اسكربتات

اسكربت²⁶

= أتجوز صعيدي عشان أوقف طار؟؟؟!
- اه ومن دون نقاش وجدال وياريت تسمعي الكلام.
= يعني ايه يابابا أتجوز واحد معرفوش وعقليته مش كويسة وليه تظلم بنتك كدا عشان توقف طار!
- بصي يا إســــراء يا بنتي، الطار دا من زمان وعشان ميكونش في خساير تاني اتحكم إننا نجوزك لواحد من الطرف التاني وكفاية اللي ماتوا بقى وعايزين نعيش في هدوء.
= بس يابابا إحنا مش عايشين مع جدي هناك في الصعيد عشان يتحكم علينا احنا بالذات الحكم دا.
- إســــراء، إنتِ البنت اللي عليها الدور في العيلة وولاد أعمامك كلهم متجوزين.
= طب سيبني أصلي استخارة طيب، أنا بكلمك كدا وقلبي بيتقطع والله مع إني لسة صغيرة، ١٧ سنة ايه وتتجوز ايه.
- أنا أعمل ايه طيب، وبعدين إنتِ كبيرة وعاقلة ومش عايزك تصغريني قدامهم يابنتي.
= حاضر.
"بمجرد ما بابا خرج قعدت أعيط
عياط هستيري، ليه يارب أتجوز واحد مشوفتش خلقته وكمان صعيدي، أنا يارب رغم إني صغيرة بس شايلة مسئوليات وشايلة حِمل تقيل وصابرة وفي الآخر أتجوز صعيدي! اللهم لا اعتراض يارب، نِمت وصحيت الفجر، صليته وقعدت في البلكونة أتأمل الكون وبحاول أصفي ذهني خالص قبل ما نروح الصعيد النهاردة، كتب الكتاب هيكون بعد بكرا هاهاها جوازة صالونات أوي ههه، ربنا يقدملي اللي فيه الخير"
= الطريق كام ساعة!
- ٥ ساعات.
= تمام.
" أمي وبابا وأنا وأخويا الصغير وأختي النونة سافرنا بالقطر، يارب لو خير يسرلي الأمور ولو شر ابعده عني يارب لإني مش حِمل غُلب يارب، لفت نظري في القطر واحد قمحاوي بملامح هادية بدقن خفيفة بطول وبعرض... يارب ارحمني بقى أنا رايحة أتجوز ههه، نمت وروحت في النوم  على كتف بابا وصحيت على وصول القطر"
= يلا يا إســــراء، فوقي.
- امسك ايدي طيب عشان أنا فاقدة توازني.
" مسك ايدي بس عند الباب سابها دوخت وأنا نازلة و..... أخويا سندني عادي مستنين أقولكم الشاب يعني! هههه لأ الشاب سبقنا هههه، روحنا عند بيت جدي وطبعا دا بيت كبير جدًا بس سكر زيي كدا، المهم طلعنا شقتنا وارتاحنا من السفر وبكرا خطوبتنا أنا والمجهول"
____________________
" في الجانب الآخر "
- يابا أنا مش هتجوز يابا، أنا لسة صغير على الجواز ولسة بكون نفسي وبصراحة مش عايز أظلهما معايا يابا إنت وجدي.
- ياولدي نحنا صوح مش رايدين الچوازة دي من أصله بس عشان التار يوقف ياولدي، نحنا من ميتا بنوطي راسنا، وبعدين الصُلح خير بردك ياولدي.
- طب والشقة والعفش وكل السهاري دي!
- متشيلش هم، نحنا هناخدلك شجة ايچار لحد ما نوضبلك شجتك اهنيه.
- طيب يابا، سيبني أرتاح من السفر عشان تعبان.
ــــــــــــــــــــــــــــــــ
" تاني يوم عند إســــراء "
= يارب إنت أكيد شايف إن دا خير ليا وأنا بصراحة مرتاحة إما صليت استخارة فيسرلي أموري واصلحلي الحال واجعله زوج صالح ليا يارب، الله أكبر... السلام عليكم ورحمة الله، السلام عليكم ورحمة الله.
- حرمًا يا بنتي.
= جمعا يا بابا.
- جدك قاللي إما إســــراء تخلص صلاة الفجر خليها تنزللي.
" نزلت وحرفيا البيت بيخليك تتوه فيه من كتر ما هو كبير، نزلت عند جدي وجدتي وجدي طبعا قعد يقنع فيا وكل الكلام دا وبعد ما خلصنا كلام نسوان عمي وأمي حضروا الفطور وأكلنا وشربنا الشاي وقعدنا في الجنينة نتساهر ونضحك أنا وولاد عمي ونسوان أعمامي وجدتي، وبعدها لقينا ناس بتنصب صوان كبير واتضح إنه المسرح اللي أنا هقعد عليه وبنات عمي اللي هم أكبر مني ومتجوزين طلعوا جهزوني ولبست فستان جميل جدًا ورقيق ومحطتش ميكب ولفيت الطرحة وأهل العريس وصلوا والعريس وصل اااه لقد هرمنا من أجل هذه اللحظة بجد هههه، عندنا في الصعيد تقاليد وهي العروسة بتحط شال على وشها والعريس يشيله ودا بيبقى أول لقاء بينهم فطبعا حطوا على وشي شال ووقفوني في نص البيت والمعازيم برا في الجنينة وراح شال الشال هههه.... ايه دا دا الواد بتاع القطر، يا مساء السكر جدًا ياولاد"
