زوجة لسبعة أيام

١٥

صعبتي علي ..
قلت ليها عيشي تحت رجول امك و ابوك واخوانك ، لانه ديل النعمة الحقيقيه ، لا رفاهيه لا لبس لا طلعات ولا اي حاجة في الدنيا دي بعد عبادة رب العالمين .. و دايما فاقد الشئ يتحدث عنه .. عرفتي معنى كلامي ؟ .. زحت و بقت تعاين فيني ، قالت لي ممكن تبقي صحبتي ؟ قلت ليها ما عندي حاجة اقدما ليكي بالمقابل ، قالت لي عندي المقابل ، هااا موافقه ؟ 

قلت ليها اكيد موافقه يا ... قالت لي هههههه بالغتي م حصل سمعتيهم بنادوني بيهو ؟ قلت ليها و محرجة اسالك طبعاً ، قالت لي سلمى ، قلت ليها عاشت الاسامي يا سلومة ..قالت لي تسلمي ، يلا بما انك بقيتي صحبتي عليكي الله تعالي معاي للبنات اعرفك بيهم منهم بنات اهلي و صحباتي في الجامعه .. 

قلت ليها سمح بقعد لحد ما امك تناديني ، قالت لي ، طيب الكيس دا فيهو ملابس ليكي اذا حابه تغيري غيري بنتطرك برا ، اذا حابه تجي كدا يلاا ف كل الاحوال حلاتك .. قلت ليها لو قلت ليكي انا عندي ملابس و الحاجات دي لو شلتها حتسبب لي احراج .. قالت لي بيني و بينك مافيها حاجة و نصها بي ورقتا 
، يلت ليها تمام ، حأغير ّقالت لي انتطرك ولا تجي بهناك طوالي ، قلت ليها لا امشي بجي بهناك ... فعلا طلعت و قعدت اغير ما اخترت شي بس كنت عارفه اي حاجة حتكون موجودة داخل الكيس هي افضل من الانا لابساهو .. شلت لي لبسه من فوق الكيس ولبستها ، و مالقيت لي طرحه، اترددتا اطلع ، تاني قلتا اصلا غرفه كلها بنات ، و انا طرحتي تحت في الحوش مع العبايه ، مشيت في الممر ، مشيت خبطت الباب و وقفت برا مسافه ماف زول فتح لي و سامعه صوت جوطتهم ، تاني خبطتا ما فتحو لي ، طوالي براحه فتحت الباب و دخلتا م فتح كويس قمتا لزيتو و في وحدة ورا الباب وانا م عارفه ، و شكلي خبطتها من غير قصد ..بس فجاة سمعتا الكورك و الشتايم ، م حسيت الا بي وحدة جاراني من يدي و وقعت فيني شتم وتهزيئ وانا والله من الخلعه م فاهمه حاجة ، و بقت تقول لي يا غبيه يا حيوانه في زول بدخل بالطريقه دي م شايفاني ورا الباب ، عايني خبطتيني وين ، قلت ليها بعفويه من الخلعه ، في شنو طيب ؟ قالت لي يا بت ال ....(شتمت امي) م اتحملتا الكلمة ، لقيت نفسي لذيتا لورا قامت اترتعت بزيادة ، و البنات بقولو ليها ي رحاب استهدي بالله في شنو لي كدا ، بقت تقوليهم شنو استهدي بالله ، و طاخ ادتني كف بي يد مقفوله لمن حسيت خشمي جاب الدم ، عاينت ليها و طلعتت وقعدت ف الارض جمب الباب قعدت ابكي  شديد ما عشان ضربتني بس عشان شتمت امي و ما قدرت اخد حقها بس قعدت ابكي من الحرقه .. 

والجوطه دورت في الغرفه الناس كلها بتشاكل في البت ، جاتني وحدة طالعه شايله مناديل و قزازة مويه باردة ، و بركت لي ف الارض بتقول لي ارفعي راسك وريني لاحول ولاقوة الا بالله ، و جات سلمى جاريه من تحت جات مسكتني بتقول لي علياء علياء في شنووو ، و دا شنوو 

