اسكربتات

اسكربت³¹

_ أهلًا أهلًا بالأستاذة ورد اللي متعبانا معاها.
= أهلًا يا أستاذ أحمد.
_ أهلًا بيكِ يافندم.
= احنا هنفضل نتساهر ولا ايه، هات الملف الجديد عشان معنديش وقت.
_ حضرتك احنا ظباط مخابرات ومحتاجين هدنة بعد كل عملية.
= شششش، المكان المرادي في قرية ريفية والمجرم تاجر مخدرات كبير أوي، لازم أفكر هنعمل ايه.
_ ياورد باشا أكيد احنا نتنكر كالعادة.
= أكيد بس المرادي هيكون حاجة مختلفة
_ ممكن نمثل إننا مجرمين مثلا!
= لأ، احنا لازم نفكر في حاجة تخليه ميشكش للحظة إننا ظباط، بص أنا جاتلي فكرة بس... بص الفكرة إننا نتجوز ونروح نسكن هناك في شقة جمبه وبعدين نبدأ نشتري منه ويكإننا هنبقى زباينه وكدا وفجأة هوب نعرف العصابة بتاعته كلها ونخلص المهمة دي.
_ إ. إ. إنتِ بتقولي ايه! يعني ايه نتجوز دي!
= يا أحمد باشا أكيد يعني مش هتجوزك من حبي فيك يعني، احنا هنبقى قاعدين مع بعض فلازم نكون كاتبين على الأقل، يعني مش هنعيش مع بعض واحنا محارم على بعض يعني!.
_ يا ورد أنا مستغرب هو إنتِ يعني مستغرب إن بنت تقول لولد نتجوز.
بعصبية= ورد باشا لو سمحت، أنا شغلي رقم واحد في حياتي وأموت لو مأديتش أحسن أداء فيه ومش هييجي واحد زيك حيالله يعني يتكلم معايا كدا، اللي أقوله يتنفذ ياحضرة، شكلك مش فاهم إن دا تاجر مخدرات دولي وبيتعامل مع دول مش أشخاص يافندم، فهمت!
_ فهمت يا ورد باشا.
= بكرا تعدي عليا عشان نرتب للخطة كويس.
_ بس دا مكتبي.
= يلا اتفضل، هدور على ملف كدا.
__________________
_ ياعم دي دماغها تعبانة، أكيد أكيد في حاجة تاني يعني غير الجواز.
- تلقاها بتحبك ههه.
_ بس عبط دي استحالة تبص لحد، دي الشغل كل حياتها.
- سلم أمرك لله، ودا أصلا مش جواز رسمي دا ورق وأكيد هتخلصوا المهمة وتتطلقوا.
_ هقول لأهلي ازاي دلوقت ياربي.
- أنا هقولهم وهفهمهم متشغلش بالك
_____________________
= نعم يا حضرة العقيد!
-مينفعش اللي بتقوليه دا يا إســــراء.
= طالما قولت إســــراء يبقى أقولك يابابا، بص يا بابا أنا لازم أنجح في العملية دي عشان أترقى، افهمني يابابا، هو دا الحل والله أنا عارفة دماغ الشبح(تاجر المخدرات) كويس ودرساها ولازم نتجوز أنا واللي اسمه أحمد دا.
- ماشي يا إســــراء اللي إنتِ عايزاه لإني بثق فيكِ جدًا، المهم هتبدأي في المهمة امتى!
= بكرا هنتجوز أنا والواد دا ونطلع على القرية على طول.
- تمام يلا ادخلي نامي، الجو أخّر.
______________________
" في الصباح"
= يا حضرات أنا مش عايزة شوشرة كتير، أنا هاخد أستاذ أحمد ونمشي وأرجو تمشّوا الدنيا في غيابنا، ادعولنا بالتوفيق عشان دي مهمة خطيرة شوية.
- ربنا معاكم يا فندم.
- سلام يا صاحبي هتوحشني.
_ في رعاية الله يا رجالة.
" ركبنا أنا وهو الموتوسكلات بتاعتنا وروحنا للماذون كتبنا وودعت بابا وهو ودع باباه وأخوه و ركبنا قطر ومشينا"
= إنت جاي تقعد فين.
_ جمبيكِ، أظن مش من حلاوتك يعني.
= احترم نفسك وشوف إنت بتتكلم مع مين، يلا قوم.
_  مش قايم، دا مكاني ومفيش في القطر غير المكان دا أساسًا.
