اسكربتات

اسكربت³⁷

_ ياستي غوري بقى أنا مجبور عليكِ أساسا ومش
بطيقك.
= غورة لما تؤش شكلك ومش عايزة أشوف وشك الغبي دا تاني.
"سيبته وروحت أغير الفستان في أوضة الأطفال، نسيت أعرفكم عليا: اسمي إســــراء بدوي والقريب مني بيناديني ب وَرد ولسة من شوية كنت عروسة زي القمر بس بقى جواز صالونات ومش بنحب بعض خالص بس..... "
= ألو ياماما، اطمنوا وطمنوا قلوبكم من ناحيتي الدخلة تمت الحمدلله.....سلام عشان بلال بيناديلي عشان نتعشى.
"كدبت ومثلت ولسة ياما هكدب تاني، احنا أصلا بنكره بعض موت واتخانقنا أول ما فتحنا باب الشقة اللي المفروض أي بنت بتفرح وتبدأ حياة جديدة مع شريك حياتها الجديد أومال أنا شايلة الحزن من أولها وكل واحد راح على أوضة ومش طايقين نبص في خلقة بعض "
_ افتحي عشان تمضي على الورق بتاع فلوس أبوكِ النصاب.
= والله احنا عارفين مين النصاب الضلالي ومش هنقول، هات الورق أمضيه عقبال مامضي على ورق طلاقي منك.
_ والله انا اللي منتظر اليوم دا بفارغ الصبر.
= خد الورق أهو...خدك عزرائيل يابعيد.
_ والله همد ايدي عليكِ وهخليكِ تموتي في ايدي لو مبطلتيش.
= مد كدا وأنا أقطعلك ايدك ورجلك.
_ انا مش همد المرادي عشان اللي يجي يزورنا بس، بس المرة الجاية هكسر دماغك.
= ياما خوفت وركبي سابت وضغطي وطي وهموت ههههههه.
_ يلا ياماما اتفضلي على أوضة النوم.
= أوضة نوم مين ياحبيبي؟ كل واحد ينام في أوضة.
_ لأ يا غالية أصل أنا مسحت ديون أبوكِ من دفاتر الناس عشان أتجوزك ياحلوة مش عشان كل واحد في أوضة ههههه.
= لو كنت ناسي أفكرك، إنت مسحت ديون أبويا عشان تتجوزني سنة وتغيظ مراتك أصدي طاليقتك اللي خانيتك مع ابن عمك، يعني مش متجوزني حبا فيا وكدا عشان ننام في نفس الأوضة.
_ اه يعني إنتِ عاملة فيها ناصحة وكدا، تمام أوي وعشان إنتِ بنت ناس فقرا هحترم كلامك دا بس بشرط.....تعامليني قدام الناس كإنك مراتي وفي البيت تعملي الأكل وتروقي عليا زي أي زوجة وتهتمي بيا وإلا وعزة جلالة الله أطلقك دلوقتي وأمشيكِ بفضيحة، اوكاي؟
= اوكاي، يلا غور بقى.....ولا استتى، تعالى فكلي الطرحة عشان مش عارفة.
"بدأ يفكلي الطرحة وأنا قاعدة على الكرسي وحلفت بيني وبين نفسي إني هوقعه في حبي وأكسر شوكته وفرعنته دي رغم إني مش بحبه أصلا بس دماغي الناشفة بقى، لاحظته نعسان ومش قادر يقف"
بحنية= كفاية ياحبيبي بقى وأنا هكمل أنا، شكلك تعبان أوي.
_ حبيبي؟ ماشي.
" خرج وأنا قلعت الطرحة وغيرت الفستان ونسيت إنه اللبس في أوضة النوم فطلعت دماغي كدا من باب أوضة الأطفال أشوفه فين لقيته في الحمام فروحت جري أجيب بيجامة وآجي قبل ما ييجي جبتها وأنا طالعة بجري وهو داخل خبطنا في بعض ووقعنا وكان منظر فظيع بجد"
= يلهوي، معلش آسفة والله.
_ بتعملي ايه في الأوضة؟ بتسرقيني؟
= اه بسرقك وسيبني أقوم بدل ما أعضك.
