اسكربتات

اسكربت²⁷

= يعني هخيط رجلي؟
- إنتِ فرحانة كدا ليه ههه.
= معلش يا باش ممرضة أنا أول مرة أخيط وكدا فمتحمسة شوية.
- تمام، الدكتور هييجي كمان ٥ دقايق، حطي عليها القطن دا عشان متنزفش كتير.
= تمام.
" أنا كنت بقرأ روايتي على المكتب في سُكات راحت رجلي اتفتحت في المكتب (هو حروفه زي الاستنلس كدا) روحت لابسة وروحت أقرب مستشفى لينا، المهم بقى أنا كنت لوحدي في البيت ومحدش لحد دلوقتي يعرف، الدكتور جه ياولاد ههه، بس ايه السكر دا ياناس"
- اتفضلي يا آنسة على أوضة الاسعافات الأولية.
"روحت على أوضة الاسعافات وقعدت على السرير ومعانا طبعا الممرضة"
- مدي رجلك لو سمحتِ.
= حاضر، بس هي محتاجة كام غرزة؟
- هي عميقة شوية هتاخد ٣، هاتي يا أم رضا البنج.
" بدأ يحط البنج في الجرح بالسرنجة"
- حاسة بالبنج؟
= اه لسة حاسة.
- إنتِ بتشربي قهوة!
= بشربها كل أسبوع أو كل شهر مرة.
- أومال البنج مش بيعمل مفعوله ليه.
= أنا قبل ماجي كنت شاربة شاي بس والله مكملتش الكوباية.
- هههه، يابنتي ماهو القهوة والشاي واحد، إنتِ عاملة زي رضا ابني.
= يا أم رضا استحالة يكونوا حاجة واحدة يعني.
- حضرتك اللي اتنين بيهربوا الدم.
" أنا عارفة يابني والله بس عايزة أسمع صوتك ههه"
= لو بيهرب الدم يعني أنا معنديش دم؟ ترضيها عليا يام رضا! أكون عديمة الدم؟
- ههههه.
" أيوا كدا اضحك، دا إنت سكر والله، بصيتله وابتسمت"
- طب دلوقتي أنا هخيط بس متعيطيش عشان البنج معملش مفعوله.
= أنا مش بعيط، علفكرا أنا صيدلانية وبدي لنفسي حقن يعني مبخفش.
" لقيته بيبصلي وعاجباه شجاعتي وعدم خوفي وعينه لمعت كدا، إنت يالا ياللي سرقت قلبي يالا، بدأ يخيط وأنا حاسة بس عادي"
- أم رضا عقمي الجرح ولفيه بشاش قطن أنضف خامة.
- بس غريبة يا دكتور دا الشاش دا مش بيطلع لأي حد.
- احم.. ما الآنسة مش حد، الشاش دا كويس لحالتها، أنا في المكتب مستني الآنسة إما تخلص تيجي أكتبلها روشتة.
" والله مفيش حاجة كويسة لحالتي غيرك هههه"
= يلا يا أم رضا، ورايا لسة طبخ أطبخه.
- إنتِ عسل أوي يا...
= إســــراء، إســــراء يام رضا.
- اسمك جميل، يلا أديني خلصت، روحي للدكتور يكتبلك روشتة.
" روحت عند الدكتور لقيته قاعد كدا على الكرسي ومستنيني"
بخجل= احم.
- اتفضلي.
"قعدت على الكرسي اللي قصاده، لقيته بدأ يكتب في الروشتة"
- اسم حضرتك؟
= إســــراء بدوي.
- كام سنة؟
=١٨.
" اتصدم إما عرف إني ١٨ وأكيد كان يحسب أكتر من كدا لإن اللي يشوفني يقول ٢٠ أو أكتر"
-١٨ ازاي يعني؟
= أفندم!
- لأ خلاص، كتبتلك على اقراص تمشي عليهم لمدة ٣ أسابيع وتيجي تفكي الخياطة مع العلم إن كل يومين هتغيري على الجرح في أي صيدلية أو هنا.
= تمام، الحساب كام!
-٧٠.
بدون وعي= نعم ياخويا؟.. احم، أصدي ليه ٧٠ يعني.
باستغراب- والله الحساب كدا ولو مش عايزة تدفعيه خلي عنك خالص.
= شكرا، اتفضل.