= الصبر من عندك يارب.
_ ياريت تتأقلمي إني جوزك وكدا لإما الحوار هيبان وهنتكشف.
= متبقّاش إلا إنت تنصحني! قضّي بقى الفترة دي على خير عشان أنا خلقي ضيق وإنت عارف.
_ نينيني، مغرورة جتك البلا في... بهمس: جمالك.
= إنت بتشتم ولا ايه، هستحمل غباوتك دي كتير ولا ايه؟ المهم تعالى أقولك خطتنا عشان ننفذها كويس أوي وياريت متغلطش كالعادة وأنقذك كالعادة بردو.
_ هههه تمام قولي ياستي.
" قولتله الخطة ورسمتله الأماكن اللي الخطة هتتنفذ فيها بس البعيد تايه ومش مركز معايا ودي حاجة بتعصبني"
= جرا ايه يا أحمد.
_ ايه.
= إنت سرحان في ايه يا عم إنت، ركز عشان متعصبش عليك وإنت عارفني.
_ إنتِ قولتي ايه!
= هددتك يا أخي، ركز.
_ اسمي أحمد، قولي اسمي تاني.
= طب بص يا أحمد أنا جاية أشتغل مش جاية لشغل الحب واللڤلڤلة، اصحى وفوّق وخليك راجل، دا أنا أرجل منك يا أخي.
" سابني ومشي وحاسة إني جرحت رجولته بس أعمل ايه، لازم يفوق دي مهمة خطيرة، أنا زعلته وحاسة إني خلاص الإنوثة قربت تنعدم مني من كتر الزعيق والعصبية في الشغل، أحمد شخص طيب والله و... "
= جيت يعني!
_ أنا راجل يا أستاذة ورد، وراجل أوي ومتستفزنيش تاني تمام أنا أفعالي وحشة ولساني أوحش فاتقي شري بقى!
= ياما خوفت رُكبي سابت يااي.
_  لازم تسيب يا حلوة، أنا راجل من صلب راجل ومقلش عنك في حاجة والله وأبوكِ زي أبويا في المستوى ودرجة العقيد يعني مشوفكيش بتقلي مني تاني وفي الأول والآخر إنتِ مرا وواحدة ست بردو يعني متعشيش الدور أوي.
=......
" بصيت الناحية التانية على الأراضي والحاجة، دموعي أول مرة تنزل بعد موت أمي، تعمل ايه إما أعز الناس ليك تموت، امي دي كانت كل حياتي وبعد موتها قلبي حجّر وبقيت قاسية، فضلت باصة بعيد لحد ما نمت"
_ قومي احنا وصلنا.
= إنت ازاي تسيبني نايمة على كتفك كدا.
_ صوتك دا ميعلاش تاني.
= لأ هيعلى وهوريك مقامك كويس وهعلمك إزاي تتكلم معايا أنا كدا.
_ يلا مش عايز كلام فاضي وياريت تبقي رقيقة زي كل الزوجات لإما الشبح هيقتلنا.
= متبقاش إلا إنت وتعرفني هعمل ايه.
" نزلنا المحطة وركبنا تاكسي وروحنا للشقة اللي أجرناها، الشقة هادية وحلوة، حطيت هدومي في الدولاب وقفلت على نفسي الأوضة ونمت"
_ إســــراء، افتحي.
=نعم عايز ايه؟
_ اطلعي بس.
= ها عايز ايه.
_ تعالي كُلي، عملت مكرونة وبانيه.
= متشكرة، يلا لو سمحت بقى عشان مش فاضية.
بعصبية_ هو إنتِ ايه؟ أنا جايبلك أكل تاكلي مش سم، شوفتك تعبانة ووشك أصفر قولت اما أعمل أكل عشان تاكلي وفي الآخر تعامليني كدا!؟! متختبريش صبري عشان أنا دمي حامي وممكن أعمل حاجات متتصوريهاش وكمان بتقفلي الباب في وشي؟ ماشي يا إســــراء.
= ششش، الوحش بحدد مكانه اسكت بقى.
_ أنا داخل أنام عندك الأكل أهو لو جوعتي كُلي.
=  يا حنين ياحلو ههه.
_ إنتِ لسة متعرفنيش.
= أهو، لقيت مكانه دا ساكن في الشقة اللي قصادنا يا احمد الحقني.
_ طب افتحي الباب طيب مش هنفضل نتكلم كدا.
