اسكربتات

اسكربت²³

بدموع= إنت عبيط، إنت عايز تنتحر وتموت كافر، طب فكر في الناس اللي بتحبك، فكر في أمك وأبوك وأختك لوجي، فكر.... فكر فيا.
- عايز أموت عشان زهقت من الدنيا دي وعايز أغور.
= طب استهدى بالله وانزل من على السور، انزل بالله عليك.
- متعيطيش طيب، امسحي دموعك دي.
= بتغير عليا من الدموع ولا ايه ههه.
-لأ عشان شكلك وحش وإنتِ بتعيطي.
"قلبي اتكسي نصين بالمعنى الحرفي، أنا للدرجادي وحشة ومش بيحبني، أنا بحبه وهو ولا حاسس بيا ولا بقلبي اللي كان هيموت لما شوفته هينتحر، أنا زهقت من الحب اللي من طرف واحد دا"
- ايه متنزليني، سرحتي في ايه.
= لأ ماسرحتش في حاجة، خد الجردل دا انزل عليه... أنا نازلة.
-إســــراء.
=عايز ايه.
-متقوليش لحد حاجة.
= ماشي.
"نزلت وقلبي حاسة انه اتكسر واتفتت لمجرد إنه حب انسان مش بيحس، أنا تعبت يارب.. تعبت وفاض بيا ومش عارفة أكره، ليه يارب زرعت حبه في قلبي، يارب شيل حبه من قلبي أنا خلاص مش حمل إني أحب تاني"
- مالك يابت دبلانة كدا.
= ها... مش دبلانة ولا حاجة بس الجو حر.
- طب ادخلي اغسلي المواعين وإنتِ هتفكِ.
= ماشي مع إنك بتضحكِ عليا عشان أغسلهم عنك بس اشطا.
"دخلت وشغلت أغاني وأنا بنضف المطبخ وأغسل المواعين، جت أغنية بتوصف حالتي جدًا.. حزنت وفكرت فيه، ليه مش حاسس لحد دلوقتي بحبي ليه؟! أنا تعبت وممكن أسافر يمكن أنساه، خلصت المواعين وعملتلي كوباية ليمون بنعناع تطري عليا في الحر دا وطلعت البلكونة أشم هوا يمكن النار اللي جوايا دي تهدى"
= مش أحمد اللي هناك بيلعب كورة مع العيال بتوع الشارع ، هاهاها وكان هينتحر من شوية، بجد بخمسين حالة في الدقيقة، يارب اجبر بخاطري واجعله من نصيبي لتشيل حبه من قلبي خالص، أه أه شوفي دا جاب جول هههه فظيع، إما أصوره بالكاميرة كدا.... الصورة يلهوي قمر أوي طالع كإنه زي صلاح في الصور، هبقى أبعتهاله إما أشحن بقى.
- إنتِ يامجنونة ياللي بتكلمي نفسك.
"اتخضيت وقلبي اتنفض، هو.. هو اللي بيكلمني من تحت البلكونة، استر يارب"
= ها... إنت مالك أكلم نفسي ولا لأ.
- احترمي نفسك معايا.
= إنت عايز تتخانق يعني ولا ايه مش فاهمة.
- أنا طالع أهو أطوحك من فوق.
= ههه مش هتقدر.
" يلهوي دا طلع بجد، استرها يارب عليا"
- وأديني قدرت وطلعت.
= ط ط طب كويس.
- بصي في عيني كدا.
= أهو بصيت.
- بصي لمدة دقيقة بالظبط.
"بصيت وعيطت ومقدرتش، عينه جميلة أوي، عيطت لإنه قاسي ومش حاسس بقلبي"
- بتعيطي ليه.
= عيني وجعتني.
- طب أنا طالع وابعتي الصورة.
= عرفت منين إني صوّرتك.
- هههه أنا شايفك من أول ما دخلتِ البلكونة وعارف إنك صورتيني.
= طيب أبقى أبعتهالك.
- ماشي... عايزة حاجة؟!
بخفوت= عايزة قلبك.
- ايه.
= هعوز منك ايه يعني.
- طيب ياختي.
" أنا هحاول أكره وربنا يقدرني بقى"
- خدي يا إســــراء ساعديني في تجهيز الأكل.
= حاضر يامامتشي... اطلعي وأنا اللي هعمل الأكل، هوريكي ابداعي ههه.
-استرها علينا يارب ههه، خلصيه طيب عقبال ما أطلع أعزم أم أحمد وأحمد ابنها ولوجي يتغدوا معانا.
= تعزميهم؟! ط ط طب ماشي.
"ياناااا، أمي عايزة تعزمهم على الأكل بتاعي، أينعم أكلي لا يعلى عليه بس هو... هو هيجي ياكل اوووووف يعني أنا بحاول أكره وأنساه وفي الأخر أمي تعزمهم صبرني يارب، شغلت أغاني كالعادة وأنا بعمل الأكل وقعدت أغني وأنا بحط الأكل على السفرة، هم لسة منزلوش الحمدلله، حطيت الأكل وشكلته بقى على زوقي ولبست طرحتي ودريسي وطلعت عشان أنادي عليهم ينزلوا ياكلوا"
