اسكربتات

اسكريبت¹⁸

_ الحقي!
بخوف= ألحق ايه؟ فيه ايه، ايه اللي حصل؟ متقلقنيش، ردي عليا.
بدموع_ أم عاشور جارتك ماتت في حادثة.
بعياط هيستيري= ايه! بتهزري صح؟ كدابة، كدابة وبتكدبي عليا، أم عاشور عايشة وهروح عندها دلوقتي وهتحكيلي قصة حبها بعمي أبو عاشور وهنضحك زي مابنضحك، هي..هي كويسة ومفيهاش حاجة والله صح؟ انطقي، هي كويسة ودا مقلب عاملينه فيا صح!
_ والله أبدًا، روحي ودّعيها وربنا يصبرك والبقاء لله.
" سمعت الكلمتين دول وروحت في عالم تاني ومصحتش غير على صوت الدكتور وماما وبابا، حرام والله أنا بحبها جدًا ليه تمشي، ليه دا كان لسة باقي ضحك عايزين نضحكه سوا، هتحرم من الشوكولاتة اللي كانت بتجبهالي ولا الحنية اللي كانت بتديهالي، قومت من على السرير وروحت أودع أم عاشور، مش متخيلة إن دي آخر مرة أشوفها فيها، بوست جبينها وعيطت جامد ومكنوش عارفين يطلعوني من عندها غير بالعافية، الحقيقة إن أم عاشور مكنش ليها بنات فكانت بتعتبرني بنتها وكل ما ليها، آآآآآآه....."
- إســــراء يابنتي قومي كلي لقمة، الناس عمالة تيجي وتروح والميت بقيله كتير عقبال مايخلص.
=......
- إســــراء، ردي عليا.
= ماما... أنا هنام النهاردة في شقة أم عاشور.
- مينفعش خالص، مفيش حد هنا في الشقة يونسك، انسي الحكاية دي ويلا روّحي.
بدموع= هنام ياماما النهاردة وبس، أنا هفتقدها جدًا وعايزة أستعيد نفسي من تاني وأرجع لإسراء أم ضحكة، أرجوكِ ياماما.
- ماشي يا إســــراء، بس أخوكِ هينام معاكِ.
= ماشي.
" العزا خلص وأحمد أخويا هينام على سرير وأنا على سرير في أوضة أم عاشور، قعدت أعيط وأفتكر ابتسامتها الحنونة وعيونها الخضرا وهي بتضحك وكل شيء فيها، قعدت أعيط لحد مانمت وحلمت بأم عاشور وهي وشها بينور كدا وبتقولي إن محدش يحزن عليها عشان هي عند ربنا الرحيم وراحت ضحكة ومشيت دخلت لمكان جاي منه نور فضلت أقولها في الحلم متسبينيش وهي تقولي مع السلامة، صحيت من النوم لقيت دموعي نازلة والجو لسة ليل بصيت في الفون لقيت الساعة 2.30 قررت أصلي قيام الليل، صليت قيام الليل وقعدت أدعي وأعيط على أخري، اتفاجئت بحد في أوضة الضيوف وبيعيط، اترعبت وخوفت جدًا من المنظر اللي قدامي وجريت لأوضة النوم عند أخويا، بس هو مين اللي برا دا وقافل النور عليه وعمال يعيط كدا اوعى يكون عفريت يامصيبتي، ط ط ط طب لازم أطلع وأشوف ليكون حد هيسرق حاجة، طلعت بسكينة قدامي ومشيت ببطئ وروحت فاتحة النور فجأة، لقيت الشخص دا فرح وقال أمي! طبعًا كنت هطوح السكينة عليه بس هو قام حاضنّي وقالي إنتِ لسة عايشة يا أمي، أنا آسف إني سافرت ومخدتكيش معايا آسف يا آمي، بس الحمدلله إنك عايشة، في اللحظة دي حرفيًا عيطت وبعدته عني وقولتله أنا مش أمك وأمك ماتت بجد"
- إيه؟ إنتِ مين؟ فين أمي؟ أمي عايشة صح!
بدموع= البقاء لله، أنا إســــراء بنت أم عاشور.
- بنتها ازاي معلش؟
= هو إنت مين ياعم إنت الأول؟
- أنا ابنها عاشور اللي كان مسافر.
= وأنا إســــراء جارتها وهي الله يرحمها تعتبر زي ماما وأكتر.
- طب وايه اللي مقعدك عندنا.
= لااا بقولك ايه، اتعدل كدا واصطبح وقول ياصبح، أنا أم عاشور كانت بتقولي يابنتي وهي راحت وكنت عايزة أنام النهاردة على سريرها عشان دي آخر مرة هكون في الشقة دي.
