حب بطعم الانتقام.... بقلم رونا

العاشر

جلس شريف خلف مكتبه وامامه وحيد يعرض عليه اخر تطورات الوضع بالمجموعه
:انا ياشريف بيه برضه مع رأي جلال بيه... العقود علي المدي الطويل ليها اضرار علي المجموعه.... دول هيتحكموا في توريدات الشركة وكمان الشرط الجزائي كبير اوي
قال شريف بحدة تحمل الكثير من عنجهيته وغرورة  : هو علي اخر الزمن هتفهم انت وجلال احسن مني ياوحيد..... انت عارف.. انا بقالي اد اية بحاول اقنع الناس دي انها تشتغل معايا.....
: عارف ياشريف بيه اد اية الصفقة دي مهمه بالنسبالي
: مش مهمه بس.... دي أهم صفقة في حياتي.... انا بيها هتحكم في السوق
اندفع وحيد : وهما هيتحكموا في سيادتك
ضرب المكتب بقبضته... وحيييد... انا بقالي خمسين سنه في السوق يعني افهم اية الصالح والطالح اكتر منك..... انت كل مهمتك تخلي جلال يمضي وبس..... كمال بيلف حوالين الوفد عشان يمضي معاهم قبلي وطول ماجلال عمال يعارض ويأجل الصفقة هتطير من ايدينا.... الاسبوع اللي جاي تكون العقود اتمضت فاهم
اومأ له وحيد علي مضض فهو بالرغم من خبرته الا ان رغبته بالتوقيع علي هذا الاتفاقيه تجعله لايري مدي اضرارها والتي استطاع  جلال ان يصل اليها بعد دراسه كافه الجوانب .....!..!
دخلت سالي الي المكتب قائلة بكبر معتاد منها : عملت اية ياوحيد في موضوعي  ؟
قال وحيد : بتابع يافندم تحقيقات النيابه....تقرير المعمل الجنائي هيطلع خلال أيام بعدها هنشوف شركة التأمين هتقرر اية
صاحت بحدة : وانا لسة هستني تقارير وزفت..... وانت لازمتك اية لما الموضوع هياخد وقت
: يافندم.... قاطعته بحدة   : انت تتصرف وتخلص الموضوع ده... شركة التأمين لازم تدفعلي التعويض في أسرع وقت ..
: ياسالي هانم الموضوع مش بالساهل كدة... وبعدين لازم تتأكد ان الحريق كان مش متعمد عشان تقدر تصرفلك التعويض
قالت بغضب : اتصرف ياوحيد
اومأ لها وحيد وزفر بداخله فلولا انه عشرة عمر مع شريف لما تحمل تلك الكريهه وترك العمل فورا..... كم لاتشبهه جلال الذي بالرغم
من قسوته الا انه محترم في تعاملاته معه عكسها....!
...... خرج وحيد لتقول سالي لابيها : شفت يابابي اللي بيحصلي  
: اهدي ياسالي
: انا اتدمرت يابابي.... شركتي فلست وعليا ملايين لازم ادفعها للمستثمر العربي شريكي .... انت لازم تساعدني
تنهد شريف قائلا ; مفيش في ايدي حاجة اعملهالك ياسالي... انا حتي حساباتي في البنوك بقت في ايد اخوكي..... صرخت بغل :متقولش اخويا.... انا بكرهه
نظر اليها شريف باستهجان لتقول ; ايوة بكرهه.... طول عمرك مفضله عليا... هو الولد تسيبله ثروتك عادي إنما أنا لا
قال شريف باستنكار : انا ياسالي.... ده انا محدش دلعك ادي... واخوكي محدش قسي عليه قدي
قالت بغل : امال سايبه ياخد كل حاجة لية؟
: ماانتي عارفة اللي حصل..... كنتي عاوزاني اعمل اية ؟
: تقف قصاده وترجع فلوسنا منه...ولو وصلت تهدده... تعمل فيه اي حاجة.... امال بنت السواق تتمتع بثروتك وانا لا
: اصبري ياسالي.....جلال مش هياخد حاجة هو بس محتاج يحس انه اخد حقه من اللي عملناه فيه وانا سايبه يحس انه انتصر..... بعدها صدقيني من نفسه هيرمي كل حاجة.... وهانت كلها كام يوم ويمضي الصفقة.... وقتها هترجع كل حاجة زي ماكانت
نظرت لابيها باستفهام : يعني اية ؟
.... انت هترجع كل حاجه ازاي بعد مابقت في ايده
: هوصل معاه لحل... مالكيش انتي دعوه
هتفت بغضب : وانا لسة هصبر لما توصل لحل .... لا طبعا انت لازم تتصرف انا لازم ادفع الفلوس للمستثمر والا هروح في داهيه... ده واخد عليا شروط جزائيه كبيرة
قطب جبينه : انتي غبيه ياسالي... ازاي تمضي علي كدة من غير ماتاخدي رأي حد فينا
: وانا كنت اعرف ان المخازن هتتحرق
زم شفتيه قائلا : طيب ياسالي... هتكلم مع جلال واشوف
تهكمت : لما البيه يبقي يرجع.....!