اسكربتات

اسكربت¹⁹

= أنا تعبت خلاص ومش قادرة أواجه العالم وملّيت من الحياة بجد، ساعات بحس بلامبالاة رهيبة بتخليني أكره نفسي، إنت عارف يعني ايه قدامي الناس اللي بحبهم بيعيطوا وأنا ولا حاسة بيهم ولا أي حاجة خالص غير الصمت؟.
- كمّلي طلّعي اللي في قلبك.
= عارف يادكتور أنا نفسي في حد يشبهني، يفهمني من نظرة، شخص بيحس بيا ومهتم بيا وبتفاصيلي الصغيرة، لو لقيت الشخص دا هحطه في كفة والعالم في كفة....زمايلي بيقولولي ارتبطي ومعرفش ايه بس لأ حرام وذنب كبير جدًا عند ربنا وهم مش حاسين، هم بيحسبوا إما أرتبط وأحب وأعلق نفسي في حبال دايبة يبقى كدا لقيت الشخص البيرفكت بس لأ دا بيبقى شخص سوري في اللفظ يعني بيبقى مرا، أنا مش بحب الشاب اللي عامل نفسه روش أنا بحب الشخص اللي في حاله وعارف ربنا وبيخاف على ولاد الناس مش الصايع الضايع ابن اللذين دا.
- ههههه اهدي مالك اتعصبتِ كدا.
= يادكتور يانفساني إنت التاني اسكت خليني أكمّل معلش اعذرني.
- كمّلي يا آنسة.
= أمك اسمها عانسة ههههه معلش بقى.
بصدمة- هو إنتِ بتضحكِ؟
= إيه دا هو إنت مش هتهزقني على أمك وهتهزقني علشان بضحك؟.
- غريبة والله إن واحدة مريضة نفسيًا بتضحك.
= الضحك حرام ولا ايه يعني؟
- ما علينا، كمّلي.
= الدراسة جاية عليا والصدقاء والأهل وكل العالم جاي عليا لحد ما هطق خلاص من كتر الضغط اللي عليا.
- وقتك خلص يا آنسة.
= جرا ايه ياراجل خليني أكمل ولا بتاخد 800 جنية وتطيرهم في الهوا.
- آنسة ايه قلة الذوق دي، أنا دكتور وليا احترامي وفلوسك دي هاخدها أجيب بيها علاج للضغط اللي جبتهولي بكلامك وضحكك دا، يلا برا... الجلسة التانية يوم التلات وأتمنى متجيش وتشوفي دكتور غيري.
بقرف= طظ فيك.
- وفي شكلك.
" كنت هتخانق بس الناس طلعوني بسرعة، صراحة أنا بتعصب بسرعة وأنا من بيئة ريفية متواضعة زيي ههه بحب الضحك بس عندي اكتئاب وعشان كدا بروح عند الزفت أصدي الدكتور دا  ودي كانت أول جلسة عنده ههه بس بصراحة حساة إنسان مثقف كدا وهادي وعسل والله كدا وملامحه مقطقطة ياختاااي، روحت البيت لقيت ماما عمالة تزعق مع بابا"
= لا إله إلا الله، صوتك جايب الشارع، يعني وأنا على الطريق اللي بعد كيلو متر كنت سامعة صوتك.
- ههههه.
- كدا بتضحكِ أبوكِ عليا يا تربية.
مقاطعة= تربية قمر زي اللي ربتها ياعسل.
- ثبتيني بقى.
= عاش ولا كان ولا ايه ياحاج.
- سيبوني في حالي.
- كنتِ فين يابت.
= كنت في مشوار كدا.
- اللي هو ايه.
= م. م. معرفش، أنا داخلة أوضتي.
"أنا بعرف أرد وأهزأ وكل حاجة لكن لو سألتني سؤال أنا مش عايزة أجاوب عليه ببعد وببقى مخنوقة"
- هتفضلي في الأوضة كتير كدا.
= ياماما إما معاد المسلسل ييجي هطلع أتفرج معاكِ.
- هو باقي نص ساعة فقومي اعمليلنا نسكافيه.
= اشطاا.
