زوجة لسبعة أيام

١٣

من جيت داخلة حبوبه تعاين فيني مستغربه الملابس الحلوة واالغريبه ، مشيت عليها بوستها واطمنت عليها ، و وريتا انو ادتني ليهم بت ظريفه ، كداا 

طبعاً قاعده جمب حبوبه و جسمي دا بينتح كدا من الارهاق خصوصا رجلي ، قعدت افكر انا المرة الفاتت خليت قروشي في الشنطه و اختفت اسي دي اختها وين ! 

قمتا ، طلعت العبايه ، و طلعت الاكل من الاكياس ، ختيت لحبوبه وقعدنا ناكل ، و بتبسم براااي زي المجنونة .. بعد انتهينا من الاكل ، لملمت حاجاتي ، و القروش ختيتا جوا صدري دا اامن مكان ،، اتزكرتا وليد ، قمت فتشت تلفوني ، لمن لقيتو ، و قاعده افتش في العرف البيشبه التسعه ، لمن اتوصلتا ليهو ولقيتو ياهو نفس شكلو الحفظتو .. 

اتصلتا عليهو ، جرس طوويل ، حتى رد علي .. قالي 

_السلام عليكم 

*وعليكم السلام ، انت وليد ؟

_ايوة انا

*انا علياء يا وليد

_عليا منو ما عرفتك !

*اااا اناااا الجبت لي علاج حبوبة و قلت ليك بسدو ليك ، جيتك في الصيدلية..

_اي اي عرفتك ، ازيك ، انتي كويسه ؟

*حمدلله 

_يعني العلاج داك كان لحبوبتك 

*اي ، انا دقيت عليك عشان قبيل جيت الصيدليه لقيت مافيها زول 

_لا زميلي شغال ، ان شاءالله خير محتاجة دواء تاني ولا حاجة ؟

*لالا جزاك الله خير ، كنت دي دايرة اديك الامانة واشكرك بس

_يا زولة متين هو ، مالك مستعجله كدا

*حمدلله ربنا سهلا و بتحمل اي شي الا الامانة و من سد دينه نامت عينو دام الله فرجا دي براها محمدة ..

_ما بيناتنا يا زوله والله وانا عافيك لله والرسول

*الله يخليك بس وريني متين القاك في الصيدليه كمان عايزة اشيل علاجات تانيه 

_خلاص العصريات كدا بتلقيني ان شاءالله بس لو ممكن وريني العلاجات شنو عشان او ما متوفرة عندنا اجيبا ليكي معاي من الفرع التاني. . 
*شريطين حبوب

_اديني اساميهم

*ما بعرف

_مليني حرف حرف ّ

*مابعرف اقرا 

_اها ، تمام جيبيهم لي معاكي بكرة 

*ان شاءالله.. مع السلامة

_في امانة الله ..

قفلتا منو ، وبقيت قاعده مقابله حبوبة .. 

(في جانب رحاب واحمد )

*ممكن اجي ارجعك م مشكله 

_لالالا ما تتعب نفسك معقول تخلي شغلك عشان ترجعني ، انا بدبر نفسي مع بنات خالاتي ..

*مافيها حاجة اجي ارجعك البيت و ارجع شغلي

_لالا م تتعب نفسك يا احمد انا برجع

*خلاص خليكي متواصله معاي تلفون طمنيني ..

_انت ما حتجي ؟
*بحضر العقد بكرة ، العرس كلو عبارة عن عقد اصلاً ، لكن اوعك تقشري شديد بعدين

_اجي ، ليييييه يعني انا ياداب عروسه

*عارف انك ياداب عروسه واجمل عروسه كمان بسس بخاف يسحروك لي يا رحاب ..

_جد؟

* اااي جد ، عارفه يا رحاب ، اي زواجنا كان مدبر يعني النصيب جمعنا و ما جات فرصه نحب بعض قبل الزواج بس حاعترف ليكي اعتراف ، من اول مرة شفتك فيها حسيت اني بحبك زي البعرفك لي زمن ، وكنت فرحان بيكي و والله يا بت الناس كان ما اخاف الكضب انا بحبك و عيني مليانه بيكي يا رحاب. .

_بتحبني انا ! 

*يعني ما حاساها في تصرفاتي ؟

_حاساها اكيد بس م اتوقعت تحبني 

*يا بت انتي هبله ! انتي اسي مرتي ولازم احبك ، ااي هو ما فرض علي لكن حبيتك وفكرة انك مرتي دي بتطمني و بتريحني شديد ... 

_الله يخليك لي و ما يحرمني منك 

*ولا يحرمني منك ياخ ، رايك شنو نطلع 

_وين ؟

*قومي اللبسي قومي خلينا نطلع ياخ 

_فجاة كدا ؟

*اي فجاه قومي اللبسي بسرعه اي حاجة لانو بالعربيه ..

_طيب طيب بس قبل اللبس دايرة اقوليك حاجة ّ

*اامريني 

_عاوزة عربيه 

*امممممم ممكن تصبري على 15 يوم و اجيب ليكي احلى عربيه ، بس انا كمان عندي شرط ..

_جد .. قولو ياخ موافقه موافقه

*هههههه يا ستي شرطي بس لو حتخلي بالك من نفسك انا اجيب ليك عربيه وعربيه وعربيه ولو عايزة عيوني زاتو اركبهم ليكلمبات قدام للعربيه زاتوو عندي منو غيرك انا ..

_حبيبي ربنا يخليك لي وعندي طلب تاني 

*بعد حبيبي القلتيها دي اطلبي عيوني بس

_تسلم لي عيونك 

*الله يسلمك لي 

_زي ما شايف يا احمد البيت كبير و طابقين و انا خصوصاً اني عروس م بقدر عليهو براي ، بس كنت عاوزة لي حبشيه ..

*حاااااضر من عيوني جيبي العاوزاها 
_بالجد الله ما يحرمني منك 

*ولا منك .. يلا ياخ قومي اللبسي اي حاجة بسررررعه ، عشان بكرة طالع بدري

_طيب يلا دقايق بس .. 

.اما انا . كالعاده ملل ، ونفس روتيني 

وانا منتظرة العشاء يأذن عشان اصلي وانوم ، سرحتا ولاول مرة احلم او اتمنى ان تكون لي غرفة نوم زي بتاعت البت القبيل .. قلتا في نفسي هي سالتني من اسمي ، طيب انا ليه ما سألتها من اسمها ؟ و يا ربي بكرة حتعاملني حلو كدا برضو ؟ ااااخ يا رب تسخر لي عبادك يا رب و تسهل لي اموري ياربي يا كريم .. 

صليت العشاء و غطيت حبوبتي و قفلتا بيبانا و نمته ..

#استككانة🍉°...

يتبع ....