Everything Has Changed (The Neighbors Series #1 - Published under Pop Fiction)

One

Chapter 1
Tayong Dalawa

**

"Excuse me! Nagmamadali lang," sabi ko habang pinipilit na sumingit sa mga estudyanteng nagkalat sa hallway.

Seriously, bakit kung kailan nagmamadali ako saka naman nagkalat ang mga estudyanteng ito sa daan? Kailangang-kailangan ko nang makapunta sa field!

"Hey, watch where you're going!"

"Sorry!" sigaw ko habang patuloy pa ring tumatakbo.

Kainis naman kasi! Late na kami pinalabas ng teacher namin. Ang dami kasing pasaway sa classroom kaya late kaming pinag-recess. Kailangan ko nang makarating agad sa field dahil siguradong kanina pa ako hinihintay ng mga kaibigan ko.

Nang makarating ako sa field ay huminto ako saglit habang naghahabol ng hininga. Inilibot ko ang mga mata ko para hanapin ang mga kaibigan ko at nang makita ko sila ay tumakbo agad ako papunta roon.

"Sorry, na-late ako," sabi ko habang hinihingal na umupo sa tabi ni Bree.

"Bakit ba kasi ang tagal mo?" tanong ni Saff.

Si Sapphire Briones, isa sa mga kaibigan ko. May pagkamataray siya pero sa aming mga kaibigan niya, mabait siya. At kahit na ganyan siya, matalino siya. Siya ang top one sa section nila. Sa pagkakaalam ko nga, running for valedictorian siya sa batch namin.

"Alam niyo namang marami akong pasaway na classmates, 'di ba? Ayun, damay na naman ang buong klase sa kakulitan nila kaya late kaming pinalabas ni Ma'am," sabi ko habang inilalabas ang baon ko.

Dito sa field kami madalas kumakain ng mga kaibigan ko. Kahit na hindi kami classmates ay sabay-sabay pa rin kaming kumakain kapag recess at lunch. Actually, magkaklase silang dalawa at ako lang ang nahiwalay. Parehas kasi silang matalino kaya nasa pilot section sila. Ako, medyo lang. Pero hindi naman ako bobo. Mataas pa rin naman ang grades ko.

Kaya kami naging magkakaibigan ay dahil matagal ko na silang kapitbahay. Hindi ko naman sila childhood friends. Basta naging kaibigan ko sila mula nang lumipat sila ng bahay sa tabi ng bahay namin. Mas naunang lumipat noon sina Saff at ang sumunod ay sina Bree.

"Ano ba 'yan? Malapit na tayong grumaduate pero ganyan pa rin sila? Paano sila sa college niyan? Tss!" himutok ni Bree habang kinakain ang lunch niya.

Si Brianna Rosales, isa rin sa mga kaibigan ko. Matalino rin siya tulad ni Saff. Pero siyempre, mas matalino si Saff. Siya ang pinakamahiyain sa'ming tatlo. Minsan, nahihiya siyang gawin ang isang bagay dahil tingin niya ay hindi niya kaya. Pero minsan, hindi niya nare-realize, nagagawa na niya ang isang bagay nang siya lang mag-isa.

Napailing na lang ako. Bahala sila. Buhay naman nila 'yon.

Napatigil ako sa pagkain nang may maalala. Bumaling ako sa mga kaibigan ko.

"Girls, mamaya nga pala, hindi ako makakasabay umuwi," sabi ko. Tumingin silang pareho sa'kin.

"Bakit?" tanong ni Bree.

I shrugged. "It's Tuesday."

Bigla namang napahampas sa mesa si Saff at ngumiti nang nakakaloko. "Ah. Sabay ulit kayong uuwi ng jowa mo."

Napakunot-noo ako at muntik nang masamid. "Anong 'jowa'? Hindi ko siya jowa, ah."

"Sus! Pero crush mo."

"Huwag nga kayo. Tigilan niyo 'ko," sabi ko habang tumatawa sila.

Tss! Lagi na lang nila akong tinutukso kapag hindi ako sumasabay sa kanilang umuwi. Isang beses lang naman sa isang linggo ako hindi sumasabay sa kanila.