بمكر- طب ومتعرفيش إن أم عاشور ليها أولاد وممكن ييجوا في أي لحظة؟
= عارفة وممكن تدخل تشوف أخويا اللي نايم معايا علفكرا.
"سيبته ودخلت الأوضة وقفلت بالترباس وقعدت أعيط لحد ماسمعت صوت الفجر، قومت صليته وقعدت أدعي ربنا إنه يخفف عن قلبي الحزن الكبير دا لحد مانمت على السجادة.... أحمد أخويا صحي الصبح وصحّاني وقومت من على سجادة الصلاة ولبست وخدت مفتاح شقة أم عاشور ومشيت"
- إســــراء يابنتي هو إنتِ عينك منفخة ليه كدا.
= معلش ياماما الفقدان وِحِش.
- ربنا يصبرك يابنتي، أنا عارفة إن أم عاشور كانت زي بيستك بالظبط كانت صاحبة ليكِ بمإن مكنش ليكِ صحايب، ع العموم أنا مامتك وبحبك ومعاكِ في أي حاجة وأي شيء عايزة تفضفضي عنه أنا هنا.
= بحبك ياماما، ربنا يخليكِ ليا.
"عدى يوم والتاني وأنا بمر باكتئاب ومعزولة تمامًا، كل اللي كنت بعمله كنت أعمل قهوة وأفضل قاعدة في أوضتي لوحدي، مع الوقت اتضح إن أم عاشور مش هترجع تاني زي ماكنت بفكر وإن لازم أبقى أقوى وأتخطى العقبة دي وبالفعل بدأت أتخطاها حبة حبة، كنت ببص من البلكونة اللي في أوضتي لقيت عاشور ابن أم عاشور على القهوة تحت وقاعد حزين جدًا ومعاه حد تاني عمال يخفف عنه ويضحكه بس هو لا رد غير الصمت وبس، شد انتباهي جامد إن عاشور شبه أم عاشور جدًا جدًا بنفس العيون الخضرة والبياض الخفيف دا وكل شيء، دخلت وقفلت البلكونة وروححت للمطبخ أساعد ماما في الأكل"
- بدأنا نتحسن أهو.
=ههه آه الحمدلله، بفضل ربنا ثم إنتِ ياماما.
- الحمدلله، المهم أنا هاخدك معايا النهاردة نجيب لوازم للبيت وكدا.
= اشطا ياماما.
" كَلنا واحنا نازلين أنا وماما لقينا عاشور بشكله الحزين"
- البقاء لله ياعاشور.
- حياتك الباقية.
- شد حيلك كدا، إنت أقوى وأنا واثقة إنها فترة حزن وهتعدي.
- إن شاء الله.
" لاحظني من ورا أمي واتصدم وراح داخل شقته"
= ماما، تعالي نشتري فينو ونوزعه على روح أم عاشور.
- تمام ياقلب ماما مفيش مانع.
= شكرًا يا أجمل أم في الكون.
" اشترينا فينو كتير ومعاه جبنة مثلثات ومربة علب صغنونة خالص وروّحنا عبينا في كل كيس صابعين فينو واتنين جبنة وواحدة مربة وبدأت أوزع على الجيران كلهم لحد ماوقفت قدام شقة أم عاشور وبدأت أخبط وأنا ناسية تمامًا إنها اتوفت"
- نعم!
بفرحة= هي فين أم عاشور!!  لو هي جوا ناديها وخد دا على روح أم عاشور، ادخل نادلها.
- إنتِ مستوعبة اللي بتقوليه؟
= ايه اللي بقو....
"اسبهليت مكاني وافتكرت إني بوزع الوجبة دي على روحها وبدأت أعيط وأقول لابنها"
بدموع = طب اتفضل دا على روحها، ادعيلها بالرحمة.
- استني!
=....
- هو إنتِ كنتِ بتحبي أمي للدرجادي؟
= تعالى أقعد مع ماما شوية وأنا أقولك بدل وقفتنا دي.
- طب ماتتدخلي إنتِ.
= أفندم؟
- ادخلي نقعد في الصالة ومتخافيش الباب هيبقى مفتوح على رجله.
= لأ مينفعش، سلام.
- استني طيب أنا جاي.
" جه وماما دخّليته في الصالة وقعد وقالي"
- ردي على السؤال بقى.
