زوجة لسبعة أيام

٢

من دربي داك ،طوالي مشيت طلعت عبايتي المكرفسة .. جبت لي جردل مويه حبيبة ، دخلت فيهو عبايتي. اديتا نفضه كداا ،وخليتا للشمس ، 
مشيت على عنقريب حبوبة.. بساند فيها جاي وجاي لمن وقفتها ، و جبتها في الكرسي ، قعدتهاا ، و طلعت ليها هدوما ،،و بقيت بحمم فيهااا و اغني ليهااا ،بس عشان اشوف ضحكتاا ،( حبوبتي ما بتتكلم الا ما ندر ) ،، بغني ليها و اشاغل فيها ،، خلصتا من الحمام ، نشفتها و لبستها ، و رجعتها العنقريب ، و غطيتا... 
مشيت لملمت حاجاتي و دخلت استحميت انا كمان ، كدا نص البرميل راح .. 
المهم مشيت لبست عبايتي ، و جيت لقيت حبوبه نامت ، شلت مفاتيحي ، و طلعتا .. 
مشيت خبطتا علي خالتو صفية فتح لي ولد صغير .. خليتو نادا خالتو صفية. ، جاتني سلمتها المفتاح و اتوكلت مشيت اناا ،، طبعا واقفه ساعه عشان القى لي حافلة توصلني مع الدفر الحاصل دا ، بي جاي جاي حاولتا ركبتا شماعه ، بعدها نزلتا و ركبت لي حافلة تانية ، عشر دقايق و نزلتا .. 
مسافة ربع ساعة كداري لامن وصلتا ، رنيت الجرس ، فتحت لي وحدة من البنات اسمها ( سارة) ، وانا واقفه منتبهه لان في عفش و كراتين براا جمب الباب و الحوش مقلوب كدا. . قلت ليهاا : دا شنو يا سارة ؟ّ
قالت انتي وين ياخ.والله اشتقت ليكي شديد ، قلت ليها وانا كمان والله يا سروية ، بس ما وريتيني دي شنو الحاجات دي ؟
قالت لي سمح ادخلي ماما جواا بتوريكي ، قلت ليها يلااا ..
فعلاً من شافتني البت دي ماسكة يدي اصلو ما فكتني لمن دخلنا جواا ، امها شافتني اتخلعت قالت لي : 
علوية ! يا بت انتي كويسه ؟ وينك اختفيتي كدا لا حس لا خبر ؟ حبوبتك كويسه ؟
قلت ليها اييييك قصه طويله والله ، لكن اتطمني انحنا بخير ، بس انتو بتجددو ولا حاصل شنوو ؟
قالت لي لا والله يا علياء ، للاسف انحنا راحلين ، ابو البنات قال الا نمش مدني و يبيع البيت دا و جوطة و برنامج طويل شديد والله و زي ما عارفه انا وبناتي متعودين علي جو الخرطوم و ناسنا و دنيتا كلهم هناا .. 
طبعاً سكتا لانو كانت مفاجأة كبيرة بالنسبه لي .. قلت ليها معليش يمكن الحصل دا لخير ليكم و ان شاءالله انتي والبنات حتتعودو .. قالت لي : انا عارفه وضعك يا عليا و عارفه سفرنا دا قطع رزق ليكي و انا من بعدك ما بقدر اثق في وحدة تدخل بيتي و تقعد في نصنا انا وبناتي و انا والبنات حنفقدك والله و ياريت لو اقدر اسوقك معاي .. قلت ليها ما تشيلي همي اككيد بتفرج و يلا خلوني اساعدكم ..مسكتني قالت لي والله ما تسوي حاجة عندي الناس شغالين اقعدي دايرة اتكلم معاكي ، قلت ليها اتفضلي ..
قالت لي انا مستعدة اخصص ليكي مبلغ شهرياً وانتي عارفه انا غايتي شنو ! و شغل البيوت دا ما دايراكي تشتغليهو ،ما كل البيوت آمنة ليكي و انتي بنت و ما عندك ضهر بعد رب العالمين ، وانا عارفه وضعك ما بيسمح ليكي تشتغلي برا ،بس كمان جوا البيوت ما امان يا علياء .... 
دموعي جروو ، قالت لي ما تبكي انا واثقة ان ربنا حييسرا عليكي ، و دي ورقه فيها رقمي سجليهو و كلميني في اي وقت اوعك تقطعي مني فاهمة ، و حسيت بي يدها في يدهاا ختت لذ قروش و قفلت عليها بأصابعيني .. قلت ليها لالا ..... سكتتني ،قالت لو عايزاني ازعل منك رجعيها لي ، و بعدين كفاية بكى ، البنات حيتأثرو ..
بالجد ما كنت قادرة اتحكم في دموعي ،لانو من مدة ربنا كان فاتح لي باب الرزق من البيت داا ،و انا عارفه اني ما حألقا زيهم تاني ، ديل الناس الوحيدين الحسيت في نصهم بالالفة والحب و ما حصل ضايقوني و يشهد الله بيعاملوني كأني وحدة منهم ، بس حيفرقو معاي و كان علي الرزق الله في و ما بينساني انا متأكدة .. 
عشان انا ما بحب الوداع وعارفه بناتها قدر شنو هما متعلقين بي ، كان لا بُد من اني احاول انسحب براحة من غير ما يحسو بي ،

( في جانب تاني)
*يعني مافي حل تاني ؟
_ الحل كان عندك
*انتي عايزاني اسوي شنو يعني شهادتي ما استلمتها في يدي ، تخريج لسه ما اتخرجتا وريني كيف بياتو منطق انتي بتتكلمي 
_وانا ما عندي حلّ
*لا عندك بدل الحل حلول 
_انا حأقفل
*استني انا عايز اعرف قرارك اسي دا
_انا بحبك و اذا حصلت لي اي حاجة اعفي لي
*قصدك شنوووو انتي !!
*الووووو
*الوووووووووو اففففف

#استككانة🙈~

يتبع ...