= قبل أي حاجة أهو، احنا لازم نبطل خناق ولازم نتعامل كإننا متجوزين بجد عشان دا دماغه سم وعفريت وممكن يكشفنا، عايزين نحترم بعض شوية تمام!!
_ تمام يا إســــراء.
= قول يا ورد، بابا بس اللي بيقولي يا إســــراء.
_ ماشي انجزي بقى
= تمام يلا ادخل، عشان ندرس الخطة.
_____________________
- تعالى يا حلو، عندي الصنف الجديد لوز اللوز وهيعمل معاك شغل عال العال.
- بكام دا.
- الحبة منه ب٥٠٠ بس ايه عنب.
- تمام عايزه.
- رفعت هات كيس للأستاذ.
_________________
= لازم أدخل عنده أحط الكاميرا دي، هروح ويكإني خدامة وإنت تروح تشتري منه عينة، تمام!
_ تمام ياحلو إنت.
= يارب الصبر.
" لبست لبس الخدامين المبهدل دا وأحمد لبس لبس السرسجية وعرفنا كل واحد هيقول ايه وهيعمل ايه وانطلقنا"
= استخبى، بعد ٧ دقايق بالظبط تدخل، وايه سلسلة الحمير دي! ههه.
_ هم السرسجية بيلبسوا كدا ههه، أول مرة تضحكي وبجد ضحكتك حلوة.
= طب يلا غور بقى عشان ننفذ الخطة، استخبى خلّص متّنحش.
___________________
= ألووو ألو ياباشي أنا في العمارة أهُوُّن وهنضفها حاضر.
- إنتِ مين يابت إنتِ.
= آني سعدية الشغالة ياباشي وجاية أنضف شقق العمارة كُلاتها.
- بس أنا مقولتش لحد يبعتلي شغالة، هتصل بصاحب العمارة.
= اااه قلبي هيوقف ياناس، هاتلي ياللي واقف شوية ماية، إهئ إهئ ياباشا أنا عندي القلب وعايزة القرش عشان أصرف على علاجي، هتقطع عيشي لييييه آآههه يامااا.
- خلاص خلاص، يلا نضفي واتكلي على الله.
= إيدك أبوسها ياباشي.
- لالا يالا ابدأي في الشغل.
= تحيا مصر ياباشي.
- تحيا مصر ايه إنتِ شايفاني ظابط! واليُعاذ بالله يعني!
= خلاص أني آسفة ياباشي، هروح أنضف اهو أنا آسفة آسفة.
- افتح بابني الباب دا.
- واحد باينله عايز حلو هههه.
- دخله جوا وأنا جاي أهو.
- تمام ياباشا.
_ سلاموز يا شبح، سمعت إنك منزل صنف جديد من اللي القلب بيحبه دا ههههههه.
- احنا أول مرة نشوفك.
_ ياسطا أنا كنت بشتري من عيل سيس والصنف بتاعهم مش ولابد وسمعت عنك جيتلك جري.
____________________
= أخيرًا حطيتها.
- حطيتي إيه يابت إنتِ.
= السجادة ياباشي، السجادة تقيلة أوي.
- طب يلا امشي وكملي بكرا عشان معايا ضيوف، يلااا.
= حاضر يا باشي حاضر.
" مشيت وأنا حاسة إني حلمي بيتحقق وهخلص المهمة دي وهترقى خلاص، روحت لقيت أحمد بيشم!!! "
= إنت بتعمل ايه يخرب بيتك.
_ ايه بعمل ايه، بشم بودررة.
= يامقرف يا حقير، هتصل باللواء وهقوله والله.
_ يابت دا سكر بودرة هههه أنا أشم العبط دا! ههه بس ايه رأيك في تمثيلي!
= كداب، وريني كدا، صدّق دا سكر هههه إنت واحد فظيع أساسًا.
بتقليد_ أنا خدامتك سعدية يا بااااشي هههه كنتِ فصيلة بجد هههه.
= هانت وحلمي يتحقق خلاص هههه ما إنت التاني بتقول ايه دا أنا بشتري من عيل سيس هههه.
" قعدنا نضحك سوا وأول مرة أضحك من بعد موت أمي، خلصنا ضحك وتريقة ودخلت كلت لإني كنت هموت من الجوع"
= بس بتطبخ حلو ياض يا أحمد.
_ موهبة بقى.
= نينيني، هاتلي أشرب طيب.