_ قومي قومي أنا مش قادر أتنفس منك، كاتمة نفسي كإن عِجلة وقعت عليا من الدور الرابع.
= ههههههه.....سرحان في ايه ياعم.
_ ها؟ اه اه يلا عشان أنام عشان مش قادر على كلامك الكتير.
" هي ملامحها حلوة كدا ليه وضحكتها جميلة أوي ابعد يا شيطان بقى احنا بنا اتفاق ومش عايز أخلفه يلا عشان تنام يا أستاذ بلال يلا عشان دماغك مصدعة أساسا من دوشة الفرح"
_______________________________
- بيعت بنتك بالديون وارتاحت؟
- والله ما كنت موافق، هي اللي صممت وقالت تسد ديونك وبالمرة أتجوز يابابا.
- الله يسامحك ياسيد، كنت قولي أستلفهم من اخواتي، اخواتي مش هيقصروا معانا بس ايه، خلال شهر البت اتجوزت واحد ولا نعرفه.
- خير ان شاءالله ياحبيبتي خير، ربنا أكيد عملها الصالح وعملنا الصالح.
- يارب يكون زوج صالح ليها وميبهدلهاش يارب.
_______________________________
- شوفتي عروسته؟
- اه شوفتها مانا روحت الفرح.
- يا بجحة اييييه إنتِ بجحة ليه بجد.
- بباركله ياعم دا مهما كان طليقي.
- بس مراته محجبة ومحترمة وأحلى منك بكتييير.
- اه مانا شوفتها جميلة أوي.
- مش غيرانة؟
- وأغير ليه مانا معايا الأحسن منه أهو ههههه.
- بعد ما دمرتي علاقتي بابن عمي؟ منك لله يابعيدة.
- ايه عايز تطلقني إنت كمان ولا ايه!
- لأ مش هطلقك بس هعذبك معايا، تخدريني وتخليني أعمل حاجات أنا مش داري بيها وفي الآخر تيجي تقوليلي أنا مظلومة زيي زيك يا شيطانة.
- متصدقش أعملك ايه يعني.
- والله؟ حسابك بيتقل وهدمرك بردو.
_________________________________
= صح النوم ياحبيبي، حضرتلك الفطور.
_ حبيبي بردو؟
= أقولك يا بولة طيب؟ وبعدين بدل ما تقولي صباح الخير يا وردتي!
_ ايه اللي دخلك الأوضة؟
باستعباط= يلهوي نسيت احنا متفقين، معلش حقك عليا.
_ لو نسيتِ أنا هنسى وأظن إنتِ عارفة بتكلم عن ايه ههههه.
= يلا يا عريس بقى الفطار هيبرد، محشي وحمام من اللي بيرموا العضم دول.
_ آه منك آه ومن كهن البنات دا.
"فطرنا وشربنا الشاي وقعدنا في الصالة نسمع التليفزيون"
= ألله كارتون مستر بن ألله ألله ألله.
" وأنا بغني وفرحنا قعدت أتنطط وأرقص وهو قاعد يضحك على الطفلة اللي قدامه"
=معلش يا باشا متأخذنيش أصلي بحبه اوي.
_ هو مين.
= مستر بن وأي كارتون لطيف.
_ ادخلي البسي عباية وطرحة طويلة عشان شكل أهلك طالعين.
= حاضر يا بلال يا حلو يا مسكر.
_ يابنتي احنا اتكلمنا في ايه بالليل؟ قولتلك الدلع دا قدام الناس مش قدامي، قدامي وش خشب بس.
= لأ الدلع قدامك وقدام الناس عشان مبعرفش أبقى بوشين صراحة، هقوم ألبس عباية وإنت دخلهم.
"لبست عباية استقبال وطرحة طويلة وشوية كريمة تفتيح وروج قليل وكحل وطلعت بقى هو شافني قعد مبحلق بس"
= ايه؟
_ لأ لأ مفيش يلا ادخلي هاتي الحلويات وأنا هقعد معاهم في الريسبشن.