" قومت وعملت نسكافيه وجهزت فشار وجبت بيبسي وقعدنا نسمع المسلسل، خلّصت ودخلت أقعد على النت زي كل وقتي عادي فلقيت أغنية طالعة تريند اسمها _شيماااء_ ههههه طلعتني من المود هههه وسمعت كذا فيديو بيضحّكوا ولقيت صفحة الدكتور اللي أنا روحتله النهاردة في الأصدقاء المقترحة ياختاااي اتصدمت وقررت أدخل أشوف الفيلسوف دا تفكيره عامل إزاي، بالفعل دخلت وأول ما تفتحيها كدا هتلاقي صورته هههه طبيعي يعني مستنية أقولك مثلا هلاقي مين؟ هههه والسيرة الذاتية بتاعته محترمة وحبتها ونزلت كدا لقيت بوست كاتب فيه^ واحدة مستفزة جت العيادة النهاردة وكانت هتجبلي شلل وأظن إنها مفيهاش حاجة أصلا وجاية تستعبط عليا، ربنا يشفي العبايط اللي زيها ههههه^ ركبني عفريت واتعصبت جدًا وكنت هرمي الفون في الأرض لكن قولت إما ندخل نشوف الكومنتات كدا، لقيت واحد بيقوله أنا عايزها لإنها هتغير حياتي 180 درجة واللي يقوله إنت برنس وأحلى دكتور واللي يقوله ابعتلي رقمها وأنا هعالجها وحاجة تقرف اتفاجئت بقى إنه حد بيكتب كومنت فاستنيت كدا لقيت هو اللي كان بيكتب فقال" علفكرا إنتوا اللي مجانين مش هي، يعني واحدة زيها بريئة متعرفش حاجة، يتقال عليها كلام **خ زي اللي اتقال، وإنت ياللي بتقول هتغير حياتي مية وتمانين درجة تعلالي وأنا أغيرهالك هه وإنت ياللي عايز رقمها تعالى وأنا أدهولك ياكلب ياحقير منك له، بلوكات " فرحت إنه دافع عني في الآخر، فرحت جدًا بجد ولقيته مسح البوست وتقريبا كدا عمل بلوكات زي ماقال، أسكت! لااا إزاي! ههه فروحت شايفة تاني بوست ولقيته بوست ضحك وبيضحك واللي بعديها وكذا بوست بيضحكوا ولقيت بوست فيه حكمة ولقيت صورة لواحد وواحدة والواحد عايز يشوف الواحدة والواحدة دي مش عارفة إن الواحد عايز يشوفها فالواحد بيحزن وسلملي على مخك لو فهمت ههه بس الكابشن اللي هو كاتبه كان عميييق بشكل كبير وكان كاتب جملة كدا جميلة فخوفت يكون خاطب حد كدا ولا كدا فدخلت وشوفت لقيته الحمدلله أعزب زي حلاتي ههه وعرفت تاريخ ميلاده وامه واخوه وعيلته كلها"
- بت يا إســــراء هو إنتِ لسة صاحية!
= ها... هنام أهو.
"عدت الأيام وجه يوم التلات وقررت أروحله"
= احم احم.
- وعليكم السلام اتفضلي.
= احم.. أنا آسفة على أسلوبي المرة اللي فاتت بس والله إنت اللي عصبتني.
- لا ولايهمك، اتحسنتِ ولا لسة.
= ها... أنا مش فيا حاجة عشان أتحسن ولا ايه!.
بصدمة- اييه! احم أصدي فعلا مش عندك حاجة بس عندك اكتئاب صح؟
= آه عندي اكتئاب وحاسة إني بقيلي تكة وأطلع منه.
- طب اتفضلي على الكرسي وريحي واتكلمي.
"قعدت أتكلم عن خذلان كل شخص في حياتي ليا وعن كل شخص اتريق على حزني وعلى الوقت اللي كلهم سابوني فيه سواء صحابي أو زمايلي أو حتى أستاذي اللي اتريق عليا وقالي يام حزن، وعيّطت جامد وقولتله إني والله مش كئيبة أنا بجب الضحك جدًا لكن طول ما أنا معاهم ببقى حزينة على نفسي إني بتهان كدا فبضطر إني أنعزل عنهم نهائي ولا كإني أعرفهم"
- إنتِ دلوقتي أزلتي جزء كبير من اكتئابك وحزنك بسبب الفضفضة دي بس أتمنى إنك متحزنيش تاني عشان دا هيأثر عليك.
= حاضر بس أنا دلوقتي عايزة أنساهم يادكتور، أنساهم خالص وأمحيهم من راسي.
-.......
= أنا عايزة شخص لطيف ينسّيني كل تعبي وحزني ووجع قلبي؛ شخص أقوله امشي يقولي مينفعش أمشي لإنك جزء منّي، شخص يخلّي حياتي عبارة عن فرح وبس، ولو في حزن يتقاسمه معايا، شخص يغيّر دنيتي وحياتي بكلمة منه وبس........ لو لقيت الشخص دا بجد هبقى أسعد إنسانة على وجه الأرض.