" دفعت ال٧٠ وأنا بتحسر على فلوسي، فلوسي لإن ولا أمي ولا أبويا في البيت، المشكلة دلوقتي إني مش هعرف أشوفه تاني إلا بعد ٣ أسابيع!! ليه يا دنيا يعني، وااو افتكرت إني هغير كل يومين على الجرح أيوا بقى يا دنيا دلعيني، بس صراحة الواد محترم ومؤدب وطول بعرض وعضلات ودقن خفيفة وعيون بني واسعة ويارب إما آجي كل يومين ألاقيه، روحت وأجزت النهاردة من الدروس واتصلت على بابا وماما وقولتلهم واتخضوا عليا وزمانهم جايين، نزلت على الفيس والواتس وقولت الحمدلله على كل حال، طبعا كله اتخض ودخلولي وازاي حصل كدا دا إنتِ كنتِ كويسة الصبح ومعرفش ايه والبت صحبتي المقربة شوية اتصلت عليا تتطمن"
- ألو ياختي، ايه اللي عورك كدا.
= هو... هو اللي تقيل عليا وجرحني بتقله دا.
- مين متسيبش أعصابي.
= الدكتور اللي خيطلي الجرح، ااااه يا أسماء تقيل تقل وعنده كاريزما عالية أوي وجمال وعيون عال العال.
- أبو تقل دمك، إنتِ مستوعبة إنك متخيطة؟
= لأ هو نساني وعيي وعقلي، لو هشحت كدا محبش إلا هو.
- يابنتي مش عوايدك إن أي حد يعجبك كدا.
= ماهو دا اللي كنت بدور عليه من زمان يابنتي وخلاص لقيته.
- طب احكيلي بقى كل اللي حصل.
" حكيتلها كل حاجة بالتفصيل الممل وهي طبعا مستغربة اني حبيت لإني صعب أحب بسهولة كدا، المهم بقى بابا جابلي فراخ مشوية وشيبسي وكلهم بدأوا يهتموا بيا في البيت ههه طب أعور نفسي كل يوم عشان أشوف الاهتمام دا ولا ايه طيب ههه، النهاردة اليوم اللي هغير فيه على الجرح"
=اذيك يا أم رضا، عايزة أغير على الجرح.
- ثواني يا إســــراء.
_ يام رضا هاتي المشرط بسرعة عشان في حالة صعبة هنا.
- حاضر يا دكتور بلال.
= يام رضا.
- إســــراء، استني عشان معانا حالة صعبة معلش.
" استنيت ولقيته داخل أوضة الاسعافات ومشفنيش وأنا قاعدة، يابني بص وراك أنا في الانتظار أهو يااني دا الواحد شكله هيغلب معاك"
- إســــراء ادخلي أوضة الاسعافات عشان الدكتور اللي هيغيرلك مش أنا.
" ليه بس كدا بس كدا بس بصوت أحمد مكي هه"
= تمام يام رضا.
" لقيته شارد وبيفكر في حاجة يانا على القمر دا كل يوم بيحلو يا جدعان والله"
= احم، ممكن أدخل!
_ اتفضلي، في تحسن ولا ايه.
= أنا مش بقعد يعني طول النهار في دروس وبصلي وبعمل الشغل بتاع البيت يعني مش برتاح عشان يلم بسرعة.
_اممم طب وفين مامتك.
= أمي! أكيد يعني مش هخليها تعمل حاجة وأنا قاعدة.
_ فيكِ الخير.
ببرود= عارفة.
_ هههههه، دمك خفيف.
= احم، هو لسة بدري على ما تخلص تغيير!
_ ها... لأ هو القطن والشاش وخلاص.
= يا مُسهل.
- دكتور بلال، هو حضرتك فاضي عشان في حالة طارئة هنا.
_ إما أخلص يا جهاد اللي في إيدي.
- غريبة يا دكتور يعني كان أي حد يغيرلها على الجرح من الممرضين يعني، مش شرط حضرتك.
_مكنش في حد فاضي منكم.
- ازاي يعني، كلنا كنا فاضيين بس كنا في المعمل، وإنتِ يا حلوة إنتِ مفيش صيدليات جمبيكم يعني!
_ جهاد احترمي نفسك ويلا روحي شوفي شغلك.
ببرود تام= والله يا روحي حاجة متخصش حضرتك خالص وأروح المكان اللي أنا عايزاه، فاهمة يا بتاعة إنتِ.
_ جهاد مخصوم منك ١٠٠ جنيه يلا على شغلك.
بغيظ- ماشي يا دكتور.
_ هههههه دا إنتِ قطة شرسة جدًا في الخناق لأ وكمان بتتكلمي باحترام وفي نفس الوقت بتهيني الشخص اللي قدامك بجد شابوه ليكِ ههههه.