" جبت الحلويات وطلعت أقدمها لأهلي وأهله وفعلا أنا فرحانة مش بمثل الفرحة ولا كدا، ماما وأنا بسلم عليها فضلت قاعدة حاضناني وتعيط وأنا أهدي فيها لحد ما هديت وبابا مبسوط انه شافني مبسوطة وأهله ناس كويسين ومحترمين جدًا وبجد فرحانة إن ربنا رزقني بناس حلوة كدا"
_ كلوا الحلويات ياجماعة ومتتكسفوش دا بيتكم.
= إلا حتة الأكل دي ياجماعة عشان بلال بيزعل من اللي مش بياكل هههه.
- ربنا يسعدكم ياحبيبتي.
" بصيتله بكل حب"
= يارب ياطنط، يارب.
- طب ايه متيجوا عندنا تحت ونسيب العرسان شوية.
= هنزعل منكم والله، اقعدوا شوية كمان.
- لأ هننزل تحت عند عندنا وندردش شوية ونسمع أخبار غزة ربنا ينصرهم يارب.
_ ان شاءالله ربنا هينصرهم، ربنا بينصر المظلوم دايمًا ومستحيل ينصر الظالم ولو نصره مرة هينتقم منه ألف مرة.
" حسيته بيتكلم على طليقته فروحت حاطة ايدي على كتفه "
= فعلا ياحبيبي معاك حق.
" نزلوا واتوضيت وصليت ولاحظت إنه مش بيصلي"
= هو إنت مش بتصلي؟
_ متعودتش على الصلاة من صغري رغم إن أبويا وأمي ملتزمين.
= طب تعالي أعلمك الصلاة، دي هي عمود الدين بتاعنا وهي أول ما الواحد بيموت ويتدفن في قبره بيتسئل عليها، تعالى معايا أعلمك الوضوء الأول.
" دخل الحمام وبعد ما خلص دخلتله أعلمه الوضوء وقعدت أعلمه واحدة واحدة زي الطفل لحد ما خلّص وبعد ما خلص رش عليا ماية"
_ هههههه شكرًا.
بحنية مفرطة= العفو يا حبي هههه، علفكرا ضحكتك حلوة جدًا.
_ عارف.
= يلا بقى عشان تصلي يا نرجسي.
" علمته الصلاة بردو وصلى لوحده وكان بيطول في السجود شوية ودعيت إن لو خير ليا يجعله من نصيبي ولو شر يبعده وكمان دعيت إن ربنا يهديه"
_ شكرًا ليكِ بجد.
= العفو على ايه بس.
_ بس بتعرفي تمثلي هههه
= مكنتش بمثل ياحبيبي دا كان حقيقة قولتلك مش بحب اللي بوشين زيك.
_ والله؟ وإما أقوم أسفلت وشك دلوقت.
= قوم سفلته ياعم وشوف مين هيكمل معاك في فيلمك دا.
" سيبته ودخلت أوضة الأطفال ومسكت الفون شوية وروحت نايمة"
______________________________
- روحت فين بالليل.
- روحت في ستين داهية.
- طب كنت خدني معاك عشان بحب الداهية وهي معاك جدًا.
- إنتِ واحدة مقززة أوي والله وبكرهك وحسابي معاكِ القانون اللي هيخلصه.
- قانون ايه يا حبي.
- زي إني روحت الفندق اللي كنت نايم فيه وروحتِ إنتِ اتفقتِ مع عامل النظافة يغطي الكاميرات وإنتِ داخلة اوضتي، وزي ما حطيتِ منوم مركز في العصير وزي ما كمان خليتيني أبصم على ورقة جواز وأنا نايم وجبتِ حد يقلد امضتي وزي ما روحتِ نمتِ جمبي ويكإن حصل بينا حاجة وكدا بس الحمدلله عرفت كل دا وعرفت إني ملمستش واحدة نج!سة زيك الحمدلله.
- أيوا علمت كل دا وزيادة كمان، نصبت على بلال في فلوسه وكسرت قلبه عشان كنت بحبك إنت وإنت مش معبرني، اتجوزت بلال عشان أعرف أوصلك وفي الآخر تقولي نج!سة؟
- تمام يافندم تقدر تتفضل.
