفوش وين راه .. بينما نجود صرالها كسرفالحوض نتعها ودخلت غيبوبة لمدة 9 اشهر ولدت اخر فرد لعايلة المالكي وسام وبعدها ربي دا الامانة نتاعو

فرات ( وقت سمع الاسماء حس بحاجة تحركت فيه الداخل تلفت ليه )

البروفيسور ( كمل يحكي ويقرب من فرات ) بصح الاكسيدون هذا غيركامل فالعايلة بالاخص بعدما فرات المالكي ضاع منهم

فضيلة ( شافت يمين وشمال كانت تخاف لاي واحد يسمعهم يحكو ) خلونا نحكو الداخل

البروفيسور ( هبط المظلة نتاعو ) مذابيا انا لانو عندي امور بزاف نحب نحكيهالك

فرات كان متعطش للحقائق .. كان حابب يعرف باي طريقة كانت وش الى صرى .. اذا كانت عايلة المالكي مرفهين كامل هكا علاه ماحوسوش عليه .. علاه خلاوه يعني مكانش تفسير اخر للحادثة ماغير هاذي ..

قاعدين فالصالون مقابلين بعض .. ثلاثتهم كانو في الحلبة هاذيك .. والبروفيسور كان الحكم بينهم وهو الى رح يحكم بالفوز ولا الخسارة .. ولكن هو وقت جا لهنا كان مقرر انو ينقل الصراع برى الحلبة ويديه ويحطو بين افراد عايلة المالكي