مشيت للدكتور سلمت عليه وقلت: انا عايز افحص اذا في تطابق بيناتنا.
هز راسه بطيب ومشيت معاه بعد خلصت فحوصات طلعت الجنينة تعبان قعدت على الكرسي وغمضت عيوني بتعب وغفيت بدون شعور صحيت بيد على خدي لقيتها غنوة بتبكي حضنتني شديد وقالت: رؤوف رؤوف انت ح تنقذها
- غنوة في شنو غصون حصل ليها شنو.
عاينت لي وقالت: الفحوصات طلعت متطابقة والدكتور قال ممكن تتعمل العملية بالليل لو موافقين
- متأكدة؟.
هزت راسها بأي قمت بسرعة طلعت ليه واتأكدت ومشيت عملت اجراءات المستشفى ومشيت لرام وايان علشان ما يخافوا لقيتهم بصلوا في الضهر جيت صليت معاهم بعد خلصنا قعدتهم في حضني وبوستهم
ايان:بابا غصون بقت كويسة؟.
ابتسمت وقلت: ايوا يا بابا كويسة وانا ح افضل معاها كم يوم في المستشفى علشان ح اعمل معاها عملية صغيرة علشان تكون كويسة شديد طيب؟
رام:بابا انت ح تكون كويس؟.
هزيت راسي وبوستها وقلت: انا ح اكون كويس بس انتوا خلوا بالكم من نفسكم وما تنسوا الصلاة واسمعوا الكلام طيب؟ وما تنسوا تدعوا لماما ماشي؟
هزوا راسهم بوستهم وقلت: يلا انا ح امشي.
بوستهم شديد وقمت استحميت وودعتهم ومشيت كان مفروض اكون في غرفتي علشان يتابعوا حالتي قبل العملية مشيت لغصون كانت نايمة ونور في المسجد دخلت غرفتي المساء بعد جهزت للعملية الباب فتح وجات ماما ورام وايان جوا جارين طلعوا في حضني ورام بتبكي مسحت ليها دموعها وبوستهم قالت: بابا ما ح تتأخر صح؟.
قلت: اكيد يا روح بابا انتوا.
بوستهم امي جات باست راسي وقالت: ربنا يعين ويسلمكم.
ابتسمت ليها.
مسكت ايان ورام وقالت: يلا حبيباتي.
باسوا خدي وطلعوا والدكتور والممرضة دخلوا واتحولت لغرفة العمليات بعد اتطمنت انو غصون حالتها مستقرة ودخلونا العملية
فتحت عيوني الضوء كان قوي رجعت قفلتهم وشوية شوية فتحتهم كنت في غرفة العناية عاينت للساعة والتاريخ بعد يومين من العملية يعني التفت على يميني لقيت غصون بتعاين لي من سريرها الجنبي ابتسمت ليها بتعب ما كان في حد في الغرفة على الاغلب ما حد عارفها صحت قمت بتعب وطلعت الاجهزة مني وانا ماسك جرح العملية جريت الكرسي الجمبها وقعدت قلت: غصون حاسة بحاجة؟ في حاجة بتوجعك؟.
هزت راسها بتعب بست راسها ورنيت على جرس طلب الدكتور عدت ثواني وجاء داخل ومعاه باقي الدكاترة بسرعة مسكني وقال: ليه قمت.
قعدني وخلاني اتسطح جات الممرضة ومعاها دكتور تاني وبدوا يفحصونا بعد خلصوا الدكتور قال: نونو طالعة لمنو انتِ يا جميلة قوية كدا لماما ولى بابا؟.
ابتسمت بتعب وقالت: اكيد ماما.
ابتسمت ليهم قلت ليه: حالتها كيف يا دكتور؟.
قال: كم ساعة نتأكد انو جسمها اتقبل الكلية ونحولكم الغرف.
هزيت راسي بتعب غنوة كانت واقفة جمب الباب ومعاها نادر بعاينوا لينا وبقولوا في حاجة شوية وسلموا علينا من بعيد وطلعوا لانو ممنوع يدخلوا غصون قالت بخنقة: عمو بابا ما جاء؟.
عاينت ليها وقلت: بابا منو؟
- طيب ماما وين؟
-- غصون ماما جاية بس ابوك اسمه منو علشان اشوفه.
ابتسمت وقالت: بابا رؤوف سمعت ماما ريل بتتكلم عنه لماما.
ابتسمت وانا ما فاهم حاجة وقلت: نومي حسي شوية وماما بتجي.
هزت راسها بطيب.
ابتسمت بتعب ونمت انا كمان معاها صحيت بصوت الدكتور بتكلم معاها ومطلعنها الغرفة ابتسمت ليها والممرضة اخدتها وطلعوا الدكتور قال: انت ح تفضل لتاني يوم هنا بعد داك ممكن نطلعك بتكون فحوصاتك طلعت
- ممكن اولادي اذا هنا يدخلوا لي؟.
اتنهد وقال
-- الكبير فيهم بس
- بس هم توأم.
عاين لي وقال: طيب بس ما ح اخليهم كتير.
هزيت ليه راسي شوية ودخلوا جوا ماشين بسرعة حضنوا يدي قعدت شوية الدكتور كان واقف قال: ﻷ ارجع اتسطح والا ح اطلعهم.
رجعت اتسطحت باسوا يدي وخدودي وقالوا: بابا انت كويس؟ متين ح ترجع البيت؟.
ابتسمت ليهم وحضنتهم قلت: انا كويس انتوا تمام؟.
هزوا راسهم رجعت بوستهم وقلت: اشتقت ليكم
رام:ونحنا كمان يا بابا.
ابتسمت ليهم الدكتور قال: يلا كدا كفاية.
هزيت راسي وقلت ليهم: يلا يا بابا خلوا بابا نادر او خالد يرجعكم البيت طيب؟.
هزوا راسهم وطلعوا
تاني يوم حولوني لغرفة عادية سألت الممرضة من غرفة غصون وين كانت جمبي طوالي ساعدتني قعدت على الكرسي واخدتني ليها كان معاها غنوة ونور كانوا بفطروها ابتسمت لم شافتني وقالت: عمو المخيف.
ابتسمت ليها وقلت: بقيتي كيف يا غصون؟
- الحمد لله
-- حاسة بحاجة؟ في حاجة بتوجعك؟.
هزت راسها بﻷ ابتسمت ليها ومشيت على شعرها وبست راسها وقلت: يلا ارتاحي حبيبتي
قلت لنور: نور عارفة غرفتي وين؟.
هزت راسها قلت: لم غصون تنوم ضروري تجيني.
هزت راسها بإستغراب طلعت غرفتي شوية وماما واريام والاولاد جوني