= شكرًا يا دكتور، الحساب كام.
_ من غير فلوس.
= شكرًا بس كام بقى.
_ من غير فلوس بجد والله وهتيجي تغيري كل يوم هنا ببلاش.
= هههه ليه يعني كدا.
_ كدا ومن غير ليه، أتمنى تكوني بتمشي على العلاج بانتظام عشان الجرح يلم بسرعة.
= ثواني، مش هو التغيير كل يومين!
_ احنا بنقول كدا للمريض عشان مثلا ميتحركش كل يوم أو كدا أومال إنتِ بتتحركي كل دقيقة فعادي بالنسبالك بقى.
= لو إني مش مقتنعة بس تمام.
"أنا بعرف الشخص اللي قدامي من نظرة وعرفت إن جهاد عايزة تغوي دكتور بلال بس هو مطنشلها وإما شافته بيغيرلي على الجرح غارت مني وبكدا قلبي ارتاح إنه منفضلها تماما"
______________________
- شوفتي يام رضا طالعة من عنده بتضحك ازاي.
- إنتِ مالك تضحك ولا تعيط.
- ماهي دي اللي خصم ١٠٠ جنيه من مرتبي عشانها.
- طب اسكتي بقى عشان جاي علينا.
بعصبية_ إنتِ يا أستاذة جهاد إنتِ اتجننتي أو مخك باظ ولا ايه، إزاي تقولي للمريض قدامي روح غير في صيدلية وإزاي تنطقيها أصلا، وإزاي تكلمي المريض بالطريقة دي سواء قدامي أو من ورايا، إما تكون المستشفى بتاعت أبوكِ يبقى اعملي كدا أما مش تيجي مستشفتي وتعملي الشغل بتاعك دا، ياريت تسمعي الكلام لإما وعزة جلالة الله لهتشتغلي ببلاش ومش هتاخدي ولا جنيه، والعميلة اللي كلمتيها كدا تعتذري منها بكرا إما تييجي ليه بقى! لإنها عميلة مميزة للمستشفى ومش محتاج أفسر زيادة عن كدا، تمام؟
" أنا واقفة بعيد جدًا محدش شايفني وسمعت الحوار كله وعيطت لإني أول مرة أشوف حد بيدافع عني في غيابي كدا، كفاية يا دكتور بلال بقى هتخلي قلبي يحبك أد ايه يعني، ربنا يجعلك من نصيبي يابلال يارب، المهم بقى روحت نضفت البيت وروحت الدروس ولقيت هناك صحبتي وحكيتلها على كل حاجة كالعادة"
- يابت دا كدا بدأ يحبك والله.
= ازاي يحبني من يوم وليلة أيعقل!
- يُعقل ياختي يُعقل، والله دا كدا بدأ ينجذب ليكِ ويتعلق بيكِ، كفاية إنه هو اللي غيرلك بدل أي ممرضة، اعقليها في دماغك ولا بصي ركزي عشان امتحانات تالتة ثانوي على أبواب.
= متفكرينيش بقى، المهم أنا همشي دلوقت وأبقى أكلمك بالليل.
" عدت الأيام وكل يوم كنت بروح أغير وهو يغيرلي وأم رضا ساعات، لاحظت عليه السرحان وكمان اللهفة إما يشوفني وفرحته إما يدردش معايا أو مثلا أقول رد يضحكه، عدت الأيام دي وخلاص النهاردة هفك الخياطة"
= عايزة أفك الخياطة يام رضا.
- الدكتور اللي بيفكها، هو جه أهو.
_ في حالة عايزة تغير يام رضا هناك روحيلها.
= هفك الخياطة النهاردة.
_ ومالك متعصبة كدا ليه ههه.
= لأ دي عصبية الفرح وكدا.
_ اممم، يعني كدا خلاص مش هشوفك تاني!
= نعم؟
بمزح_ لأ يعني أصدي هرتاح من حالة كل يوم بتغير عندنا ببلاش.
= ههههه، طب يلا فك الخياطة عشان عايزة أروح أذاكر، ورايا أول امتحان بكرا في الثانوية.
_ شدي حيلك بقى، عايز أشوفك ترتيب على الجمهورية.
بعيون مدمعة= حاضر، في رعاية الله.