_ هاتي بوسة الأول.
= هأ.....
بلهفة_ خدي اشربي بسرعة هتموتي، شرقتي ولا ايه يا وردتي!
= ااااااه، إنت عبيط؟ إياك أسمعك بتقول العبط دا تاني فهمت!
_ فهمت يا وردتي.
= جتك القرف.
_ أنا مش بتكسف والله وممكن أعمل تصرف عسل أوي.
= زي ايه مثلا.
_ زي إني جوزك وكدا يعني ههه.
= احنا كاتبين على ورق ياحبيبي فلو فكرت مجرد تفكير في الهطل اللي بتتكلم فيه دا هكسر دماغك عشان متعرفش تفكر تاني.
_ طب ادخلي أوضتك بقى عشان مطلّعش عينك دلوقت، إنتِ زودتيها أوي أوي.
بحرقة= أنا بكرهك.
" دخلت الأوضة وقفلت على نفسي الباب وقعدت أعيط، ليه دا الوحيد اللي لما بهزقه بستحقر نفسي وأقرف من نفسي، ليه بقيت بخاف من عصبيته بعد ما كنت مابخافش من حد غير ربنا، ليه هو الوحيد اللي ضحكت معاه من قلبي، أنا بكرهه وهفضل أكرهه طول حياتي، بدأت أعيط عياط هيستيري بصوت عالي شوية"
_إســــراء، إســــراء، ياورد، افتحي متقلقنيش عليكِ، ياورد افتحي أنا آسف والله مش هزعلك تاني.
" لا حياة لمن تنادي، إســــراء فقدت وعيها تمامًا، جاب مفتاح احطياتي كان مخبيه معاه ودخل لقاها في حالة وحشة وسخنة أوي، زعل عليها جدًا لدرجة إنه بدأ يعيط من خوفه ليجرالها حاجة، قام جاب ماية متلجة وحط فيها نشا وجاب شراب أبيض قطن وبدأ يعملها كمدات ويشربها عصير في بؤها وكل شوية يقيس حرارتها وكإن روحه اللي بيواليها وخايف لتروح منه ليموت لإن الجسد بدون روح بيبقى ملوش أي لازمة"
ببكاء_ إســــراء أنا آسف والله مش هزعلك تاني، أنا آسف.
" أسبوع كامل بيعيط عليها وخايف عليها وبيسهر يعملها كمادات طول الليل، بينزل يجيبلها محاليل وكانيولا ولاوازم المحلول عشان تتغذى شوية لإنها نايمة أو تقريبا في غيبوبة مؤقتة، بيعملها محلول جلوكوز ويركب الكانيولا( كان شغال في صيدلية قبل ما يدخل الجامعة) وبدإت تفوق وهو نايم جمبها"
= أ.... أ... أحمد.
" قام فورًا أول ما سمع صوتها وكإن روحه رجعت لجسده من تاني"
_ إســــراء، الحمدلله يارب الحمدلله، ثواني أحضرلك أكل تاكلي.
" طبخ لحمة مسلوقة ولسان عصفور ورز أبيض"
_ قومي يا إســــراء، طبخت أكل خفيف على معدتك أهو
= هممم، أحمد أنا... أنا...
_شششش بحبك.
" هو عارف إن إســــراء مش لسة في وعيها فقرر يبوح بالكلمة اللي كانت واقفة في قلبه حتى لو مش في وعيها بس أهو قالها"
_ إســــراء قومي كُلي إنتِ بتنامي كل شوية ليه.
= دماغي..... بتوجعني أوي.
_ أنا آسف، آسف والله.
= هات آكل عشان هموت.
_ بعد الشر عليكِ، هأكلك أنا.
"كلت وشربت العلاج ويادوب بدأت أستوعب"
بصدمة= الوحش...
_ متشغليش بالك، أنا خلال الأسبوع دا عرفت كل حاجة عنه من خلال الكاميرا اللي حطيتيها، الشرطة جت خدت العصابة بتاعته كلها بعد ما اديتلهم عناوين كل واحد فيهم، المهم إنتِ دلوقت.
= أنا ايه! أنا نايمة أديلي أسبوع! بس إنت سكر والله، عملت كل دا لوحدك خلال أسبوع فإنت سكر خاالص وهات بوسة بقى.
بصدمة_ إنتِ في وعيك؟
= معرفش بس بحبك.
_ نامي يا إســــراء دلوقت، نامي.