- أنا .... أنا هو الشخص اللي عايزاه.
= ايه!
- آه ماهو العجيب والغريب في الأمر إني عايز حد بالمواصفات اللي قولتيها ومفيش غيرك اللي هلاقيها عنده أنا كمان.
= هههههه إنت بتهزر صح؟
- لأ... بصراحة أنا كلامك عجبني وحاسس إنك عاقلة ومثقفة وفرفوشة من طريقتك معايا المرة اللي فاتت وحاسس إنك تشبهيني، فاهمة!
خدودي احمرت واتكسفت= هو وقتي خلص ولا لسة.
- هههه لسة.
= ط ط طب المفروض هنعمل ايه يعني لو إنت الحل لمشاكلي.
- إننا نتجوز في أقرب وقت.
= تسمحلي أشتمك؟
- آه هههه.
= إنت عبيط؟
- آه هه.
= أولا احنا مبنحبش بعض ثانيا إنت أكيد يعني مش هتقول لامك بعد يومين هتجوز طب وفين شقتك اللي عايزة تتجهز والسباكة والموال دا طب وأهلي مش هيوافقوا وأنا أصلا مش بحبك.
- مع الوقت هتحبيني، أمي أصلا هي اللي قايلالي عليكِ عشان إنتِ بنت صاحبتها وكدا، والشقة بتاعتي مش ناقصها حاجة غيرك حرفيًا متجهزة وكل حاجة وأظن إن احنا مش... احم.. مش هنتجوز جواز حقيقي يعني ممكن مثلا نتجوز ونحل مشاكلنا سوا لكن احم..
= عليك نور ههه كنت لسة هقول كدا، كدا تمام أوي.
- هنتجوز بكرا.
= طب تعالى طيب النهاردة اطلب ايدي حتى.
- ههه جاي يا... هو إنتِ اسمك ايه صحيح.
= إســــراء.
- وأنا مـحـمـد.
= على بركة الله.
-النهاردة بالليل انتظريني أنا مش جاي.
= هههههههه، اشطا.
" قبل ما اقول لامي وبابا كانت أمي بتقولي والعجيب إنها اتصدمت إني أول مرة أوافق على عريس ههه"
_ اتفضلوا اتفضلوا.
_ يزيد فضلك يأم أحمد.
_ تعالوا في الريسبشن.
" ماما دخّلتهم في الريسبشن وأنا كنت في المطبخ فجت وقالتلي أروح عندهم وهي هتكمل الحاجة"
_عنّك يابنتي.
= اتفضلي ياطنط العصير، اتفضل ياعمو، اتفضل، اتفضل.
" فرّقت عليهم كلهم وعلى أخوه وهو كمان"
- زي القمر يابنتي بجد ربنا يحميكِ.
= ربنا يخليكِ ياطنط.
- اتفضلوا الكيكة، دي بقى من إيد إســــراء.
" كلهم قالوا إن طعمها جميل وأنا اتكسفت جدًا ووشي احمر"
- طبعًا احنا جايين نطلب إيد إســــراء يابو أحمد وعشمانين فيك.
- وأنا مش هخذلك يابن عمي.
- طب نسأل العروسة.
بخجل= احم... موافقة يابابا.
- لولولولولولي.
- مين اللي بيخبط.
" ياخرابي دا المأذون"
- اتفضل.
.....
- بارك الله لكما وبارك عليكما وجمع بينكما في خير.
- خد إســــراء يا مـحـمـد واقعدوا سوا في البلكونة.
" في البلكونة"
= ايه دا بقى إن شاء الله، مش قولت هنتجوز بكرا.
- خير البر عاجله يا إســــراء  ولا ايه.
= إما نشوف أخرتها معاك.
- شوفي إنتِ هناك أهو.
" شاور بإيده للقمر"
بكسوف= احم... شكرا.
- بجد مش بهزر إنتِ قمر فعلًا.
= قمر إزاي بقى.
- قمر يعني عندك قلب عسل وعند عينين واسعة وبؤ صغير ووردي كدا وعندك وش مدور ومتوسطة الطول وقمر وفاهماني.
= هههه إنت اللي عسل والله.
- ايه دا هتغر في نفسي علفكرا ههه.
= بقولك ايه هو إنت بيتكم فين وكدا.
- في الجيزة يعني مش مشوار يعني.