- في ايييه؟ إنت هتحبسني يا حقير؟
- شششش أمثالك هياخدوا إن شاءالله مؤبد يلا غوري.
" هتاخد مؤبد عشان طلعت تاجرة مخد،رات واللي اكتشف دا أحمد ابن عم بلال وكمان عشان نصبت وغيره"
__________________________
- الحمدلله ورد مبسوطة معاه الحمدلله.
- قولتلك إنهم ناس محترمة.
- فعلا وحماتها وحماها واخت جوزها ماشاءالله عليهم ارتحتلهم أوي.
- ربنا يسعدها هي وجوزها يارب.
- أنا عايزة أتجوز يا ماما بقى عشان أخفف عنكم شوية ههههه.
- تتجوز ايه يا بتاع تالتة ثانوي ههههه، روح ذاكر روح.
- يووووه ماشي.
ــــــــــــــــــــــــــــــــــــــــــــــــــــــــ
"عند أبو بلال"
- ما شاء الله مراته أخلاق وذوق جدًا ياصفية.
- حبيتها أوي وربنا يرزقنا منهم ذرية صالحة يملوا علينا البيت.
- يارب، بس شكلها بتحبه.
- الاتنين واقعين في بعض ههههه، إنت مشوفتش عينه منزلتش من عليها ازاي؟
- الحمدلله إنه نسي مراته التانية، ربنا يسعدهم يارب.
_____________________________
" أدخل؟ لأ ياعم هتدخل تعمل ايه؟ طب خلاص هدخل وخلاص أشوفها أديلها ٣ ساعات مش سامع صوتها ليه"
_ احم، إســــراء......إســــراء، اصحي.
" دي جمالها مش عادي، كإنها ملاك وهي نايمة وشعرها بيطير على وشها وشفايفها الحمرا وبيجامتها الأطفالي، يألله بقى معايا حتة السكر دي ومش واخد بالي؟ يأخي اسكت انتوا متفقين على اتفاق، انسى التخاريف دي"
بنعاس= اممم، بتعمل ايه هنا.
_ مساء الخير طيب، المغرب أذن تعالي نصلي.
= حاضر اسبقني طيب...... ثانية؟ إنت ازاي تدخل عليا وأنا نايمة كدا؟
_ قولتلك جيت أصحيكِ عشان تصلي.
= طب لو سمحت متدخلش تاني، يبقى خبط على الباب وهفتحلك.
" حسيت بالذنب وقومت، اتوضيت وصليت وهي اتوضت بردو وصلت ودخلت المطبخ وأنا قعدت على اللاب شوية لقيت الفون بيرن عليا، رقم ابن عمي"
_ ألو.
- عامل ايه ياصاحبي، أنا أثبت براءتي الحمدلله.
_ والله؟ فين دي.
- بعتلك التسجيل والجرنال اللي الزفتة اتفضحت فيه شوفهم وسامحني عشان فعلا معملتش حاجة ومش مستعد أخسرك نهائي، دا إنت أعز حد ليا في دنيتي بعد ما أبويا ما مات ملقتش ضهر أسند عليه غيرك يا صاحبي، شوفه ولو سامحتني رن عليا وقولي ولو لأ هحاول معاك تاني وتالت عشان اللي يصاحبك أحسن ليه إنه يخسر روحه على إنه يخسرك يا أغلى من أخويا.
بدموع_ وأنا سامحتك من غير ما أشوفه عشان كنت حاسس إنك ملكش ذنب ياحبيبي، يبقى تعالي باركلي واقعد معايا شوية عشان واحشتني.
ببكاء- ههههه مش عارف أعيط ولا أضحك حاضر حاضر حاضر من عيوني يابلال من عيوني، سلام سلام ياغالي معطلكش بقى.
" خلصت مكالمتي وقعدت أدمع وأنا بسمع الريكورد وأشوف الشيطانة عملت معايا ومع ابن عمي ايه ولقيت إسراء جت حضنتني وبتعيط"
= متعيطش، ربنا جابلك حقك منها وبعدها عنك عشان هي مش شبهك ولا تشبهلك ولا قلبها حلو زي قلبك.