و قامت جري دخلت جواا و سامعه كوراكها بتقول دا منو العمل فيها كدا ، و تخبط في حاجة بي رجولها ، و جوطة وكوراك و انا ببكي و البت الجمبي دي بتكمد لي و تقول لي معليش ، و الناس جوا اتلمت في سلمى و بتشاكل في البت ، و جاتني تاني راجعه قعدت جمبي و تمسح لي و تتكلم معاي ، والله هي بكتني اكتر لانو اول مرة القا حنية بعد حنيه حبوبة ،، بس قمتا و م اتكلمتا و هي بتمسكني بتقول لي تعالي يا علياء .. حسبي الله ونعم الوكيل فيكي يارحاب ليييه ياخ حيوانه انتي ، وحدة قالت ليها انتي وقفتي مع البت ديك من غير ما تفهمي و تدعي في بت خالتك كدا .. قالت ليها شوفي هنا كلنا عارفين رحاب و اخلاقها الزفته مهما سوت نا بتوصل للضرب ،والبت دي انا عارفاها م بتغلط ،، و جات لاحقاني ، مشيت الحوش لام سلمى ( خاله حنان) قلت ليها ، وينا الجلابيه ، شهقت في وشي و مسكتني و بقت تقول سجمي سجمي دا شنو ووب علي ، دا شنووو جيبو تلج بقت تقول ، مسكتها ، قلت ليها انا عايزة امشي لحبوبه ، قالت لي اصبري عاني وشك ، قلت ليها اديني الجلابيه اكويها خليني امشي ، قالت لي خليها جلابيه شنو اسي ، بس جات سلمى ،و بقت تكورك في امها بتقوليها شايفه عمايل بت اختك الما عندها ذرة اخلاق ، سوت شنو في البت المسكينه دي ، بس شلت عبايتي من الحبل في يدي و بلبس فيها و ماشه ، و امها بتوقفني و سلمى دايرة تحصلني بس هرولتا و طلعتا 

وشي كنت حاساهو محفور م مضروب بالجد ضربتا كانت بي غبنة و قوة وحرقه كدا ما زوله طبيعيه كأنها بتنتقم مني .. 

ماشة و مغطيه وشي بالطرحة  لمن وصلتا الشارع ، شفت الصيدليه اتزكرتت القروش حقت وليد ، بس وقفتا عاينت كداا ، م شفتا زول ، دخلتا عاينتا بقيت اقول سلام عليكم ،ماف زول رد ، كررتها اكتر من مرة ماف زول رد علي ..

بعد طلعتا ، لقيت وليد بناديني بقول لي ايوة ايوة لمن طلع لي برا .. قالي كنت بصلي .. اتلفت ليهو بس اتخلع و بقى منطط عيونو و بعاين فيني ، قالي ادخلي ادخلي الصيدليه 

قلت ليها لا ماشه لحبوبة ، هاك القروش قالي قزوش شنو ما شايفه وشك دا ،قلت ليهو ق

روشك كم ، قام انفعل قالي حريقه في القروش ، عاينت ليهو بعدم مبالاة، قام راق كدا و براحه قالي :

_وشك مالو ؟
*مم مافي شي 

_انتي في زول ضاربك يا علياء؟

*لالا 

_ماتقولي لي لالا 

*ما تدخل في حياتي لو سمحت

_لا حاتدخل ، اذا بتتعرضي للضرب وريني عشان اقدر اساعدك 

*كل الحصل اتزحلقتتا 

_قالي ،دا اثر زول ضاربك كف 

*عن ازنك ّ..

_عليا استني ...!

*م تجي وراي لو سمحتت

_عليا .....
مشيت و خليتو ..

*في الحلقة الجاية*

_شغليها عندك 

*لالالالا ما دايراها 

_مشكلتك شنو معاها زي الغيرانه كدا يا رخاب كان ما اخاف الكضب 

*اغير من الجربوعه الشحاته دي ، شكلك انتي الغيرانه و شايلاها معاها تقيله و زاتا بعد العملتو فيها دا م حتقبل تشتغل عندي ..

_لا يختي انا م غيرانه منها بس عندي معاها فهم 

*طيب بحاول ، بس كيف 

_اعملي فيها عاوزة تعتذري ليها و اعملي سلمى كبري 

*خليها عليها ، طالما ختيتها في راسي حأجيبا يعني حأجيبا يا #رغده .. 

السُّقوط درجات ...

أدناها السُّقوط من العين , أوسطها السُّقوط من التَّفكير ,

و أقصاها السُّقوط من القلب , و أوجعُها السُّقوط في حفرة !!

#استككانة.🐸. و اسفه علي التأخير ..
نتلاقا بكرة
يتبع ....