"خرج من برا أوضتي وهو متوتر مني وأول مرة يسمع مني كلام من هذا القبيل وأنا أساسا مش وعيي خالص، نمت شوية وقومت ملقتوش، خدت شاور وسرحت شعري وصليت، لبست بدلة الظباط الواسعة بتاعتي وعليها الحجاب ولبست الهاف ومشيت على البيت بس قبل ما أروّح روحت المكتب"
= أستاذ أحمد فين يا علي.
- في مكتبه يا فندم.
_________________________
= شكرًا يا أستاذ أحمد على وقفتك جمبي.
_ شكر ايه بس دا واجبي يا فندم.
"زعلت إنه بقى يقولي يافندم بدل ورد أو إســــراء بس كتمت في قلبي ومبينتش حاجة"
= بس حضرتك مكنتش تسيبني نايمة في الشقة لوحدي وتمشي.
_ مينفعش أكون معاكِ لإننا اتطلقنا خلاص.
بقهرة= مقولتش يعني! على العموم شكرا، سلام.
" خرجت وركبت عربيتي وماشية على البيت"
ببكاء= لييه يارب، دا أنا حبيته وحبيت حنيته عليا، يارب هو مكتوب عليا الفراق لييه، حبيته وأول مرة أحب، حبيت اهتمامه بيا وخوفه عليا وكإنه عوّضني حنان أمي بس زي ما أمي مشيت هو أهو خلاص طلقني، كنت بحسب بيحبني زي ما بحبه بس أنا اللي دبش وأنا اللي لساني طويل معاه ومستاهلش شخص طيب زيه.
" وصلت البيت وطلعت أوضتي وانعزلت عن العالم الأناني كله"
_ آلو، السلام عليكم يا فندم ورد.
= وعليكم السلام.
_ اللواء كان هيعمل تكريم بكرا عشان انجازنا في القبض على الشبح.
= انجازك إنت، أنا معملتش حاجة يافندم.
_ إزاي دا، دي خطتك كلها أساسًا، إنتِ اللي خططتِ ورسمتي وحطيتي الكاميرة الصوتية وعملتي كل حاجة مش أنا، أرجو إنك تيجي عشان اللواء هيزعل جدا.
= أنا في هدنة وممكن تطول وتبقى للأبد وأنعزل الشغل يا فندم فمفيش داعي لكل دا.
_ هو أنا اتصلت بنمرة غلط ولا ايه؟ فين إســــراء اللي كان حياتها يعني شغل وشغل يعني حياتها! أنا مقدر تعبك النفسي والجسدي بس لازم تيجي بكرا، لازم.
= تمام يافندم، سلام.
"قفلت معاه وأنا قلبي بياكلني، قلبي اللي حب واحد وفي الآخر خذله، طب ليه اتعلقت بيه دا كله أكتر من أسبوع اللي اتجوزته فيه ألحق أتعلق بيه كدا!!  يارب خليك جمبي ومتسبنيش يارب، صحيت تاني يوم كعادتي المملة نزلت أوضة الچيم بتاعتي وفطرت وخدت دُش وشغلت العندليب وبدأت أفتكره وأفتكر ضحكه وطبخه وجماله وأبتسم، بدأت أجهز اللبس بتاعي، اللبس: فستان فضي وطرحته والهيلز وشنطة سواريه، استنيت إما العصر يأذن وصليته وبدأت ألبس، خلصت وحطيت روچ خفيف ومشيت بالعربية لمكان الحفلة"
- أهلًا يا ورد باشا، الحفلة نوّرت والله.
= بنورك يافندم، شكرًا لتقديرك يافندم.
بفرحة_ أهلًا يا ورد باشا، فرحت بشوفتك جدًا.
= أهلًا بيك يا فندم.
- عملتي مجهودات جليلة يا ورد باشا وتستحقي أكتر من كدا.
= العفو يافندم.
"خلصنا كلام رسميات وقعدت على كرسي قدام خالص ولقيت أحمد قاعد جمبي"
_هاي ههه.
= نعم يافندم؟
_ متيجي نفكنا من الرسميات ونرجع زوج وزوجة تاني.
= أفندم؟
بغمسة_إنتِ متعرفيش؟ دا احنا زوج وزوجة حقيقيين كمان.
بصدمة= متهزرش.
_ أهزر ليه ما إنتِ كنتِ في غيبوبة وإنتِ مراتي وكدا فخليت الجواز حقيقي هههه.