"مشيت وأنا زعلانة إني مش هشوفه تاني زعلت جدًا لإني اتعودت كل يوم أشوفه وأسمع صوته بس افتكرت دعمه ليا ودا شجعني جدًا جدًا في أيام امتحاناتي وحرفيا أيام الامتحانات كانت صعبة جدًا وضغط وسهر بس الحمدلله دا كله عدى وخلصت النهاردة، روحت نمت من كتر التعب وصحيت المغرب لقيت صحابي كلهم في البيت وعاملين مفاجأة وحفلة وزينة وأغاني وفرحانين وهايصين قومت لبست وجهزت نفسي واحتفلت معاهم ورقصنا وفكينا عن نفسنا لحد ١٠ بالليل
وكلهم روحوا وأنا نضفت البيت وخلصته ومسكت الفون فتحت فيس وظهرلي مسدج من الأزر فتحتها لقيت بلال كاتب" مبروك وعقبال النتيجة بقى وعقبال ما بعد النتيجة عشان الواحد على نار😂♥️" اتخضيت وضحكت على الايموشنز دي و!!! ايه اللي بعد النتيجة ومعناه ايه الكلام دا وجاب الأكونت بتاعي ازاي وياختااااي دا منزل في سيرته الذاتية كلام غامض وتحت الكلام الايموشن دا💐 طب مانا شهرتي ورد ياثثطا يمكن بيلمحلي مثلا! قفلت خالص ومردتش على المسدج بتاعته وروحت اسكندرية يومين غيرت فيهم جو ورجعت، النهاردة النتيجة هتظهر يامامااااا"
- ادخلي على الموقع بسرعة عشان ميتضغطش ومتعرفيش تدخلي.
بتوتر= حاضر حاضر، أهي ظهرت.
"بدأت أعيط عياط هيستيري معقولة!! معقولة أجيب ٩٨° و٩٩ من مية يعني يعتبر ٩٩، ماما وبابا وأخويا فرحانين وماما تزغرط وبابا يحضني ويعيط من الفرحة وخلاص حلمي اتحقق وهدخل كلية صيدلة، عدت الأيام والنهاردة أول يوم ليا في الكلية، اتعرفت على صحبة صالحة وخلصت اليوم الطويل دا وروحت لقيت بلال عندنا!!!!"
= السلام عليكم، أخبارك ايه يا دكتور بلال.
_ بخير الحمدلله، طب أتكل أنا على الله يا طنط بقى.
- مانت قاعد يا دكتور، نورتنا والله، في رعاية الله.
" بعد ما مشي واتأكدت إنه مشي"
= هو جاي يعمل ايه دا.
- جاي يطلب ايدك يا إســــراء وهو وأهله جايين بكرا.
= ازاي يعني! أنا لسة أولى جامعة!
- والله ياحبيبتي كلنا موافقين حتى إنتِ بعينك اللي فضحاكِ دي.
= هههه يا قفشاني إنتِ يا مسكرة.
" فرحانة جدًا إنه هيبقى من نصيبي قولت لأسماء صحبتي قالتلي انها كانت متأكدة من كدا، اه نسيت أقولكم إنها دخلت كلية علوم ياولاد، خلصت كلام معاها ونمت"
= اصحوا يا جدعان النهاردة خطوبتي هههه.
- يلا يا حلوة اعملي معايا الأكل إنتِ وأسماء صاحبتك، اتصلت عليها امبارح وقولتلها تيجي تساعدنا في الأكل.
= طب أنا عروسة طيب اهئ اهئ المفروض محطش ايدي في الأكل لَطعمه يبقى مسكر.
- يلا ياخفة، كمان ١٠ دقايق وأسماء جاية ادخلي جهزي الخضار.
" خلصنا الأكل وكنا فرحانين واحنا بنعمله وأغاني بقى ورقص واحنا بنطبخ وزغاريط لحد المغرب ما أذن، دخلت لبست وأسماء ساعدتني، لبست فستان أحمر وهيلز أحمر وطرحة هافان فاتحة جدًا داخلة على درجات الأوڤ وايت المهم يعني كنت مزة، طلعت ومعايا الشربات واتفقوا على الجواز وكدا وكلنا وبعدين سابونا لوحدنا"
_ عرفتي كان أصدي ايه في ما بعد النتيجة! هههه.
= اه عرفت يادكتور بلال.
_ بلال بس بقى دا احنا مخطوبين دلوقت.
= هو إنت بتحبني!
_ دا أنا بحبك من أول غُرزة ههههه.

"تمـسك بقـلبي فإنـه يُـحبك♥️"
بقلم/ إســــراء بدوي|وَرد.