زوجة لسبعة أيام

٦٤

نحن المن دواعي الغفلة سمينا الحقيقة مُصيبة ..... 
( في جانب احمد ) 
_احمد تعااال جاي 
*حاضر يا امي ...
_يحضرك الخير انت يا يمة ..
* امييين و ما يحرمنا منك 
_لالا م وقعد هنا تعال جمبي هناا دااا ..
*ياخ انا لاقي يا امي ، اهااا 
_احمد ، انت قايلني ما حاسة بيك يا ولدي ! قلبي دااا قلبكم انت واخواتك يوم واحد فيكم تحصل ليهو حاجة انا البتألم بدلكم ، يا ولدي ، بصراحه كداااا ، انا والله محتارة وما دايرة اجبرك انك تحكي لي غصب عنك ،، و ريني يا ولدي ، انا لو ما عارفاك متزوج كان قلت انت بتحب البنية دي ! و بيني و بينك يا احمد البت دي اصلو ما اتخيلتها تكون كدا ، زولة طيبة و مسؤلة ماشاءالله عليها ،، بس كمان نظراتك ليها يا احمد ! 
* امي انا عارف انك زوله ما صغيرة و عقلك و تفكيرك مخضرم و واعية كفاية اني اخليكي تواجهي معاي الحاصل في النهاية انتي امي و قبل م تعرفي الحاصل معاي ،. ما دايرك تتخلعي ولا تخافي علي انا بحمدالله تنوم مظلوم و ما انوم ظالم دا البخليني اتخطى اي عقبة و اي حاجة بسهوله ، والحصل معاي يا امي بلطف ربنا علي انا اتجاوزتو في ليلة و ضحاها ...
_رحاب عملت شنو ؟
*فعلاً قلب ام ... رحاب يا امي طعنتني في ضهري ، خانتني يا امي في سريري الجبتو بي قروشي و بخت راسي في مخدتوو ، سبحان الله كانت كل الدلائل بتظهر لي وحدة وحدة و بتشير للكان حاصل ، بس بحسن ظن مني اتغافلتا عن الحقيقه لحد ما جا يوم و اتكشفت لي ، و هي حامل ، وانا حالياً بيهمني ولدي ، و عشان اكون واضح يا امي ما في زول حسس بي في الوقت داك غير علياء ، كانت واقفه وقفة راجل ما حسيت انه مجرد تعاطف ساي دايماً بشوفها نور قدامي لمن تضلم في وشي ، رغم اني ما بنكر كرهت البنات و ثقتي بقت مهزوزة ، بس يا امي علياء غير ، و مستحيل تقبل زول زي .. 
_لاحول ولاقوة الا بالله ، يااا رب تتلطف بينا يا الله ، الحمدلله ربنا اصلو ما بخلي حق زول ربنا دا كريم ،ربنا دااا اصلووو ما بعمل حاجة والا يكون وراها خير ، معليييش يا ولدي انت راجل و قلبك قووي و دع الخلق للخالق ، ربنا بعوضك خيرها ، و عشان اكون معاك واضحة ، انا ولدها دا ما بيلزمني ما بضمن انه ولدك يا احمد ، ما دايرنو يا ولددي ..
*لا يا امي انتي ما ربيتيني على كدا ، دا شافع ما عنده اي ذنب و دا 90 % ولدي ، لانه الحمل دا ظهر في فترة كنا فيها طوالي مع بعض المهم يا امي ، انا اتجاوزتها يعلم الله في لحظة كرهتها و قرفتت منها ، كل الدايرو ولدي ،،، و الولد ما بيدو لابوه الا بعد 8 سنوات و يكون متزوج تقريباً ،و انا ما داير اخلي معاها زي ما جبتو انا حأعرف اربيهو يا امي ... 
_ و علياء ؟
*ليه طوالي قلتي علياء ، البت صغير و تستاهل فرصه افضل مني و حياة تستحقها تعبت كتير و شافت كتير بعد دا كفاها !
_وانت ناقصك شنو !
*ناقصني ان ما مستعد لتجربه تانية كل الدايرو زوجة لسبعه ايام ، بس عشان افوز بحضانة الولد ... 
_الله يسعد قلبك يا ولددي .... 