= طب أمك صاحبة أمي بجد ولا بتهزر!
- بجد والله وكانوا في نفس المدرسة وهم في إبتدائي وإعدادي.
= اممم، طب كلمني عن نفسك.
" كلمني عن نفسه وطلع شخص فرفوش أوي زيي هههه وحاسة إني هحبه زي ماقال"
- اصحي ياماما.
= طب قول صباح الخير طيب، ايييه.
- طب خلصي عشان نخرج سوا.
= طيب خمسة وفوت عليا.
- إما نشوف هيبقوا خمسة ولا أزيد.
= ماشي ههه.
" لبست دريس جملي وعليه الطرحة والحمدلله مش بحط حاجة، خدني في العربية بتاعته وروحنا على عربية فول نفطر"
= ههه بقى دكتور زيك متواضع وبتاكل كمان من على عربية فول؟ إنت غريب بجد ههه.
- أمي قالتلي اتواضع عشان متتحسدش ههههه.
= وأنا كمان أمي قالتلي اتواضعي.
" قعدنا نضحك ونهزر وروحنا السوبر ماركت نتسوق"
= أنا مش عايزة إلا حاجة واحدة.
- هي ايه.
= بيبساية وبس كدا.
- هههه من عيوني.
= بس بالله عليك واحدة بس مش ألاقيك جايب مصنع وجاي.
- ههههه حاضر.
" شربنا البيبسي وروحنا ملاهي قعدنا فيها وقضينا يوم جمدااان بجد"
= عايزة أروح.
- زهقتِ ولا ايه.
= لأ بس عايزة أروح عشان ورايا محاضرة أونلاين.
- اشطا خلاص هروح معاكِ.
= بطل بقى، بطل لُطف عشان لطفك دا هيجيب أجلي قريب هههه.
بعفوية- بحبك.
" في لحظة ومكان ووقت غير مناسبين ويتقالك الكلمة دي ويفضل قلبك يدق يدق يدق وأعصابك متقدرش تتحكم فيها وقلبك بيرقص من الفرحة في اللحظة دي يتقال فعلا إنه الشخص اللي كنت بدور عليه ولقيته"
صدمة بخجل= إنت قولت ايه!.
- قولت بحبك....ايه فيها ايه.
= طب يلا روّحني.
"ركبت معاه العربية في صمت، هموت من الفرحة ومعرفش ليه بس أنا مبينة إن أنا متدايقة عشان ميحسش بحاجة"
- أنا عارف إنك فرحانة.
= احم...لأ مش فرحانة ولا حاجة.
- أنا دكتور نفسي يعني الحركات دي عادي بالنسبالي ههه.
= صدّق هههه احم أصدي لأ.
- طب يلا عشان وصلنا.
" دخلت البيت وماما استقبلته ودخل"
- جيبي اللاب وتعالي.
= سمعًا وطاعة هههه.
" جبت اللاب وفتحت المحاضرة"
- متجاوبيش مع حد حاجة.
= ليه.
- كدا مزاجي.
= هجاوب.
- اسمعي الكلام يا إســــراء.
= حاضر يا.....احم...مـحـمـد.
- أيوا كدا.
" خلصت المحاضرة وماما جابت تسالي وقعدنا نتساهر ونضحك لحد ما مـحـمـد زهق وعايز يروح"
- وصّلي مـحـمـد للباب يا إســــراء.
= حاضر.
"عند الباب"
- امتى بقى وأمك هي اللي تيجي توصّلنا مش إنتِ.
= بطل تكسفني بقى بكلامك.
- ههه حاضر، يلا باي.
= باي.
" مع الوقت حبيته فعلا، حبيته يا بشرر، بقيت بحب وأتحب، خلاص قررت أعترفله إني بحبه"
= مـحـمـد، أنا عايزة أعترفلك بحاجة.
- أنا اللي عايز أعترف.
= طب قول إنت الأول.
- أنا حبيتك بجد، روحي اتعلقت بيكِ وعايزك في حياتي حرفيا وبدونك يومي مش بيكمل.
= احم، أنا... أنا حبيتك يا مـحـمـد ومش قادرة أستغنى عنك، وإنت نسيتني أي حد جرحني وبقيت شخصي المفضل، بحبك.
- وأنا بعشقك، اعملي حسابك الجمعة الجاية فرحنا يا مُزتي.
= ايه؟
- بحبك.
"تمسّك بقـلبي فإنـه يُـحبك"♥️

بقلم/ إســــراء بدوي" وَرد".