ببكاء_ والله أنا تعبت، مشاكل كتير وفوقها الشيطانة دي تعمل عليا دور الحب وتخليني أتجوزها وأنا مش بحبها أصلا وتنصب عليا في مبلغ وكمان تورط ابن عمي اللي طلعت بيه من الدنيا، منها لله ربنا خدلي حقي منها الحمدلله.
= خلاص بقى دا إنت عيوطة أوي هههه.
بحزن_ متسبنيش يا إســــراء، متبعديش عني، كفاية الأذى اللي اتأذيته.
= بس احنا متفقين يا بلال على اتفاق.
_ وفيها ايه لما يكون جواز حقيقي.
= بس....
_ خلاص هسيبك براحتك، هاتِ الغدا الأول عشان جعان.
" اتغدينا وأنا من جوايا فرحانة أوي بس خايفة، خايفة ليغدر بيا أو ميكونش مأمن ليا، المهم كلنا وشربنا نيسكافيه وفتحت التليفزيون على فيلم هندي رومانسي."
_ يااه دا فيلمي المفضل دا.
" سمعناه وكانت فيه لقطات وحشة كنت بغمض عيني وهو يضحك عليا لحد ما خلص وهو يبصلي ويضحك وأنا مكسوفة أوي"
بخدود حمرا= خلاص بقى.
_ خجولة أوي وشكلك حلو وإنتِ مكسوفة كدا.
=....
" قومت جريت على الحمام أرجع الأكل اللي كلته في الغدا، مش بحب نوم بعد العصر وكمان النبيﷺ نهى عن النوم فيه فإما بنام العصر وأقوم أتغدى برجع ودي حاجة فيا من زمان"
_ ايه مالك.
= كح كح تعبانة.
_ حمل ولا ايه ههههه دا احنا معملناش حاجة حتى ههههه.
بخجل= بطل بقى عشان مش قادرة، وبعد كدا متسيبنش أنام بعد العصر عشان هو اللي بيخليني كدا.
_ كنت بحسب الحمل وكدا هههه، طب مانا عندي فكرا، متيجي ونجيب مليجي هههه.
= مليجي مين.
_ مش بتفهمي التلميحات شكلك.
= اه مش بفهمها.
_ أصدي نخليه جواز حقيقي وكدا يعني بدل ما ترجيع على الفاضي يكون ترجيع على مليان.
= إنت قليل الأدب وأنا ومش هخليه جواز حقيقي.
_ طب ليه، احنا خلال اربع أيام اتعودنا على بعض وأعتقد إنك حبتيني زي ما حبيتك.
= بس أنا خايفة.
_ متقلقيش أنا طيب وحنون ومأمن وحلو وأعجبك هههه.
" اطمنت من كلامه إلى حد ما"
= الباب بيخبط، شكله ابن عمك هههه.
_ الهروب علامة الرضا هههه اما يمشي هنخرج نتمشى على النيل.
= هيييه.
" عيشت أجمل أيام حياتي معاه وبجد بحمد الصدف اللي جمعتني مع الشخص الحنون اللطيف دا وفي النهاية حابة أقول:
"تخيل أن تجدَ ضالَّتكَ في عالمٍ، كلُ شيءٍ فيه يدعو للتيهِ!
أن تأنسَ ويؤنسُ بكَ، وتأمنَ ويؤمنُ بكَ
أن يُباع كلُ شيءٍ ويُشترى خاطِركَ
أن يُكتفى بوجودِك، فـ يهون كلُ شيءٍ ولا تهونُ أنتَ
أن تبارُككَ علاقةً، وتزيدُك امتنانًا لخالقِك
أن تتكيءَ للمرةِ الأولى وأنت لا تخشى السقوط.
أن يجبركَ وجود أحدهم
أن تُحِبَّ نفسكَ مجددًا وتراها أهلًا للمحبةِ."

"تمــسّك بـقلبي فإنـه يُحبـكᰔ"
بقلم/ إســــراء بدوي| وَردೀ.