= أم عاشور كانت صحبتي وأختي وكل حياتي، كانت بتهوّن عليا الدنيا ومشاكلها، كانت كل يوم تحكيلي قصة حب عم أبو عاشور وهي، كانت تقولي إن هي كانت قمر وغنية وعم عاشور فقير بس اتجوزيته عشان بتحبه، كانت تجيبلي كل يوم شوكولاتة جلاكسي وتقولي تعالي نلعب ونتسلى، تعالي أقولك سر عني، تعالي أحكيلك عن عاشور ابني المسافر، تعالي أحكيك عن.. حزني ووجعي، كنا بنحكي أوجعنا وأحزاننا لبعض، هه في مرة كنا رايحين فرح نوسة بنت أم خالد وجت عندي تفوت عليا ومكيجتها معايا وراحت قالتلي ايدك جميلة وخلتني جميلة.. قولتلها إنتِ الللي ملامحك حلوة ياجميلة، ياااه لو هفضل أحكي مش هيكفيني سنين، عارف! موتها كسرني ووجعني أوي، وجعني لدرجة إني فضلت شهر مش بطلع من أوضتي غير للضرورة، وجعني لدرجة إني كنت بروحلها المقابر وأدور على اسمها كدا كانت كسرة بالنسبالي بس هي في مكان أفضل من هنا بدليل إنها جاتلي في الحلم بتشع نور من وشها، ربنا يرحمها.
بدموع تكاد الهبوط- هي كانت بتقولك عنّي ايه؟
= كانت بتقول حاجة مينفعش أقولها، وكانت بتقول إنك حنين زيها بس عقلك ناشف شوية زي أبوك، كانت بتقول إن إنت شبهها جدًا وكمان ليك نفس عيونها، كانت بتقول إنك مسافر لأمريكا عشان تكون نفسك وتجيب بنت الحلال احم وكانت بتحبك أوي.
- ربنا يرحمها يا إســــراء وإنت يا عاشور قوي وقد حيلك كدا ولا ايه!
- آه اكيد يا مرات عمي.
- طب اشرب القهوة بقى.
- تسلميلي.
"الحاجة اللي مينفعش أقولهاله هي إن أم عاشور كانت بتقعد تقولي" لو تبقي من نصيب ابني يا إســــراء" ودا شيء يكسف أصلًا.... عاشور ماما كانت بتعزمه كل يوم وكل شوية وكان يعتبر عايش معانا، خدنا على بعض وعرفت إنه زي ما أم عاشور وصفيته بالظبط، كنا في مرة بنسمع فيلم كوميدي كلنا فجت لقطة بتفطس ضحك فضحكنا كتيير بصيت عليه وهو بيضحك لقيت ضحكته تجنن وتخطف القلب كدا وعيونه بتصغر وهو بيضحك بتبقى لطيفة أوي، ماما قامت تعمل سناك تاني"
- ايه رأيك في الفيلم!
= هههه حلو جدا.
بتوهان- إنتِ الأحلى.
= احم احم.
- ها... احم آسف.
= على الله تتكرر.
- سامحيني يامعلمة بقى ذلة لسان ههههه.
= ياولا.
" فرفوش جدا وكذا مرة يقول كلام غريب زي اللي قاله من شوية بس باخدها بضحك ومش بكسفه، الليل ليل جامد وهو روّح شقته وخد أحمد أخويا معاه عشان يساعده في مشروع التخرج وأنا دخلت نمت"
= صباحو.
- قمر.
= ايه الفطار النهاردة!
- أصدك بقى الغدا ههه.
= أيًا يكن هو ايه!
- سمك.
= العب يلا هووووو أجمل ماما دي ولا ايه.
- احم.
"جريت على أوضتي جري، عاشور برا يلهوي ياخوفي ليكون شاف شعري، عااا الواد دا عايز يوقعني بجد على فكرا"
= ماما، اعملي جمبري مع السمك عشان تبقى أكلة بنت مرا بجد ههه.
- محمد اللي هيعمله.
" هاي عاشور طلع اسمه الحقيقي محمد باي هههه"
= هيبوظه دا فاشل.
- مين اللي فاشل يا كحيانة، دا أنا شيف محمد ياماما.
= شوف شوف، إما نتفرج على الشيف بوراك ههه.
"عمل الجمبري زي العفريت ههه عمله ريحته تجنن والله، حطينا الأكل على السفرة وبدأنا ناكل وخدت طبقين شوربة جمبري جمبي وسمكتين والرز والسلطة وبدأت آكل ههه"
- ايه دا ياماما خفّي.
= معلش بقى أصلها أكلتي المفضلة وكدا.
- والله إنتِ المفضلة.
= احم احم.
- أيوا بحبك، ايه؟
= ايه يابابا؟
- بحبك ههه حتى أمك عارفة وأمي كانت قيلالي عليكِ قبل ماتموت والطوب قرب ينطق بحبي وإنتِ ولا حاسة.
= بجد، يعني بتحبني؟
- آه وأكتر من كدا كمان.
= ط ط طب وأنا يعني...
- انطقيها بقى وحياة الجمبري.
= وحياة الجمبري بحبك.

"تمسك بقلبي فإنه يُحبك" ♥

بقلم/ إســــراء بدوي"وَرد"