في جانبي انا ، بالجد كنت مستغربة انا كيف وافقت كداااا كيف من غسر تفكير !، يمكن لان فعلاً دي حاجة مؤقته ! ولا انا متعاطفه بزيادة ! افففف استعجلتا انا ولا شنو ! طيب على العموم انا قدامي تلاته شهور ! 
جاتني عبير ، قعدنا اتونسنا لمن نمت عندها و ما حسيت على نفسي ..
صحيت بصوت تلفونها ، لمن اتخلعتا انا جابني هنا شنو !
قمتا سرعه سرعه مشيت لي حبوبة لقيتها مافيشه ، تقريباً حبوبة دي انا بقيت م بلحق اسوي ليها حاجة ، في اي حاجة بلقى ام احمد عملتو ليها ، اخدت حمامي و طلعتا براا ، لقيتهم بتكلمو في موضوع ما فهمتوو لاني جيت لقيتهم بتكلمو في حاجة تخص احمد ، سلمت عليهم و قعدتا و بسمع فيهم ، بعدها سمعت عبير بتقول لأمها والله هو راجل البيت شهرين ونص كتيرة شديد ياخ اتكلمي معاهو يا امي ، امها قالت ليها انا ما بقيف قصاد رغبة زول فيكم ، بقيت بعاين ما فاهمه حاجة ، بعدها جا احمد بي شنطتو ، و مبتسم ما عارفه ليه قلبي دقا شديد من التوتر و خفتا بالجد يكون ماشي مكان بعيد ، خصوصاً لمن ربطت كلام عبير ، شهرين و نص ! 
امه قالت ليهو اهم شي تخلي بالك من نفسك بس ، قاليها اكيد يا غالية و بيعاين فيني ، و انا حسيت انه ظهر علي اني اتوترتا ، عبير قالت ليهو يعني مصمم يا احمد !
قاليها مالك يا عويرة كلها شهرين و حتمر عليكم كأنها اسبوعين ، بي قلبي قلت ليهو اااخ لو اسبوعين يا احمد ، مرات بقول كلام بيني و بين نفسي بيحيرني انا ليه قلتا كداا او ليه اتصرفتا كدا ، ما كنت قادرة استوعب حقيقة احساسي في اللحظة ديك ، احساس كداا كان متملكني و ارجع اقول لنفسي انا ماااالي !! لمن عيوني دايرات يرقرقوو .. 
كنت بس ساكته و بعاين فيهم و هو بعاين فيني كل لحظة و التانية ، قام قالي ، علياء ، قلت ليهو نعم ! قالي انا مسافر شهرين اجازة اطلبو الدايرنو كلو اجيبو ليكم معاي ،، قلت ليهو ربنا يكتب سلامتك ، قالي الله يسلمك ، و ودعهم ، و ودع حبوبه و طلع .... 

( في جانب رحاب ) 
* امي ، امي ، امي ،....ردي علي 
_اسكتي مني ، انا ما امك انا ما امك ، اسكتي مني ...
*عليكي الله ما تعامليني كدا اسي انا ما فضل لي زول غيرك عليكي الله ... انا عطشان اسقيني ما قادرة احرك يديني ، واجعني اااخ ..
_انتي لسه شفتي وجع ! قلبك ما واجعك ! 
هاكي اشربي اشربي ...
*امي انا حاسه زي الفي حاجة في رجولي ، حااسه في موية ولا دم ، امي امي ، بطني واجعاني شديد ، ااااااااااه ااااااخ بطني بطني يا امي وديني المستشفي يا امي ...
_في شنوووو ، يا رب انا ما بعرف حاجة هنا اسوي شنوووو ، اصبري اصبري ، في دم 
لو سمحتي يا اختي ، لووووو سمحتي ، بلقى مستوصف قريب من هناااات ؟ 
( وصفت ليها ، سبحان الله الام و ما ادراك ما الام ، مهما غلط الزول ما بلقى سند غير الام ) ، اتصرفت لمن وصلت المستوصف و دخلت رحاب .......** بعدها بي نص ساعه ** 
_جناك زانو ما اتحمل يقعد في بطنك يا رحاب ..
*انا تعبانه يا امي ما تقسي علي ..
_اااااااخ واااخ يا روحي وحراق رووحي .. 
** هنا كانت نهاية رحاب ، عاشت منبوذة حتى من اهلها ، عاشت في بيت ريفي في بلد مافي زول بيعرفهم فيها ، هي وامها .. 
و ارجع اقوليكم ، الغلط ساهل و الصح مُكلف جداً ، بس لازم نكون قدر حماقاتنا و اختياراتنا لو طلعت غلط في الاخر يعني .... 

( في جانب سلمى)
* ما عارفه يا وائل 
_كيف ما عارفه انحما بنحب بعض يبقي المانع شنو ناخد خطوة !
*صراحه ما دايرة علاقتنا تبقى زي وليد اخوي و رغدة اختك ، انا حمدت ربنا يوم خلو بعض امي وامك ما اختلفو ، لمن نجي احنا ، لاقدر الله حصل خلاف بينا ..
_اتفائلي يا سلمى اي علاقة في الدنيا بيحصل فيها خلاف بس التفاهم بيخلي المركب تمشي .. *فعلاً ، طيب يا وائل اتوكل على الله. و ربنا يججيب الفيهو الخير 
_ايوة كدااا ياخ ، انتي بس الله يخليكي لي 
*و يخليك لي يا رب ... 

( في جانب احمد ) 
معقول اكون انسان جبان كدا !
ما قادر اواجه الواقع حقي ؟ الهروب عمره ما كان حل ، ولا حيكون حل ! 
فجأة حياتي اتلخبطت ، كيف تطلع وردة في نص صخور ؟ كيف يتولد حب في كومة مشاكل زي دي ! 
انا ما جبان يا علياء ما جبان ، بس المرة دي حأختار اهرب ....... 

.. اما انا بقيت داخله مارقه متوترة و مقلقة دايرة اطرشق من شنو ما بعرف ، بس مقلقه كدااا حاجة كدااا ماسكة فيني ما قادرة افهمها ..
سبحان الله التلفون رن بتاع خالتو ام احمد .. اول ما ردت ، قالت احمممد ! 
و بعدها سكتت ....و بعدها صرخت و هنا انا عرفت سبب كل ذرة احساس كان متملكني، اساسو وين ! 

#استككانة😑...الليله بس بي وشي الواحد داا 😑😑😑😑😑😑😑😑😑😑 ..