بقهرة= إنت سافل وحقير وهنتقم منك والله متخافش.
_ خوفت بجد بجد المرادي، بهزر معاكِ ياحبيبي، أنا راعيتك بس في الفترة دي وشوفت شعرك بس ههه.
= طب بس بقى عشان دمك بقى تقيل أوي.
_ حطي عليه شوية لبن وقلبيه وهيبقى خفيف وكويس على المعدة.
= هههههه.
_ يااا أخيرًا شوفت ضحكتك، وحشتيني.
بخجل= اسكت بقى، احنا متطلقين ومينفعش.
_ ومين قال، احنا لسة متجوزين يا وردتي وكنت بضحك عليكِ وإنتِ خدتي الكلام جد وروحتي ماشية بسرعة وخدتي هدنة إسبوعين.
بفرحة لا إرادية= بجد احنا لسة متجوزين!
_ أه أه أه، دا إنتِ فرحانة أوي بقى.
= أ... أ... أصل..
- سيداتي وسادتي، معاكم اللواء السيد إبراهيم، كنت حابب أشكر شخصيتين مهمين جدًا وممتازين في شغلهم جدًا وقدروا يعرفوا عصابة الوحش كلها وتم القبض عليهم، الشخصيتين هم إســــراء بدوي الشهيرة ب"ورد" وأحمد محمد، اتفضلوا على المسرح.
في ودن إســــراء_ أحمد محمد الشهير بالعاشق المجنون.
= طب يلا يا مجنون طلعني على المسرح عشان الهيلز هيزحلقني.
" طلعنا خدنا درع ونجمة وكنت فرحانة جدًا وأحمد فرحان ومبسوط، جيت أنزل من على المسرح اتكعبلت وراح أحمد شدني لحضنه بسرعة، فضلت في حضنه دقيقتين، سامعة صوت قلوبنا احنا الاتنين، الكل عمال يسقف وأنا هموت من الكسوف وأنا في حضنه كدا، أحمد بعدني عنه وراح ماسك ايدي وخلاني وقفة جمبه"
_ كنت حابب أشكر حد كدا كان سبب في إني أركز على شغلي أكتر وأحبه كمان عن ما كنت بحبه، كنت عايز أقوله إني بحبه لدرجة مقدرش أوصفها، بحبه ومتعلق بيه وقلبي بينبض باسمه، حبيب امبارح وحبيب دلوقتي ولآخر وقتي، أنا عايز أعترفله بحبي وإن قلبي مدقش ولا هيدق لحد غيره، عايز الشخص دا يقدر حبي ليه ولو لمرة ويحبني زي ما بحبه، حابب الشخص دا يخلي حياتي ورد زي ماهو اسمه ورد، أنا بحبك يا ورد.
" لأول مرة دموعي تبان لحد، لأول مرة أعيط من فرحتي، لأول مرة أحس إني بحلم، اتوترت ومسحت دموعي وابتسمت"
= وأنا كمان بحبك يا أحمد.
" صفير وفرحة وتسقيف وسيادة اللواء فرحان لينا وبابا وكل الناس فرحانة وهو خدني في حضنه وبقى يلف بيا من كتر فرحته بيا، الحفلة خلصت وكله روّح وأنا عايزة أروّح"
_ بتحبيني بجد يا إســــراء؟
= ياعم بحبك من ساعة ما كنا في القطر بس مكنتش عارفة هل دا حب ولا ايه! بس بحبك أوي والله وبحب رجولتك وجدعنتك وحنيتك وطيبتك واهتمامك وضحكتك وعيونك وكل حاجة فيك بحبها، إنت جوزي ياحمد جوووزي.
بغمزة_ ياولا، طب متيجي!.
بخجل= أوعى بقى عايزة أروّح.
_ اتغيرتي يا إســــراء أوي وبقيتي أنثى هههه.
= فعلا هههه، كله بسببك يا ميدو، سلام بقى.
_ تعالي أوصلك بعربيتي طيب عشان أنا فسكت الكاوتش بتاعك ههه.
= غلس والله.
_ غلس بس بحبك يابت.
= ياارب الطف بيا بقى.
_ هههه، هيلطف إزاي وفرحنا بكرا!!
بصدمة= ايه؟
بفرحة_ ايه!
"تمسك بقلبي فإنه يحبك♥"
بقلم/إســــراء بدوي|وَرد.