Achilles

Chapter Eleven

Lumapit ako sa kanya at inayos ang bow tie niya. Tiningala ko siya. Nakatitig sa akin si Keeper at kahit hindi nito sabihin ay may paghanga akong nababasa sa mga mata niya. Tahimik siyang tumalikod at naunang maglakad palabas ng boutique. Magkaibang sasakyan ang gagamitin namin. Dalawang magkasunod na mga kotse ang huminto sa harap namin nang makalabas kami. After a moment, nakasakay na ako sa kotse papunta sa party.

ENGRANDENG party ang dinaluhan namin sa isang five-star hotel. Napakaraming tao at ang ilan ay kilala ko pa since negosyante rin ang Daddy ko. Ang iba ay sikat na mga artista at entertainment personalities. But nothing beats good food. Na-miss ko ang mga masasarap na pagkain. Kalilimutan ko muna ang anumang diet at kakain ako ng marami but with poise. Kahit gaano ako katakam sa pagkain ay dapat maging maganda pa rin ako at demure.

"I haven't seen you for so long. Kumusta?"

Napabaling ako sa nagsalita. Isang lalaking gwapo ang kausap ni Keeper. Naririnig ko silang nag-uusap since nasa likuran lang nila ako at tahimik na kumakain. Medyo pamilyar sa akin ang kausap ni Keeper. Malamang nakita ko na siya sa mga business magazines.

"I'm fine. Hindi ko yata nakikita ang kakambal mo," puna ni Keeper.

"Si Elisha? Nasa honeymoon pa."

"Narinig ko ngang ikinasal na siya pero private ang wedding. Konti lang ang guests."

"Tama ka. By the way, kumusta ang mga kapatid mo? Si Aurora?"

"Talagang si Roiri lang ang kinumusta mo ha? Kung 'di ko pa alam na mahilig ka sa mga mas matatanda sa'yo," natatawang sabi ni Keeper. Natawa rin ang kausap niya. Mukhang pareho pang babaero ang dalawa.

"Ano ka ba naman? Hindi ko isasali si Roiri sa mga adventures ko. We're friends," nakangiting sabi ng lalaking kausap ni Keeper. "Nagtataka lang ako kasi hindi ko pa siya nababalitaang ikinasal eh malapit na siyang mag-thirty. I'm sure nag-aalala na ang mommy ninyo. O baka naman hinahanapan na niya kayo ng mapapangasawa."

"Parang ganon nga ang plano niya."

"That's tough. May napili na siya para sa'yo?"

"Parang meron na nga pero tinakasan ko." Natawa ang lalaki. Saka ko naintindihan kung ano talaga ang dahilan kaya tumakas si Keeper sa England.

"Then I guess you should take care of that. Hindi mo pwedeng takasan ang mommy mo forever," payo ng kausap niya.

"I know. Pasasaan ba at susuko rin ang mama ko," nakangising sabi niya. Nagpaalam na ang kausap niya. Binalingan ako ni Keeper. "You're eavesdropping."

"Sabi mo kailangan nasa malapit lang ako eh." Hindi siya umimik. "Pinipilit ka ng Mama mo na ipakasal sa babaeng 'di mo gusto."

"So?"

"Wala lang," sabi ko saka nagpatuloy sa pagkain. "Tanggap na ba talaga ng Mama ninyo si Raphael para sa kapatid mo?" tanong ko. Hindi ko talaga feel na bigkasin ang pangalan ng goth girl na 'yon. Nakakarindi talaga.

"Under three-year probation si Raphael pero 'wag mong iisipin na gumawa ng masama sa loob ng three years na iyon dahil kapag ginawa mo 'yon –"

"Sinabi ko ba na may gagawin ako?" mataray kong sabad. Bakit parang nakakabasa ng isip ang lalaking ito?

"Naninigurado lang ako," seryoso niyang sabi. "Pupunta muna ako ng men's room. Kapag 'di kita inabutan dito, may mangyayaring hindi maganda sa'yo."

"Opo."

Umalis na nga siya. Nakakainis talaga ang pagiging demanding niya pero ayoko siyang suwayin. Ayoko siyang galitin dahil sigurado akong may mangyayari ngang masama sa akin kapag ginawa ko 'yon. Natuto na ako.