بخجل= احم، هو حضرتك اسمك ايه.
- ها.... ها... اسمي؟.. اسمي أحمد.
= تشرفت، وأنا إســــراء.
" طبعًا أنا خجولة أصلا وهو قعد يتهته في الكلام إما شافني بس حسيت انه فرحان، طلعنا على الكوشة ولبسني الشبكة ولبسته الدبلة وبعدها لقينا ضرب نار كتير في السما وكبار العيلتين فرحانين وبيضربوا نار في السما طبعا أنا خوفت جدًا من الصوت"
= أنا خايفة جدًا... خايفة.
- متخافيش.... أنا جمبك، تعالي ندخل جوا.
" دخلنا جوا في الصالة وقعدنا على كرسين وجابولنا تورتة، ياجدعان والله لو الخطوبة حلوة كدا مكنتش رفضت في الأول ههه، المهم بعدها دخلنا نتعشى أنا وهو وطبعا في برا عجول مدبوحة وطباخين وحاجة قمر أوي وأغاني وفرحة العيلتين بعد نزاع الخصام للحظة إما عرفت إني صلحت بين عيلتين فرحت وعيطت وآنا بتعشى معاه".
- بتعيطي ليه طيب!
بدموع= احنا رجعنا الفرحة للعيلتين تاني يا أحمد.
- ههه قولي اسمي تاني كدا.
بخجل= أحمد ههه.
= عارف يا أحمد أنا كنت بحسبك هلاقيك واحد جاهل وغبي وحقير والله هههه.
- وبعدين!
= هو احنا كتبنا الكتاب، صح؟
- اه.
= وبعدين لقيت واحد قمر بعضلات وعسول ومثقف وأصلا كان عايش في مصر، بص يا أحمد أنا بصراحة مرتاحالك جدًا من ساعت ما صليت استخارة وكنت بدعي ربنا إنك تكون زوج صالح ليا وربنا مخيبش ظني الحمدلله.
- أنا علفكرا.. احم... أنا عارفك من زمان من وأنا كنت في مصر بس مكنتش أعرف إن إنتِ أصلا من الصعيد وكدا وبصراحة كنت بحبك أوي وبدعي ربنا بيكِ كل يوم وإما قالولي هتتجوز من الصعيد زعلت جدًا إن خلاص إنتِ هتروحي مني بس لما عرفت إن إنتِ فرحت جدًا وكنت عايز أسجد ركعتين شكر لربنا إنه استجاب دعواتي.
بدموع= ياااه هو إنت بتحبني كدا!
- أكتر من كدا والله، أنا بتمنى من ربنا إنه يخليكِ تحبيني زي ما حبيتك.
بدموع= ما أنا خلاص حبيتك ياحبيبي.
- طب نخلص أكل بقى عشان مش هعرف أسيطر على نفسي زيادة عن كدا ههه.
" وشي احمر جدًا وبقيت أخبي وشي بإيدي من الكسوف"
- عارف إنك مكسوفة وكمان خدودك حمرا ههه.
بخجل= طب يلا دول عايزينك برا بسرعة.
- ماشي يا حلوتي.
" حاسة بالأمان معاه جدًا وفرحانة إن ربنا جبر بخاطري ومخيبش ظني و... دا بيضرب نار برا هههه، شوفته من الشباك وهو بيضرب نار وبعدين رقص وباين عليه الفرحة جدًا، بعدين جه حد كلمه ففرح أكتر!! طبعًا أنا قعدت أتأمل فيه من شباك الأوضة ربع ساعة فلمحني وبرقلي بعينه إني أدخل جوا فدخلت مع ان الشباك كان صغير"
- إنتِ بتبصي ليه من الزفت.
= آسفة بس كنت بتفرج عليك.
- متتكررش تاني.
= إنت بدأت تغير ولا ايه ياباشا؟ ههه، وبعدين مما الراجل دا وشوشك فرحت كدا ليه! قالك نكتة!.
- مبدأيًا كدا أنا بغير وجدًا كمان، ثانيا الراجل بيقولي إنه الفرح بكرا يا عروستي.
بخجل وحياء جدًا= طيب يا عريسي.
- ههههه، بقيتي كتكوتة حمرا ليه ههه.
بخجل= أحمد بقى!
- يا قلب وعيون وحياة أحمد.
= عايزاك توعدني بحاجة.
- اتفضلي يا مدام أحمد.
= عايزاك توعدني إنك هتتقي ربنا فيا ومتزعلنيش ولو زعلتني صالحني عشان آنا قموصة وغيورة كمان، عايزاك سند ليا وضهر أتسند عليه وقت ضعفي، عايزاك تفضل جمبي علطول ومتبعدش عني عشان الفراق أكتر حاجة بكرهها، عايزاك تكملي تعليمي وعايزاك إما تيجي من الشغل تجبلي معاك حاجة حلوة ههه، شوكولاتة بقى أو مصاصات أو غيره وأفضل المصاصة اللي بالفرولة، عايزاك يا سيدي ليا وبس كدا.
- كل طلباتك أوامر ياست ورد.
= وإنت! أصبحت لإســـراء بدوي |وَرد ملكٌ على عرش قلبها.

"تمـسّـك بِــقلبي فانـه يُــحبك♥"
بقلم/ إســــراء بدوي|وَرد.