= ماما... يلا.
- حاضر جايين اهو.
" نزلت هي وطنط ولوجي وأنا سبقتهم وجهزت كل حاجة والمياه والعصير وكمان جهزت الشاي عشان عقبال ما نخلص أكل أصب مياة علطول"
= تعالي ياطنط، اتفضلي، كلي ومتتكسفيش.
-تعالي ياماما هنا، كلوا بقى وقولوا رأيكم.
- أحمد بيخبط افتحيله يا إســــراء.
"فتحته وكنت باصة على الأرض عشان ماشوفش عينه ودخل قعد قدامي، اتجاهلته وكلت براحتي خالص، خلصنا أكل وشربنا الشاي وهو عمال يبص وأنا أتجاهل، مشيوا أخيرا وأنا دخلت أصلي وبعديها نمت"
- قومي يا إســــراء، في عريس متقدملك.
= عريس ايه على الصبح.
- أحمد... أحمد ابن أم أحمد اللي اتقدملك.
ببرود= وأنا رافضة ومش عايزاه.
- بطلي عبط، أحمد مؤدب ومحترم وإنتِ عايزة حد محترم وعنده أخلاق، وبعدين إنتِ تطولي تتجوزي أحمد؟!
= لأ مطولش وعشان كدا مش عايزاه.
- طب أنا هسيبك النهاردة تفكري وتصلي استخارة وبكرا هييجوا.
= طيب سلام بقى.
"كملت نوم ولا كإن حاجة حصلت، سلمت أمري لربنا في الموضوع دا، أنا ممكن أكون بحبه جدا بس هو مش بيحبني بيتقدم ليه، يارب ريح قلبي تاني يوم صليت الفجر وطلعت من البلكونة لقيته جاي من الصلاة وبيكلم بابا وبيضحك، دخلت تاني جوا، أنا مش زعلانة إنه اتقدم أنا زعلانة إنه أخر عليا أوي، يارب بقى".
- يلا الفطار.
= حاضر، قومت أهو.
- أكيد عارفة إن النهاردة العريس جاي.
= أيوا عارفة يابابا.
- طب ياقلب بابا، خدي الفلوس اللي عايزاها وانزلي اشتري فستان وافرحي كدا.
= حاضر.
" نزلت أتسوقت لوحدي وجبت فستان زهري على طرحة أوڤ وايت وجيت، المغرب أذن... صليته ولبست الفستان وحطيت ميكب بسيط خالص وطلعت أقابله"
- احم... هو إنتِ هتفضلي ساكتة كدا.
= هتكلم أقول ايه.
- قولي وفضفضي وقولي رأيك فيا وفي المفاجأة دي.
= طب ممكن تحكيلي إنت بتحبني ولا لأ؟!
- هقولك... أنتِ عارفة أول يوم جينا فيه نسكن في العمارة هنا ساعت ما كنا صغيرين!! شوفتي إنتِ البت القردة اللي كانت دايما تدافع عني وتشجعني وتلاعبني بألعابها من ساعتها وأنا بحبك وعايزك وكل ما أقول لأمي عايز أخطبك تقولي إنك لسة صغيرة وأنا كمان صغير لحد ما خلاص مش قادر أشوفك جمبي علطول من غير ما تعرفي إني بحبك قد ايه، كل ما أحس إنك هضعف قدامك كنت بعاملك بقسوة عشان ماضعفش، فاكرة لما كنت هنتحر أنا كنت بعمل كدا عشان فاض بيا وعايزك معايا والظروف مش سامحالي مش حكاية فلوس حكاية إنك كنتِ لسة صغيرة، أنا عايزك معايا يا إســــراء، أنا عايز تبقي مراتي وصاحبتي وكل ما عندي أتمنى توافقي يا إســــراء بجد، أنا بحبك وعايزك جمبي، وبالمناسبة أكلك حلو وزي المطاعم وأحلى كمان، وافقي بقى.
= بس... بس إنت محستش بحبي إلا دلوقتي.
بحسرة- يعني أنا اترفضت خلاص؟!
= ها....لأ أنا موافقة يا أحمد، بس عايزاك تقولي بحبك تاني هههه.
- طب بحباااااااااااااك.
- جرا ايه ياعيال.
- مفيش حاجة ياطنط، بس عايز أكتب الكتاب دلوقتي.
- اتصل طيب بالمأذون.
- يعني إنتِ موافقة؟!.
- آه.
= جرا اييه....يعني هيبقى جوزي كمان شوية؟!
-أه يا سوسو يامراتي ههه..
= طب اشطا أنا موافقة أتجوز أحمد اللي مجنني ههه.
- يامجانين إنتوا الاتنين.

"تمسـك بقـلبي فإنـه يُحبك"🤎
بقلم/ إســــراء بدوي|وَرد.